मारकुस 4 - लोहोरुङ्चारिक् टुप्खुबामि काठा ( मट्टि १३:१-२३ ; लुका ८:४-१५ ) 1 हाङ् येसुऎ फेरि गालिल टोम्पक्लिॽवा कॆक्पि याॽमिचि खानावाँ खेम्मिपक्कुचि। खोम् गॆअङ्मॆअङ् डिरिक् याॽमिचि खोम्मिम्पासॆ खो एक्क सिङ्खङ्बि ठाङाहाङ् याॽमिचिबाङ् मिःक्म मॆअङ् खाराहाङ् पेना। याॽमिचि चाइ कॆक्पिन चुआमि। 2 हाङ् खोसॆ याॽमिचि काठाबाङ् डिरिक् खानावाँ चिनुचि। खोसॆ आक्खा याॽमिचि गर लोसुचि, 3 “खेमाम्नॆ! एक्क चारिक् टुप्खुबा याॽमि चारिक् टुप्सि आम्पका। 4 टुप्से खॆॽमार ऎॽवा चारिक् चाइ लाम्फुबि सिट्टा हाङ् सवाँचि पेटाआमिहाङ् कोप्हिर कोप्चाइटुचि। 5 ऎॽवा चारिक् चाइ लुङ्कॽवा नुङ्मा बाखाबि सिट्टा, आक्क बाखाबि डिरिक् साम् डॆन्ठाम् ठाल माऎसॆ सॆॽलन कॆप्पखारा। 6 टर बाखाबि नुःर साम् माडॆम्मिम्पासॆ नाम् कॆट्टाआ हाङ् हॆङ्खारा। 7 हाङ् ऎॽवा चारिक् चिचिङ् नुङमा याॽवासिवाँबि सिट्टा हाङ् माहा याॽवासिवाँऎ डॆक्खॆटु। मसॆ आक्कसॆ उम्चा सिमा माहेसु। 8 टर होइढा चारिक् चाइ काम्नुऎ बाखाबि सिॽमिम्पासॆ कॆप्पका, पुबका हाङ् डिरिक् उम्चा सिःसु। ऎॽवासॆ सुपङ् ऎॽवासॆ ठुपङ् हाङ् कोइसॆ एकक् उम्चा सिःसु।” 9 हाङ् येसुऎ आक्खाचि लोसुचि, “आसाम् नाबाक् चु खोसॆ खेमुर!” 10 याॽमिचि खो चुऎ ठालबाङ् खाइटामि हाङ् एपङ्हि टिङ्खुबाचि हाङ् होइढा याॽमिचिऎ काठाऎ लोमा यकुवॆ खानावाँ इबिॽमा कामानुङ् येसु लोसुचि। 11 येसुऎ आक्खाचि लोसुचि, “आन्नाग निवाँहाङ्ऎ खोम् याॽमिचि सक्पि मान्टहाङ् हाङ्डाम् लॆकुयॆ लोमॆ चुम्मिम्पा खानावाँ लेॽमॆ निवाँ पिडानि, टर होइढाचि चाइ काठाबि टेः लोकुङ्चि। 12 का गर लॆःॽङा, मान्ठाभनॆ, ‘खोचिऎ खाङ्कुचि हाङ् खेम्कुचि, टर माङ्स वाबुचिनि। हॆॽनॆहाङ्ग खोचि निवाँहाङ् पोट्टा ऎम्पखुबा लॆटामि हाङ् खोसॆ खोचि यङ्निखुबा लॆटुचि’।” 13 हाङ् येसुऎ आक्खाचि लोसुचि, “आन्नॆ ग काठाऎ लोमा यकुवॆ खानावाँ वाप्हिसाम्निनि हाङ्ग होइढा चोब्न काठाऎ लोमा यकुवॆ खानावाँ मान्टॽल वाबुकाम्नॆ? 14 काठाऎ लोमा यकुवॆ खानावाँ ग रेम, चारिक् टुप्खुबॆ निवाँहाङ्मि खानावाँ टुबुकु। 15 ऎॽवा याॽमिचिम् निवाँबि निवाँहाङ्मि खानावाँ लाम्फुबि सिॽमिम्पा चारिक् रक्मान लि। खोचिऎ खेम्मा ग खेमुकुचि, टर मरक्लन साइटान टाहाङ् आक्क कोप्फॆकु। 16 हाङ् ऎॽवाचिम् निवाँबि चाइ ग खानावाँ लुङ्कॽवा नुङ्मा बाखाबि सिॽमिम्पा चारिक् रक्मा लि। खेम्मा अक्सि खोचिऎ चेन्चामानुङ् निवाँयुङ् लॆकुचि। 17 टर आक्क खानावाँऎ उम्चि निवाँबि साम् ऎठुङ्मिम्पासॆ एक्क हिच्चि डिना निवाँयुङ्र लॆकुचि। हाङ् निवाँयुङ् लॆःॽमिम्पासॆ डुखा नुङ् खोप्चिनाँवा खोप्टिखॆॽमा अक्सि याइकुचि। 18 “हाङ् ऎॽवाचिम् निवाँबि चाइ ग खानावाँ चिचिङ् नुङ्मा याॽवासिवाँबि सिॽमिम्पा चारिक् रक्मा लि। 19 हाङ् हिङ्खामामि लागि पाबुहा ठका, चासुम्टाङ्पा लिमॆ निवाँ हाङ् होइढा खानावाँऎ म निवाँहाङ्मि खानावाँ टोप्ठाङ्कु हाङ् आक्कसॆ उम्चा सिसुनि। 20 हाङ् ऎॽवामि निवाँबि चाइ आक्क खानावाँ काम्नुऎ बाखाबि सिॽमिम्पा चारिक् रक्मा लि। हाङ् खोचिऎ खानावाँ खेमुकुचि हाङ् आक्क आनुसारन लॆःॽमि हाङ् ऎॽवासॆ रिपङ, ऎॽवासॆ ठुपङ् हाङ् कोइसॆ एकक् उम्चा सिःकु।” ओप्लिङ्मि काठा ( लुका ८:१६-१८ ) 21 येसुऎ आक्खाचि लोसुचि, “सिःग्ठाम् पाठिऎ डॆक्माम् लागि हाङ् लिःॽमारामि खुॽमाबि युङ्माम् लागि आसॆस ओप्लिङ् ओबुचिनि, टर पङ्पङ्माबि युङु हॆॽनॆ? 22 गरहाङ्न हढारि माङ्माङ् चुम्से युङ्डा आक्खा चोब्न लाबक् हाङ् खाङ्मि, माङ्माङ् वाप्टक्निऎ खानावाँ चु, वाप्टक्मॆ मु। 23 आसाम् नाबाक् चु खोसॆ खेमुर!” 24 हस खोसॆ आक्खाचि लोसुचि, “आन्नॆ माङ् खेम्डाम्नि म खानावाँ नुःर निवाँ टिसाम्नॆ। आक्र लॆटानि हाङ्ग निवाँहाङ्ऎ आन्नॆ निवाँ टिमिम्पाबाङ्स डिरिक् वाप्हिखुबा मुकानि। 25 मान्ठाभनॆ आसानुङ् वाप्मॆ निवाँ चु, खो वाप्मॆ निवाँ येट्टिबि, टर आसानुङ् माआ, खोबि चुऎ मिःक्म सङ्क ङाप्लाह्ङ।” चारिक् पुबक्मॆ काठा 26 फेरि येसुऎ लोसुचि, “निवाँहाङ्मि हाङ्डाम् एक्क याॽमिऎ बाखाबि चारिक् टुप्मिम्पा रक्मान। 27 “खो इम्चा हाङ् पगु हाङ्स माह् चारिक् कॆप्प हाङ् पुबक्से खॆ। टर आक्क मान्टहाङ् लिऎ लोमॆ खानावाँ टुप्खुबॆ माङ्स लेसुनि। 28 “बाखे उम्टाङ्पे कॆप्पक्मिकु हाङ् पुबक्मिकु हाङ् चिक्खॆमिस्से उम्चा सिकु। 29 उम्चा टुमुक् हाङ् खोसॆ काच्याऎ हॆक्पखॆकु, मान्ठाभनॆ आक्क हॆक्मॆ बेला साप्खेमिम्पा लि।” रायोमि चारिक् ( मट्टि १३:३१-३२ ; लुका १३:१८-१९ ) 30 फेरि येसुऎ लोसुचि, “निवाँहाङ्मि हाङ्डाम् माङ् नुङ् ङेःप्मॆ अठावा माङ्मि बारेबि काठा लोमाहाङ् गमि बारेमि इबिॽमानिह्? 31 ग गरक्मा खानावाँ रेम, रायोमि चारिक् बाखाटेम्पि चोब्बाङ् मिःछुॽमा उम्चा रेम। एक्क याॽमिऎ आक्क बाखाबि टुबुकु। 32 हाङ् आक्क पुबक् हाङ् साघापाटाबि चोब्बाङ् ढ्या वॆप्ब, हाङ् डिढ्ढा डिढ्ढा हागा टेःकु। सवाँचि टाःक्मिहाङ् आक्कुबि हाब्बाङ् हेबुकुचि।” 33 इमिम्पा खानावाँ वाबुचिर कामानुङ् येसु याॽमिचि नुङ् गरहान डिरिक् काठाबि यामुसा। 34 येसु याॽमिचि नुङ् काठाबि टेःॽन यामुयुक्सा। टर खो नुङ् खोम् टिङ्खुबाचि टेः चुःक्मिर खोसॆ काठाऎ लोमा यकुवॆ चोब्न खानावाँ इबियुक्सुचि। येसुऎ ढ्या हिॽयापा नुबक्मिडुवॆ ( मट्टि ८:२३-२७ ; लुका ८:२२-२५ ) 35 म डिना नाम् डाखॆटु हाङ् येसुऎ खोम् टिङ्खुबाचि लोसुचि, “लु, ह कानि मॆआरॆङ् खारियॆ।” 36 टिङ्खुबाचिऎ होइढा याॽमिचि याइडामानुङ् येसु चुऎ सिङ्खङ्पि ठाङामि हाङ् येसु नुङ् मॆआरॆङ् खारामि। खोनुङ् होइढा सिङ्खङ् सङ्क चुआ। 37 मरक्लन टोम्पॽलिॽवाबि ढ्या हिॽयापा लुबका हाङ् योवा चुपकाहाङ् सिङ्खङ् डॆपकु हाङ् सिङ्खङ् योवाऎ चॆप्खॆॽमा परकु। 38 येसु चाइ सिङ्खङ्मि डॆङ्पिऎ भागबि निङ्टवाँ नॆन्ठाम्पि नॆन्से इम्टिखॆम्पा लॆटा। टिङ्खुबाचिऎ खो गर कामानुङ् हुम्पकुचि, “पारभु, काङ्का रुम्सिखॆॽमा ठाबाक्मिम्पा लेसुनानॆ?” 39 हाङ् खो हुम्पका हाङ् येप्पका हाङ् हिॽयापा नुङ् टोम्पॽलिॽवामि योवा वोमानुङ् लोसु, “यङ् उगॆ! याइटॆ!” मरक्लन हिॽयापा लुमा याइटु हाङ् चोब्न नुबखारा। 40 येसुऎ आक्खाचि लोसुचि, “आन्ना मान्ठा किसिकानिहा? माल् आन्नाबि निवाँयुङ् माऎ?” 41 हाङ् खोचि आक्खॆसे किसिमानुङ् उम्चि टाङ्पाटाङ्पाबि गर कासामि, “हॆॽनि, ग मान्टऎ याॽमिर? हिॽयापा नुङ् योवाऎ सङ्क खोसॆ लोमिम्पा खेमुकुटा।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.