सेन्चि 21 - लोहोरुङ्उम्चङ् पारु नुङ् बाखाटेम् 1 मबाङ् काङॆ उम्चङ् पारु नुङ् बाखाटेम खाङुङ् मान्ठाभनॆ याॽलिऎ पारु नुङ् बाखाटेम ग माखारा हाङ् पॆरॆरॆमा सङ्क माचु। 2 हाङ् काङॆ पारुबि निवाँहाङ्बाङ् उम्चङ् सॆङ्सॆङॆ यारुसालेम हाटा पारुबा उङ्मे पाइऎ खाङुङ्। आक्क हाटा ग डाङ्पामि लागि एक्क डाङ्मा चाक्मिम्पा रक्न लॆटा। 3 हाङ् काङॆ हाङ्पेन्ठाम् ठालबाङ् ढ्या साम्लाबि गर लोमिम्पा खेमुङ्, “खाङॆ, हयॆबाङ् मरक् याॽमिचिमि लुम्पि निवाँहाङ् पेनुक्। निवाँहाङ् आक्खाचिनुङ्न पेनुक् हाङ् खोचि खोमि याॽमिचि लिक्मि। निवाँहाङ् खोसॆॽन खोचिनुङ् पेन्मे निवाँ मुडु हाङ् खो उम्चि निवाँहाङ् लि। 4 खोसॆ आक्खाचिम् मिक्बाङ् चोब्न मिॽवा टुःक्पिकुचि। हाङ् आसास होइखेपा सङ्क सिखॆॽमा पाब्नि हाङ् निवाँ टुक्माबि सिॽमानुङ् हाप्मा पाप्नि हाङ् टुक्मावाबि सिॽमा पाप्नि मान्ठाभनॆ याॽलिहा चोब्न खानावाँ लुक्खॆडा।” 5 मबाङ् हाङ्पेन्ठाम ठालबि पेन्खुबाऎ काङा गर लोसिङ, “ह काङॆ चोब्न खानावाँ उम्चङ् मुकुङ्।” हाङ् खोसॆ काङा गर स लोसिङ्, “इघा खानावाँ साबॆ मान्ठाभनॆ इघा चोब्न खानावाँ निवाँयुङ्मा नुङ् चाइबानऎ लॆ।” 6 हाङ् खोसॆ गर लोसु, “चोब्न खानावाँ लिखारा, काङा आल्फा हाङ् ओमेगाङा परक्खुबा नुङ् लुक्पिखुबाङा। आसा चाइ वाइमे सिकु कॆ आक्क पिपक्मिम्पा हिङ्खामामि योवाबाङ् मरक्न डुङ्मा पिकुङ।” 7 हाङ् आसॆ चाइ काइसा खानावाँ हेचाकु खो इघा चोब्न खानावाँ टक्चाखुबा याॽमि लि। खोसॆ काङा खोम् निवाँहाङ् कामानुङ् लोःॽङा हाङ् काङॆ खो काम पासा कामानुङ् लोकुङ्। 8 टर किसिखुबाचि, निवाँयुङ् आलॆखुबाचि, चिक्सिमालुहा योम्पक् यिक्खुबाचि, याॽमि सेक्खुबाचि, ब्याबिचारिचि, साइटानमि चॆक्मावाऎ आक्खॆॽमाहा योम्पक् यिक्खुबाचि, मुर्टि चुङ्खुबाचि हाङ् बङ्चाखुबा चोब्न याॽमिचि मिः नुङ् गान्ढाक्बि कहाङ्मा खाइहाङ्चाक्मि। ग चाइ होइखेपा सिखॆॽमॆ रेम। उम्चङ् यारुसालेम 9 मबाङ् डॆङ्पिऎ डुखामि वाङ्चि खरॆ खिन्खुबा वाङ्चि निवाँखाटॆखुबाचिबाङ् एक्कसॆ काङा गर लोसिङ्, “कानुङ् डाबॆ, आना सामुङ्मि खिम्टाङ्मा खाङ्मिखाना।” 10 मबाङ् निवाँहाङ्मि लावाऎ काङा लाबिङ् हाङ् आक्क निवाँखाटॆखुबाऎ एट्टान टक्भॆऎ पङ्पङ्मामि सङ्पिटु टॆटिङ। हाङ् खोसॆ काङा सॆङ्सॆङॆ हाटा यारुसालेम निवाँहाङ्मि ङारिङ्बा पारुबाङ् उङ्मे पाइमिम्पा खाङ्मिटिङ्। 11 आक्क हाटा चाइ निवाँहाङ्मि निङ्लावाऎ हामिम्पा लॆटा हाङ् एक्क एट्टान डिरिक् याङ् सिऎ बिल्लारा लोमॆ लुङ्कॽवा हाङ् आक्क चाइ सिसा रक्मान लॆटा। 12-13 आक्क हाटा टक्भॆऎ हाङ् ढ्या गारऎ बॆङ्मिम्पा लॆटा। हाङ् आक्कमि नाम्कॆॽवा, नाम्डाॽवा, ठाम्लाङ् नुङ् युलाम् पोट्टा सुम्चिसुम्चि टागार चुआ। चोब्न टागार चाइ एपङ्हि लॆटु। चोब्न टागारबि एक्क एक्क निवाँखाटॆखुबाऎ खाङ्युक्सु। हाङ् आक्कुबि एपङ्हि इस्राएलि सामॆक्चिमि निङ् साप्मिम्पा लॆटा। 14 हाटाबिऎ गारमि लागि एपङ्हि जाग टिमिम्पा लॆटा। हाङ् आक्खा सक्पि सामुङ्मि एपङ्हि सॆक्ढुङ्पाचिमि निङ् साब्मिम्पा लॆटा। 15 हाङ् काङानुङ् यामुखुबा निवाँखाटॆखुबामि हुक्पि आक्क हाटा, हाटामि गार नुङ् आक्कमि लम्भॆरॆङ्मा सिक्मॆ फिइयामि एक्क सिग्ठाम् चुआ। 16 ग हाटा रिचि पोट्टान मरक्न टक्भॆऎ लॆटा। हाङ् आक्क निवाँखाटॆखुबाऎ हाटा आक्क सिक्ठाम्ऎ सिग्मार आक्कमि चोब्न पोट्टा हिबङ् रिकग् किलोमिटारा टक्भॆऎ ठाङ्पे युम्फे, गिउ मिउ सिःग्मार मरकॆन लॆटा। 17 हाङ् हाटा बॆङ्मिम्पा गार याॽमिऎ रक्न निवाँखाटॆखुबाऎ सिःगु, आक्क सिःग्मार ठुपङ् मिटारा टक्भॆऎ लॆटा। 18 हाङ् गार बिल्लाउरा लोमॆ एट्टान डिरिक् याङ् सिऎ लुङ्कॽवाबाङ् मुमिम्पा लॆटा। हाङ् आक्क हाटा माठुमिम्पा फिइयाऎ हेब्मिम्पा लॆटा हाङ् आक्क माङ्स सिसा रक्न गिउबाङ्मिउ खाङ्टऎ लॆटा। 19 हाटा बॆङ्मिम्पा गारमि जागा एट्टान डिरिक् याङ् सिहा चोब्न खालाहा लुङ्कॽवाबाङ् हेब्मिम्पा लॆटा। आक्खा लुङ्कॽवाबि चोब्बाङ् याॽलिऎ चाइ बिल्लाउरा लोमॆ लॆटा, मरहाङ्न होइक चाइ निल लुङ्कॽवा हाङ् होइक चाइ हरिटा हाङ् होइक चाइ पान्नामि लॆटा, 20 हाङ् होइक चाइ आनिक्स यो हाङ् होइक चाइ लालामानि, होइक चाइ पिटमानि हाङ् बेरुजा, हाङ् होइक चाइ पुस्पाराज, हाङ् होइक चाइ लासुनॆ हाङ् होइक चाइ निलमानि हाङ् कटेला लोमॆ लॆटा। 21 हाङ् एपङ्हि लम्भॆरॆङ्मा चाइ मोटिबाङ् हेब्मिम्पा लॆटा। चोब्न लम्भॆरॆङ्मा एक्क एक्क मोटिबाङ् मुमिम्पा लॆटा। हाङ् आक्क हाटामि लाम्फु चाइ माङ्स माठुमिम्पा हाऎ फिइयाबाङ् मुमिम्पा सिसा रक्मान लॆटा। 22 काङॆ आक्क हाटा हङ्सि हाम्पि स निवाँहाङ्मि खिम् माखाङुङ् मान्ठाभनॆ चोब्पासॆ आक्कुबि चुखुबा चोब्नबाङ् चॆकुवॆ पारभु निवाँहाङ् नुङ् सामुङ् चुङुकुचि। 23 आक्क हाटाबि हामामि लागि नाम नुङ् पाप्पालाँ आपाब्खुबा लॆटा मान्ठाभनॆ निवाँहाङ्मि निङ्लावा आक्कुबिहा हाङ् खोचिमि ओप्लिङ् चाइ सामुङ् रेम। 24 हाङ् बाखाटेम्पि चोब्न जाटिचि आक्कमि ओऎबि लाम्ढुम्मि हाङ् चोब्न हाङ्चिऎ आक्कुबिन उम्चि चासुम् लाटॆकुचि। 25 आक्क हाटामि लम्भॆरॆङ्मा हानाम्स सॆक्मिम्पा लिनि मान्ठाभनॆ आक्क हाटाबि हानाम्स युटा लिनि। 26 हाङ् निवाँहाङ्मि निङ् सङ्पि मुमामि लागि आक्क हाटाबि चोब्न जाटिबिहा याॽमिचिऎ टाटाङ्पामि निङ्लावा लाटॆकुचि। 27 टर आक्कुबि सामुङ्मि हिङ्खामामि साब्चिराबि निङ् चुःक्मिहा याॽमिचिबाङ् होइढा काइसॆ योम्पक् यिक्खुबाचि, चिक्सिमालुहा योम्पक् यिक्खुबाचि हाङ् बङ्चाखुबाचि आसास आक्क हङ्सि भॆन्हिमिनि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.