सेन्चि 22 - लोहोरुङ्1-2 मबाङ् निवाँखाटॆखुबाऎ काङा हिङ्खामामि योवा अङ्ऎ हङ्मा खाङ्मिटिङ्। आक्क चाइ निवाँहाङ् नुङ् सङ्टिॽमिम्पा सामुङ्मि हाङ्पेन्ठाम ठालबाङ् आम्पक्मानुङ् हाटामि लाम्फुमि लुम्पाङ् अङ्मेपाइटा हाङ् आक्क योवा स्फाटिक् रक्न हामिम्पा लॆटा। आक्क हङ्मामि हिच्चि पोट्टान हिङ्खामामि उम्चा सिखुबा सिङ्मि बोटा चुआ। आक्कसॆ एक्क माइनाबि एक्क खालॆ हाङ् होइक माइनाबि होइक खालॆ उम्चा एपङ्हि माइनान सियुक्सु। हाङ् आक्क सिङ्मि बाॽवाऎ चाइ बाखाटेम्बिऎ जाटि जाटिबिहा याॽमिचि नुबक्मिॽमॆ सिढामि योम्पक् यिक्युक्सु। 3 हयॆबाङ् मरक् चाब्हिमा लोमॆ खानावाँन माचु। निवाँहाङ् नुङ् सामुङ्मि हाङपेन्ठाम ठाल आक्कुबि लि हाङ् खोम् योम्पक मुखुबाचिऎ खो चुङ्कुचिमि। 4 खोचिऎ निवाँहाङ्मि ङारिङ् खाङ्टकुचि हाङ् खोम् निङ् खोचिम् निढाराबि लि। 5 हाङ् आक्कुबि हानाम्स सेन्टा लिनि, आक्कुबि हामामि लागि ओप्लिङ् हाङ् नाम् सङ्क पाब्नि मान्ठाभनॆ पारभु निवाँहाङ्न आक्कुबि ओ। हाङ् खोचिऎन हानाम्स हाङ्डाम् लॆकुचि। पारभु येसु सॆॽलन टामेपाइ 6 मबाङ् निवाँखाटॆखुबाऎ काङा लोसिङ, “आना इमिम्पा इघा चोब्न खानावाँ निवाँयुङ् लॆहिऎ हाङ् चाइबानऎ लॆ। हाङ् निवाँहाङ्मि खानावाँ लोखुबाचि सॆङ्सॆङॆ लावा पिक्खुबा पारभु निवाँहाङ्ऎ खोम् योम्पक् मुखुबाचि सॆॽलन लिमा ठाबाक्डॆ इघा खानावाँ खाङ्मिॽमाम् लागि निवाँखाटॆखुबा पाङ्हाङ्डु।” 7 हाङ् येसुऎ गरहाङ् लोसु “खाङाम्नॆ, काङा सॆॽलन टामे पाइङा। ग साब्चिराबि निवाँहाङ्बाङ् लोमिम्पा खानावाँ आनुसारा पाइखुबाचि आसिका टक्चामिम्पा याॽमिचि यो।” 8 काङा युहान्नाऎ इघा चोब्न खानावाँ खेमुङ् हाङ् खाङुङ्। हाङ् काङॆ आक्खा खानावाँ खेमुङ् हाङ् खाङुङ्हाङ् आक्खा खानावाँ काङा खेम्मिखुबा नुङ् खाङ्मिखुबा निवाँखाटॆखुबा चुङ्मामि लागि काङा खोम् लाङ्पि पोप्ढारिङ्। 9 टर खोसॆ काङा गर लोसिङ, “आनॆ काङा स्यामिॽमा फॆन्नि। काङा ग आना हाङ् ग साब्चिराबि साप्मिम्पा खानावाँ टिङ्खुबा निवाँहाङ्मि खानावाँ लोखुबा आनामि बुबुनानुसाचि रक्मान निवाँहाङ् टिङ्खुबाङा टे यो। आनॆ निवाँहाङ् टे स्यामिटॆ।” 10 हाङ् खोसॆ काङा गर लोसिङ, “ग साब्चिराबि साप्मिम्पा निवाँहाङ्बाङ् यामुमिम्पा खानावाँ ऎचुमॆ मान्ठाभनॆ इघा खानावाँ सॆॽलन लिमा परक्डा। 11 काइसॆ योम्पक् यिक्खुबाऎ काइसॆ योम्पक्न यिक्ढाङ्र हाङ् ङेसिमा लुऎ योम्पक् यिक्खुबा आक्रक्न लॆःॽढाङ्र। हाङ् निवाँनेन् याॽमि निवाँनेन्न लिढाङ्र हाङ् सॆङ्सॆङॆ याॽमि आक्रक्न लिढाङ्र।” 12 हाङ् येसुऎ लोसु, “खाङाम्नॆ, चोब्न याॽमिचि उम्चि योम्पक् रक्न नाम्याक् हाङ् डान्डा पिॽमाम् लागि काङा सेॽलन टामॆ पाइङा। 13 काङा आल्फा हाङ् ओमेगा याॽलिऎ नुङ् डॆङ्पिऎ हाङ् ठाबाक्खुबा नुङ् लुक्पिखुबाङा यो। 14 “हाङ् टाङ्पामि चेः होप्मानुङ् बिऎ मुखुबा याॽमिचि आसिका टक्चामिम्पाचि यो मान्ठाभनॆ खोचि आक्क हाटामि लम्भॆरॆङ्माबाङ् हङ्सिॽयु भॆन्मॆ ढुप्पाट टक्चाडुचि हाङ् हिङ्खामि बोटाऎ सिडुऎ उम्चा चाटक्मि। 15 टर हाटाबाङ् बाहिरा चाइ हुॽवार पाइखुबाचि, चाटक् खाङ्मिखुबाचि, ब्याबिचारिचि, याॽमि सेक्खुबाचि, मुर्टि चुङ्खुबाचि हाङ् हुन्नऎ खानावाँ इमानुङ् बङ्सिखुबाचि पेनुक्मि। 16 “काङा येसुऎ मान्डालिबि चुःक्मिहा चोब्न याॽमिचि इघा खानावाँ इमामि लागि काङामि निवाँखाटॆखुबा पाङ्हाङ्डु। काङा चाइ डाउड हाङ्मि सामॆक्बिऎ खोम् हाङ्पेन्ठाम ठाल टक्चाखुबाङा रेम। हाङ् काङा चाइ नाम्सऎ हामिम्पा साङ्केम्माङा यो।” 17 सॆङ्सॆङॆ लावा नुङ् डाङ्माऎ गरहाङ् लोक्चु, “डाबॆ,” हाङ् ग खानावाँ खेम्खुबाचिऎ “डाबॆ” कामिर। हाङ् आसा चाइ वाइमे सिकु आक्क डाब्ल। हाङ् आसॆ चाइ मिनुकु, खोसॆ हानाम्स लुक्खॆॽनॆ हिङ्खामाबि योवा मरक्न डुङुकु। 18 हाङ् ग साब्चिराबि निवाँहाङ्बाङ् लोमिम्पा खानावाँ साब्मिम्पा खेम्खुबा चोब्न काङा युहन्नाऎ आन्ना नुःर लोकानि, आसॆ ग साब्चिराबि होइढा खानावाँ येप्टिकु, निवाँहाङ्ऎ आक्क याॽमिमि लागि ग साब्चिराबि साप्मिम्पा डान्डा सङ्क येट्टिबिकु। 19 हाङ् आसॆ चाइ ग साब्चिराबि साब्मिम्पा निवाँहाङ्मि खानावाँ लोखुबाऎ इमिम्पा खानावाँ मिःक्म स चेनुकु, निवाँहाङ्ऎ खोम् लागि हिङ्खामामि बोटाऎ सिकुवॆ उम्चा सङ्क चेन्पिकु हाङ् ग साब्चिराऎ लोमिम्पा सॆङ्सॆङॆ हाटाबाङ् खो लाबहाङ्कु। 20 इघा चोब्न खानावाँमि चुमॆक्सङ् पिक्खुबाऎ गर लोसु, “चाइबान, काङा सेॽलन टाःॽङा।” आमेन, टाऎ पारभु येसु टाऎ। 21 पारभु येसुमि नाम्नावाँ आन्ना चोब्ननुङ् लिर। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.