सेन्चि 14 - लोहोरुङ्सामुङ् नुङ् खोम् १,४४,००० याॽमिचि 1 हाङ् काङॆ सामुङ् यारुसालेमबिऎ सियोन पङ्पङ्माबि येप्मिम्पा खाङुङ्। आक्कुबि खोनुङ् १,४४,००० याॽमिचि चुआमि। एक्कसॆ उम्चि निढाराबि सामुङ्मि निङ् हाङ् खोम् आपामि निङ् साप्मिम्पा लॆटुचि। 2 हाङ् काङॆ योवामि छाङ्गा हाङ् पारुबि नाम्टुरुङ्मार काऎ साम्ला खेमुङ्। आक्क साम्ला चाइ डिरिक् याॽमिचिऎ बिना डुब्मिम्पा रक्मान लॆटा। 3 आक्खा १,४४,००० याॽमिचिऎ हाङ्पेन्ठाम् ठाल, रिचि हिङ्चाखुबा पारानिचि हाङ् हिपङ्रि टुङ्घङ्पाचिमि ङारिङ्बि येप्मानुङ् एक्क उम्चङ् साम् इढाङ्मिम्पा लॆटामि। मान्ठाभनॆ बाखाटेम्बाङ् हिङ्पक्मिॽमिम्पा १,४४,००० याॽमिचिऎ टेःॽन आक्क साम् चिन्मिम्पा लॆटुचि हाङ् खोचिबाङ् होइढा आसॆस चिन्मा मान्हेसुचि। 4 खोचिऎ सामुङ् हाबि खॆ खो टिङ्मानुङ् आसा मेॽनुङ्मा नुङ् सङ्क माइम्चाटिऎ एक्क याॽमिऎर टाङ्पा सॆङ्सॆङॆ युङ्डुचि। खोचि चाइ बाखाटेम्बाङ् निवाँहाङ् नुङ् सामुङ्मि लागि इन्मिम्पा हाङ् सङ्टिॽमिम्पा चोब्बाङ् याॽलि सिमिम्पा उम्चा रक्मा याॽमिचि यो। 5 खोचिम् याबाङ् बङ्चामॆ खानावाँ माटा हाङ् खोचि आब्डिक मॆड्डिङ्हाचि लॆःक्मि। सुम्पा निवाँखाटॆखुबाचिमि खानावाँ 6 हाङ् काङॆ एक्क होइक निवाँखाटॆखुबा नाम्फोलिॽवाबि पेढाङ्मिम्पा खाङुङ्। आक्कनुङ् बाखाटेम्पिहा चोब्न जाटि, सामॆक, खाप् हाङ् याॽमिचिम् लागि हानाम्स लिढाङ्ऎ नुऎ खानावाँ चुआ। 7 आक्कसॆ ढ्या साम्लाबि गरहाङ् लोसु, “निवाँहाङ्मि किसिमाबि पेनानॆ हाङ् खोन निङ्लावा पिट्टाम्नॆ मान्ठाभनॆ खोसॆ न्यायॆ लॆःॽमॆ लः टाखॆडा। हाङ् पारु, बाखाटेम, पॆरॆरॆमा नुङ् योवा पिपक्ठाम् ठाल सिरिस्टि लॆखुबा निवाँहाङ् चुङाम्नॆ।” 8 आक्क डॆङ्पि होइक निवाँखाटॆखुबा याॽलऎ निवाँखाटॆखुबा टिङ्से गर कामानुङ् खाङ्मुसा, “ढ्या हाटा बेबिलोन नासॆलिसा, ढ्या हाटा बेबिलोन नासॆलिसा! ग हाटाबिहा याॽमिचिऎ बाखाटेम्पिहा चोब्न जाटिबिहा याॽमिचि उम्चि व्याबिचारमि योम्पक्ऎ डिबुऎ रक्न सेइङ्खॆमिॽमिम्पा लॆटामि।” 9 मबाङ् होइक सुम्चि निवाँखाटॆखुबाऎ आक्खा हिच्चि निवाँखाटॆखुबाचि टिङ्से खाङ्मुसा हाङ् ढ्या साम्लाबि गरहाङ् याकासा, “आसॆ आक्क पोसु नुङ् आक्कमि मुर्टि चुङुकु हाङ् आक्कमि चिन्ना निढारा नुङ् हुक्पि चुबिकु, 10 आक्क सक्पि निवाँहाङ्ऎ खोम् सिरिमि खरॆ होकु हाङ् आक्क याॽमि किॽमालुऎ डान्डा पिकु। हाङ् आक्क याॽमि सॆङ्सॆङॆ निवाँखाटॆखुबाचि नुङ् सामुङ्मि ङारिङ्पि मिः नुङ् गान्ढाक्बि कक्ढाङ्। 11 हाङ् आक्खाचि डान्डा पिॽमामि लागि हामिम्पा मिःमि मॆक्खुबा हानाम्स लुक्खॆॽनि। हाङ् आक्क पोसु नुङ् आक्कमि मुर्टि चुङ्खुबा हाङ् एक्कसॆ टिबिॽमिम्पा आक्कमि निङ्मि चिन्ना चुखुबा चोब्न याॽमिचि चोब्न लःमि लागि लेन्ठासेन्टा डुखाबि सिक्मि।” 12 मसॆॽन निवाँहाङ्ऎ लोमिम्पा खेम्खुबाचि हाङ् येसुबि निवाँयुङ् लॆखुबा चोब्न निवाँहाङ्मि याॽमिचिबि हुङ्चाहिमॆ निवाँ पाबुक्। 13 हाङ् काङॆ पारुबाङ् गरक्मा एक्क साम्ला खेमुङ, “ग खानावाँ साबॆ, हयॆबाङ् मरक् पारभुबि निवाँयुङ् लॆःसे सिखॆखुबा याॽमिचि आसिका टक्चामिम्पाचि रेम।” हाङ् सॆङ्सॆङॆ लावाऎ लोसु, “चाइबान टा, खोचि टाङ्पामि योम्पक्बाङ् नाचाक्मि मान्ठाभनॆ खोचिऎ उम्चि काम्नुऎ योम्पक्मि नाम्याक् टक्चाकुचि।” बाखाटेम्पि चारुङ् खोम्मॆ 14 आक्क डॆङ्पि काङॆ बिइःमा खिन्दुमाबि याॽमिमि पासा रक्मान पेन्ढाङ्मिम्पा खाङुङ्। खोम् निङ्टँवाँबि फिःइयामि मुकुट वेमिम्पा लॆटु हाङ् खोम् हुक्पि येम्कुवॆ काच्चॆ खिन्मिम्पा लॆटु। 15 हाङ् होइक निवाँखाटॆखुबा निवाँहाङ्मि खिम्बाङ् आम्पका हाङ् खिन्डुमाबि पेन्खुबा गरहाङ् याकामानुङ् लोसु, “आनाम् काच्चॆ लासॆ हाङ् चारुङ् खोमॆ मान्ठाभनॆ चारुङ् हॆक्मॆ लः साप्फॆडु हाङ् बाखाटेम्पि चारुङ् टुम्खॆडा।” 16 मसॆ खिन्दुमाबि पेन्खुबाऎ खोम् काच्चॆ हुक्पि याङ्मानुङ् बाखाटेम्पिहा चोब्न चारुङ् खोमु। 17 आक्क डॆङ्पि पारुबि निवाँहाङ्मि खिम्पि होइक निवाँखाटॆखुबा आम्पका। खोनुङ् सङ्क एक्क येम्कुवॆ काच्चॆ चुआ। 18 हाङ्मि सक्पि ढुप्पाट्ट चुखुबा होइक निवाँखाटॆखुबा युङ्ठङ्बाङ् आम्पका। खोसॆ येम्कुवॆ काच्चॆ याङ्खुबा निवाँखाटॆखुबा ढ्या साम्लाबि गरहाङ् लोस, “आनाम् येम्कुवॆ काच्चॆ याङॆ हाङ् बाखाटेम्पिऎ आङ्गुरमि बोटाबाङ् आङ्गुरमि उम्चा खोमॆ मान्ठाभनॆ आक्खा चोब्न टुम्खॆडा।” 19 मसॆ आक्क निवाँखाटॆखुबाऎ खोम् काच्चॆ याङ्मानुङ् बाखाटेम्पिहा चोब्न आङ्गुर हॆगुहाङ् खॆवा लाबक्ठाम् ठालबि टिसु। ग खॆवा लाबक्ठाम् ढ्या ठालबि टिमॆ लोमॆ खानावाँऎ चाइ निवाँहाङ्मि सिरिबि सिॽमॆ लोमिम्पा रेम। 20 हाटाबाङ् बाहिराऎ आङ्गुर यिम्ठाम्पि आक्खा आङ्गुर यिम्मॆ योम्पक् लिसा हाङ् आक्कबाङ् रिकक् किलोमिटारा टक्भॆऎ हारिमि हङ्मान अङा हाङ् ग अन्युक्मि पॆॽलाढारि टाऎ रुम्रुम्पाऎ लॆटा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.