सेन्चि 17 - लोहोरुङ्मॆॽनुङ्मा हाङ् पोसु 1 हाङ् आक्खा वाङ्चि खरॆ खिन्खुबा निवाँखाटॆखुबाचिबाङ् एक्क काङामि कॆक्पि डाबाहाङ् लोसिङ, “डाबॆ, काङॆ आक्क एट्टान ब्याबिराचा लॆखुबा मेॽनुङ्मा निवाँहाङ्ऎ मान्टहाङ् डान्डा पिकुवॆ लोमॆ आना खाङ्मिना। आक्क ब्याबिचारा लॆखुबा मेॽनुङ्मा चाइ ओइर हङ्मा कॆक्पि चुऎ हाटा रेम। 2 बाखाटेम्पिहा हाङ्चिऎ आक्कनुङ् ब्यभिचारा लॆडामि। हाङ् बाखाटेम्पिहा याॽमिचि खोमि ब्यभिचारामि योम्पक्ऎ सेइङ्खॆडामि।” 3 हाङ् काङा सॆङ्सॆङॆ लावाऎ चेप्खॆटिङ् हाङ् निवाँखाटॆखुबाऎ आसास पेन्मिनिहा ठालबि चिखॆटिङ। हाङ् काङॆ आक्कुबि वाङ्चि निङ्टवाँ नुङ् एपङ् टाङ् चुऎ एक्क हार्रापॆ पोसु सक्पि पेन्मिम्पा एक्क मेॽनुङ्मा खाङुङ्। आक्क पोसुमि सालुङ् निवाँहाङ् इचामॆ साम्देन्ऎ डॆक्मिम्पा लॆटा। 4 हाङ् आक्क मॆॽनुङ्माऎ हार्रापॆ हाखुबा चेः चाङ्मिम्पा लॆटा। खोसॆ उम् सालुङ्पि फिःइया, डिरिक् याङ् सिःऎ काम्नुऎ लुङ्कॽवा हाङ् मोटि, वेमिम्पा लॆटा। खोम् हुक्पि ब्याबिचारा नुङ् काइसाहा ङेसिमा लुऎ खानावाँऎ चेप्खॆॽमिम्पा एक्क फिःइयामि खरॆ याङ्मिम्पा लॆटा। 5 हाङ् आक्कमि निढाराबि एक्क चुम्पिम्पा गरक्मा निङ् साब्मिम्पा लॆटा, “ढ्या हाटा बेबिलोन चाइ ब्याबिचारा नुङ् चिक्सिमालुहा योम्पक् यिक्खुबाचिमि आमा रेम।” 6 हाङ् काङॆ आक्क मेॽनुङ्मा निवाँहाङ्मि चुमॆक्सङ्मि लागि हिङ्चामिम्पासॆ याॽमिचिऎ सेॽमिम्पा याॽमिचिमि हारि डुङ्मानुङ् सेङ्खॆॽमिम्पा खाङुङ्। आक्क मेॽनुङ्मा खाङुङ्हाङ् फोफोआक्खॆटिङ्। 7 हाङ् आक्क निवाँखाटॆखुबाऎ काङा गर लोसिङ्, “आना मान्टा फोफोआक्खॆडानॆ? आक्क मेॽनुङ्मा हाङ् आक्क खिन्खुबा वाङ्चि निङ्टँवाँ नुङ् एपङ् टाङ् चुखुबा पोसुऎ लोमा यकुवॆ खानावाँ माङ्रटा लोमॆ कॆ आना लोखाना। 8 आनॆ खाङ्डुनॆ आक्क पोसु याॽल हिङ्चाऎ लॆटा, टर ह ग आक्क माआ। टर आक्क सॆॽलन हप्सिठाम् ठालन माऎ रुम्रुम्पाबाङ् आम्पहाङ् चोब्न लःमि लागि लुक्खॆॽमॆ ठालबि खॆ। हाङ् ग बाखाटेम् सिरिस्टि लिमिम्पा डिनाबाङ् हिङ्खामामि साब्चिराबि निवाँहाङ्ऎ निङ् मासाप्पिमिम्पा याॽमिचिऎ आक्क पोसु खाङुकुचिहाङ् फोफोआक्खॆॽमि मान्ठाभनॆ आक्क पोसु याॽलि हिङ्चामिम्पा लॆटा, टर ह ग आक्क हिङ्चानि, मरहाङ्स आक्क होइखेपा सङ्क ऎन्टा। 9 “ग खानावाँ वाप्माम् लागि निवाँटाङ्पा लिमा लॆ। वाङ्चि निङ्टँवाँऎ लोमा यकुवॆ चाइ आक्क मेॽनुङ्मा पेनुऎ आक्खा वाङ्चि पङ्पङ्मान हाङ् गसॆ वाङ्चि हाङ् लोमॆ सङ्क खाङ्मुकु। 10 ङाचि हाङ्चि लुक्खॆडामि हाङ् एक्कसॆ चाइ हस हाङ्डाम् लॆःॽमॆ पाइकु हाङ् होइक चाइ माटाटि। आक्क टाहाङ् एच्छक्मि लागि टेःॽन हाङ्डाम् लॆकु। 11 याॽलि आक्क पोसु हिङ्चामिम्पा लॆटा, टर गरक्ल आक्क माआ। आक्क ग होइढा वाङ्चि हाङ्बाङ्ऎ एक्क बाङ्चि हाङ् रक्मान रेम। खो सङ्क लुक्खॆ। 12 “हाङ् आनॆ खाङ्मिम्पा पोसुमि आक्खा एपङ् टाङ् चाइ एपङ् हाङ्चि रेम। खोचिम् हाङ्डाम् हढारि माटाटि। आक्खा एपङ् हाङ्चिऎ सङ्क आक्क पोसुनुङ्न एच्छक्मि लागि हाङ्डाम् लॆःॽमॆ ढुप्पाट्ट लॆकुचि। 13 हाङ् आक्खा एपङ् हाङ्चिऎ एक्क निवाँ चुबिकुचि हाङ् उम्चि चॆक्मावा नुङ् ढुप्पाट्ट म पोसु पिकुचि। 14 हाङ् आक्क पोसु नुङ् एपङ् हाङ्चि सामुङ् नुङ् खिक्मि, टर सामुङ्ऎ आक्खाचि हेचाकुचि मान्ठाभनॆ खो चाइ पारभुचिमि सङ्क पारभु हाङ् हाङ्चिमि सङ्क हाङ् यो। हाङ् खोनुङ् खोसॆ सेःॽमिम्पा, सॆःक्मिम्पा हाङ् निवाँयुङ्मा खोम् याॽमिचि लिक्मि।” 15 हाङ् निवाँखाटॆखुबाऎ काङा गर लोसिङ, “आनॆ खाङ्मेसिकुनॆ आक्क ब्याबिचारा लॆखुबा मेॽनुङ्मा पेन्मिम्पा डिरिक् हङ्माऎ चाइ बाखाटेम्पिहा चोब्न जाटिचि हाङ् खाप्पिहा याॽमिचि लोमॆ खाङ्मुकु। 16 हाङ् आनॆ खाङ्डुनॆ हार्रापॆ पोसु नुङ् आक्कमि एपङ् टाङ्ऎ आक्क ब्याबिचारा लॆखुबा मेॽनुङ्मा सिच्चाकुचि। खोचिऎ आक्क ब्याबिचारा लॆखुबा मेॽनुङ्मामि चोब्न खानावाँ ङाबुकुचि हाङ् आक्क चासियाम्पा मुकुचि हाङ् आक्कमि सा चाकुचि हाङ् मिःबि हिठ्ठाङ्कुचि। 17 मान्ठाभनॆ निवाँहाङ्ऎ खोम् निवाँ आनुसारा योम्पक् यिक्माम् लागि खोचि पाइमिकुचि। खोचिऎ उम्चि ढुप्पाट्ट आक्क पोसु पिॽमा खासिक्मि। हाङ् निवाँहाङ्मि निवाँबिऎ खानावाँ मालिरढारि खोचिऎ आक्क पोसुमि खानावाँ खेमुकुचि। 18 “हाङ् आनॆ खाङ्डुनॆ मॆॽनुङ्मा चाइ बाखाटेम्पिहा हाङ्चि सक्पि ढुप्पाट्ट लॆखुबा आक्क ढ्या हाटा रेम।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.