टिटस 3 - लोहोरुङ्काम्नुऎ योम्पक् मुमॆ 1 टुङ्घङ्पाचि नुङ् खोम् खुक्माबिहा टुङ्घङ्पाचिम् ढुप्पाट्ट हङ्सि पेनानॆ हाङ् लोमिम्पा खेमाम्नॆ कामानुङ् निवाँयुङ् लॆखुबाचि लोढाङ्साम्चिनॆ। हाङ् चोब्न काम्नुहा योम्पक् मुसि परक्ढाङ्मिर। 2 खोचिऎ आसास काइर आलोसाम्नॆ हाङ् आखिसानॆ लोसॆचॆ। टर याॽमिचि नुःर लॆसे चोब्नचिनुङ् हेर टङ्चाखुबा लिमा लॆःॽमि। 3 कानि सङ्क याॽलि निवाँ मॆड्डिङ्मा, लोमिम्पा आखेम्खुबा हाङ् हुन्न पिन्टिखुबा लॆटि। हाङ् काइसॆ खानावाँबि निवाँ टिखुबा हाङ् चाटिॽमॆ डुङ्टिॽमॆ योम्पक्बिॽन पाइयुक्सि। कानि कानिम् हिङ्खामा सिरि नुङ् याॽमिचिम् खानावाँ चेन्से पेन्युक्सि। हाङ् याॽमिचिऎ कानि सिच्चायुक्सि हाङ् कानिऎ सङ्क खोचि सिच्चोयुक्सामि। 4 टर कानिम् फाक्खुबा निवाँहाङ्मि नाम्नावाँ हाङ् खोसॆ याॽमिचि नाम्नाम् पिसिम्पा खानावाँ खाङ्मुसा। 5 हाङ् खोसॆ कानि हिङ्पक्मिट्टि। टर कानिऎ निवाँनेन् योम्पक् मुमिम्पासॆ ग हॆॽनॆ, टर खोम् नाम्नावाँ रक्न खोसॆ कानि होइखेपा सङ्क उम्चङ् जान्म लिमिॽमाम् लागि सःगि। हाङ् सॆङ्सॆङॆ लावाबाङ् उम्चङ् हिङ्खामा पिडि। 6 निवाँहाङ्ऎ म सॆङ्सॆङॆ लावा कानि फाक्खुबा पारभु येसु खिरिस्टबाङ् खेःॽलढारि कानि सक्पि बोबु। 7 गरहाङ् कानि खोम् नाम्नावाँऎ निवाँनेन् याॽमि लिसि, हाङ् कानिऎ हुङ्मिम्पा हानाम्स आसिखॆॽमॆ हिङ्खामामि सङ्क ढुप्पाट्ट टक्चाइर। 8 ग खानावाँ चाइबान। कॆ आना गरक्मा खानावाँ चिनॆचॆ मिनुॽङा, निवाँहाङ्बि निवाँयुङ् लॆखुबा चोप्पसॆ नुऎ योम्पक् यिक्माम् लागि नुःर निवाँ टिसाम्नॆ कामानुङ् आनॆ हेर चिनॆचॆ। गरक्मा काम्नुहा योम्पक् मुमा होइढा याॽमिचिम् लागि मुबाक्मॆ नुङ् नुऎ योम्पक् लि। 9 टर हुन्नहा खानावाँ, टुबालाबाचिम् टक्भॆहा टक्भॆहा खानावाँ हाङ् यायेॽमामि बारेबिऎ याटक्माटक् नुङ् खिमाटुमाबाङ् मिउन पेनॆ। आक्खा खानावाँ इमाहाङ् माङ्स नुऎ योम्पक् लिनि। 10 याॽमिचिम् लुम्पि फाक्बक्मॆ खानावाँ लाबक्खुबानुङ् एक्क हिच्चि खेपा गर आलॆटॆ कामानुङ् नुःर लोसॆ। मबाङ्स आक्र लॆःॽमा मायाइटु हाङ्ग खो माखाङ्रे याइमॆ। 11 गरक्मा याॽमि काइसॆ निवाँऎ चेप्खॆॽमिम्पा हाङ् हिङ्वा लि कामानुङ् आनॆ लेकुनान। खो टाङ्पान आब्डिक् नुङ्मा लि। डॆङ्पिऎ खानावाँ 12 कॆ आरटिमास आठावा टुखिखास आनाबि पाङ्हाङ्मा अक्सि, आना चाइ काङा चुब्सि निकापोलिसबि टाऎ। मान्ठाभनॆ कॆ आक्क ठालब्न चुङ् भोरि पेन्मॆ निवाँ मुडुङ। 13 आपोल्लोस हाङ् यायेॽमा लेखुबा जेनस उम्चि लाम्फुबि हेर मुबाक्कॆचॆ। हाङ् उम्चि लागि पाबुहा ठका सङ्क खाङॆ। 14 कानिम् याॽमिचि मरक्न ऎफुचाढाङ्मिर। टर काम्नुऎ योम्पक् यिक्ढाङ्मिर, हाङ् पाबुहा ठका खोम्हिसुचिर। हाङ् खोचि योम्पक् पिक्खुबा याॽमिचि लिमिर। 15 गुबि कानुङ् चुक्मिहा चोप्पसॆ आना स्यामुकिङ्कायो काडामि। आक्कुबि काङ्का नाम्नाम् पिसिखुबाचि काङ्कॆ सङ्क स्यामुक्चिम्। निवाँहाङ्मि नाम्नावाँ आन्ना चोब्ननुङ् लिर। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.