रोमि 11 - लोहोरुङ्इस्राएलिचिम हिङ्वा नुङ् निवाँहाङ्मि नाम्नावाँ 1 हाङ् काङा गर काॽङा, मरहाङ्ग माल् निवाँहाङ्ऎ खोम् इस्राएलि याॽमिचि याइमिम्पा हॆटा? आक्र हॆॽनॆ, काङा स टा आबाराहाममि खिम्पि जान्म लिमिम्पा बेन्यामिन सामॆक्बिऎ याॽमिङा। 2 निवाँहाङ्ऎ याॽलऎ बाङ्न सॆःक्मिम्पा खोमि इस्राएलि याॽमिचि खोसॆ मायाइटिटुचि। हाङ् निवाँनेन् साब्चिराऎ एलियामि बारेबि इमिम्पा खानावाँ ग आन्नॆ लेकाम्निन। खोसॆ इस्राएलि याॽमिचि आब्डिक् टिसे निवाँहाङ् गर लोमिम्पा लॆटु, 3 “पारभु, आक्खाचिऎ आनाम् निवाँहाङ्मि खानावाँ लोखुबाचि सेरुचि। आनाम युङ्ठङ् योराङ्सुचि। उम्चि हुक्बाङ् हिङ्चाडिङॆ ग काङा टेःॽन हाङ् खोचिऎ काङा सङ्क सेॽमाम् लागि यक्मॆ पाइङामि।” 4 टर निवाँहाङ्ऎ गर कामानुङ् खानावाँ ऎनु, “काङॆ काङामि लागि होइढा वाबङ् याॽमिचि सङ्क युङ्भुङ्डुङ्चि। खोचिऎ बाल लोमॆ डेउटा चुङुचिनि।” 5 आक्रहाङ्न ह सङ्क निवाँहाङ्मि नाम्नावाँऎ येसुबि निवाँयुङ् लॆसि सॆःग्मिम्पा ऎॽवा इस्राएलि याॽमिचि निवाँयुङ्पि चुःक्मि। 6 हाङ् ग योम्पक् चाइ निवाँहाङ्मि नाम्नावाँऎन यिक्डुवॆ रेम। खोचिऎ यिक्मिम्पा योम्पकऎ हॆॽनॆ। हॆॽनॆ हाङ्ग निवाँहाङ्मि नाम्नावाँऎ योम्पक् आयिक्खुबा लॆटा। 7 मसॆ गर कामा हेकि, इस्राएलि याॽमिचि निवाँहाङ्मि ङारिङ्पि निवाँ टिमानुङ् निवाँनेन् लिमा यगामि, टर मान्लिमि। टर निवाँहाङ्ऎ सॆःक्मिम्पा याॽमिचि टेःॽन निवाँनेन् लिसामि। हाङ् होइढाचिम् निवाँ चाइ निवाँहाङ्ऎ छाक्कॆ मुपिटुचि हाङ् लोमिम्पा माखेमुचि। 8 हाङ् निवाँनेन साब्चिराबि गरहाङ् साब्डा, “निवाँहाङ्ऎ आक्खाचि इम्टिखॆॽमिम्पा लावा पिडुचि। हाङ् खोसॆ आक्खाचि हढारि खाङ्निऎ मिक् हाङ् खेम्निऎ नाबाक् पिडुचि।” 9 गरहाङ् डाउड हाङ्ऎ सङ्क लोडु, “उम्चि भोजा भाट्टेर खोचि हाप्सिठाम, खोप्सिठाम्, टःक्सिठाम हाङ् डान्डा टक्चामॆ खानावाँ लिर। 10 आक्खाचिम मिक्ऎ ऎखाङ्टक्लढारि माॽयाक्टसॆ डॆगुचिर, हाङ् डुखामि भारिऎ खोचिम् मिचिक् हानाम्स खक्खक् लिबिटुचिर।” 11 काङा होइखेपा सङ्क गर काॽङा, इस्राएलि याॽमिचि पःग्मा आहेमेगारि टॆःक्मिम्पा हॆ? आक्र हॆॽनॆ, निवाँहाङ्ऎ लोमिम्पा खानावाँ खोचिऎ माखेम्मिम्पासॆ हिङ्चामॆ खानावाँ हॆॽनिबारेक्चिबि टामिम्पा रेम। ग योम्पक्बाङ् निवाँहाङ्ऎ इस्राएलि याॽमिचि ङङ्सिमिॽमा मिकुचि। 12 टर इस्राएलिचिऎ हिङ्वा लॆःॽमार बाखाटेम्बिहा याॽमिचिऎ खेःॽल आसिका टक्चाउचि। हाङ् याहुडिचिऎ निवाँयुङ् मालॆमिम्पासॆ हॆॽनिबारेक्चिऎ फाक्मॆ खानावाँ टक्चाउचि। याहुडिचिबाङ् खिरिस्टबि निवाँयुङ् लॆःॽमार ग एट्टान ढ्या आसिका लि। हॆॽनिबारेक्चि फाक्मिम्पा 13 काङा चाइ आन्ना हॆॽनिबारेक्चिम् लागि सॆःक्ढुङ्पाङा। मसॆॽन काङॆ इघा खानावाँ खेम्मिकानि। काङॆ कामि योम्पक् एट्टान ढ्या मिकुङ्। 14 काङा गर मिनुॽङा काम ग योम्पक्बाङ् काङॆ काम् याहुडि याॽमिचिन ङङ्सिमिर मिकुङ्चि, हाङ् खोचि हङ्सिबि ऎॽवाचि चाइ हिङ्खामाबि टॆःॽमा सङ्क हेङार। 15 मान्ठाभनॆ याहुडिचिऎ निवाँहाङ् याइमारग बाखाटेम्पिहा याॽमिचि निवाँहाङ्बि टाआमि हाङ्ग, खोचि टाङ्पान निवाँहाङ्बि टाआमि ग एट्टान नुऎ लिक्। एक्क सिखॆॽमिम्पा याॽमि हिङ्पम्पा रक्मान लिक्। 16 चग्मिम्पा खाॽमिकबाङ् याॽलि मिःॽम फाग्माहाङ् निवाँहाङ्मि निङ्पि सङ्टिॽमार चोब्न चःग्मिम्पा खाॽमिक् सॆङ्सॆङॆ लि। आक्रहाङ्न सिङ्मि साम् चाइ सॆङ्सॆङॆ लॆ हाङ्ग चोब्न हाँगा सङ्क सॆङ्सॆङॆ लि। 17 जाइटुनमि सिङ्बाङ् ऎॽवा हाँगा योप्लिङ्खॆॽमिम्पा रक्न, ऎॽवा याहुडिचिऎ निवाँहाङ् याइटुचि। टर आन्ना हॆॽनिबारेक्चि चाइ ठाॽनाम जाइटुनमि हाँगा चेन्मानुङ् बारिऎ होइक जाइटुनमि बोटाबि चक्टिॽमिम्पा हाँगा रक्नमान लॆकानि। मरहाङ्स आन्नॆ एक्कन साम्बाङ् चॆक्मावा नुङ् हिङ्खामा टक्चाकाम्नि। 18 मसॆ आन्नॆ आक्खा चेल्लिङ्खॆॽमिम्पा हाँगा रक्मा इस्राएलि याॽमिचिबाङ् नुऎङाये आमिनानॆ। हाङ् आन्नॆ साम् लाप्भुङ्मिम्पा हॆॽनॆ, टर साम्ऎ आन्ना लाप्भुङ्डानि। 19 हाङ् आन्ना गर सङ्क काकानि हला, “काङ्का चक्टिॽमामि लागि आक्खा हाँगा चेन्मिम्पा रेम।” 20 ग खानावाँ चाइबान, याहुडिचिऎ खिरिस्टबि निवाँयुङ् मान्लॆटुचि हाङ् खोचि हाँगार चेल्लिङ्खारामि। हाङ् निवाँयुङ् लॆःॽमिम्पासॆ आन्ना आक्खाचिमि ठालबि चुकानि। मसॆ एट्टान नाबुक् आठेरानॆ टर निवाँहाङ्मि किसिमाबि पेनानॆ। 21 मान्ठाभनॆ निवाँहाङ्ऎ चाइबानऎ हाँगा टा चेन्लाङ्कु हाङ्ग, आन्ना सङ्क चेन्हिकानि। 22 निवाँहाङ् ऎॽवा नाम्नावाँ नुङ्मा हाङ् छाक्कॆ निवाँ नुङ्मा लॆ लोमॆ खानावाँ लेसाम्नॆ। लोमिम्पा आखेम्खुबाचिम् लागि खो छाक्कॆ निवाँऎ लॆ। टर खोम् निवाँनेन्बि पेन्ढाङ्सानि हाङ्ग, खोसॆ एट्टान नाम्नाम् पिसिकानि। हॆॽनॆ हाङ्ग आन्ना सङ्क आक्खा हाँगा रक्न चेल्लिङ्खॆकानि। 23 हाङ् इस्राएलि याॽमिचिऎ निवाँयुङ् आलॆःॽमॆ योम्पक् याइसे निवाँयुङ् लॆपकामि हाङ्ग, याॽलि रक्न बोटामि हाँगा लिटाक्मि मान्ठाभनॆ निवाँहाङ्ऎ खोचि होइखेपा सङ्क चक्मा हेकुचि। 24 आन्ना हॆॽनिबारेक्चि चाइ ठाॽनाम जाइटुनमि सिङ्बाङ् चेन्टेॽमिम्पा हाँगा रक्मान लॆकानि हाङ् निवाँहाङ्ऎ आन्ना बारिबि लिःॽमिम्पा जाइटुनमि सिङ् नुङ् चःक्डानि। इस्राएलि चाइ बारिबि लिःॽमिम्पा याॽलिऎ हाँगा जाइटुन रक्मा यो। मसॆ निवाँहाङ्मि लागि खोसॆ होइखेपा सङ्क खोचि लाटॆॽमाहाङ् चक्मॆ योम्पक् काम्नुःर यिक्हिकु। चोब्न सक्पि निवाँहाङ्मि नाम्नावाँ 25 बुबुनानुसाचि, आन्नॆ नाबुक् आठेराम्नॆ कामानुङ् एक्क चुम्मिम्पा खानावाँ वाबाम्नॆ कामानुङ् मिनुॽङा। ग चुम्मिम्पा खानावाँ चाइ माङ्भनॆ खिरिस्टबि टामा लॆक्मिहा हॆॽनिबारेक्चि मॆन्टारढारि टेःॽन ऎॽवा इस्राएलि याॽमिचिमि निवाँ छाक्कॆ लि। 26 गरहाङ् चोब्न इस्राएलि याॽमिचि हिङ्पमि। निवाँनेन् साब्चिराबि गरहाङ् साब्डा, “यारुसालेमबाङ् फाक्खुबा टा हाङ् खोसॆ याकुबमि पासाचिमि चोब्न हिङ्वा सःग्पिकुचिमि।” 27 हाङ् निवाँहाङ् गर का, “ग चाइ खोचिनुङ् युङ्मिम्पा चुप्लाङ् यो नुऎ लःबि काङॆ उम्चि हिङ्वा यङ्निपिकुङ्चि।” 28 नुऎ खानावाँबि निवाँयुङ् मान्लॆमिम्पासॆॽन डिरिक् इस्राएलिचि निवाँहाङ् सिच्चाखुबा लिसामि। मसॆ आन्ना हॆॽनिबारेक्चिबि नुऎ खानावाँ टाआ। मरहाङ्स याहुडिचि उम्चि निङ् चुचाखुबा पाप्पाटुबाचिबाङ्न निवाँहाङ्ऎ सॆःक्मिम्पा हाङ् नाम्नाम् पिसिॽमिम्पा याॽमिचि यो। 29 मान्ठाभनॆ निवाँहाङ्ऎ याॽमिचि पिॽमिम्पा बारडाना ऎल्लाङ्सुनि। हाङ् सेःसिम्पा याॽमिचि हानाम्स याइटुचिनि। 30 याॽल आन्ना हॆॽनॆबारेक्चि निवाँहाङ्ऎ लोमिम्पा मान्खेम्युक्सानि। टर ह इस्राएलिचिऎ खोसॆ लोमिम्पा माखेम्मिम्पासॆ टेःॽन आन्ना सक्पि निवाँहाङ्मि नाम्नावाँ सिःॽडा। 31 मसॆ ह निवाँहाङ्ऎ लोमिम्पा आखेम्खुबा याहुडिचिऎ आन्नॆ रक्न निवाँहाङ्मि नाम्नावाँ फेरि सङ्क टक्चाकुचि लोमॆ खानावाँ खाङ्मिॽमामि लागि निवाँहाङ्ऎ आन्ना हॆॽनिबारेक्चि सक्पि खोम् नाम्नावाँ खाङ्मुसु। 32 मान्ठाभनॆ चोब्न याॽमिचि निवाँहाङ्मि नाम्नावाँ खाङ्मिॽमामि लागि निवाँहाङ्ऎ याॽमिचि खोम् खानावाँ आखेम्खुबाचि चाइ लाम्फुबिॽन याइटुचि। निवाँहाङ्मि निङ् ठेॽमॆ 33 एम, चोब्नमि लागि निवाँहाङ् एट्टान नुऎ लॆ हाङ् खोमि निवाँ हाङ् चेन्टुबावाँ वानवाप्हिनॆ लॆ! खोम् निवाँबि माङ् चुऎ हाङ् खोसॆ मान्टहाङ् योम्पक् यिगुकुवॆ आसॆस वाप्हिसुचिनि! 34 निवाँनेन् साब्चिराबि गरहाङ् साःब्डा, “पारभुमि निवाँ आसॆ लेकुवॆ हाङ् आसॆ खो चिन्मा हेकुवॆ?” 35 “हाङ् निवाँहाङ्ऎ ऎन्मॆ गारि खो आसॆस सिङि टिमा हेसुनि।” 36 मान्ठाभनॆ चोब्न खोसॆॽन सिरिस्टि लॆःॽमिम्पा यो। हाङ् चोब्न ठःका खोबाङ्न हाङ् खोम् निङ्लावामि लागि लिसा। खोमि निङ् हानाम्स सङ्पि लिर! आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.