रोमि 4 - लोहोरुङ्अबराहाममि निवाँयुङ् 1 ह कानिऎ कानिम् पाप्पाटुबा आबाराहामऎ निवाँहाङ्मि ङारिङ्पि निवाँनेन् याॽमि लिमॆ बारेबि माङ् खानावाँ चिनुवॆ कामानुङ् खाङुम्यॆ। 2 आबाराहाम खोम् काम्नुऎ योम्पक्बाङ् निवाँहाङ्मि ङारिङ्पि निवाँनेन् याॽमि लिसा ग, खोम् निवाँबि काङानङाये मिन्खुबा लॆटा। टर आक्रहाङ् निवाँहाङ्मि ङारिङ्पि काङानङाये मिन्मॆ खोम् माङ्स खानावाँ माआ। 3 मान्ठाभनॆ निवाँनेन साब्चिराबि आबाराहाममि बारेबि गरहाङ् साब्डा, “खोसॆ निवाँहाङ्बि निवाँयुङ् लॆटु हाङ् निवाँहाङ्ऎ खो निवाँनेन् याॽमि मुःसु।” 4 हाङ् एक्क याॽमिऎ योम्पक् मुकु हाङ् कानिऎ खो नाम्याक्पि हाङ्ग, कानिऎ आक्क बारडाना टक्चामिम्पा खानावाँ लोहिनि। टर खोम् योम्पक्ऎ डुब्मिम्पा नाम्याक काकि। 5 टर एक्क याॽमिऎ खोम् योम्पक्बि हॆॽनॆ हिङ्वा यङ्निमा हेखुबा निवाँहाङ्बि निवाँयुङ् लॆकु हाङ्ग, आक्क याॽमि निवाँहाङ्ऎ खोम् ङारिङ्पि निवाँनेन् याॽमि लोकु। 6 ग खानावाँन डिरिक् निङ् याॽल डाउड हाङ्ऎ सङ्क याॽमि खोम् माङ्स योम्पक् मॆड्डिङ्न निवाँहाङ्ऎ खोम् ङारिङ्पि निवाँनेन् लोकु हाङ्ग, आक्क याॽमि आसिका टक्चामिम्पा याॽमि लोडु। खोसॆ गरहाङ् लोडु, 7 “निवाँहाङ्बाङ् टाङ्पामि काइसॆ यङ्निमा टक्चामिम्पाचि हाङ् खोसॆ उम्चि हिङ्वा सःक्पिॽमिम्पा याॽमिचि आसिका टक्चामिम्पाचि यो। 8 हाङ् पारभु निवाँहाङ्ऎ हिङ्वा आङ्पिखुबा याॽमि आसिका टक्चामिम्पा यो।” 9 एक्क खानावाँ, माल् ग डाउड हाङ्ऎ लोमिम्पा आसिका खाट्ना लॆःॽमिम्पा याहुडिचिमि लागि टेःॽन हॆटा? आक्र हॆॽनॆ, ग आसिका ग खाट्ना मालिमिम्पा हॆॽनिबारेक्चिम् लागि सङ्क यो। हाङ् निवाँहाङ् आबाराहामऎ निवाँयुङ् लॆटु हाङ् आक्क खोम् निवाँयुङ्बाङ्न निवाँहाङ्ऎ आबाराहाम निवाँनेन् याॽमि लोसु कामानुङ् काङ्कॆ याॽलिऎबाङ्न लोमॆ पाइकुङ्का। 10 टर निवाँहाङ्मि ङारिङ्पि आबाराहाम निवाँनेन् लिमॆ योम्पक् खाट्ना लिमाबाङ् याॽलि लिसॆ रु डॆङ्पि लिसॆ टा? चाइबान खो खाट्ना लिमाबाङ् याॽलन निवाँनेन् लिमिम्पा लॆटा। 11 आबाराहाममि खाटाना ग डॆङ्पि म लिमिम्पा लॆटा। खोमि खाट्ना लिमाबाङ् याॽलिन निवाँहाङ्बि निवाँयुङ् लॆःॽमानुङ् खो निवाँन्न याॽमि लिमिम्पा लॆटा लोमॆ खानावाँमि चिन्नामि लागि खो खाट्ना लिमिम्पा लॆटा। गरहाङ् आबाराहाम चाइ निवाँयुङ् लॆखुबा हाङ् खाट्ना मालिमिम्पा चोब्न याॽमिचिमि लावाबिऎ आपा लिसा। खाट्ना मालिमिम्पा हाङ्स गरहा याॽमिचि निवाँहाङ्ऎ उम्चि निवाँयुङ्बाङ् निवाँनेन् लोकुचि। 12 आबाराहाम खाट्ना लॆःॽमिम्पा चोब्न याॽमिचिमि सङ्क लावाबिऎ आपा लिसा। टर खोचिमि लागि खाट्नाऎ टेःॽन योम्पक् यिगुनि। मसॆ खाट्ना लिमाबाङ् याॽल आबाराहामनुङ् मान्टक्मा निवाँयुङ् चुआ, आक्क खोचिबि सङ्क लिमा लॆटॆ। निवाँहाङ्मि चुप्लाङ् निवाँयुङ्बाङ् टा 13 आबाराहामऎ यायेॽमाऎ लोमिम्पा खेम्मिम्पासॆ निवाँहाङ्ऎ खो नुङ् खोम् पासाचिऎ बाखाटेम् सक्पि ढुप्पाट्ट टक्चाकुचि कामानुङ् चुप्लाङ् युङ्मिम्पा हॆॽनॆ, टर निवाँहाङ्ऎ आबाराहामनुङ् चुप्लाङ् ठुॽमिम्पासॆ खोसॆ निवाँहाङ् सक्पि निवाँयुङ् लॆटु हाङ् निवाँहाङ्ऎ खो एक्क निवाँनेन् याॽमि मुसु। 14 मोसामि यायेॽमा टिङ्खुबाचिऎ टे निवाँहाङ्मि चुप्लाङ् टक्चाकुचि हाङ्ग, कानिऎ निवाँहाङ् सक्पि लॆःॽमिम्पा निवाँयुङ् हुन्नऎ लि। हाङ् निवाँहाङ्मि चुप्लाङ्ऎ सङ्क माङ्स योम्पक् आयिक्खुबा लॆटा। 15 मान्ठाभनॆ यायेॽमाऎ याॽमिचि सक्पि निवाँहाङ्मि सिरि लाटॆकु, टर यायेॽमान माचुग कानिऎ आक्क टिङ्मा सङ्क आपाब्खुबा लॆटा। 16 मसॆ हाम्पॆ याॽमिचिऎ निवाँहाङ्बि निवाँयुङ् लॆकुचि खोचिऎ टेःॽन निवाँहाङ्मि चुप्लाङ् टक्चाकुचि। हाङ् आक्क चुप्लाङ् निवाँहाङ्ऎ मरक्न पिडि हाङ् ग खानावाँ आबाराहाममि चोब्न पिसाचि पिकानि कामानुङ् लोडु। हाङ् आक्क चुप्लाङ् यायेॽमा टिङ्खुबाचिमि लागि टे हॆॽनॆ, टर आबाराहामऎ रक्न निवाँयुङ लॆखुबाचिमि सङ्क रेम मान्ठाभनॆ खो कानि चोब्नमि टुबालाबा रेम। 17 मान्ठाभनॆ निवाँनेन साब्चिराबि गरहाङ् साब्डा, “काङॆ आना डिरिक् जाटिचिम् आपा मुडाना।” आबाराहामऎ निवाँहाङ्बि निवाँयुङ् लॆटु हाङ् खो निवाँहाङ्मि ङारिङ्पि कानि चोब्नमि आपा लिसा। हाङ् निवाँहाङ्ऎ सिखॆॽमिम्पाचि हिङ्पक्मिहिकुचि हाङ् मानमाहा खानावाँ याबाङ् यामुसे मुबक्हिकु। 18-19 हाङ् निवाँहाङ्ऎ गर कामानुङ् आबाराहामनुङ् चुप्लाङ् ठुबु, “आनामि डिरिक् पासाचि लिःक्मि।” टर आबाराहामऎ टाङ्पा एकग् निङ्र याक्खॆॽमिम्पा पासिङ् मिॽलाउ। हाङ् खोम् खिम्टाङ्मा सारा सङ्क मासिङ्मा पिक्खॆॽमिम्पा लॆटा। गर मिॽलामार आबाराहाममि लागि डिरिक् जाटिचिमि आपा लिमॆ लाम्फुन मॆचु। मरहाङ्स खोसॆ निवाँयुङ् लॆःॽमा मान्याइटु हाङ् निवाँयुङ् लॆःसॆ खो लॆःॽढाङ्मानुङ् निवाँ मान्सेरु हाङ् खो डिरिक् जाटिमि आपा लिसा। 20 आबाराहामऎ हानाम्स निवाँहाङ्मि चुप्लाङ् लिऎ रु लिनॆ कामानुङ् मामिन्। बोरु खोम् निवाँयुङ् चॆकुवॆ लिसे खारा। मसॆॽन खोसॆ निवाँहाङ् निङ्लावा पिट्टु। 21 चुप्लाङ् हिःॽमिम्पा खानावाँ चाइबान पिकि लोमॆ आबाराहामऎ मिनु। 22 मसॆॽन आबाराहाममि निवाँयुङ्बाङ् निवाँहाङ्ऎ खोम् ङारिङ्पि आबाराहाम निवाँनेन याॽमि लोसु। 23 हाङ् निवाँहाङ्ऎ आबाराहाम निवाँनेन् मुसु कामानुङ् साब्मिम्पा खानावाँ आबाराहाममि लागि टे हॆॽनॆ, 24 टर कानिम लागि स यो। कानि आसॆ चाइ येसु कानिमि पारभु सिखॆम्पाबाङ् हिङ्पॽमिक्खुबा निवाँहाङ्बि निवाँयुङ् लॆकि, खोसॆ कानि सङ्क निवाँनेन लोकि। 25 येसु कानिम् हिङ्वामि लागि सिखॆमिट्टा हाङ् कानि निवाँनेन लिमिॽमाम् लागि खो निवाँहाङ्ऎ हिङ्पपिट्टि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.