सेन्चि 19 - लोहोरुङ्हेचामिम्पाबि पारुबि साम् 1 मबाङ् काङॆ पारुबि डिरिक् याॽमिचिमि रक्मान ढ्या साम्लाऎ गरहाङ् लोमिम्पा खेमुङ्, “निवाँहाङ्मि निङ् सङ्पि लिर, याॽमिचि हिङ्चामिक्खुबा खोन, खोमि निङलावा लिर हाङ् खो चॆक्मावा नुङ्मा लॆ। 2 मान्ठाभनॆ खोसॆ लॆःॽमिम्पा न्यायॆ चाइबानऎ नुङ् नुऎ लॆ। बाखाटेम्पिहा याॽमिचि ब्याबिचारा लॆःॽमॆ योम्पक्पि टिखुबा आक्क ब्याबिचारा लॆखुबा मेॽनुङ्मा खोसॆ न्यायॆ लॆडु। आक्क हाटाबिहा याॽमिचिऎ निवाँहाङ्मि योम्पक् मुखुबाचि सेॽमिम्पा लॆटुचि मसॆ निवाँहाङ्ऎ ग हाटा डान्डा पिडु।” 3 हाङ् खोचि होइखेपा सङ्क गरहाङ् याकासामि, “निवाँहाङ्मि निङ् सङ्पि लिर। आक्क ढ्या हाटा हिड्ढिङ्खॆॽमिम्पा मॆक्खुमा हानाम्स मिट्टु खॆड्ढाङ्।” 4 हाङ् आक्खा हिपङ्रि टुङ्घङ्पाचि हाङ् आक्खा रिचि वटा हिङ्चाक्मिहा पारानिचि हाङ्पेन्ठाम् ठालबि पेन्डॆ निवाँहाङ् हुहु पोप्मानुङ् स्यामिटुचिहाङ् गर कासामि, “आमेन, निवाँहाङ्मि निङ् सङ्पि लिर।” सामुङ्मि भ्यामि भोजा 5 हाङ् हाङपेन्ठाम् ठालबाङ् एक्क गरक्मा ढ्या साम्ला टाआ, “ओ निवाँहाङ्मि योम्पक् मुखुबाचि, खोम् योम्पक् मुखुबाचि, खोमि किसिमाबि पेन्खुबाचि हाङ् टुङ्घङ्पा हाङ् मिःछुपा याॽमि चोब्पासॆ कानिम् निवाँहाङ्मि निङ् ठेराम्नॆ।” 6 मबाङ् काङॆ डिरिक् याॽमिचिमि साम्ला आठावा हङ्मा अङ्मिम्पा रक्मा हाङ् नाम्टुरुङ्मामि रक्मा साम्लाऎ गर लोमिम्पा खेमुङ्, “निवाँहाङ्मि निङ् सङ्पि लिर मान्ठाभनॆ कानिम् चोप्बाङ चॆकुवॆ पारभु निवाँहाङ्ऎ हाङ्डाम् लॆकु। 7 ह कानि चेन्चाइऎ हाङ् हाङ्हाङ् मिनिऎ हाङ् खोमि निङ् ठेरुम्ये, मान्ठाभनॆ ग चाइ सामुङ्मि भ्यामि भोजामि लः रेम हाङ् खोम् डाङ्माऎ टाङ्पॆ टाङ्पान परक्खॆॽमिडु। 8 हाङ् आक्क डाङ्माऎ चाङ्मामि लागि निवाँहाङ्ऎ बिऎ, ओऎ हाङ् माङ्स माठुटिऎ चे पिडु।” आक्क चेऎ लोमा यकुवॆ खानावाँ चाइ निवाँहाङ्मि सॆङ्सॆङॆ याॽमिचिम् निवाँनेन योम्पक यो। 9 हाङ् निवाँखाटॆखुबाऎ काङा गर लोसिङ्, “ग खानावाँ साबॆ, सामुङ्मि भ्यामि भोजाबि सेःॽमिम्पा याॽमिचि आसिका टक्चामिम्पाचि यो।” आक्कसॆ होइखेपा सङ्क काङा गर लोसिङ, “ग चाइ निवाँहाङ्मि चाइबानऎ खानावाँ यो।” 10 हाङ् काङा उम् लाङ्पि स्यामिसि हुहु पोबिङ्, टर खोसॆ काङा गर लोसिङ, “गर आलॆटॆ, आनॆ ग निवाँहाङ् टेःॽन चुङ्मा लॆ। काङा सङ्क टाङ्पॆ येसुबि लॆःॽमिम्पा निवाँयुङ्मि चुमॆक्सङ् पिक्खुबा आना हाङ् आनामि बुबुनानुसाचि रक्मान निवाँहाङ्मि योम्पक् मुखुबाङा। मान्ठाभनॆ निवाँहाङ्मि चाइबानऎ खानावाँ लोखुबाऎ लोमा यकुवॆ खानावाँ सङक् येसुमि बारेबिॽन यो।” येसुऎ पोसु हाङ् निवाँहाङ्मि हुन्नऎ खानावाँ लोखुबा हेचामिम्पा 11 हाङ् काङॆ पारु हेम्बॽमिम्पा खाङुङ् हाङ् आक्कुबि एक्क बिःऎ अन्युक येप्ढाङ्मिम्पा लॆटा। हाङ् आक्क सक्पि ठाङ्खुबामि निङ् चाइ निवाँयुङ्ऎ हाङ् चाइबानऎ लॆटा मान्ठाभनॆ खोसॆ चाइ काम्नुःर न्यायॆ लॆकु हाङ् निवाँनेन् लाम्फुबाङ् खिमॆ योम्पक् यिगुकु। 12 खोम मिक् मिः रक्मा हाखुबा लॆटा हाङ् खोसॆ निङ्टवाँबि डिरिक् मुकुट खाम्मिम्पा लॆटु। हाङ् खोम् सालुङ्पि एक्क निङ् साप्मिम्पा लॆटा। आक्क निङ्ऎ लोमा यकुवॆ खानावाँ चाइ खोसॆ टेःॽन लेॽयुक्सु। 13 खोसॆ ग हारिबि रुम्मिम्पा चेः चाङ्मिम्पा लॆटु हाङ् खोम् निङ् चाइ “निवाँहाङ्मि खानावाँ” लोमॆ लॆटा। 14 हाङ् बिःऎ, ओऎ हाङ् माङ्स माठुटिऎ चेः चाङ्मिम्पा पारुबिऎ टिलिङ्गाचि बिऎ अन्युक्पि ठाङामिहाङ् खोम् डॆङ्डॆङ् लङ्पकामि। 15 हाङ् बाखाटेम्पिहा जाटिचि हेचामामि लागि खोम् याबाङ् एट्टान येम्कुवॆ फेया आम्पक्मिम्पा लॆटा। खोसॆ आक्खा याॽमिचि सक्पि एट्टान चॆकुवॆ लिमानुङ् हाङ्डाम् लॆकु हाङ् खोसॆ आक्खा याॽमिचि आङ्गुर पुब्ठाम् ठालिबि आङ्गुर पुब्मिम्पा रक्न चॆकुवॆ निवाँहाङ्मि सिरिऎ पुबुकुचिमि। 16 हाङ् खोम् चेः नुङ् खोम् नाराक्पि “हाङ्चिमि सङ्क हाङ् नुङ् पारभुचिमि सङ्क पारभु” कामानुङ् साप्मिम्पा लॆटा। 17 हाङ् काङॆ एक्क निवाँखाटॆखुबा नाम्बि येप्मिम्पा खाङुङ्। आक्कसॆ नाम्फलिॽवाबि पेमिहा चोब्न सँवाँचि गरहाङ् याकामिम्पा खेमुङ्, “आन्ना टाआनॆहाङ् निवाँहाङ्ऎ टिडुवॆ ढ्या भोजाबि खोम्टिखारानॆ। 18 आक्कबि आन्नॆ हाङ्चिमि, टुङ्घङ्पाचिमि, चॆकुचिहा याॽमिचिमि हाङ् अन्युक्मि, अन्युक्बि ठाङ्खुबाचिमि हाङ् योम्पक् मुमामि लागि हिःक्टिखॆॽमिम्पा हाङ् योम्पक्मि लागि ऎहिक्टिखॆॽमिम्पाचिमि हाङ् टुङ्घङ्पाचि हाङ् चोब्नमि सा चाकाम्नि।” 19 मबाङ् काङॆ पोसु हाङ् बाखाटेम्पिहा हाङ्चि नुङ् उम्चि टिलिङ्गाचि खाङुङ्चि। खोचि चोब्न आक्क अन्युक्पि ठाङ्मिम्पा हाङ् खोमि टिलिङ्गाचि नुङ् खिमामि लागि खोम्टि खारामि। 20 टर बिइमा अन्युक्पि ठाङ्खुबाऎ पोसु नुङ् आक्कमि निङ्पि निवाँहाङ्मि हुन्नऎ खानावाँ यामुखुबा लाबु। आक्क निवाँहाङ्मि हुन्नऎ खानावाँ लोखुबाऎ आक्खॆॽमा लुहा योम्पक यिक्मानुङ् आक्क पोसुमि लायुङ् टक्चाखुबा हाङ् आक्कमि मुर्टि चुङ्खुबा याॽमिचि फोप्सिॽमिम्पा लॆटुचि। बिइमा अन्युक्पि ठाङ्खुबाऎ पोसु नुङ् आक्कमि निङ्पि निवाँहाङ्मि हुन्नऎ खानावाँ यामुखुबा हिङ्चाभॆट्टाचि रक्न मिःमि गान्ढाक्पि कहाङ्सुचिमि। 21 हाङ् आक्खाचिमि टिलिङ्गाचि चाइ अन्युक्बि ठाङ्खुबामि याबाङ् आम्पडॆ फेयाऎ बक्सिखारामि हाङ् चोब्न सँवाँचिऎ उम्चि सा बखार चाउचि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.