सेन्चि 5 - लोहोरुङ्साखक्मि साब्चिरा हाङ् सामुङ् 1 हाङ् हाङ्पेन्ठाम् ठालबि पेन्खुबामि चुब्ठिङ् हुक्पि हिच्चि पाट्टान साप्मिम्पा साखक्मि एक्क साब्चिरा काङॆ खाङुङ्। आक्क साब्चिरा वाङ्चि लायुङ् टिमानुङ् डॆक्मिम्पा लॆटा। 2 हाङ् काङॆ आक्कुबि एक्क एट्टान चॆक्मावा नुङ्मा निवाँखाटॆखुबा खाङुङ्। खो ढ्या साम्लाऎ गर कामॆ पाइटा, “साखक्मि साब्चिराबि टिमिम्पा इघा लायुङ् हेन्हिखुबा हाङ् साब्चिरा टेःबक्हिखुबा आसा चुऎ?” 3 टर पारुबि हाङ् बाखाटेम्पि हाङ् सिखॆॽमिम्पाचि पेन्मॆ ठालबि आक्क साब्चिरा हेम्बक्मानुङ् पाढालिहिखुबा आसास माचुमि। 4 आक्क साखक्मि साब्चिरा हेन्मानुङ् पाढालिहिखुबा आसास मान्भॆक्टक्मिम्पासॆ काङा एट्टान हाबिङ्। 5 मबाङ् आक्खा हिपङ्रि टुङ्घङ्पाचिबाङ् एक्कसॆ काङा लोसिङ, “आना ऎहाबॆ, खाङॆ, याहुडा सामॆक्बिऎ किबा हाङ् डाउड हाङ्मि सामॆक्बिऎ एक्कसॆ हेचाखॆडु। खोसॆ ग साब्चिराबिऎ वाङ्चि लायुङ् हेन्बक्मा नुङ् टेःबक्मा हेकु।” 6 हाङ् काङॆ रिचि हिङ्चाखुबा पारानिचि हाङ् हिपङ्रि टुङ्घङ्पाचिऎ यिप्सिम्पा आक्क हाङ्पेन्ठाम् ठालमि लुम्पि एक्क सामुङ् येप्ढाङ्मिम्पा खाङुङ्। खो चाइ सेइॽमिम्पा रॽमान खाङ्मुसा। आक्क सामुङ्मि वाङ्चि टाङ् हाङ् वाङ्चि मिक् चुआ। म चाइ चोब्न बाखाटेम्पि पाहाङ्मिम्पा निवाँहाङ्मि वाङ्चि लावा यो। 7 हाङ् आक्क सामुङ् टाआहाङ् हाङ्पेन्ठाम् ठालबि पेन्खुबामि चुब्ठिङ् हुक्बाङ् आक्क साखक्मि साब्चिरा लासु। 8 हाङ् आक्क सामुङ्ऎ साब्चिरा लासु हाङ् रिचि पारानिचि हाङ् आक्खा हिपङ्रि टुङ्घङ्पाचिऎ सामुङ् हुहु पोप्से स्यामिटुचि। खोचि चोप्पासॆ हुक्पि डुब्मॆ बिना हाङ् नाम्नुऎ ढुपाऎ चेप्खॆॽमिम्पा फिःइयामि खरॆ याङ्मिम्पा लॆटुचि। आक्खा नाम्नुऎ ढुपा चाइ निवाँहाङ्मि याॽमिचिमि पारठाना रेम। 9 हाङ् खोचिऎ गर कामानुङ् एक्क उम्चङ् साम इसामि, “आनॆ टेःॽन आक्क साब्चिरा लामा हाङ् आक्कबि टिमिम्पा लायुङ् हेन्बक्मा हेकुना। मान्ठाभनॆ आना याॽमिचिऎ सेरामि हाङ् आनॆ आनामि हारि अङ्मिसे चोब्न जाटि, खाप्, याॽमिचि हाङ् हाङ्टेम्बिहाचि निवाँहाङ्मि लागि इनुना। 10 हाङ् आनॆ खोचि निवाँहाङ्मि एक्क हाङ्डाम मुसुचिना हाङ् खोचिऎ कानिमि निवाँहाङ्मि याटाङ्पा लिमानुङ् योम्पक् मुकुचि हाङ् खोचिऎ बाखाटेम् सक्पि ढुप्पाट्ट लॆकुचि।” 11 हाङ् काङॆ फेरि खाङुङ, आक्रल काङॆ ऎॽवा ह ऎवा ङेनङेब्हिनिहा निवाँखाटॆखुबाचिमि साम्ला खेमुङ्। खोचि हाङ्पेन्ठाम् ठाल, रिचि हिङ्चाखुबा पारानिचि हाङ् टुङ्घङ्पाचिमि गॆअङ्मॆअङ् चुआमि। 12 खोचि ढ्या साम्लाबि गरहाङ् साम् इसामि, “याॽमिचिऎ सेॽमिम्पा सामुङ्ऎ ढ्या चॆक्मावा, चासुम्, निवाँ, निङ् ठेॽमा, निङ्लावा टक्चामा, निङ् ङेःप्मा खॆन्चाकु।” 13 हाङ् काङॆ पारु, बाखाटेम, सिखॆम्पाचि पेन्ठाम ठाल हाङ् पॆरॆरॆमाबिहा हिङ्चाखुबा चोब्न पारानिचिऎ गरहाङ् साम् इमिम्पा खेमुङ्, “हाङ्पेन्ठाम ठालबि पेन्खुबा नुङ् सामुङ् हानाम्स सङ्पि लिर, खोचिम् निङ् ङेःप्सिखॆॽल, निङ्लावा लिबिटुचिर हाङ् चॆक्मावा चुबिटुचिर।” 14 हाङ् आक्खा रिचि पारानिचिऎ “आमेन” लोसुचि। हाङ् आक्खा हिपङ्रि टुङ्घङ्पाचिऎ निवाँहाङ् नुङ् सामुङ् स्यामिॽमानुङ् चुङुचिमि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.