Mark 10 - Nakaran ut te Jesu Kristo 1902

¹ An neterermig iken ka neterua le nepag nemri ten Judia mene le televinpen le Jordan, an nahuto min netakarhwafugen mun ton; an neterametikun mun ilar, nar ramol ena le nian min.

² An Farisi min netakarua ton mameihrapuk ton mama rematu to ieremim terhaliatou nuain wa kapa? Netakamarofenofen kam in.

³ An neteraram meni to ilar, Moses rameni neta to kamiar?

⁴ An netakani, Moses rameghanin moma tukrai nawowa te hnaliatouan an khaliatou.

⁵ Mero Iesu netereni to ilar, Mero in ka le nekimiar remiakis remrai nawowa uk to kamiar.

⁶ Mero le nerwowunan nar Ramol ilau ieruman mene beravin.

⁷ Le nar uk ieremim terapas remin mene inen, mapuit le nuain.

⁸ An iau kapiaol nubalakin karena; moma resolan moma ilau kiu mun, mero nubalakin karena.

⁹ Mero in ka nar Wuhgin reknelisafugen ilau, pas ieremim resepapraian.

¹⁰ An imwa tan ieremim min netakaihrapuk mun ton to nar uk.

¹¹ An netereni to ilar Ierem terefhaliatou nuain mir mun ierapusen terepol tehwaga tat lan.

¹² An beravin takama terhaliatou nemirin merik mun to ierapusen, terepol tehwaga tat lan.

¹³ An netakales kova min marua ton mama teriap ilar; an tan ieremim min netakainhiau ilar.

¹⁴ Mero Iesu neterahm an nekin ramahma, an netereni to ilar, Arpas Kova min karua tonio; meseinhiauan ilar; mero in ka niko te Wuhgin taha neremim kama ilar.

¹⁵ Nuparhien tiakani to kamiar, ierem resosan niko te Wuhgin rolkoma kova terepesuenan lan.

¹⁶ An neteremak in ilar mamakar vi kam ilar mamehlaupen nelimin le ilar.

¹⁷ An neterier le suatu an wus ker neteraietkin mua ton, merenum noulin ton, namehrapuk ton, Ietikun ut, neta tiapol moma tiakos nemihwan lilen?

¹⁸ An Iesu netereni ton, Retol nakani moma to iakavit? Resolan moma ieremim ker ravit mero in am karena, Wuhgin.

¹⁹ Nekhinatin nowa min, Teneshoatil, tenesolan tehwaga tat le beravin wa ieruman, tenesakihlean, teneseiwean, teneseuhiatinan til le nar, teneksiai remam mene inam.

²⁰ An ntereni ton, Ietikun, naremnar min un iemamesuas mamol petum.

²¹ An Iesu neterahmena in neterolkeikei in, an netereni ton, Nar ker rika tonik, uan maurai etahun nauta taham mofen kam nerem nauta tenilar rika, an tenepos nauta le neai, an ua maroupa io.

²² An neteramait tat to nakaran ka, neteruan nekin mamtat ton, mero in kar ierem nauta tahan ramibor.

²³ An Iesu neteramahm ena netereni to tan ieremim min, Riakisipuk to nerem le nauta asul takaruan le niko taha Wuhgin.

²⁴ An tan ieremim min netakamaisak to nakaran tahan. Mero Iesu netararam mun meni to ilar, Takowusuas min, riakisipuk to nerem kamaiteta le nauta asul mama takaruan le niko te Wuhgin.

²⁵ Remeruk to kamel moma teraulu le nepag nidel, mero riakis to ierem le nauta asul moma teruan le niko te Wuhgin.

²⁶ An nanumun ilar neterakamuka aken, netakani ton, An pehe tapos miuh?

²⁷ Iesu neterahmena ilar netereni, Riakis to neremim, mero resolan riakis to Wuhgin, Mero in ka naremnar min remeruk to Wuhgin.

²⁸ Piter netererwowun mameni ton, Ahm ru kamar iemaipas etahun naremnar mairoupena ik.

²⁹ Iesu netereni, Nuparhien tiakani to kamiar, resolan moma ieremim ker ramapas nimwa tahan, wa pian min, wa noinen min, wa inen, wa remin, was nowasuas min, wa ten, tonio mene to nakaran ut,

³⁰ Mero terepos asul mau 100 towe mene le nian uk, nimwa min, mene pian min, mene noinen min, mene inen, mene nowasuas min, mene ten, mene nahmean min, mene le ten terepua nemihwan lilen.

³¹ Mero nerem kamaiupan rapus tepaiuatisig; an nerem kamaiuatisig tepaiupan.

³² An netakamaivan le suatu mamaruan Jerusalem; an Iesu neteramaupan in ilar; an nanumun ilar neterakamuka, an nerem kamairoupen netakamarigen. An neteros mun nerem katilum katilum mekiu, netererwowun mameni to ilar nar tapol lan, moma,

³³ Aihm ru, kenamaruan Jerusalem, an Neri Ieremim tepauraipen kam neremera le nuhwasigenan mene nerem kamatikun, an teparhwaprai nemisan ton, an teparofen in kam Jentail;

³⁴ An tepaiusan lan, an tepaigh lan, an tepahro in, an teparhwapnin, an nian kisil terua muan terepermig mun.

³⁵ An Jems mene Jon, neri Sebedi mil, netikiava ton, mamuani ton, Ietikun, iakiaolkeikei muoma tenakol kam kamlau nar tiakuarhapkinpena tonik.

³⁶ An netereni to ilau, Neta nakiaolkeikei muoma tiakol kam kamilau?

³⁷ An netukuani ton, Ofa kam kamlau muoma iakuowata ker le nelimam matu mene ker le nelimam mul le nevitan taham.

³⁸ Mero Iesu netereni to ilau, Nekuatiktik am nar nekuahrapkinpa; nukuasanen muoma tenukuamnum le nevigenar ierem io iakamamnum lan? wa muoma tenekiaos nebaptisoan ierem io iakamos?

³⁹ An netukuani ton, Iakuasanen. An Iesu netereni to ilau, Tenukuamnum le nevigenar ierem to iakamamnum lan; an tenepiaos nebaptisoan ierem io iakamos.

⁴⁰ Mero nowatean le nelimok matu wa mul resolan moma tahak to nofenan; mero taha nerem kenolita to ilar.

⁴¹ An nerem katilum katilum netakairou netakarwowun mamaimakin Jems mene Jon.

⁴² An Iesu neteraunin ilar ton mameni to ilar, Nakarhinatin mama nerem kama kairemera le Jentail kamairemera aken le ilar; an nerem asul tenilar kamani nowa to ilar.

⁴³ Mero resolan mok lan le kamiar; mero ierem terama teribor le nekimiar terepol atkokun nar to kamiar.

⁴⁴ An ierem terama teraupan le kamiar terepol atkokun nar to kamiar min.

⁴⁵ Mero in ka nuparhien Neri Ieremim remesuean moma takol atkokun nar ton mero moma terol atkokun nar, an moma terofen nemihwan tahan nemri neremim rapus.

⁴⁶ An netakarua Jeriko, an rakamier le Jeriko ilar tan ieremim min mene nahuto ribor, an neri Timias, Bartimias, iemnou ierem rametamap, ramowata le nikali suatu.

⁴⁷ An netererou moma Iesu le Nasareth, netererwowun mamasak apahm mameni, Iesu Neri Devid, asak in io.

⁴⁸ An nevin netakameinhiau in mama terapas nasakan. Mero neteramasak apahm puk aken, Neri Devid, Asak in io.

⁴⁹ An Iesu neterail mameni, Aiunpen in. An netakaiunin iemnou mamani ton, Agien, mermig, ramaunin ik.

⁵⁰ An neterelakin kalkauh tahan, neterariperip mermig mua to Iesu.

⁵¹ An Iesu neteraram ton mameni, Neta nakolkeikei moma tiakol kam ik? An iemnou netereni ton, Raboni, moma tiakahm nar.

⁵² An Iesu netereni ton, Akavan, nuparhienan taham reknol ut ik. An ihwe am neterahm mun nar. An neterameroupen in le suatu.