मारकुस 5 - लोहोरुङ्खारिॽमाङ्ऎ लाॽमिम्पा याॽमि येसुऎ नुबक्मिडुवॆ ( मट्टि ८:२८-३४ ; लुका ८:२६-३९ ) 1 हाङ् येसु नुङ् खोम् टिङ्खुबाचि गालिल् टोम्पॽलिॽवामि मॆआरॆङ् गेरासेनिचिम् ठालबि टाआमि। 2 येसु सिङ्खङ्बाङ् आम्पक्मा अक्सि खारिॽमाङ्ऎ लाॽमिम्पा एक्क याॽमि येःॽमा घारिबाङ् टाआहाङ् येसु चुबु। 3 आक्क येःॽमा फेरान पेन्युक्सा। हाङ् आसॆस खो चॆक्चिमि पाडाक्ऎ सङ्क हिक्भुङ्मा माहेयुङ्सुचि। 4 खो याॽमिचिऎ डिरिक् खेपा चॆक्चिमि पाडाक्ऎ हिक्मिम्पा लॆटुचि हाङ्स खोसॆ आक्खा चोब्न टेॽलाह्ङ्युङ्सु। आसॆस खो टाहाटिमा माहेमिम्पा लॆटुचि। 5 हाङ् गरहाङ्न लेन्टा नुङ् सेन्टा याकासे खोसॆ खोन लुङ्कॽवाऎ डुक्मानुङ् येःॽमा हाङ् पङ्पङ्मा पोट्टा पिन्टियुक्सा। 6 खोसॆ येसु मिउबाङ्न खाङ्टकु हाङ् हिरिरि पिन्डापा हाङ् येसु स्यामिटु। 7 हाङ् ढ्या साम्लाबि गरहाङ् याकासा, “चोब्बाङ् सङ्पिऎ निवाँहाङ्मि पासा येसु, आनॆ काङा माङ् लॆःॽमा परकिङानॆ? काङा डुखा आपिॽङॆ कामानुङ् निवाँहाङ्मि निङ्मि निङ् लाकुङ्!” 8 मान्ठाभनॆ येसुऎ आक्क खारिॽमाङ् आक्क याॽमिबाङ् खाइटॆ कामानुङ् लोमिम्पा लॆटा। 9 हाङ् येसुऎ खो आनाम् निङ् माल कामानुङ् सिमु, आक्कसॆ “काम् निङ् ग फाउज ये, मान्ठाभनॆ काङ्का डिरिक् लॆकिङ्का” कामानुङ् लोसु। 10 हाङ् आक्क खारिॽमाङ्ऎ काङ्का ग ठालबाङ् ऎयिक्हाङ्चिमॆ कामानुङ् लोसु। 11 आक्क पङ्पङ्मा फेरा डिरिक् बाक्चि नोप्चाढाङ्पा लॆटामि। 12 हाङ् आक्खा खारिॽमाङ्चिऎ येसु लोसुचि, “काङ्का आक्खा बाक्चि हङ्सिॽयु पाङ्हाङ्चिमॆ हाङ् काङ्का आक्खाचि हङ्सि भॆन्मिचिमॆ।” 13 खोसॆ आन्ना भॆनानॆ लोसुचि हाङ् आक्खा खारिॽमाङ्चि आक्क याॽमिबाङ् आम्पकामिहाङ् माह् बाक्चि हाङ्सिॽयु भॆनामि। हाङ् हिबङ्र बाक्चि टोम्पॽलिॽवा पोट्टा पियुङ्कामि हाङ् रुम्सि खारामि। 14 हाङ् आक्खा बाक्चि कुखुबाचि आक्कबाङ् पिल्ह्लारामि हाङ् हाटा नुङ् गाँवाँबि ग खानावाँ फुबकुचि। हाङ् डिरिक् याॽमिचि माङ् लिडॆ कामानुङ् खाङ्सि येसु चुऎ ठालबि टाआमि। 15 हाङ् खोचिऎ आक्क याॽमि नुबक्मिम्पा हाङ् चे चाङ्मानुङ् काम्नुऎ निवाँबि येसु नुङ् पेन्ढाङ्पा खाङुचि हाङ् आक्खॆॽमानुङ् किसिखारामि। 16 ग खानावाँ खाङ्खुबाचिऎ आक्क खारिॽमाङ् टुम्सिम्पा याॽमि हाङ् बाक्चि माङ् लिसामिहा लोमॆ खानावाँ होइढा टामिम्पा याॽमिचि इटुचि। 17 हाङ् याॽमिचिऎ येसु ग कानिम् ठालबाङ् खाइपिचिमॆ कामानुङ् नुःर लोबकुचि। 18 येसु सिङ्खङ्बि ठाङ्मा परकार आक्क खारिॽमाङ् टुम्सिम्पाबाङ् नुबक्खुबा याॽमिऎ कास आनानुङ्न लाखॆॽङॆ कामानुङ् नुःर लोसु। 19 टर येसुऎ खो खोनुङ् टामा मापिट्टु हाङ् लोसु, “आम् खिम्पि खारॆहाङ् आनाम् टाङ्पाम् याॽमिचिम् लुम्पि आना सक्पि पारभुऎ लॆःॽमिम्पा ढ्या योम्पक् नुङ् नाम्नावाँमि बारेबि इबिटॆचॆ।” 20 हाङ् खो खाइहाङ्इट्टा हाङ् येसुऎ खोम् लागि लॆपिॽमिम्पा योम्पक् डेकापोलिस हाटाभोरि खेम्मिटुचि। हाङ् खेम्खुबाचि चोब्न आक्खॆटुचि। याइरासमि साम्सामा हाङ् टुक्खा मेॽनुङ्मा ( मट्टि ९:१८-२६ ; लुका ८:४०-५६ ) 21 येसु फेरि सिङ्खङ्बाङ् गालिल टोम्पॽलिॽवा गॆआरॆङ्न ऎम्पका। टोम्पॽलिॽवामि गॆआरॆङ् खोम् कॆक्पि डिरिक् याॽमिचि खोम्टि खारामि। आक्रल येसु चाइ टोम्पॽलिॽवा कॆक्पिॽन चुआ। 22 आक्कबि एक्क याइरास लोमॆ याॽमि चुआ। खो आक्क ठालबिऎ याहुडिचि खोम्ठाम् खिम्पिऎ टुङ्घङ्पाचिबिऎ एक्क लॆटा। खोसॆ येसु खाङ्टॽमा अक्सि टाआहाङ् येसुमि लाङ्पि स्यामिटु। 23 हाङ् नुःर लोसु, “काम् मिःछुॽमा साम्सामा टुक्मावाऎ सिखॆटाडा, टाऎहाङ् आक्क सक्पि आम् हुक् युङ्पिटॆम, मसॆ आक्क नुबक्ल हाङ् हिङ्चार।” 24 हाङ् येसु याइरासनुङ् खारा। हाङ् डिरिक् याॽमिचि सङ्क येसु नुङ् खारामि हाङ् खोम् गॆअङ्मॆअङ् सयक्पयक् लॆटामि। 25 आक्कुबि एक्क मेॽनुङ्मा सङ्क चुआ। खो हारि अङ्मॆ टुक्मावाऎ लाप्मिम्पा एपङ्हि निङ् याक्मिम्पा लॆटा। 26 हाङ् खो सिढा याङ्खुबा डिरिक्बाङ् डुखा आङ्से खोमि चुहा चोब्न चासुम् लुक्पिम्पा लॆटा। टर नुबक्मा ग हॆॽनॆ झाना टुक्पम्पा लॆटा। 27 खोसॆ येसुऎ याॽमिचि नुबक्मिकुचि कामानुङ् खेम्मिम्पा लॆटा। मसॆ खो येसुमि डॆङ्कॽवा पोट्टाबाङ् याॽमिचि नुङ् टाआहाङ् येसुमि चे डिन्चउ। 28 मान्ठाभनॆ खोसॆ उम् निवाँबि “कॆ खोम् चे टेःॽन डिन्चाउङ् हाङ्स नुबॽङा” कामानुङ् मिन्मिम्पा लॆटा। 29 हाङ् आरक्रक्लॽन खोम् हारि अङ्मॆ टुक्मावा नुबक्खारा। हाङ् खोसॆ उम् सालुङ्पि चुहा टुक्मावा नुबॽमिम्पा लेटकु। 30 हाङ् मरक्लन येसुऎ खोबाङ् चॆक्मावा आम्पम्पा लेटकुहाङ् याॽमिचि पोट्टा ऎम्पक्मानुङ् सिमुचि, “आसॆ काम् चे डिन्चाउवॆ?” 31 खोम् टिङ्खुबाचिऎ लोसुचि, “गर डिरिक् याॽमिचि सयक्पयक् लॆःॽमिम्पा ग खाङ्मॆ पाइकुन, हाङ्स मान्टॽल आसॆ डिन्चाइङॆ कामानुङ् काग्नॆ?” 32 टर येसुऎ आसॆ काङा डिन्चाइङॆ कामानुङ् गरमर खाङ्पकु। 33 मसॆ म मेॽनुङ्माऎ टाङ्पाबि लिडॆ खानावाँ लेटकुहाङ् किसिमाऎ यङ्मानुङ् टाआहाङ् येसु स्यामिॽसे चाइबानहा चोब्न खानावाँ इबिटु। 34 हाङ् येसुऎ आक्क मेॽनुङ्मा लोसु, “साम्सामो, आनाम् निवाँयुङ्ऎ आना नुबक्मिडा। ह नुःर खारॆ। आनाम् टुक्मावाबाङ् नुबक्डाना।” 35 येसु यामुभॆॽमा रक्न याहुडिचि खोम्ठाम् खिम्पिऎ टुङ्घङ्पा याइरासमि खिम्पाङ् एक्क हिप्पा याॽमिचि टाआमि हाङ् याइरास लोसुचि, “आनाम् साम्सामा ग सिखारा। ह चिन्खुबा मान्ठा डुखा पिकुनॆ?” 36 टर येसुऎ आक्खाचिम् खानावाँबि निवाँ माटिरे याइरास लोसु, “आकिसिऎ टर निवाँयुङ् टेःॽन लॆटॆ।” 37 हाङ् येसुऎ पाट्रुस, याकुब हाङ् याकुबमि नुसा युहान्नाबाङ् होइढा आसाचि सङ्क खोनुङ् डाब्मा मापिट्टुचि। 38 खोचि टुङ्घङ्पा याइरासमि खिम्पि टाआमि, खोसॆ आक्कुबि ढ्या साम्लाऎ हाःप्खुबाचि हाङ् निवाँ टुक्मिम्पाचि खाङुचि। 39 येसु हङ्सिॽयु भॆनाहाङ् आक्खाचि लोसुचि, “आन्ना मान्ठा ढ्या साम्लाऎ हाबुकानिहा हाङ् निवाँ लाबानिनिहा? ग साम्सामा मासिखॆटि टर इम्टिखॆडा।” 40 ग खानावाँ खेमुचिहाङ् खोचिऎ येसु यिचासे इचाउचि। मसॆ येसुऎ चोब्न बाहिरा खाइटानॆ कामानुङ् बाहिरा लाबक्हाङ्सुचि। हाङ् आक्क साम्सामामि आपा, आमा हाङ् खोनुङ् चुक्मिहा टिङ्खुबाचि टेः चिःक्मानुङ् साम्सामा चुऎ ठालबि भॆना। 41 हाङ् खोसॆ आक्क साम्सामामि हुक्पि लाप्मानुङ् लोसु, “टालिटा कुमि” ग लोमिम्पा चाइ “पिसा पगॆ।” 42 लोमॆ अक्सि आक्क साम्सामा पग्लिनटा हाङ् गरमर लाम्ढुबक्का। (आक्क एपङ्हि निङ्ऎ लॆटा), ग खाङुचिहाङ् चोब्न फोफो आक्खॆटुचि। 43 हाङ् येसुऎ खोचि ग खानावाँ आसॆस आखेम्टकुचिर कामानुङ् काम्नुःर लोसुचि। हाङ् साम्सामा माङ्हाङ्स चामा पिट्टाम्नॆ लोसुचि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.