मारकुस 6 - लोहोरुङ्नासाराटबि येसु निवाँयुङ् मालॆॽमिम्पा ( मट्टि १३:५३-५८ ; लुका ४:१६-३० ) 1 आक्क डॆङ्पि येसुऎ म ठाल याइडाउहाङ् खो पुमिम्पा ठाल नासाराटबि टाआ। खोनुङ् खोम् टिङ्खुबाचि सङ्क खारामि। 2 नाचामॆ डिना येसुऎ याहुडिचि खोम्ठाम् खिम्पि चिन्पकुचि। खोम् खानावाँ खेम्खुबा डिरिक् याॽमिचिऎ आक्खॆसे कासामि, “इघा खानावाँ गसॆ हाम्पा चिनुवॆ हाङ् गरक्मा निवाँ टक्चाउवॆ हाङ् आक्खॆॽमा योम्पक् यिगुकुवॆ? 3 माल् ग आक्क मारियाम्मि पासा सिङ् नुङ् लुङ्कॽवामि योम्पक् मुखुबा हॆॽनॆ? हाङ् याकुब, योसेफ, याहुडा नुङ् सिमोनिचिम् बुबुन हॆॽनॆ? उम् मेॽनुङ्मा नुसाचि सङ्का कानिनुङ्न चुक्मि।” आक्र कासे खोचि येसु नुङ् सोम खेरामि। 4 हाङ् येसुऎ आक्खाचि लोसुचि, “निवाँहाङ्मि खानावाँ लोखुबा खो पुमिम्पा ठाल, उम् याॽमिचि हाङ्खिम् बाहेका होइढा चोब्न ठालबि ङेबुकुचि।” 5 हाङ् येसुऎ एक्क हिप्पा टुक्खाचि सक्पि हुक् युङ्से नुबक्मिॽमॆ योम्पक्बाङ् होइढा चॆक्मावामि योम्पक् मायिगु। 6 हाङ् याॽमिचिऎ निवाँयुङ् मालॆम्पा खाङुहाङ् खो आक्खॆटु। हाङ् येसु गाँवाँ गाँवाँबि चिन्से चिन्से खारा। येसुऎ टिङ्खुबाचि खानावाँ खेम्मिसि पाङ्हाङ्पा ( मट्टि ९:३५ ; १०:५-१५ ; लुका ८:१ ; ९:१-६ ) 7 हाङ् खोसॆ खोम् एपङ्हि टिङ्खुबाचि खोबि सेःरुचिहाङ् खारिॽमाङ्चि लाबक्मॆ ढुप्पाट्ट पिट्टुचि हाङ् हिप्पा हिप्पाबि फागुचिहाङ् पाङ्हाङ्सुचि। 8 खोसॆ आक्खाचि खाइमाबाङ् याॽल लोसुचि, “आन्नॆ एक्क टोम्राङ्बाङ् होइढा लाम्ढुमार पाबुहा चाम्, बॆक्खा हाङ् हम्डङ् याङ् माङ्स आखिनानॆ। 9 “सुःॽमारा चाङानॆ टर चाङ्मिम्पाबाङ् होइढा चे आखिनानॆ।” 10 हस खोसॆ आक्खाचि लोसुचि, “आन्ना हाम्पॆ खिम्पि भॆनुकानि, म गाँवाँ मायाइलढारि आक्क खिम्पिॽन पेनानॆ। 11 हाङ् हाम्पॆ ठालबिहा याॽमिचिऎ आन्ना नुःर मालॆटानि हाङ् आन्नामि खानावाँ सङ्क खेम्मा माखासिमि हाङ्ग खोचि सक्पि डान्डा सिॽल कामानुङ् चुमॆक्सङ्मि लागि आन्नामि लाङ्पिऎ ढुल फाप्पिडाआम्नॆ।” 12 आक्क डॆङ्पि खोचि खारामि हाङ् याॽमिचि आन्नामि हिङ्वाबाङ् ऎम्पकानॆ कामानुङ् लोसुचि। 13 खोचिऎ डिरिक् खारिॽमाङ्चि याॽमिचिबाङ् लाबकुचि हाङ् केवा सिबिॽमानुङ् डिरिक् टुक्खाचि नुबक्मिट्टुचिमि। बाप्टिस्मा पिक्खुबा युहान्ना सॆक्चिम्पि सिॽमिम्पा ( मट्टि १४:१-१२ ; लुका ९:७-९ ; ३:१९-२० ) 14 येसुमि निङ् गॆअङ्मॆअङ् चोब्न फुबम्पासॆ हेरोड लोमॆ हाङ्ऎ सङ्क खोम् निङ् खेमु। ऎॽवा याॽमिचिऎ खोमि बारेबि “बाप्टिस्मा पिक्खुबा युहान्ना सिखॆम्पाबाङ् हिङ्पडा, मसॆ खोसॆ चॆक्मावाऎ योम्पक् यिगुक्” कामानुङ् लोसुचि। 15 टर होइढाचिऎ “खो निवाँहाङ्मि खानावाँ लोखुबा एलिया रेम” लोसुचि हाङ् ऎॽवाचिऎ चाइ “आरॆॽहा निवाँहाङ्मि खानावाँ लोखुबाचि रक्मान एक्क टाडा” लोसुचि। 16 आक्खा खानावाँ खेमुहाङ् हेरोड हाङ्ऎ लोसु, “गग कॆ निङ्टँवाँ डाङ्मिॽमानुङ् सेॽमिॽमिम्पा युहान्ना रेम। आक्क सिखॆम्पाबाङ् हिङ्पडा।” 17-18 मान्ठाभनॆ हेरोडऎ उम् नुसा फिलिपमि खिम्टाङ्मा हेरोडियास भ्या लॆमिम्पा लॆटु। हाङ् बाप्टिस्मा पिक्खुबा युहान्नाऎ “यायेॽमा रक्न नुसामि खिम्टाङ्मा भ्या लॆःॽमा फॆन्नि” लोमिम्पा लॆटु। मसॆ हेरोडऎ खो सॆक्चिम्पि सॆक्ढाङ्पा लॆटु। 19 मसॆ हेरोडियास खोनुङ् सिर्डे याक्चाढाङ्पा लॆटा हाङ् सेॽमिःॽमा मिन्मिम्पा लॆटा, टर माहेमिम्पा लॆटु। 20 मान्ठाभनॆ युहान्ना एक्क निवाँनेन् हाङ् सॆङ्सॆङॆ याॽमि कामानुङ् हेरोड खोनुङ् मान्टमान्ट मिन्युङ्सा, मसॆ हेरोडऎ खो हिङ्चा मिॽमिम्पा लॆटु। युहान्नामि खानावाँऎ हेरोड माङ् लॆःॽमॆ लॆःॽमॆ पिक्खॆयुङ्सा हाङ्स खोम् खानावाँ खेम्मा नेन्चायुक्सु। 21 टर म लः टाआ। इॽया हेरोडऎ खोम् जान्म डिनाबि खोम् खुक्माबि योम्पक् मुखबाचि, डिड्ढा डिड्ढा टिलिङ्गाचि हाङ् गालिलबिहा टुङ्घङ्पाचि सेःरुचिहाङ् ढ्या भोजा टिसु। 22 आक्क भोजाबि हेरोडियासमि साम्सामा टाआहाङ् लाॽलुसाहाङ् हेरोड नुङ् उम् टाबाङ्चि चेन्चामिट्टुचि। मसॆ हाङ्ऎ खो लोसु, “कानुङ् ङागॆ, आनॆ माङ् ङागुकुना कॆ पिक्खाना।” 23 हाङ् खोसॆ फेरि कासाम् चामा नुङ् लोसु, “आनॆ काङानुङ् माङ् ङागुक्ना, मन पिक्खाना, गरढारि रु काम् हाङ्डाम्मि बारॆक् भाग।” 24 हाङ् खो बाहिरा खाराहाङ् उम्मा सिमु, “कॆ माङ् ङाग्मॆ?” उम्माऎ लोसु, “बाप्टिस्मा पिक्खुबा युहान्नामि निङ्टँवाँ पिॽङॆ” कामानुङ् ङागॆ। 25 आक्क मेॽनुङ्माऎ मरक्लन उम्मा याइडाउहाङ् हाङ्बि टाखॆइट्टा हाङ् लोसु “काङा बाप्टिस्मा पिक्खुबा युहान्नामि निङ्टँवाँ हन एक्क ठालबि पिॽङॆ।” 26 ग खानावाँऎ हाङ् एट्टान डुखा मिना। टर मरलॆॽलि टाबाङ्चिम् लुम्पि पिःॽना कामानुङ् चुप्लाङ् हिक्मिम्पासॆ उम् खानावाँ चेन्मा माहेसु। 27 मसॆ मरक्लन हाङ्ऎ युहान्नामि निङ्टँवाँ लाटॆटॆ कामानुङ् एक्क टिलिङ्गा लोसु। आक्क सॆक्चिम्पि खाराहाङ् युहान्नामि निङ्टँवाँ डाङु, 28 हाङ् एक्क ठालाबि युङ्मानुङ् आक्क मेॽनुङ्माबि लाटॆटु। हाङ् आक्क मेॽनुङ्माऎ उम्माबि लाखॆटु। 29 ग खानावाँ युहान्नामि टिङ्खुबाचिऎ खेमुचिहाङ् खोचिऎ युहान्नामि सिच्चि लाखॆटुचि हाङ् येःॽमाबि युङुचि। येसुऎ ङाबङ् याॽमिचि चामिॽमिम्पा ( मट्टि १४:१३-२१ ; लुका ९:१०-१७ ; युहान्ना ६:१-१४ ) 30 ह सॆःक्ढुङ्पाचि येसुबि ऎन्टाआमि हाङ् खोचिऎ यिक्मिम्पा योम्पक् हाङ् इमिम्पा चोब्न खानावाँ येसु खेम्मिटुचि। 31 डिरिक् याॽमिचि टासे खॆस्से लॆःॽमिम्पासॆ खोचिऎ चामॆ लःढारि माटक्मिम्पासॆ येसुऎ सॆःक्ढुङ्पाचि लोसुचि, “कानि आसास पेन्मिनिहा ठालबि खारियॆ हाङ् एच्छ नाचाइयॆ।” 32 मसॆ खोचि एक्क सिङ्खङ्पि ठाङामि हाङ् खुनिङ्म आसास पेन्मिनिहा ठालबि खाइटामि। 33 टर डिरिक् याॽमिचिऎ खोचि खॆॽमॆ पाइमिम्पा खाङ्टकुचि हाङ् खोचि हाबि खॆॽमॆ पाइमिहा कामानुङ् लेटखॆट्टुचि। हाङ् याॽमिचि चोब्न हाटाबाङ् हिरिरि पिन्टाआमि हाङ् येसु नुङ् सॆःक्ढुङ्पाचिबाङ् याॽलन आक्क ठवाँबि टाखारामि। 34 येसु सिङ्खङ्बाङ् युमार डिरिक् याॽमिचि खाङ्टकुचि हाङ् नाम्नाम् पिसिटुचि मान्ठाभनॆ आक्खाचि कुखुबा मॆड्डिङ्मा सामुङ्चिर लॆटामि। मसॆ खोसॆ आक्खाचि डिरिक् खानावाँ चिन्पकुचि। 35 नाम् डाखॆॽमा परका हाङ् टिङ्खुबाचिऎ येसु लोसुचि, “ह नाम् किक्खॆॽमा ठाबका हाङ् ग ठाल सङ्क आसास पेन्मिनिहा ठाल लॆ। 36 मसॆ इघा याॽमिचि लेहाङ्सॆचॆ हाङ् खोचि गॆअङ्मॆअङ्हा हाटा नुङ् गाँवाँ फेरा खॆःॽमि हाङ् उम्चि लागि चामा इन्चामिर।” 37 येसुऎ आक्खाचि लोसुचि, “आन्नॆॽन इघा याॽमिचि माङ्हाङ्स चामा पिट्टाम्चिनॆ।” हाङ् टिङ्खुबाचिऎ लोसुचि, “गर वेःॽलि याॽमिचिम् लागि चारेपा इन्मा ग काङ्कॆ हिकग् सिःमि याङ् डुब्मा पाप्निहॆ?” 38 खोसॆ आक्खाचि लोसुचि, “खारानॆ हाङ् आन्नानुङ् ऎॽवा चारेपा चुऎ खाङाम्नॆ।” टिङ्खुबाचिऎ खाङुचिहाङ् लोसुचि, “ङाचि चारेपा नुङ् हिच्चि ङा चु।” 39 आक्क डॆङ्पि येसुऎ चोब्न याॽमिचि फिरिरिमा चउराबि खिरिरि पेम्मिटाम्चिनॆ कामानुङ् खोम् टिङ्खुबाचि लोसुचि। 40 मसॆ याॽमिचि एकग् एकग् हाङ् ङापङ् ङापङ् जानाबि फाक्बकामि हाङ् खिरिरि पेनामि। 41 हाङ् खोसॆ आक्खा ङाचि चारेपा याङ्से पारु पोट्टा खाङ्से निवाँहाङ् ओहाक् पिट्टु हाङ् चारेपा योबु हाङ् याॽमिचि हाबिटाम्चिनॆ कामानुङ् टिङ्खुबाचि पिट्टुचि। गरहाङ्न खोसॆ आक्खा ङा सङ्क हाबिटुचि। 42 हाङ् चोप्पासॆ बखार चाउचि। 43 हाङ् येसुमि टिङ्खुबाचिऎ एम्बम्पा चारेपा नुङ् ङामि योप्लिङ्खॆम्पा भाग एपङ्हि बचॽवा खोमुचि। 44 आक्कुबि चाखुबाचि वाठाङ्पाचि टेःॽन ङाबङ् जाना चुआमि। येसु योवा सक्पि लाम्ढुमिम्पा ( मट्टि १४:२२-३६ ; युहान्ना ६:१५-२१ ) 45 हाङ् मरक्लन येसुऎ खोम् टिङ्खुबाचि एक्क सिङ्खङ्बाङ् खोबाङ् याॽलन टोम्पॽलिॽवा मॆआरॆङ् बेठसेडा लोमॆ ठालबि खारानॆ कामानुङ् लोसुचि। आक्रल खोसॆ होइढा याॽमिचि ह खारानॆ लोहाङ्सुचि। 46 आक्खाचि खारानॆ लोहाङ्सुचि हाङ् येसु पङ्पङ्मा पोट्टा पारठाना लॆसि खारा। 47 नाम् किक्खारा हाङ् खोम् टिङ्खुबाचि चाइ टोम्ॽलिॽवाबि सिङ्खङ्बाङ् डिरिक् मॆअङ् टामिम्पा लॆटामि। येसु चाइ हस पङ्पङ्माब्न चुआ। 48 याॽल पोट्टाबाङ् ढ्या हिॽयापा लुमिम्पासॆ टिङ्खुबाचिऎ हेमाहे सिङ्खङ् फॆॽमिम्पा येसुऎ खाङ्ढिन्टु। हाङ् खो पङ्पङ्माबाङ् युढिन्टा हाङ् टोम्पॽलिॽवा सक्पि लाम्ढुसे खोचि पोट्टा टाआ हाङ् येसुऎ टिङ्खुबाचि पाङ्फॆॽमा परम्पा लॆटु। 49 टर खो टोम्पॽलिॽवा सक्पि लाम्ढुम्पा खाङुचि हाङ् चाप् कामानुङ् टिङ्खुबाचि याकाबकामि। 50 मान्ठाभनॆ खोचि चोब्नऎ येसु खाङ्टकुचि हाङ् किसिखारामि। हाङ् मरक्लन येसुऎ लोसुचि, “माङ्स आमिनानॆ, काङान, आकिसिआनॆ!” 51 हाङ् खो टिङ्खुबाचि चुक्मिहा सिङ्खङ्पि ठाङ्खारा हाङ् मरक्लन हिॽयापा लुमा याइखॆटु। ग खाङुचिहाङ् टिङ्खुबाचि फोफो आक्खॆटुचि। 52 मान्ठाभनॆ खोचिऎ चारेपामि खानावाँऎ लोमा यकुवॆ खानावाँ मावाप्मिम्पा लॆटुचि, टर उम्चि निवाँ छाक्कॆ लिमिम्पा लॆटा। 53 हाङ् येसु नुङ् खोम् टिङ्खुबाचिऎ टोम्पलिॽवा पाङ्फॆटुचि हाङ् मॆआरॆङ् गानेसारेट लोमॆ ठालबि टाआमि हाङ् सिङ्खङ् टोम्पॽलिॽवा कॆक्पि युङुचि। 54 खोचि सिङ्खङ्बाङ् आम्पक्मा अक्सि याॽमिचिऎ येसु लेटखॆट्टुचि। 55 हाङ् खोचि गॆअङ्मॆअङ्हा हाटाबि पिन्से खारामि। हाङ् हाबिहाबि येसु चु कामानुङ् याॽमिचिऎ खेमुचि, खोचिऎ टुक्खाचि लिःॽमाराबिन येसुबि टॆटुचि। 56 हाङ् हाम्पॆ हाम्पॆ गाँवाँ, हाटा होइढा ठालबि येसु खॆॽयुक्सा, आक्कुब्न याॽमिचिऎ टुक्खाचि खिन्टॆॽमानुङ् हाटा फेरा युङुचि हाङ् येसु नुःर लोसुचि, “टुक्खाचि आनाम् मिःक्म चे हाङ्स डिन्चामा पिट्टॆचॆ।” हाङ् खोम् चे डिन्चाखुबाचि चोब्न नुबक्युक्सामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.