सेन्चि 16 - लोहोरुङ्निवाँहाङ्मि सिरिमि वाङ्चि खरॆ 1 हाङ् निवाँहाङ्मि खिम्बाङ् आम्पक्मिम्पा ढ्या साम्लाऎ आक्खा वाङ्चि निवाँखाटॆखुबाचि गर लोमिम्पा काङॆ खेमुङ, “खारानॆ, हाङ् निवाँहाङ्मि सिरिमि वाङ्चि खरॆ बाखाटेम्पि होसाम्नॆ।” 2 मबाङ् याॽलऎ निवाँखाटॆखुबाऎ निवाँहाङ्मि खिम् याइमानुङ् खाइटा हाङ् खोसॆ खोमि खरॆ बाखाटेम्पि होसु। आक्क डॆङ्पि आक्क पोसुमि चिन्ना चुखुबा हाङ् खोम् मुरटि चुङ्खुबा चोब्न याॽमिचिमि सालुङ्पि चिःक्सिमा लुहा एट्टान किॽमालुहा टुगुहा हुवा आम्पकाहाङ् चोब्न टुक्सिखारामि। 3 मबाङ् होइक हिच्चि निवाँखाटॆखुबाऎ खोम् खरॆ पॆरॆरॆमाबि होसु हाङ् पॆरॆरॆमाबिऎ योवा सिखॆॽमिम्पा याॽमिमि हारि रक्मान लिसा हाङ् पॆरॆरॆमाबि चुहा चोब्न पारानिचि सिखारामि। 4 हाङ् होइक सुम्चि निवाँखाटॆखुबाऎ खोम् खरॆ हङ्मा नुङ् योवा पिपक्मॆ ठालबि होसु हाङ् आक्खा सङ्क चोब्न हारिन पिक्खारा। 5 मबाङ् योवाबि ढुप्पाट्ट लॆखुबा निवाँखाटॆखुबाऎ गर लोमिम्पा कॆ खेमुङ, “ओ निवाँहाङ् आना सॆङ्सॆङॆ लॆःक्ना, आना ह सङ्क चुःक्ना हाङ् डॆङ्पि सङ्क लिःक्ना। आनॆ काम्नुःर न्याय लॆकुना, मान्ठाभनॆ आनॆ लॆःॽमिम्पा इघा न्याय नुऎ लॆ। आना ह चुःक्ना हाङ् याॽलि सङ्क चुआना। 6 खोचिऎ आनामि सॆङ्सॆङॆ याॽमिचिमि नुङ् निवाँहाङ्बाङ् यामुखुबा याॽमिचि सेॽमिम्पा लॆटुचि मसॆ आनॆ आक्खा याॽमिचि हारि डुङ्मिटुचिना आक्क चाइ खोचिऎ टक्चामा लॆऎ डान्डान पिट्टुचिना।” 7 आक्क डॆङ्पि युङ्ठङ्बाङ् गर लोमिम्पा एक्क खानावाँ कॆ खेमुङ, “एम, चोब्बाङ् चॆकुवॆ पारभु निवाँहाङ्, आनॆ याॽमिचि लॆकुनॆ न्यायॆ नुऎ हाङ् चाइबानऎ लॆ।” 8 मबाङ् होइक रिचि निवाँखाटॆखुबाऎ खोम् खरॆ नाम् सक्पि होसु हाङ् नाम्ऎ चोब्न याॽमिचि मिऎ रक्न हिॽमॆ चॆक्मावा टक्चाउ। 9 हाङ् ङिमिम्पा नाम्ऎ याॽमिचि एट्टान हिट्टिटुचि। हाङ् गरहा डुखा लाटॆॽमॆ ढुप्पाट्ट खोनुङ् चुआ, टर याॽमिचिऎ उम्चि निवाँ माऎनुचि हाङ् खो निङ्लावा मापिट्टुचि। 10 हाङ् होइक ङाचि निवाँखाटॆखुबाऎ खोम् खरॆ आक्क पोसु पेन्ठाम ठालबि होसु। हाङ् आक्क पोसुमि हाङ्टेम् माॽयाक्टऎ डॆक्खॆटु। हाङ् याॽमिचि एट्टान डुखाबि सिॽमिम्पासॆ कॆङ्न यागुचि। 11 एट्टान टुक्मिम्पा हुवा नुङ् टुक्मावाँ आङ्मिम्पासॆ खोचिऎ पारुबिऎ निवाँहाङ् चाप्हिमा पिट्टुचि टर खोचिऎ काइसॆ योम्पक् यिक्मा मायाइटुचि हाङ् उम्चि निवाँ निवाँहाङ्बि माऎनुचि। 12 हाङ् होइक ठुक्चि निङ्वाखाटॆखाबाऎ खोम खरॆबाङ् युफेरिटिस लोमॆ ढ्या हङ्माबि होसु हाङ् नाम्कॆॽवा पोट्टाबिहा हाङ्चि डाप्हिमिर कामानुङ् आक्क हङ्मान हॆङ्खारा। 13 हाङ् काङॆ आक्क ढ्या पुसॆःॽमा, पोसु हाङ् निवाँहाङ्मि हुन्नऎ खानावाँ लोखुबामि याबाङ् बयक् रक्मान खाङ्मुऎ सुम्चि काइसॆ लावा आम्पक्मिम्पा खाङुङ्। 14 आक्खा लावाचि चाइ आक्खॆॽमा लुहा योम्पक् यिक्खुबा काइसॆ लावा यो। खोचि बाखाटेम्पिहा चोब्न हाङ्चिबि खॆःॽमिहाङ् खोमुकुचिमि हाङ् चोब्बाङ् चॆकुवॆ निवाँहाङ्ऎ खो सिच्चाखुबाचि डान्डा पिकुवॆ डिना खोचि निवाँहाङ् नुङ् खिःक्मि। 15-16 मसॆ आक्खाचिऎ हाङ्चि हिबुरु खाप्पि आरामागेडोन लोमॆ ठालबि खोम्भुङ्सुचिमि। पारभुऎ गरहाङ् लोसु, “खेमानॆ, काङा आन्नॆ मामिॽलाम्पा बेला खुसुबाङ्र टाःॽङा, आसिका टक्चामिम्पा याॽमि आक्क रेम खो हानाम्स परक्ढाङ्खुबार इम्टिखॆॽनि हाङ् काम्नुःर चेः चाङ्मानुङ् चोब्न लःमि लागि परक् मसॆ खो चे मॆड्डिङ् लाम्ढुमा पाब्नि हाङ् ङेसिमाबि सिॽमा पाब्नि।” 17 हाङ् होइक वाङ्चि निवाँखाटॆखुबाऎ खोम् खरॆ हिॽयापाबि होसु हाङ् निवाँहाङ्मि खिम्मि निवाँहाङ् पेन्ठाम ठालबाङ् गर लोमिम्पा एक्क ढ्या साम्ला खेमुङ, “ह लुक्खारा।” 18 आक्क डॆङ्पि नाम्फलिॽवाबि बिजुलि हासा, नाम्फलिॽवाबि नाम्टुरुङ्मा याकासा। हाङ् किॽमालुऎ लुग्डिमा खारा। गरक्मा किॽमालुऎ लुग्डिमा ग बाखाटेम्पि याॽमि सिरिस्टि लिमिम्पा डिनाबाङ् माटामिम्पा लॆटा। 19 हाङ् बेबिलोन लोमॆ ढ्या हाटा सुम्चि लिमानुङ् नासॆलिसा। हाङ् बाखाटेम्पिहा चोब्न हाटा योरिङ्खारा। हाङ् बेबिलोन हाटाबिहा याॽमिचिऎ लॆःॽमिम्पा हिङ्वा योम्पक् निवाँहाङ्ऎ मिॽलापु हाङ् खोसॆ आक्खाचि खोम् सिरिमि खरॆबाङ् डुङ्मिटुचिमि। 20 मसॆ योवाऎ ऎक्मिम्पा चोब्न ठाल हाङ् पङ्पङ्मा माखारा। 21 हाङ् नाम्फलिॽवाबाङ् याॽमिचि सक्पि रिपङ् ठाःक्मार वॆहा डिढ्ढा डिढ्ढा लुङ्कॽवार वॆहा बोम् हेरा। हाङ् आक्क बोम्ऎ याॽमिचि एट्टान डुखाबि सिॽमिम्पासॆ खोचिऎ निवाँहाङ् चाप्हिमा पिप्पकुचि मान्ठाभनॆ आक्क डुखा एट्टान किॽमालुऎ लॆटा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.