सेन्चि 15 - लोहोरुङ्वाङ्चि निवाँखाटॆखुबा हाङ् वाङ्चि किॽमालुऎ खानावाँ 1 मबाङ् काङॆ पारुबि होइक ढ्या हाङ् आक्खॆॽमालुऎ एक्क चिन्ना खाङुङ्। आक्कुबि वाङ्चि निङवाखाटॆखुबाचि चुआमि। खोचि चोब्पासॆ एक्क एक्क डुखा खिन्मिम्पा लॆटुचि। इघा चाइ डॆङ्पिऎ ढ्या डुखा रेम मान्ठाभनॆ इघा डुखा नुङ् सोरि निवाँहाङ्मि सिरि सङक् लुक्खॆपिकु। 2 हाङ् काङॆ मिः नुङ् आइना ठुटिखॆडॆ एक्क पॆरॆरॆमा रक्मा खाङ्सिटुङ्। आक्कमि कॆक्पि म पोसु हाङ् आक्कमि मुर्टि आचुङ्खुबाचि हाङ् आक्कमि निङ्मि नाम्बर टिमा आखासिमानुङ् हेचाखुबाचि येप्ढाङ्पा खाङुङ्चि। निवाँहाङ्ऎ पिॽमिम्पा बिना खोचिऎ याङ्मिम्पा लॆटुचि। 3 हाङ् खोचिऎ गरहाङ् निवाँहाङ्मि योम्पक मुखुबा मोसामि नुङ् सामुङ्मि साम् इसुचि, “चोब्बाङ् चॆकुवॆ पारभु निवाँहाङ्, आनाम् योम्पक् एट्टान ढ्या हाङ् आक्खॆॽमा लुहा लॆ। चोब्न जाटिबिहा याॽमिचिमि हाङ्ना। आनामि चोब्न लाम्फु निवाँनेन् हाङ् चाइबानऎ लॆ। 4 ओ पारभु, आनानुङ् चोब्न याॽमिचि किसिक्मि, चोब्न याॽमिचिऎ आना निङ्लावा पिक्मि, मान्ठाभनॆ आना टेःॽन सॆङ्सॆङॆ लॆःक्ना। चोब्न जाटिबिहा याॽमिचि आनाबि टाःक्मिहाङ् स्यामिःक्मि मान्ठाभनॆ आनामि निवाँनेन् योम्पक् खाङुमुडा।” 5 आक्क डॆङ्पि काङॆ पारुबिऎ निवाँहाङ्मि खिम् हेम्बक्मिम्पा खाङुङ् आक्क चाइ निवाँहाङ् पेनुऎ सॆङ्सॆङॆ ठाल सङ्क लोकुचि। 6 हाङ् आक्क निवाँहाङ्मि खिम्बाङ् वाङ्चि वटा डुखा खिन्खुबा निवाँखाटॆखुबाचि आम्पकामि। खोचिऎ सॆङ्सॆङॆ बिःइमा हाऎ चेः चाङ्मिम्पा लॆटामि। हाङ् उम्चि सॆङ्कॆरॆक्बि फिःइयामि हम्डङ् हिक्मिम्पा लॆटामि। 7 हाङ् आक्खा हिङ्चाखुबा रिचि पारानिचिबाङ् एक्कसॆ चाइ वाङ्चि वटा फिःइयामि खरॆ आक्खा वाङ्चि निङ्वाखाटॆखुबा पिट्टुचि। हाङ् आक्खा खरॆबि हानाम्स हिङ्चाढाङ्ऎ निवाँहाङ्मि सिरि चुआ। 8 हाङ् निवाँहाङ्मि निङ्लावा नुङ् चॆक्मावाबाङ् आम्पक्मिम्पा मॆक्खुमाऎ निवाँहाङ्मि खिम् डॆक्खॆटु। आक्खा वाङ्चि निवाँखाटॆखुबाचिऎ लाटॆॽमिम्पा आक्खा वाङ्चि डुखा मान्लुक्खॆॽरढारि आसास आक्क निवाँहाङ्मि खिम् हङ्सि भॆन्मा माहेसुचि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.