सेन्चि 20 - लोहोरुङ्खिरिस्टमि एबङ् निङ्ऎ हाङ्डाम् 1 मबाङ् काङॆ एक्क निवाँखाटॆखुबा हाप्सिठाम् ठालन माऎ रुम्रुम्पामि साँचो नुङ् एक्क ढ्या साङ्ल हुक्पि खिन्मानुङ् पारुबाङ् युमॆपाइऎ खाङुङ्। 2 हाङ् आक्क निवाँखाटॆखुबाऎ आक्क ढ्या पुसॆःॽमा लाबुहाङ् आक्क साङ्लऎ एबङ् निङ्मि लागि ठुब्भुङ्सु। आक्क पुसॆःॽमा चाइ आरेॽऎ पुसॆःॽमा रेम खो चाइ डियाबालास आठावा साइटान लोकुचि। 3 आक्क निवाँखाटॆखुबाऎ आक्क साइटान हाप्सिठाम ठालन माऎ ढ्या रुम्रुम्पाबि कक्ढाङ्सु। हाङ् आक्कसॆ एबङ् निङ्ढारि जाटि जाटिबिहा याॽमिचि ऎफोप्सिटुचिर कामानुङ् आक्क रुम्रुम्पा डॆक्ढाङ्सु हाङ् लायुङ् टिठाङ्सु। टर एबङ निङ् डॆङ्पि आक्क साइटान एच्छक्मि लागि हेम्बॽमा लॆ। 4 हाङ् काङॆ आक्कुबि हिच्चि सुम्चि हाङ्पेन्ठाम् ठाल खाङुङ्। आक्क ठालबि न्यायॆ लॆःॽमॆ ढुप्पाट्ट टक्चामिम्पाचि पेन्मिम्पा लॆटामि। हाङ् आक्कुबि बाखाटेम्पि येसुमि बारेबि खानावाँ खेम्मिॽमिम्पा हाङ् निवाँहाङ्मि खानावाँबि निवाँयुङ् लॆःॽमिम्पाबि निङ्टँवाँ चॆक्सिॽमिम्पा याॽमिचि चुआमि। खोचिऎ आक्क पोसु आठावा आक्क पोसुमि मुर्टि माचुङ्मिम्पा लॆटुचि हाङ् खोचिम् निढाराबि नुङ् हुक्पि लायुङ् माचु। खोचि होइखेपा सङ्क हिङ्पकामि हाङ् खिरिस्ट नुङ्न एबङ् निङ्ढारि हाङ्डाम् लॆटुमि। 5 हाङ् होइढा सिखॆॽमिम्पा याॽमिचि चाइ आक्क एबङ् निङ् मालुक्खॆॽलढारि माहिङ्पक्मि। गन याॽलिऎ सिखॆॽमॆबाङ् हिङ्चामॆ खानावाँ लॆटा। 6 याॽलऎ खॆपा सिखॆम्पाबाङ् हिङ्पक्खुबाचि आसिका नुङ्मा हाङ् सॆङ्सॆङॆ याॽमिचि यो मान्ठाभनॆ होइक खेपा टाऎ सिखॆॽमॆ खानावाँऎ खोचि माङ्स लॆःॽमा हेसुचिनि, टर खोचि निवाँहाङ् नुङ् खिरिस्टमि याटाङ्पा लिमानुङ् पारभु नुङ् सोरि एबङ् निङ्ढारि हाङ्डाम् लॆटःक्मि। साइटान हेचाइमिम्पा 7 एबङ् निङ् लुक्खॆहाङ् आक्क हिक्मिम्पा साइटान लेॽहाङ्। 8 आक्क डॆङ्पि खो बाखाटेम्पिहा चोब्न जाटि जाटिबिहा याॽमिचि फोप्सिॽमाम् लागि खॆ। आक्खा जाटि जाटिबिहा याॽमिचि गोग नुङ् मागोग लोकुचि। साइटानऎ खोचि एक्क निवाँ लिमानुङ् खिमामि लागि एक्क ठालबि खोमुकुचिमि। हाङ् खोचि हङ्माबिऎ बालुवा रकॆन ङेप्मान हेनिऎ लिक्मि। 9 हाङ् खोचि चोब्न बाखाटेम्पि खारामि हाङ् निवाँहाङ्मि याॽमिचि हाङ् खोसॆ नाम्नाम् पिसिॽमिम्पा हाटा बुःप्खॆटुचि। टर पारुबाङ् मिः हेरा हाङ् आक्खाचि लुक्पिटुचिमि। 10 आक्क डॆङ्पि जाटि जाटिबिहा याॽमिचि फोब्सिखुबा आक्क साइटान सङ्क निवाँखाटॆखुबाऎ आक्क पोसु नुङ् निवाँहाङ्मि हुन्नऎ खानावाँ लोखुबा मिः नुङ् गान्ढाक्बि कहाङ्सु। आक्कुबि खोचिऎ लेन्टा सेन्टा हानाम्स एट्टान डुखा आङ्मा सिः। सिखॆम्पाचिमि न्यायॆ लिमिम्पा 11 मबाङ् काङॆ एक्क ढ्या बिऎ हाङ्पेन्ठाम ठाल नुङ् आक्कुबि पेन्खुबा खाङुङ्। खोम् ङारिङ्बाङ् बाखाटेम् नुङ् नाम्फलिॽवा माखारा हाङ् आक्क हानाम्स माखाङुमुसा। 12 हाङ् काङॆ सिखॆॽमिम्पा टुङ्घङ्पाचि नुङ् मिःछुपाचि चोब्न आक्क हाङ्पेन्ठाम् ठालमि कॆक्पि येप्मिम्पा खाङुङ्चि। आक्कुबि होइढा साब्चिरा नुङ् हिङ्खामाबि साब्चिरा सङ्क हेन्बक्मिम्पा लॆटा। याॽमिचिऎ हिङ्खामाबि यिक्मिम्पा योम्पक्मि बारेबि आक्क साब्चिराबि साप्भुङ्मिम्पा खानावाँ आनुसारन आक्खा चोब्न सिखॆॽमिम्पा याॽमिचिमि न्यायॆ लिसा। 13 हाङ् पॆरॆरॆमाबि चुःक्मिहा सिखॆॽमिम्पाचि पॆरॆरॆमाऎ ऎनु हाङ् सिखॆॽमानुङ् बाखाटेम्पिहा येःॽमाबि चुःक्मिहाचि सङ्क आक्कबाङ् एन्पकामि हाङ् निवाँहाङ्मि ङारिङ्पि येबामि हाङ् खोचि बाखाटेम्पि हिङ्चामार मान्टहाङ् पाइटामिहा म रक्न खोचिमि न्यायॆ लिसा। 14-15 हिङ्खामामि साब्चिराबि निङ् माआमिहा चोब्न याॽमिचि मिःमि गान्ढाक्पि कॽहाङ्मा खाइहाङ्चाआमि। आक्क डॆङ्पि सिखॆॽमॆ लोमॆ खानावाँन मान्लि मान्ठाभनॆ गग कहाङ्मिम्पा लॆटा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.