सेन्चि 10 - लोहोरुङ्निवाँखाटॆखुबा हाङ् साखक्मि मिःछुपा साब्चिरा 1 आक्क डॆङ्पि काङॆ होइक एक्क चॆक्मावा नुङ्मा निवाँखाटॆखुबा पारुबाङ् युमॆपाइऎ खाङ्टकुङ्। खो चेःऎर खिन्डुमाऎ डॆक्मिम्पा लॆटा हाङ् खोम् निङ्टवाँबि पाप्पाङ्सुॽवाऎ नॆमिम्पा लॆटा। खोम् ङाचिक् नाम्र हामिम्पा लॆटा हाङ् खोम् लाङ् मिःमि खाँबाँ रक्मान लॆटा। 2 खोसॆ खोम् हुक्पि एक्क मिछुॽमा हेन्मिम्पा साखक्मि साब्चिरा खिन्मिम्पा लॆटु। हाङ् खोसॆ खोम् चुब्ठिङ् लाङ्ऎ पॆरॆरॆमाबि हाङ् बॆङ्सिङ् लाङ्ऎ बाखाटेम्पि सिग्मिम्पा लॆटु। 3 हाङ् आक्क निवाँखाटॆखुबा किबार लॆःॽमानुङ् ढ्या साम्लाबि याकासा। हाङ् खो याकामार नाम्फलिॽवाबि वाङ्चि वटा नाम्टुरुङ्मामि सम्ला टाआ। 4 हाङ् आक्क वाङ्चि वटा नाम्टुरुङ्मामि साम्ला टामा अक्सि आक्कसॆ लोमा यकुवॆ खानावाँ कॆ साब्मा परक्मिम्पा लॆटुङ्, टर काङॆ पारुबाङ् गरक्मा लोमिम्पा साम्ला खेमुङ् वाङ्चि वटा नाम्टुरुङ्मामि साम्लाऎ लोमा यकुवॆ खानावाँ निवाँब्न युङॆ। आक्कसॆ लोमा यकुवॆ खानावाँ आसाबॆ। 5 हाङ् काङॆ पॆरॆरॆमा नुङ् बाखाबि येप्ढाङ्मिम्पा निवाँखाटॆखुबाऎ खोम् चुप्ठिङ् हुक् पारुटु ठेप्पक्डुवॆ खाङुङ्। 6 हाङ् खोसॆ पारु, बाखाटेम् हाङ् पॆरॆरॆमा हाङ् आक्कुबि चुःक्मिहा चोब्न पारानिचि सिरिस्टि लॆखुबा हानाम्स हिङ्चाऎ निवाँहाङ्मि निङ् लासे चुप्लाङ् ठबुहाङ् लोसु, “ह हुङ्मॆ खानावाँन लिनि। 7 बोरु होइक वाङ्चि निवाँखाटॆखुबाऎ खोम् पॆँपॆलिमा डुब्मा ठाबाक्मार, निवाँहाङ्मि खानावाँ लोखुबाचिऎ लोमिम्पा रक्न निवाँहाङ्ऎ मिन्मिम्पा खानावाँ लिमिकु।” 8 हाङ् पारुबाङ् टाडॆ साम्लाऎ काङा होइखेपा सङ्क गर लोसिङ्, “खारॆहाङ् पॆरॆरॆमा नुङ् बाखाबि येप्ढाङ्खुबा निवाँखाटॆखुबामि हुक्बाङ् आक्क हेन्मिम्पा साखक्मि साब्चिरा लासॆ।” 9 हाङ् काङा सङ्क आक्क निवाँखाटॆखुबाबि खारिङ् हाङ् आक्क मिःछुपा साखक्मि साब्चिरा ङागुङ्। हाङ् खोसॆ काङा गर लोसिङ्, “ग लासॆ, हाङ् चाऎ। ग आनाम् याबि वॆॽमा खुडोर लिम्पॆ लि, टर बःक्पि चाइ खिक्खॆ लि।” 10 हाङ् काङॆ निङ्वाखाटॆखुवाबाङ् आक्क मिःछुपा साखक्मि साब्चिरा लासुङ् हाङ् चाउङ्। आक्क काङामि याबि वॆॽमा खुडोर लिम्पॆ लुसा, टर बःक्पि टाआहाङ् चाइ खिक्कॆ लुसा। 11 हाङ् एक्क साम्लाऎ काङा गर लोसिङ्, “आनॆ हस ऎॽवाहा याॽमिचिमि, जाटिचिमि, खाप्पि यामुखुबाचिमि नुङ् हाङ्चिमि बारेबि निवाँहाङ्बाङ् यामुमान लॆःॽना।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.