सेन्चि 7 - लोहोरुङ्१,४४,००० इस्राएलि याॽमिचि लायुङ् टिमिम्पा 1 आक्क डॆङ्पि बाखाटेम्पि, पॆरॆरॆमाबि नुङ् चोब्न सिङ्लुङ्पि हिॽयापा आलुर कामानुङ् रिचि निवाँखाटॆखुबाचि बाखाटेम्मि रिचि पोट्टान रिचि हिॽयापा ऎक्मानुङ् येप्मिम्पा कॆ खाङ्टकुङ्। 2 निवाँहाङ्ऎ आक्खा रिचि निवाँखाटॆखुबाचि बाखाटेम् नुङ् पॆरॆरॆमा नासॆलॆःॽमॆ चॆक्मावा पिॽमिम्पा लॆटुचि। हाङ् काङॆ नाम्कॆॽवा पोट्टाबाङ् होइक निवाँखाटॆखुबा कॆॽमॆ पाइमिम्पा खाङ्टकुङ्। खोनुङ् हिङ्चाऎ निवाँहाङ्मि लायुङ् चुआ। खोसॆ आक्खा रिचि निवाँखाटॆखुबाचि ढ्या साम्लाबि गर लोमिम्पा खेमुङ्, 3 “एच्छ यो एच्छ, कानिऎ कानिमि निवाँहाङ्मि योम्पक् मुखुबाचिमि निङ्टँवाँबि लायुङ् माटिरढारि बाखाटेम, पॆरॆरॆमा नुङ् सिङ्लुङ् माङ्स आलॆटाम्नॆ।” 4 हाङ् निवाँखाटॆखुबाचिऎ लायुङ् टिबिॽमिम्पाचि ङेब्मिम्पा खेमुङ्। खोचि १,४४,००० जना लॆटुचि। हाङ् खोचि चोब्न इस्राएलि सामॆक्बाङ् टामिम्पा याॽमिचि लॆटामि। 5 हाङ् याहुडामि सामॆक्बाङ् १२,०००, रुबेनमि सामॆक्बाङ् १२,००० हाङ् गाडमि सामॆक्बाङ् १२,०००, 6 हाङ् आसेरमि सामॆक्बाङ् १२,०००, नाप्टालिमि सामॆक्बाङ् १२,०००, मानास्सेमि सामॆक्बाङ् १२,०००, 7 हाङ् सिमियोनमि सामॆक्बाङ् १२,०००, लेबिमि सामॆक्बाङ् १२,०००, इस्साखारमि सामॆक्बाङ् १२,०००, 8 हाङ् जबुलुनमि सामॆक्बाङ् १२,०००, योसेफमि सामॆक्बाङ् १२,०००, हाङ् बेन्यामिनमि सामॆक्बाङ् १२,००० याॽमिचिबि लायुङ् टिमिम्पा लॆटा। ओइर याॽमिचिऎ निवाँहाङ् चुङ्मिम्पा 9 आक्क डॆङ्पि काङॆ हाङ्पेन्ठाम् ठाल नुङ् सामुङ्मि ङारिङ्पि ङेप्मान हेनिहा ओइर याॽमिचि खोम्टि खॆॽमिम्पा खाङ्टकुङ्चि। खोचि चोब्न हाङ्डाम्, जाटिबाङ्, सामॆक्बाङ्, याॽमिचिबाङ् हाङ् खाप्बिहा याॽमिचि लॆटामि। खोचि बिइःमा चेः चाङ्मिम्पा लॆटामि, हाङ् उम्चि हुक्पि खाजुरमि हाँगा खिन्मिम्पा लॆटामि। 10 खोचि ढ्या साम्लाबि गर कासामि, “हाङ्पेन्ठाम् ठालबि पेन्खुबा कानिम् निवाँहाङ् नुङ् सामुङ्बाङ्न कानि हिङ्चाडि।” 11 हाङ् चोब्न निवाँखाटॆखुबाचि हाङ्पेन्ठाम ठाल, टुङ्घङ्पाचि हाङ् रिचि हिङ्चाखुबा पारानिचिमि गॆअङ्मॆअङ् येप्ढाङ्पा लॆटामि। हाङ् खोचि हाङ्पेन्ठाम ठालबि हुहु पोप्से निवाँहाङ् चुङुचिमि। 12 खोचि गरहाङ् कासामि, “आमेन, हानाम्स कानिम् निवाँहाङ्मि निङ् ठेॽमा, निङ्लावा पिॽमा, निवाँ नुङ्मा लॆ लोमा, ओहाक पिॽमा, निङ् ङेःब्मा, चॆकुयॆ लॆ लोमा खॆन्चाकु। आमेन!” 13 हाङ् हिपङ्रि टुङ्घङ्पाचिबाङ् एक्कसॆ काङा गरहाङ् सिमिङ्, “इघा बिइःमा चे चाङ्खुबाचि आसाचिर? खोचि हाबाङ् डाबामिहा?” 14 हाङ् काङॆ खो लोसुङ, “टुङ्घङ्पो, काङॆ लेङानि, ग खानावाँ आनॆन लेकुना।” हाङ् खोसॆ काङा लोसिङ, खोचि चाइ एट्टान ड्या डुखा आङ्मानुङ् टाडामिहा याॽमिचि रेम। खोचिऎ टाङ्पामि चेः सामुङ्मि हारिऎ सःक्से बिइःमा मुडुचि हाङ् निवाँहाङ्मि ङारिङ्पि सॆङ्सॆङॆ लिडामि। 15 मसॆ “खोचि हाङ्पेन्ठाम् ठालबि पेन्खुबा निवाँहाङ्मि ङारिङ्पि येप्मानुङ् लेन्टा सेन्टा निवाँहाङ्मि खिम्पि खो चुङ्मॆ योम्पक् यिगुक्मि। हाङ् हाङ्पेन्ठाम् ठालबि पेन्खुबा खोचिम् लुम्पि लिसे कोबुकुचि डोबुकुचि। 16 हाङ् खोचि फेरि हानाम्स सागॆ नुङ् वाइमॆ सिसुचिनि। हाङ् खोचि ङिऎ नाम्ऎ हाङ् होइक कुःसाहा माङ्ऎ सङ्क डुखा पिॽमा हेसुनि। 17 मान्ठाभनॆ हाङ्पेन्ठाम् ठालमि लुम्पि पेन्खुबा सामुङ्ऎ खोचि कुकुचिमि। खोसॆ खोचि हानाम्स लुक्खॆॽनॆ हिङ्खामामि योवा पिकुचि। हाङ् निवाँहाङ्ऎ खोचिम् चोब्न मिॽवा टुःक्पिकुचि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.