रोमि 2 - लोहोरुङ्निवाँहाङ्मि न्यायॆ 1 ओ लाङ्काम्, आनॆ आक्रहा काइसा याॽमिचि आब्डिक टिमा हेकुना, टर ग खानावाँबि आनॆ निवाँहाङ् पिॽमॆ माङ्स जुवापा माआ। आनॆ होइढाचि हिङ्वा नुङ्मा लॆःॽमि हाङ् डान्डा टक्चामा लॆःॽमि कामानुङ् आब्डिक् टिकुनार, आनॆ टाङ्पॆ टाङ्पान आब्डिक् टिकुना मान्ठाभनॆ आना सङ्क खोचि रक्न लॆःक्ना। 2 हाङ् आक्रक्मा योम्पक् मुखुबा याॽमिचि निवाँहाङ्ऎ चाइबानऎ खानावाँ आनुसारा न्यायॆ लॆकुचि कामानुङ् काङ्कॆ लेकुङ्का। 3 ओ लाङ्काम्, आनॆ आक्रहा योम्पक् यिक्खुबा याॽमिचि आब्डिक् टिकुचिना, टर टाङ्पा सङ्क खोचि रक्न लॆःॽना हाङ् आना चाइ मान्टक्ल निवाँहाङ्मि न्यायबि सिॽङानि मिन्नॆ? 4 ओ लाङ्काम्, आनॆ निवाँहाङ्ऎ हेर पिॽमिम्पा नाम्नावाँ, आङ्मिम्पा खानावाँ हाङ् हुङ्मिम्पा खानावाँ माङ्स हॆॽनॆ आमिनॆ। निवाँहाङ्ऎ आना आनामि हिङ्वाबाङ् ऎम्पक्मिॽमामि लागि खोम् नाम्नावाँ आना सक्पि सिडा लोमॆ खानावाँ आनॆ वाप्मा लॆ। 5 टर आनामि निवाँ छाक्कॆ लिडा हाङ् आना आनामि हिङ्वा याइमा मिट्टुनानि। मसॆ निवाँहाङ्मि सिरि चोब्न याॽमिचि सक्पि टाऎ डिना आनॆ एट्टान किॽमालुऎ डान्डा टक्चामॆ योम्पक् आनॆॽन यिक्मॆ पाइकुना। आक्क डिना चोब्न याॽमिचिमि निवाँहाङ्ऎ लॆकुवॆ खोम् निवाँनेन् न्याये लॆकुचि। 6 निवाँहाङ्ऎ चोब्न याॽमिचि उम्चि योम्पक् रक्न नाम्याक् पिकुचि। 7 हाङ् हाम्पॆ याॽमिचिऎ चाइ निवाँहाङ्मि निङ्लावा, निङ् हाङ् हिङ्खामा टक्चामामि लागि नुऎ योम्पक् यिक्ढाङ्मि, निवाँहाङ्ऎ खोचि हानाम्स लुक्खॆॽनॆ हिङ्खामा पिकुचि। 8 टर आसॆ चाइ टाङ्पाम्टे काम्नुःर लिर मिनुकु हाङ् चाइबानऎ निवाँहाङ्मि खानावाँ याइकु हाङ् काइसॆ योम्पक् यिगुक, आक्खाचि चाइ निवाँहाङ्ऎ एट्टान किॽमालुऎ डान्डा पिकुचि। 9 हाङ् निवाँहाङ्ऎ काइसॆ योम्पक् यिक्खुबा चोब्न याॽमि डुखा नुङ् खोप्चिनावाँ खोप्टिखॆमिकु। आक्क खानावाँ याॽलि याहुडिचिऎ हाङ् आक्क डॆङ्पि हॆॽनिबारेक्चिऎ आङ्मा सिःॽमि। 10 टर नुऎ योम्पक् यिक्खुबॆ निवाँहाङ्बाङ् निङ्लावा, निङ् हाङ् सान्टि टक्चाकुचि। ग योम्पक् चाइ याॽलि याहुडिचिमि लागि लि आक्क डॆङ्पि हॆॽनिबारेक्चिम् लागि लि। 11 मान्ठाभनॆ निवाँहाङ्ऎ आसास सिःग्माबाग्मा लॆटिनि। 12 मोसामि यायेॽमा मॆड्डिङ् हिङ्वा योम्पक् यिक्खुबा हॆॽनिबारेक्चि यायेॽमा मॆड्डिङ्न नासॆलिःक्मि। यायेॽमा टिङ्मानुङ् हिङ्वा योम्पक् यिक्खुबाचि निवाँहाङ्ऎ यायेॽमा रक्न न्याये लॆकुचि। 13 मान्ठाभनॆ निवाँहाङ्मि यायेॽमा खेटेखेम्खुबाचि निवाँहाङ्मि ङारिङ्पि नुहा याॽमिचि लिमिनि, टर यायेॽमाऎ लोमिम्पा रक्न पाइखुबाचि चाइ खोम् ङारिङ्पि नुहा याॽमि लिःक्मि। 14 मान्ठाभनॆ हॆॽनिबारेक्चि नुङ् मोसामि यायेॽमा माआ। टर खोचिऎ उम्चि निवाँऎन यायेॽमाबि चुहा खानावाँऎ लोमिम्पा खेमुकुचि हाङ्ग, खोचिमि लागि खोचिन टाङ्पामि लागि यायेॽमा रेम। 15 खोचिमि योम्पक्ऎन खोचिमि निवाँबि यायेॽमा साब्डा लोमॆ खानावाँ खाङ्मुकु। उम्चि निवाँऎन ग खानावाँ चाइबानऎ लोमॆ खाङ्मुकु मान्ठाभनॆ खोचि उम्चि निवाँऎ ग योम्पक् नुऎ लॆटा हाङ् ग योम्पक् काइसॆ लॆटा लोकुचिमि। 16 ग योम्पक् आक्रल लि निवाँहाङ्ऎ इॽया चोब्न याॽमिचिमि निवाँ हङ्सिहा खानावाँमि न्यायॆ खिरिस्ट येसु लॆःॽमिकु। काङॆ इकुङॆ नुऎ खानावाँ सङ्क गन। याहुडिचि नुङ् यायॆॽमा 17 आना टाङ्पॆ याहुडिङाये मिनुक्ना, मोसामि यायेॽमा टिङुकुना हाङ् निवाँहाङ्बि नाबुक् ठॆँठॆँ लॆःक्ना। 18 आन्नॆ यायेॽमा पाढालॆमिम्पासॆ, चिन्डानॆसॆ, आनॆ हाम्पॆ खानावाँ चाइ निवाँहाङ्मि निवाँ आनुसाराऎ लॆऎ हाङ् चाइबानऎ लॆऎ कामानुङ् लेकुना। 19 निवाँहाङ्मि बारेबि माङ्स आलेक्खुबाचिम् मिक् ओबक्पिक्खुबा हाङ् माॽयाक्टबि लाम्ढुखुबाचि ओप्लिङ्बि टॆःॽमामि लागि निवाँनेन् खानावाँ चिन्खुबाङा मिनुक्ना। 20 आन्ना गर काकानि, निवाँहाङ्मि यायेॽमाबि चुहा चोब्न नुऎ नुङ् चाइबानऎ खानावाँ आनानुङ् लिमिम्पासॆ, आनॆ चाइ टाङ्पा निवाँहाङ्मि खानावाँमि बारेबि निवाँ माआमिहाचि हाङ् पिसाचिरहा खानावाँ ऎवाप्खुबाचि चिन्खुबाङा मिनुकानि। 21 मान्टक्ल आनॆ होइढा याॽमिचि चाइ चिनुकुचिना, टर टाङ्पॆ चाइ माङ्स खानावाँ चिन्नानॆ? माल् आनॆ होइढा याॽमिचि चाइ खुमा फॆन्नि कामानुङ् चिन्खुबा टाङ्पा चाइ खुसुबाङ् लिक्नॆ? 22 हाङ् आनान ब्याबिचारा लॆःॽमॆ हिङ्वा योम्पक् यिक्मा फॆन्नि कामानुङ् काखुबा, टर आनान आक्क योम्पक् यिक्खुबा लिःक्नॆ? आन्नॆ हुन्नाहा डेउटाचि सिच्चोकाम्नि, टर हॆॽनिबारेक्चिम् निवाँहाङ्मि खिम्बाङ् मान्ठा खुकानिहा? 23 आना काङॆ मोसामि यायेॽमा लेकुङ् कामानुङ् नाबुक ठेरुक्ना, टर आक्क यायेॽमाऎ लोमिम्पा खानावाँ चेन्से आनॆ निवाँहाङ् सिच्चोकुना। 24 निवाँनेन् साब्चिराबि गरहाङ् साब्डा, “हॆॽनिबारेक्चिऎ आन्ना याहुडिचिमि योम्पक् खाङ्मिम्पासॆॽन निवाँहाङ्मि निङ् इचामॆ पाइकुचि।” 25 मान्ठाभनॆ आनॆ यायेॽमा टिङुकुना हाङ्टेःॽन खाट्नाऎ योम्पक् यिगुकु। टर यायेॽमाऎ लोसिन्टक्न पाइनानि हाङ्ग, आना खाट्ना मालिमिम्पा आक्खा हॆॽनि बारेक् याॽमिचि रक्मान यो। 26 मसॆ खाट्ना मालिमिम्पा एक्क हॆॽनि बारेक् याॽमि यायेॽमाऎ लोमिम्पा रक्न योम्पक् यिगुक् हाङ्ग, निवाँहाङ्ऎ आक्क याॽमि खाट्ना लिमिम्पा एक्क याॽमिर खाङुकु। 27 हाङ् आना याहुडि नुङ् साप्मिम्पा मोसामि यायेॽमा चु हाङ् आनामि खाट्ना सङ्क लिडा। मरहाङ्स आना यायेॽमाऎ लोसिन्ट पाइनानि। मसॆ खाट्ना मालिमिम्पा यायेॽमा रक्न पाइखुबा हॆॽनिबारेक्चिऎ आना याहुडि सक्पि आब्डिक् टिःक्मि। 28 मान्ठाभनॆ खाङ्मार टे याहुडिर खाङ्मुमॆसॆ हाङ् सालुङ्मि बाहिरा पोट्टि खाट्नामि चालाना टिङ्मिम्पासॆ एक्क याॽमि निवाँहाङ्मि चाइबानऎ याहुडि लिनि। 29 चाइबानऎ याहुडि लिमामि लागि ग निवाँ हङ्सिॽयुबाङ् निवाँहाङ्मि ङारिङ्पि नुऎ लिमा लॆ। हाङ् चाइबानऎ खाट्ना चाइ यायेॽमाबि साप्मिम्पा खानावाँ टिङ्मॆ टे हॆॽनॆ, टर निवाँहाङ्मि लावा टक्चामानुङ् निवाँ हङ्सिॽयुबाङ् होइकन लिमॆ रेम। गरक्मा याॽमि याॽमिचिऎ हॆॽनॆ टर निवाँहाङ्ऎ ङेबुकु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.