सेन्चि 6 - लोहोरुङ्सामुङ्ऎ ठुक्चि लायुङ् हेम्बॽमिम्पा 1 हाङ् काङॆ खाङ्मॆ पाइमार, सामुङ्ऎ आक्खा वाङ्चि लायुङ्बाङ् याॽलिऎ चाइ हेनु। हाङ् रिचि हिङ्चाखुबा पारानिबाङ् एक्कसॆ नाम्टुरुङ्मामि रक्मा साम्लाबि गर लोसु, “डाबॆ।” 2 हाङ् काङॆ आक्कुबि एक्क बिइःमा अन्युक् येप्ढाङ्मिम्पा खाङ्टकुङ्। आक्क अन्युक् सक्पि ठाङ्खुबाऎ हुक्पि एक्क सिगिक् ठुॽलाङ् वेमिम्पा लॆटु। हाङ् निवाँहाङ्ऎ खो एक्क मुकुट पिॽमिम्पा लॆटा। हाङ् होइडाचि खिमाटुमाबि हेचाखुबार हेचामामि लागि खो लङ्पका। 3 मबाङ् सामुङ्ऎ होइक हिच्चि लायुङ् हेनु। हाङ् होइक हिङ्चाखुबा पारानिऎ गर लोमिम्पा कॆ खेमुङ्, “डाबॆ।” 4 हाङ् आक्कुबि होइक एक्क एट्टान हार्रापॆ अन्युक् हाङ् आक्कुबि ठाङ्खुबा खाङ्मुसा। आक्क सक्पि ठाङ्खुबा एक्क फेया पिॽमिम्पा लॆटा हाङ् बाखाटेम्पि याॽमिचि सेप्पे चुःमिॽमॆ ढुप्पाट्ट खो पिॽमिम्पा लॆटा हाङ् बाखाटेम्पिहा चोब्न ठालबि खिमाटुमा परका। 5 मबाङ् सामुङ्ऎ होइक सुम्चि लायुङ् हेम्बकु हाङ् होइक हिङ्चाऎ पारानिऎ गर लोमिम्पा कॆ खेमुङ्, “डाबॆ।” आक्क डॆङ्पि काङॆ माइऎ अन्युक् खाङ्टकुङ। आक्क अन्युक् सक्पि ठाङ्खुबाऎ हुक्पि ठाःक्ठाम् खिन्मिम्पा लॆटा। 6 हाङ् काङॆ आक्खा रिचि हिङ्चाखुबा पारानिचिमि लुम्पाङ् गर लोमिम्पा खेमुङ्, “एट्टान डिरिक् याङ् सिऎसॆ एक्क डिनामि नाम्याक्ऎ एक्क ठाःक्मा सिया आठावा सुम्चि ठाःक्मा पाङ्कॆ टेः इन्हि, टर जाइटुनमि केवा हाङ् आङ्गुरमि डिबु माङ्स आलॆटाम्नॆ।” 7 हाङ् सामुङ्ऎ होइक रिचि लायुङ् हेनु हाङ् होइक पारानिऎ गर लोमिम्पा कॆ खेमुङ्, “डाबॆ।” 8 हाङ् काङॆ होइक एक्क फिःॽमा अन्युक् खाङ्टकुङ्। हाङ् आक्क सक्पि ठाङ्खुबामि निङ् सेक्खुबा लॆटा। हाङ् सिखॆॽमिम्पा याॽमिचि पेन्ठाम् ठालऎ आक्क टिङ्मिम्पा लॆटु। हाङ् खोसॆ बाखाटेम्पिहा रिचि भागबि एक्क भाग खिमॆटुमाबाङ, सागॆ, टुक्मावा हाङ् ठाब्नाम् पोसुचिबाङ् सिखॆमिॽमॆ ढुप्पाट्ट टक्चामिम्पा लॆटा। 9 आक्क डॆङ्पि सामुङ्ऎ होइक ङाचि लायुङ् हेनु। हाङ् काङॆ युङ्ठङ् खुक्माबि निवाँहाङ्मि खानावाँमि लागि याॽमिचिऎ सेॽमिम्पाचि हाङ् उम्चि निवाँयुङ् नुःर टिङ्खुबाचिमि लावा खाङ्टकुङ्। 10 खोचि ढ्या साम्लाबि गरहाङ् याकासामि, “ओ चोब्बाङ् सङ्पिऎ पारभु, आना सॆङ्सॆङॆ हाङ् चाइबानऎ लॆःक्ना। बाखाटेम्पि काङ्का सेक्खुबा याॽमिचि हानाम् न्यायॆ लॆकुचिनॆ हाङ् डान्डा पिकुचिनॆ?” 11 निवाँहाङ्ऎ खोचि चोब्न बिइःमा चेः पिॽमिम्पा लॆटाचि हाङ् “येसुमि योम्पक् मुखुबा आन्नामि होइढा बुबुनानुसाचि सङ्क होइढा याॽमिचिऎ आन्ना रक्न मासेॽलढारिहाङ् पाबुहा याॽमिचि खॆॽल मालिरढारि एक्छक्म नाचाआनॆ कामानुङ् निवाँहाङ्ऎ खोचि लोमिम्पा लॆटुचि।” 12 हाङ् सामुङ्ऎ होइक लायुङ् हेन्मिम्पा खाङ्टकुङ्। हाङ् ढ्या लुग्डिमा खॆॽमिम्पा खाङुङ् हाङ् नाम् माइऎ चेःर माॽयाक्ट लिसा हाङ् पाप्पालाँ हारि रक्न हार्रापॆ लिसा। 13 हाङ् ढ्या हिॽयापाऎ हुम्मार छाराक्फुमि बोटाबाङ् उम्चा हेड्डारिन्टक्न नाम्फलिॽवाबाङ् साङ्कॆम्मा बाखाटेम्पि हेड्डिन्टामि। 14 हाङ् साखक्मि साब्चिरा नॆटिखॆॽमिम्पा रक्न नाम्फलिॽवा नॆटिखारा हाङ् चोब्न पङ्पङ्मा हाङ् योवॆ ऎक्मिम्पा ठाल चुऎ ठालबाङ् माखारा। 15 मबाङ् बाखाटेम्पिहा चोब्न हाङ्चि, टुङ्घङ्पाचि, टिलिङ्गाचिम् डिड्ढा याॽमिचि, चासुम्टाङ्पा नुङ् निङ् चुचाखुबाचि हाङ् योम्पक् मुखुबाचि हाङ् योम्पक् मुमामि लागि ऎहिक्टिखॆॽमिम्पाचि ढाँणानुङ् पङ्पङ्माबि कुम्सि खारामि। 16 खोचिऎ पङ्पङ्मा हाङ् लुङ्कॽवा गर लोसुचि, “काङ्का सक्पि हेड्ढिन्टॆ हाङ् काङ्का नॆःक्चिमॆ हाङ् हाङ्पेन्ठाम् ठालबि पेन्खुबा हाङ् सामुङ्मि सिरिबाङ् काङ्का चुम्चिमॆ। 17 मान्ठाभनॆ खोचिमि किॽमालुऎ सिरि खाङ्मिॽमॆ डिना टाडा। आक्क सिरिबाङ् आसा सङ्क कुम्हिमिनि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.