सेन्चि 18 - लोहोरुङ्बेबिलोन हाटा लुक्खॆॽमिम्पा 1 आक्क डॆङ्पि काङॆ पारुबाङ् युमॆ पाइमिम्पा होइक निवाँखाटॆखुबा खाङुङ्। खोनुङ् ढ्या ढुप्पाट्ट चुआ। खोमि निङ्लावाऎ बाखाटेम् उजेल मुसु। 2 हाङ् आक्क निवाँखाटॆखुबा ढ्या साम्लाबि गर कासा, “ढ्या हाटा बेबिलोन नासॆलिसा। ह आक्क हाटा ग चाप्चि पेन्मॆ ठाल लिसा। आक्कुबि ग चोब्न खालाह काइसाहा लावा पेनुक्मि। हाङ् चिःक्सिमा लुहा सवाँचि पेनुक्मि। हाङ् चोब्न खालाहा काइसाहा हाङ् सिच्चामा लुहा पोसुचि पेनुक्मि” 3 “मान्ठाभनॆ बाखाटेम्पिहा चोब्न जाटिबिऎ याॽमिचि आक्कमि ब्याबिचारा लॆःॽमॆ योम्पक्ऎ निवाँ बुप्खॆडुचि। बाखाटेम्बिहा हाङ्चिऎ खोनुङ् ब्याबिचारा लॆःडुचि हाङ् उम्चि एट्टान डिरिक् याङ् सिहा खानावाँ याङ्मॆ निवाँ लिबिॽमिम्पासॆ बाखाटेम्पिहा बेप्पारिचि चासुम्टाङ्पा लिसामि।” 4 आक्क डॆङ्पि काङॆ पारुबाङ् होइक गर लोमिम्पा साम्ला खेमुङ्, “काङा टिङ्खुबा याॽमिचि, आन्ना आक्क हाटाबाङ् आम्पकानॆ। हाङ् आक्क हाटाबिहा याॽमि रक्न हिङ्वा आलॆटानॆ। हॆॽनॆ हाङ्ग आन्नॆ सङ्क खोचिऎ टक्चामॆ डान्डा टक्चाकाम्नि। 5 मान्ठाभनॆ आक्क हाटामि हिङ्वा डिरिक् लिडाहाङ् पारुढारि टाखॆडा। हाङ् निवाँहाङ्ऎ आक्कमि चोब्न काइसॆ योम्पक् मिॽलाडु। 6 बेबिलोन हाटाबिहा याॽमिचिऎ होइढा याॽमिचि सक्पि मान्टहाङ् पाइटामिहा आक्क हाटाबिहा याॽमिचि नुङ् आक्रहाङ्न काइर लॆटाम्चिनॆ। आक्क हाटाबिहा याॽमिचि होइढा याॽमिचि लॆःॽमिम्पाबाङ्स एट्टान काइर लॆटाम्चिनॆ। खोचिऎ मान्टहाङ् होइढा याॽमिचि काइर लॆटुचि आक्कबाङ्स एट्टान काइर लॆटाम्चिनॆ। 7 आक्क हाटाऎ टाङ्पाटाङ्पॆन मान्टहाङ् निङ्लावा लासु हाङ् टाङ्पामि निवाँ रक्न हिङ्चाआ मरहाङ्न खो डुखा हाङ् मिॽवा पिट्टॆ। मान्ठाभनॆ खोसॆ खोम् निवाँबि ‘काङा ग हाङ्टाङ्माङाये का काङा लाङ्मिॽमा हॆॽङानॆ हाङ् काङा हानाम्स डुखा सिॽङानि।’ 8 मसॆ खो सक्पि इॽयाक्पिॽन किॽमालुऎ डुखा टा। आक्रलन आक्क हाटाबिहा याॽमिचि सिखॆॽमा सिःक्मि हाङ् खोचि हाःब्मॆ नुङ् साक्मॆन्चा पेन्माबि सिःक्मि। हाङ् आक्क हाटा मिःऎ हिक्खॆ। मान्ठाभनॆ आक्क हाटा न्यायॆ लॆखुबा पारभु निवाँहाङ्ऎ एट्टान चॆकुवॆ लॆ। 9 “हाङ् बाखाटेम्बिऎ बेबिलोन हाटाबि ङेसिमा लुऎ योम्पक् यिक्खुबा हाङ् आक्क हाटाबिहा याॽमिचि नुङ् चेन्चाखुबा हाङ्चिऎ आक्क हाटाबि लागालिमिम्पा मिःबाङ् आम्पक्डॆ मॆक्खुमा खाङुचिहाङ् हाःबुक्मि हाङ् निवाँ टुगुक्मि। 10 खोचि आक्क हाटाऎ आङ्मिम्पा डुखा नुङ् किसिॽमिहाङ् मिउन येॽमानुङ् गरहाङ् काग्मि, ‘एट्टान डुखा, आना ढ्या हाङ् एट्टान चॆकुवॆ बेबिलोन ग एच्छक्पि लुक्खाराना!’ 11 “खाबाटेम्पिहा चोब्न बेप्पारिचि निवाँ टुक्मानुङ् हाबुक्मि मान्ठाभनॆ ह उम्चि कॽनाम् आसॆस इनुचिनि। 12 आक्खाचिम् फिइया, सि, राट्ना, मोटि हाङ् काम्नुहा काम्नुहा हारमक्मक्हा चे नुङ् डिरिक् याङ् सिहा चेः हाङ् नाम्नुहा सिङ्बाङ् मुमिम्पा कॽनाम नुङ् हाट्टिमि कॆङ्बाङ् मुमिम्पा कॽनाम्, कासा हाङ् चॆक्चि हाङ् सिङगमारमार इनुचिनि। 13 हाङ् खोचिमि डालाचिनि, नाम्नुऎ मासाला, ढुपा, मुर्रा, बिःऎ ढुपा, डुङ्मॆ ठका, जाइटुनमि केवा, खाॽमिक, सिचाम् हाङ् साँवाँ नुङ् सामुङ्चि, अन्युक्चि, अन्युक्ऎ सॆनुकुवॆ बग्, योम्पक् मुखुबाचि हाङ् याॽमिचि आसॆस इनुचिनि। 14 मसॆ आक्खा बेप्पारिचिऎ गर लोकुचि, ‘आनॆ टक्चामाहा काम्नुहा खानावाँ माइटुना। हाङ् आनामि चासुम नुङ् ङेःॽमिम्पा निङ् सङक् बाखाबिन माखारा। हाङ् आक्खा खानावाँ आनॆ हानाम्स टक्चाउनानि।’ 15 “आक्क हाटाबि बेप्पारा लॆःॽमानुङ् चासुम्टाङ्पा लिमिम्पाचि आक्क हाटा सक्पि टाडॆ डुखा नुङ् किसिमानुङ् मिउन येबुक्मिहाङ् निवाँ टुक्मानुङ् गर कासे हाबुक्मि, 16 ‘ग हाटामि लागि ग एट्टान डुखामि लः टाआ! आना काम्नुहा सुटि, हार्रापाहा हाङ् हारमक्मक्हा चेः चाङ्खुबा काम्नुऎ मेॽनुङ्मार लॆटाना। हाङ् फिःइया, ओइर याङ् सिहा लुङ्कॽवा नुङ् मोटि वॆयुक्साना। 17 एच्छक्पि आक्क हाटाबि चुऎ चासुम् लुक्खारा।’ बेप्पारा लॆखुबाचि, योवाखङ्मि टुङ्घङ्पाचि। “योवाखङ् फॆक्खुबाचि नुङ् आक्कसक्पि ठाङ्खुबाचि मिउन येबामि। 18 हाङ् खोचिऎ आक्क हाटा माक्खॆडॆबाङ् आम्पडॆ मॆक्खुमा खाङुचिहाङ् गरहाङ् कासामि, ‘गरक्मा ढ्या हाटा ग हाबिसु मान्चु!’ 19 खोचि निवाँ टुक्मिम्पा खानावाँ खाङ्मिॽमाम् लागि उम्चि निङ्टवाँबि बाखा वेनुचिहाङ् हाब्से गर कासामि, ‘ग हाटाबि एट्टान डुखा टाआ। योवाखङमि टुङ्घङ्पाचि ग हाटाबिऎ चासुम्बाङ्न चासुम्टाङ्पा लिसामि। टर एक्छक्पि इग चोब्न लुक्खारा!’ 20 हाङ् आन्ना पारुबि पेन्खुबाचि बेबिलोन हाटा सक्पि सिडॆ डुखाबि चेन्चाआनॆ। आन्ना निवाँहाङ्मि सॆङ्सॆङॆ याॽमिचि हाङ् निवाँहाङ्मि खानावाँ लोखुबाचि, हाङ् सॆःक्ढुङ्पाचि ह चेन्चाआनॆ मान्ठाभनॆ बेबिलोनबिहा याॽमिचिऎ आन्ना माङ् लॆटानि निवाँहाङ्ऎ खोचि आक्कमि डान्डा पिडुचि।” 21 मबाङ् आक्कुबि एक्क चॆक्मावा नुङ्मा निवाँखाटॆखुबाऎ एक्क ढ्या यिःॽलुङ् रक्मान लुङ्कॽवा ठेरुहाङ् पॆरॆरॆमाबि कक्से गर लोसु, “गरहाङ्न ढ्या हाटा बेबिलोन वेन्ढाङ् हाङ् आक्क हानाम्स खाङ्मुनि, 22 हाङ् साराङ्गि, साम् इखुबाचिमि साम्ला, बाँसुरि नुङ् पॆँपॆँलिमामि साम्ला ह फेरि ग हाटाबि हानाम्स खेम्टॽनि। हाङ् हुगॆ डुःक्मॆ योम्पक् मुखुबाचि आनाबि हानाम्स लिमिनि। हाङ् आक्कुबि होइखेपा सङ्क यिःॽलुङ् यिःक्मिम्पा साम्ला हानाम्स टानि। 23 हाङ् ओप्लिङ्मि उजेल ग हाटाबि हानाम्स हानि। हाङ् डाङ्पा नुङ् डाङ्माचिम् साम्ला आनाबि खेम्टाॽनि। ग हाटाबिहा बेप्पारा लॆखुबाचि बाखाटेम्पि डिड्ढा लॆटानि हाङ् ग हाटाबिहा याॽमिचिमि चाटक्ऎ बाखाटेम्पिहा चोब्न याॽमिचि फोप्सिटुचि। 24 निवाँहाङ्मि खानावाँ लोखुबाचि, निवाँहाङ्मि सॆङ्सॆङॆ याॽमिचि हाङ् बाखाटेम्बिहा चोब्न याॽमिचि सेॽमिम्पासॆ ग हाटा निवाँहाङ्ऎ डान्डा पिडु।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.