मट्टि 25 - लोहोरुङ्एपङ् जाना लाङ्मिॽचि 1 येसुऎ हस लोसुचि, “निवाँहाङ्मि हाङ्डाम् चाइ एपङ् जाना लाङ्मिॽचिनुङ् ङेप्हि। खोचि ओप्लिङ् याङ्मानुङ् डाङ्पा चुब्सि खारामि। 2 आक्खाचिबि ङाचि लाङ्मिॽचि चाइ निवाँ मॆड्डिङ्हा हाङ् होइढा ङाचि लाङ्मिॽचि चाइ निवाँटाङ्माचि लॆटामि। 3 निवाँ मॆड्डिङ्हा लाङ्मिॽचिऎ उम्चि ओप्लिङ् ग लाखॆटुचि, टर पाबुहा केवा चाइ मॆन्लाखॆटुचि। 4 टर निवाँटाङ्मा लाङ्मिॽचिऎ चाइ ओप्लिङ्नुङ् सोरि हारपॆक्पि पाबुहा केवा सङ्क खिनामि। 5 हाङ् डाङ्पा सॆॽलन माटामिम्पासॆ खोचि चोब्न इम्मॆ सुःक्पक्से इम्टिखारामि। 6 “खोचिऎ सेन्टाराम्पाबि गरक्मा ढ्या साम्ला खेमुचि, ‘खाङाम्नॆ, डाङ्पा टामेपाइ, खो चुब्सि डाबानॆ।’ 7 आक्खा चोब्न लाङ्मिॽचि पःक्लिन्टामि हाङ् उम्चि टाटाङ्पाम् ओप्लिङ् ओप्पकुचि। 8 हाङ् आक्खा निवाँ मॆड्डिङ्हा लाङ्मिॽचिऎ निवाँटाङ्मा लाङ्मिॽचि लोसुचि, ‘आन्नामि केवा काङ्का सङ्क मिःक्म पिच्चिमॆम मान्ठाभनॆ काङ्कामि ग ओप्लिङ् सिःखॆॽमा परका।’ 9 टर आक्खा निवाँटाङ्मा लाङ्मिॽचिऎ लोसुचि, ‘काङ्का हाङ् आन्ना सङ्क खेःॽमॆ केवा काङ्कानुङ् माआ। मसॆ खारानॆहाङ् केवा इन्चोखुबाबाङ् आन्नामि लागि इल्लाआनॆ।’ 10 “हाङ् आक्खा निवाँ मॆड्डिङ्हा लाङ्मिॽचि केवा इन्सि खॆॽमिम्पा बेलान डाङ्पा टाआ। हाङ् परक्मिम्पाचि चाइ डाङ्पा नुङ् भ्यामि भोजा चासि हङ्सिॽयु भॆन्खारामि हाङ् लम्भॆरॆङ्मा सङ्क सॆक्टिखारा। 11 “आक्क डॆङ्पि आक्खा निवाँ मॆड्डिङ्हा लाङ्मिॽचि सङ्क टाआमि हाङ् गर काबकामि, ‘टुङ्घङ्पो, टुङ्घङ्पो, काङ्का सङ्क हङ्सियु भॆन्मामि लागि लम्भॆरॆङ्मा हेम्बक्पिच्चिमॆ।’ 12 टर डाङ्पॆ लोसुचि, ‘चाइबान कॆ आन्ना लोकानि, कॆ आन्ना लेसानिनि’!” 13 हाङ् येसुऎ खानावाँ लुक्पिसे लोसुचि, “मसॆ आन्ना सङ्क नुःर पेनानॆ, मान्ठाभनॆ काङा हानाम् हाङ् हाम्पॆ डिना हाङ् हानाम्ल ऎन्टाङॆ लोमॆ आन्नॆ लेसाम्निनि।” योम्पक् मुखुबा सुम्पा याॽमिचि ( लुका १९:११-२७ ) 14 “मान्ठाभनॆ निवाँहाङ्मि हाङ्डाम् गरक्मा रेम, एक्क टुङ्घङ्पॆ खो होइक हाङ्टेम्पि खाइमार खोम् खिम्पिहा योम्पक् मुखुबाचि सेःरुचिहाङ् खोम् चासुम् सक्पि ढुप्पाट्ट पिट्डउचि। 15 खोसॆ योम्पक् मुखुबाचिम् निवाँ रक्न एक्क ङाचि, होइक हिच्चि हाङ् होइक चाइ एक्क फिइयामि ढॆक्का पिट्टुचि हाङ् मरक्लन खो चाइ होइक हाङ्डाम्पि खाइटा। 16 हाङ् ङाबङ् फिइयामि ढॆक्का टक्चाखुबा चाइ खाराहाङ् आक्खा याङ् बेप्पाराबि टिसु हाङ् होइढा ङाचि फिइयामि ढॆक्का डुबु। 17 हाङ् आक्रहाङ्न हिच्चि ढॆक्का टक्चाखुबा सङ्क होइक हिच्चि ढॆक्का डुबु। 18 टर एक्क ढॆक्का टक्चाखुबॆ चाइ खारा हाङ् बाखा टोसुहाङ् टुङ्घङ्पामि चासुम् चुम्भुङ्सु। 19 “डिरिक् निङ् डॆङ्पि आक्खा योम्पक् मुखुबाचिम् टुङ्घङ्पा ऎन्टाहाङ् खोचिऎ खोसॆ पिॽमिम्पा याङ् माङ्पि फॆरुचिहा कामानुङ् सिमुचि। 20 हाङ् ङाचि फिइयामि ढॆक्का टक्चाखुबॆ होइढा ङाचि ढॆक्का याङ्मानुङ् याॽलि टुङ्घङ्पा लोसु, ‘टुङ्घङ्पो, आनॆ काङा ङाबचि ढॆक्का पिॽमिम्पा लॆटिङ्ना। खाङॆ, कॆ आक्कबाङ् होइढा ङाबङ् ढॆक्का सङ्क डुःप्डुङ।’ 21 उम् टुङ्घङ्पॆ खो लोसु, ‘काम्नुऎ योम्पक् यिगुना, नुचाक्नॆ हाङ् निवाँयुङ्मा योम्पक् मुखुबा! आना मिःछुॽवा खानावाँबि निवाँयुङ्मा लिमिम्पासॆ कॆ होइढा डिरिक् खानावाँबि सङ्क ढुप्पाट्ट पिःॽना। डाबॆहाङ् टुङ्घङ्पा नुङ्न आना सङ्क चेन्चाऎ।’ 22 आक्क डॆङ्पि हिच्चि फिइयामि ढॆक्का टक्चाखुबा टाआहाङ् लोसु, ‘टुङ्घङ्पो, आनॆ काङा हिच्चि ढॆक्का पिॽमिम्पा लॆटिङाना। खाङॆ, आक्कबाङ् कॆ होइढा हिबङ् डुप्टॆडुङ।’ 23 उम् टुङ्घङ्पॆ खो लोसु, ‘काम्नुऎ योम्पक् यिगुना, नुचाक्नॆ हाङ् निवाँयुङ्मा योम्पक् मुखुबा! आना मिःछुॽवा खानावाँबि निवाँयुङ्मा लिमिम्पासॆ कॆ होइढा डिरिक् खानावाँबि सङ्क ढुप्पाट्ट पिःॽना। डाबॆहाङ् टुङ्घङ्पा नुङ्न आना सङ्क चेन्चाऎ।’ 24 “हाङ् एक्क फिइयामि ढॆक्का टक्चाखुबा सङ्क टाआहाङ् लोसु, ‘टुङ्घङ्पो, आना माटुॽमिम्पा ठालबाङ् खोम्खुबा हाङ् माटुप्मिम्पा ठालबाङ् इःक्खुबा छाक्कॆ निवाँ नुङ्मा याॽमि लॆःक्ना कामानुङ् कॆ लेमिम्पा लॆटुङ। 25 मसॆ आनाम् ढॆक्का माइकुङॆरु मिन्मानुङ् किसिमाऎ खारिङ्हाङ् आनॆ पिॽमिम्पा ढॆक्का बाखा हङ्सि चुमुङ। खाङॆ, आनाम् ढॆक्का गुबिॽन चु लायाकॆ।’ 26 हाङ् टुङ्घङ्पॆ खो लोसु, ‘आना काइसॆ हाङ् ऎट्टुबाङ याॽमि, काङॆ माटुॽमिम्पा ठालबाङ् खोमुकुङ् हाङ् मालिप्मिम्पा ठालबाङ् इःगुकुङ् हेम? गरक्मा खानावाँ आनॆ लेॽमिम्पा हाङ्ग, 27 आनॆ काबाङ् लायाक्मिम्पा याङ् ब्याजाबि टिसुनाग काङा ऎन्टामार ब्याजनुङ् आक्क याङ् टक्चाखुबा लॆटुङ।’ 28 हाङ् खोसॆ होइढा खोम् योम्पक् मुखुबाचि लोसुचि, ‘खोबाङ् आक्क ढॆक्का ङाप्लाप्साम्नॆ हाङ् आक्क एपङ्बङ् ढॆक्का चुखुबा पिट्टाम्नॆ। 29 मान्ठाभनॆ आसानुङ् चु, खो येट्टिबि हाङ् खोनुङ् डिरिक् लिऎछ। टर आसानुङ् माआ, खोबि चुहा मिःक्म सङ्क खोबाङ् ङाप्लाङ्। 30 ह इग योम्पक् पिॽनॆ याॽमि बाहिरा माॽयाक्टबि कक्हाङ्साम्नॆ। आक्कबि याॽमिचि हाबुक्मि हाङ् कॆङ् यिःगुक्मि।’ डॆङ्पि लिऎ न्यायॆ 31 “याॽमिम् पासा चोब्न निवाँखाटॆखुबाचि नुङ् टाङ्पामि निङ्लावाबि टा हाङ् निङ्लावा नुङ्मा हाङ्पेन्ठाम् ठालबि पेनुक। 32 हाङ् चोब्न जाटिबिहा याॽमिचि खोम् ङारिङ्पि खोम्भुङ। हाङ् खोसॆ एक्क कुचाऎ सामुङ् नुङ् मॆठुबाचि फागिन्ट आक्खा याॽमिचि सङ्क एक्कबाङ् होइक फागुकु। 33 हाङ् खोसॆ सामुङ्चि चाइ टाङ्पाम् चुप्ठिङ् पोट्टि हाङ् मॆठुबाचि चाइ बॆड्सिङ् पोट्टि युङुकुचि। 34 हाङ्ऎ खोम् चुप्ठिङ् पोट्टिहा याॽमिचि लोकुचि, ‘टाआनॆ, ओ काम् आप्पा निवाँहाङ्बाङ् आसिका टक्चामिम्पा याॽमिचि, बाखाटेम्मि सिरिस्टिबाङ्न आन्नामि लागि टङ्पिॽमिम्पा हाङ्डाम्पि पेनानॆ। 35 मान्ठाभनॆ काङा सागॆ सिमार आन्नॆ चामा पिट्टिङ्नि, काङा वाइॽमॆ सिसिङ्र आन्नॆ योवा डुङ्मा पिट्टिङ्नि, काङा वाइटिटिङ्र आन्नॆ काङा आम्नि खिम्पि लाखॆटिङ्नि। 36 काङा चे मॆड्डिङ् लॆटिङ्र आन्नॆ चे पिट्टिङ्नि, काङा टुगिङ्र आन्नॆ खाङिङ्नि, सॆक्चिम्पि चुइङ्र आन्ना काङा चुब्सि टाआनि।’ 37 “हाङ् आक्खा निवाँनेन् याॽमिचिऎ खो लोकुचि, ‘पारभु, काङ्कॆ हानाम् आना सागॆ सिमिम्पा खाङुङ्कॆ हाङ् चामा पिट्चाचिमॆ? हाङ् हानाम् वाइमॆ सिमिम्पा खाङुङ्कॆ हाङ् योवा डुङ्मा पिट्टाचिमॆ? 38 हाङ् हानाम् काङ्कॆ आना वाइटिम्पा खाङुम्कॆ हाङ् नुःर लॆटाचिमॆ? काङ्कॆ हानाम् आना चे मॆड्डिङ् खाङुम्कॆ हाङ् चे चाङ्मिटाचिमॆ? 39 हाङ् काङ्कॆ हानाम् आना टुक्मिम्पा आठावा सॆक्चिम्पि खाङुम्कॆ हाङ् आना चुब्सि टाइङ्कॆ?’ 40 हाङ्ऎ खोचि लोकुचि, ‘चाइबान कॆ आन्ना लोकानि, इघा काम् नुसाचिबि चोब्बाङ् मिःछुॽवा चाइ ऎॽवा नुःर लॆटाम्नि, आन्नॆ आक्खा काम् लागिॽन लॆटाम्नि।’ 41 “आक्क डॆङ्पि खोसॆ उम् बॆङसिङ् पोट्टाबिहा याॽमिचि लोकुचि, ‘आन्ना चाप्हिमा सिॽमिम्पा याॽमिचि, आन्ना काबाङ् मिउ खाइटानॆ हाङ् साइटान नुङ् आक्कमि खारिॽमाङ्चिम् लागि टङ्पमिम्पा हानाम्स सिखॆनॆ मिःबि सिट्टानॆ। 42 मान्ठाभनॆ काङा सागॆ सिसिङ्र आन्नॆ काङा चामा मापिट्टिङ्नि, हाङ् वाइमॆ सिसिङ्र योवा डुङ्मा मापिट्टिङ्नि। 43 काङा वाइटिटिङ्र आन्नॆ आम्नि खिम्पि नुःर मालॆःॽङानि, चे मॆड्डिङ् लॆटिङ्र चे मापिॽङानि, काङा टुक्सिइङ्र हाङ् सॆक्चिम्पि चुइङ्र आन्ना काङा चुब्सि माटाआनि।’ 44 “हाङ् आक्खाचिऎ सङ्क गर लोकुचि, ‘पारभु, काङ्कॆ हानाम् आना सागॆ सिमिम्पा, वाइमे सिमिम्पा, वाइटिम्पा, चॆ मॆड्डिङ् लिमिम्पा, टुक्सिमिम्पा हाङ् सॆक्चिम्पि सॆक्ढिङ्खॆम्पा खाङुम्कॆ हाङ् आना नुःर मालॆचिमॆ?’ 45 हाङ् आक्रल खोसॆ लोकुचि, ‘चाइबान कॆ आन्ना लोकानि, इघा मिॽमिॽहा याॽमिचिबि एक्क याॽमि माङ्स ऎखाङ्मॆन काङा ऎखाङ्मॆ यो।’ 46 हाङ् आक्खाचि चाइ हानाम्स लुक्खॆनॆ डन्डाबि सिःक्मि, टर निवाँनॆन्चि चाइ हानाम्स सिःखॆॽनॆ हिङ्खामाबि भॆनुक्मि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.