मट्टि 24 - लोहोरुङ्डॆङ्पि लिऎ खानावाँ येसुऎ याॽलन इमिम्पा ( मारकुस १३:१-१३ ; लुका २१:५-१९ ) 1 येसु निवाँहाङ्मि खिम्बाङ् आम्पक्मे पाइमार खोम् टिङ्खुबाचि खोबि टाआमिहाङ् लोसुचि, “निवाँहाङ्मि खिम् ऎॽवा काम्नुऎर कामानुङ् खाङ्मिटुचि।” 2 हाङ् खोसॆ आक्खाचि लोसुचि, “आन्नॆ इघा चोब्न खाङ्मॆ पाइकाम्नि हॆॽनॆ? चाइबान कॆ आन्ना लोकानि, एक्क लुङ्कॽवा सक्पि होइक लुङ्कॽवा सङ्क मायाइरे ग चोब्न योराङ्।” 3 हाङ् इॽया येसु जाइटुन लोमॆ पङ्पङ्माबि पेन्ढाङ्मार खोम् टिङ्खुबाचि खुनिङ्म टाआमिहाङ् खो सिमुचि, “काङ्का लोचिमॆ म, ग खानावाँ हानाम् लिऎ? हाङ् आना ऎन्टाक्नॆ हाङ् बाखाटेम् लुक्खॆमॆ खानावाँमि चिन्ना चाइ माङ् लिऎ?” 4 येसुऎ आक्खाचि लोसुचि, “काम्नुःर पेनानॆ, आसॆस आन्ना ऎफोप्सिॽमिर। 5 मान्ठाभनॆ ओइर याॽमिचि काम् निङ्पि ‘काङान खिरिस्टङा’ कामानुङ् टाग्मि हाङ् ओइर याॽमिचि फोप्सिकुचिमि। 6 “हाङ् आन्नॆ डिड्ढा डिड्ढा खिमाटुमा लिमिम्पा हाङ् आक्रहा लिमॆ खानावाँ खेम्काम्नि, टर आकिसिआनॆ मान्ठाभनॆ इघा खानावाँ ग लिमान लॆ। टर बाखाटेम आक्रलन चाइ लुक्खॆनि। 7 मान्ठाभनॆ एक्क जाटिबिहा याॽमिचि हॆॽनिबारेक् याॽमिचि नुङ् हाङ् एक्क हाङ्टेम् होइक हाङ्टेम् नुङ् खिमा पगुक्। हाङ् डिड्ढा डिड्ढा आनिकाला सि हाङ् हाम्पि ग हाम्पि लुक्ढिमा खॆ। 8 टर इघा चोब्न खानावाँ ग एक्क मेॽनुङ्मॆ चाचा टक्मा परक्मार लिमा ठाबाक्मिम्पा डुखा रक्मा टेःॽन रेम। 9 “हाङ् याॽमिचिऎ आन्ना लाप्से डुखा पिस्सि लाखॆकानि हाङ् सेरुकानि। आन्नॆ काङा टिङ्मिम्पासॆ चोब्न जाटिबिहा याॽमिचिऎ सिच्चाक्मि। 10 “आक्रल डिरिक् याॽमिचिऎ उम्चि निवाँयुङ् याइकुचि, हाङ् एक्कसॆ होइक बङ्सिकु हाङ् सिच्चाबॆ चुमॆ योम्पक् लि। 11 हाङ् निवाँहाङ्मि खानावाँ लोखुबा हुन्नहा ऎॽवाहा याॽमिचि आम्पःक्मि हाङ् डिरिक् याॽमिचि फोप्सिकुचिमि। 12 “काइसॆ खानावाँ फुबम्पासॆ डिरिक् याॽमिचिम् लुम्पि नाम्नाम् पिसिॽमॆ खानावाँ माखॆसे खॆ। 13 टर डॆङ्पिढारि टाङ्पाम् निवाँयुङ् ऎमाइखुबाचि चाइ निवाँहाङ्ऎ हिङ्पकुचि। 14 हाङ् बाखाटेम्पिहा चोब्न जाटिबिहा याॽमिचि चुमॆक्सङ्मि लागि निवाँहाङ्मि हाङ्डाम्मि बारेबिऎ नुऎ खानावाँ खेम्मि हाङ् बाखाटेम् लुक्खॆ। किॽमालुऎ लः ( मारकुस १३:१४-२३ ; लुका २१:२०-२४ ) 15 “मसॆ आन्नॆ डानियाल लोमॆ निवाँहाङ्मि खानावाँ लोखुबाऎ लोसिन्टक्न सॆङ्सॆङॆ ठालबि सॆङ्सॆङॆ लॆःॽनॆ चिःक्सिमा लुऎ ठका येप्मिम्पा खाङ्काम्नि (पाढालॆखुबाचिऎ लोमिम्पा खानावाँ वाबाम्नॆ)। 16 आक्रल याहुडियाबि चुखुबा याॽमिचि पङ्पङ्मा पोट्टा खुरारानॆ। 17 हाङ् खिम्मि सङ्पिटु चुखुबाचि कक्नाम् लामा कामानुङ् मिम्मॆ टालबि आयुसानॆ। 18 हाङ् रोपाबि चुखुबा याॽमि उम् चाङ्मॆ चे लासि खिम्पि ऎखॆॽर। 19 बःक्खुरुॽमाचि हाङ् चाचा डुरु फिःप्मिखुबा मेॽनुङ्माचिबि आक्रल एट्टान डुखा लि! 20 आन्ना खुरॆॽमॆ लः चुङ्पि आठावा नाचामॆ डिनाबि आसिॽल कामानुङ् निवाँहाङ् नुङ् पारठाना लॆटानॆ। 21 मान्ठाभनॆ गरक्मा किॽमालुऎ डुखा ग बाखाटेम्मि सिरिस्टिबाङ् हढारि मालिटि हाङ् फेरि गरक्मा डुखा लिसुलिनि। 22 निवाँहाङ्ऎ आक्खा डुखामि डिना मिःक्म हाङ्स माचेनुग आसास आहिङ्चाखुबा लॆटामि, टर खोसॆ सॆःक्मिम्पा याॽमिचिम् लागि हाङ्स खोसॆ आक्खा डिना मिःक्म हाङ्स चेन्लाङ्कु। 23 “आक्रल याॽमिऎ आन्ना ‘खाङानॆ, खिरिस्ट गुबि नुङ् मुबि चु’ लोसानि हाङ्ग म खानावाँबि निवाँयुङ् आलॆटानॆ। 24 मान्ठाभनॆ हुन्न्नहा खिरिस्टचि नुङ् निवाँहाङ्मि खानावाँ लोखुबाचि आम्पक्मि हाङ् डिड्ढा डिड्ढा आक्खॆॽमाहा योम्पक् खाङ्मुकुचि हाङ् हेर निवाँहाङ्ऎ सॆःक्मिम्पा याॽमिचि सङ्क फोप्सिकुचिमि। 25 “खाङाम्नॆ, कॆ आन्ना आक्खा खानावाँ लिमाबाङ् याॽलन लोडानि यो। 26 मसॆ याॽमिचिऎ आन्ना ‘खो ग आसास पेन्मिनिहा ठालबि चु’ लोसामि हाङ्ग, आक्कुबि ऎखारानॆ। हाङ् खोचिऎ आन्ना ‘खो ग हङ्सिॽयुऎ कोठाब्रे चु’ कामानुङ् लोसामि हाङ्स आक्क खानावाँ निवाँयुङ् आलॆटाम्नॆ। 27 मान्ठाभनॆ मान्टहाङ् नाम्कॆॽवाबि नाम्टुरुङ्मा हामार नाम्डाॽवाढारि खाङ्मु, याॽमिमि पासा टामार सङ्क चोब्न याॽमिचिऎ खाङ्टकुचि। 28 हाम्पि किम्खॆमिम्पा सा लि, आक्कुबि नाप्पॆङ्चवाचि खोमुक्मि। याॽमिमि पासा खाङ्मुऎ डिना ( मारकुस १३:२४-२७ ; लुका २१:२५-२८ ) 29 “आक्खा डुखामि डिना लुक्खॆॽमा अक्सि नाम् माॽयाक्ट लि हाङ् पाप्पाला हामा याइकु। हाङ् साङकेम्माचि नाम्फलिॽवाबाङ् हेड्ढिन्मि हाङ् नाम्फलिॽवाबिहा चॆक्मावा यङ्पकु। 30 “हाङ् नाम्फलिॽवाबि याॽमिम् पासामि चिन्ना खाङ्मु। हाङ् बाखाटेम्पिहा चोब्न याॽमिचि हाःबुक्मि। हाङ् आक्खाचिऎ याॽमिमि पासा नाम्फलिॽवाबिऎ खिन्डुमाबि चॆक्मावा नुङ् ढ्या निङ्लावा नुङ् टामे पाइमिम्पा खाङ्टकुचि। 31 हाङ् खोसॆ खोम् निवाँखाटॆखुबाचि पॆँपॆँलिमामि ढ्या साम्लानुङ् पाङ्हाङ्कुचि। हाङ् खोचिऎ नाम्फलिॽवा खुक्माबि पेन्मिम्पा निवाँहाङ्ऎ सॆःक्मिम्पा बाखाटेम्पिहा चोब्न याॽमिचि खोम्टॆकुचि। छाराक्फुमि बोटाबाङ् चिन्मॆ ( मारकुस १३:२८-३१ ; लुका २१:२९-३३ ) 32 “छाराक्फुमि बोटाबाङ् ग खानावाँ चिनानॆ। आक्कमि हागा नॆक्कॆ लि हाङ् बॆॽलुवाँ बॆॽपकुहाङ् ह ओम्मक् ओम्मक् लिबक् कामानुङ् वाप्टकाम्नि। 33 आक्रहाङ्न कॆ लोमिम्पा चोब्न खानावाँ लिमिम्पा खाङ्काम्नि, खोम् टामॆ लः मुबिॽन टाखॆडा कामानुङ् लेट्टकाम्नि। 34 चाइबान कॆ आन्ना लोकानि, इघा चोब्न खानावाँ मालिसिखॆॽलढारि गरक्लहा याॽमिचि लुक्खॆॽमिनि। 35 पारु नुङ् बाखाटेम् लुक्खॆ, टर कॆ लोमिम्पा खानावाँ चाइ हानाम्स लुक्खॆनि। नुःर पेन्मॆ खानावाँ ( मारकुस १३:३२-३७ ; लुका १७:२६-३० , ३४-३६ ) 36 “आक्खा खानावाँ हानाम् हाङ् हाम्पॆ लःबि लिऎ कामानुङ् ना पारुबिहा निवाँखाटॆखुबाचिऎ लेकुचि ना निवाँहाङ्मि खोम् पासॆॽन लेकु। आक्क खानावाँ ग आपॆबाङ् होइक आसॆस लेसुचिनि। 37 याॽमिम् पासा टामार नुहामि लःबि लिसिन्टक्न लि। 38 मान्ठाभनॆ योवाऎ चोब्न डॆक्माबाङ् याॽल नुहा सिङ्खङ्पि मान्भॆन्लढारि याॽमिचि चामॆ डुङ्मॆ हाङ् भ्या लॆःॽमॆ योम्पक्पि पाइढाङ्मिम्पा लॆटामि। 39 योवॆ खोचि चोब्न माटॆङ्फॆॽलढारि खोचिऎ माङ्स मालेमिम्पा लॆटुचि। याॽमिमि पासा टामार सङ्क आक्रक्न लि। 40 आक्रल हिप्पा रोपाबि योम्पक् मुढाङ्मिम्पा लिःक्चि, निवाँहाङ्ऎ एक्क लाखॆकु हाङ् खोसॆ होइक चाइ वेड्डाकु। 41 यिःक्लुङ् यिःक्ढाङ्पा हिप्पा मेॽनुङ्माचिबि निवाँहाङ्ऎ एक्क लाखॆकु हाङ् होइक चाइ खोसॆ वेड्डाकु। 42 “मसॆ आन्ना नुःर पेनानॆ, मान्ठाभनॆ आन्नामि पारभु हानाम् टाऎ लोमॆ खानावाँ आन्नॆ लेसाम्निनि। 43 टर आन्नॆ ग खानावाँ लेसाम्नॆ, खिम्पिऎ टुङ्घङ्पॆ खुसुबाङ् युटाऎ हाम्पॆ लःबि टाऎ कामानुङ् लेसुग, खो माइम्चारे पेन्खुबा लॆटा हाङ् खोम् खिम्पि खुमा आपिक्खुबा लॆटा। 44 मसॆ आन्ना सङ्क नुःर पेनानॆ, मान्ठाभनॆ याॽमिमि पासा आन्नॆ मामिॽलामिम्पा लःबि टा। काम्नुऎ नुङ् काइसॆ योम्पक् मुखुबा ( लुका १२:४१-४८ ) 45 “निवाँयुङ्मा नुङ् निवाँटाङ्पा याॽमि चाइ टुङ्घङ्पॆ खोम् योम्पक् मुखुबा होइढा याॽमिचि नुऎ लःबि चामा डुङ्मा पिट्टुचिर कामानुङ् सॆःक्मिम्पा याॽमि हॆॽनॆ? 46 खोम् टुङ्घङ्पा खिम्पि ऎन्टामार आक्क योम्पक् खाङ्खुबॆ आक्रक्न काम्नुःर योम्पक् मुढाङ्पा भॆट्टकु हाङ्ग आक्क डिरिक् आसिका टक्चामिम्पा योम्पक् मुखुबा याॽमि यो। 47 चाइबान कॆ आन्ना लोकानि, खो टुङ्घङ्पॆ खोम् चोब्न चासुम् सक्पि ढुप्पाट्ट लॆखुबा याॽमि मुकु। 48 टर योम्पक् मुखुबा चाइ काइसॆ लॆ हाङ् खोसॆ काम् टुङ्घङ्पा हमासिन ऎन्टानि कामानुङ्, 49 खोम् होइढा योम्पक् मुखुबाचि रक्पकुचि हाङ् डुङ्टिखुबाचिनुङ् चाबका हाङ् डुङ्पका हाङ्ग, 50 आक्कमि टुङ्घङ्पा खोसॆ मामिॽलामिम्पा डिना हाङ् लःबि टा। 51 हाङ् खो ढ्या डान्डा पिकुहाङ् हुन्नहा याॽमिचि चुःक्मिहा ठालबि कॽहाङ्कु। आक्कुबि याॽमिचि हाःप्मॆ नुङ् कॆङ् यिःक्मॆ योम्पक् यिगुक्मि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.