मट्टि 23 - लोहोरुङ्येसुऎ निवाँनेन् साब्चिरा चिन्खुबाचि इचामिम्पा ( मारकुस १२:३८-३९ ; लुका ११:४३ , ४६ ; २०:४५-४६ ) 1 हाङ् येसुऎ डिरिक् याॽमिचि हाङ् खोम् टिङ्खुबाचि लोसुचि, 2 “मोसामि यायेॽमा चिन्खुबाचि हाङ् फारिसिचिऎ मोसामि यायेॽमा चिन्मॆ ढुप्पाट्ट टक्चाडुचि। 3 मसॆ आक्खाचिऎ लोमिम्पा चोब्न खानावाँ खेमाम्नॆ हाङ् आक्रक्न लॆटानॆ, टर खोचि पाइमिम्पार चाइ ऎपाइटानॆ मान्ठाभनॆ आक्खाचिऎ चिन्मा ग चिनुकुचि टर टाङ्पे चिन्मिम्पार खोचि चाइ पाइमिनि। 4 खिनखिन्टिहिनिहा यायेॽमाबिहा खानावाँ खोचिऎ याॽमिचि खिन्मिकुचिमि, टर खोचिऎ चाइ आक्खा खिन्मा ग हॆॽनॆ, याॽमिचि पाइबाक्माम् लागि उम्चि एक्क हुक्खॆरॆॽवासिऎ सङ्क डिन्चाउचिनि। 5 खोचिऎ चोब्न योम्पक् याॽमिचि खाङ्मिॽमाम् लागि यिगुक्मि मान्ठाभनॆ खोचिऎ उम्चि हुक्पिऎ वॆक्सु ढ्या मुबकुचि हाङ् उम्चि चेमि फुर्कॆ टक्भॆहा टक्भॆहा मुकुचि। 6 खोचि भोजाबि टुङ्घङ्पा टाबाङ्चि पेन्ठाम् ठालबि हाङ् याहुडि खोम्ठाम् खिम्पि काम्नुहा काम्नुहा ठालबि पेन्मा मिनुक्मि। 7 हाङ् खोचि हाटाबि वाइटिॽमार याॽमिचिऎ स्यामिॽङामिर हाङ् ‘चिन्खुबो’ कामानुङ् लोङामिर मिनुक्मि। 8 “टर आन्नाबि आसास ‘चिन्खुबा’ लोमा पाब्नि मान्ठाभनॆ आन्ना चोब्न एक्कन हाङ् आन्नामि चिन्खुबा एक्क टेः चु। 9 ग बाखाटेम्पि आन्नॆ आसास ‘काम् निवाँयुङ्मि आपा’ कामानुङ् आलोसाम्नॆ मान्ठाभनॆ पारुबि एक्क टेःक्न आन्नामि आपा चु। 10 हाङ् आन्ना आसॆस ‘चिन्खुबा’ ऎलोमिर मान्ठाभनॆ आन्नामि एक्क टेः चिन्खुबा खिरिस्ट यो। 11 आन्ना हङ्सिबि आसा चाइ चोब्बाङ् टुङ्घङ्पॆ लि खो आन्ना चोब्नमि योम्पक् मुपिखुबा लि। 12 आसॆ चाइ टाङ्पा टुङ्घङ्पा मुकु खो निवाँहाङ्ऎ मिःछुॽमा मुकु, हाङ् आसॆ चाइ टाङ्पा मिःछुॽमा मुकु खो निवाँहाङ्ऎ ढ्या मुकु। येसुऎ हुन्नहा याॽमिचि वोमिम्पा ( मारकुस १२:४० ; लुका ११:३९-४२ , ४४ , ५२ ; २०:४७ ) 13 “ढिक्कारा, आन्ना मोसामि यायेॽमा चिन्खुबाचि हाङ् फारिसिचि! आन्ना हुन्नहा लॆकानि मान्ठाभनॆ आन्नॆ याॽमिचिम् ङारिङ्पा पारुमि हाङ्डाम्मि लम्भॆरॆङ्मा सॆक्ठाङ्डाम्नि। हाङ् आक्कुबि आन्ना स भॆनानिनि हाङ् भॆन्मा यक्खुबाचि सङ्क भॆन्मा पिट्टाम्चिनिनि। 14 “ढिक्कारा, आन्ना मोसामि यायेॽमा चिन्खुबाचि हाङ् फारिसिचि! आन्ना हुन्नहा लॆकानि मान्ठाभनॆ आन्नॆ लाङ्मिॽमाचिम् खिम् लुप्चाकाम्नि हाङ् खाङ्मिॽमाम् लागि टक्भॆहा टक्भॆहा पारठाना लॆखाङ्कानि। मसॆ आन्नॆ चाइ होइढाचिबाङ् चाइर डान्डा टक्चाकाम्नि। 15 “ढिक्कारा आन्ना मोसामि यायेॽमा चिन्खुबाचि हाङ् फारिसिचि! आन्ना हुन्नहा लॆकानि मान्ठाभनॆ आन्नॆ एक्क याॽमि आन्नाम् मुमाम् लागि नाम्फलिॽवा हाङ् बाखाटेम्न टेमॆ खानावाँ इकाम्नि। आक्क याॽमि आन्नामि हुक्पि टॆकाम्निहाङ् आन्नॆ खो आन्नाबाङ्स डिरिक् नाराक्मि पासा मुकाम्नि। 16 “ढिक्कारा आन्ना, मिक्सुरुम्पा टुङ्घङ्पाचि! आन्नॆ गर कामानुङ् याॽमिचि चिनुकाम्चिनि, ‘निवाँहाङ्मि खिम्मि निङ्पि किरे डॆम्मार माङ्स लिनि, टर निवाँहाङ्मि खिम्पि चुऎ फिइयामि निङ्पि किरे डॆन्मार चाइ आक्क लागालि।’ 17 निवाँ मॆड्डिङ्हा हाङ् मिक्सुरुम्पा आन्ना! मिॽलाआनॆ, फिइया ढ्या रु आक्क फिइया सॆङ्सॆङॆ मुखुबा निवाँहाङ्मि खिम् चाइ ढ्यार? 18 हाङ् आन्ना गर सङ्क काकानि, ‘आसॆ युङ्ठङ्मि निङ्पि किरे डॆन्मार माङ्स लिनि, टर आक्क निङ्पि टिमिम्पा ठकाबि किरे डॆनुक् हाङ्ग आक्क लागालि।’ 19 आन्ना मिक्सुरुम्पाचि! हाम्पॆ चाइ चोब्बाङ् ढ्या लिऎ? सङ्टिमिम्पा ठका रु आक्क सङ्टिमिम्पा ठका सॆङ्सॆङॆ मुखुबा युङ्ठङ् चाइ ढ्या? 20 मसॆ आसॆ चाइ युङ्ठङ्मि निङ्पि डिन्चासे किरे डॆनुकु, आक्कसॆ युङ्ठङ् हाङ् आक्कुबि चुऎ चोब्न ठकाबि किरे डॆनुकु। 21 हाङ् आसॆ चाइ निवाँहाङ्मि खिम्मि निङ्पि किरे डॆनुकु हाङ् आक्कसॆ आक्कुबि पेन्खुबा निवाँहाङ्बि किरे डॆनुक्। 22 हाङ् पारुमि निङ्पि किरे डॆन्खुबॆ निवाँहाङ्मि पेन्मॆ ठाल हाङ् आक्क सक्पि पेन्खुबा निवाँहाङ्पि किरे डॆनुक्। 23 “ढिक्कारा आन्ना, मोसामि यायेॽमा चिन्खुबाचि हाङ् फारिसिचि! आन्ना हुन्नहाचिन, मान्ठाभनॆ आन्नॆ, पटॆना, स्वाँपा हाङ् जिरामि एपङ् भाग पिकाम्नि, टर यायेॽमा रक्न लॆःॽमान लॆहा न्यायॆमि योम्पक्, नाम्नाम् पिसिॽमॆ खानावाँ हाङ् निवाँयुङ् लॆःॽमॆ योम्पक् चाइ मुसानिनि। आन्नॆ एपङ् भाग पिॽमॆ योम्पक् सोरि सोरि यायेॽमाऎ लोमिम्पा आक्खा योम्पक् सङ्क यिक्मा लॆ। 24 आन्ना मिक्सुरुम्पा टुङ्घङ्पाचि, मान्ठाभनॆ आन्नॆ मिॽमिहा बोम्सुमा चाइ ठागुकाम्नि, टर अन्युक् चाइ लिन्ढिङ्खॆकाम्नि! 25 “ढिक्कारा आन्ना, मोसामि यायेॽमा चिन्खुबाचि हाङ् फारिसिचि! आन्ना हुन्नहाचिन, मान्ठाभनॆ आन्नॆ ठाला हाङ् खरॆ बाहिरा पोट्टि ग पॆङ्काम्नि टर हङ्सिउ चाइ आन्ना चिःक्सिमा लुलु हाङ् लोभाऎ चेप्खॆमिकाम्नि। 26 ओ मिक्सुरुम्पा फारिसिचि, याॽल ठाला हाङ् खरॆमि हङ्सिउ पॆङाम्नॆ हाङ् आक्खामि बाहिरा पोट्टि सङ्क पॆङ्मिम्पा लि। 27 “ढिक्कारा आन्ना, मोसामि यायेॽमा चिन्खुबाचि हाङ् फारिसिचि! आन्ना हुन्नहाचिन, मान्ठाभनॆ आन्ना बाहिरा खेःवाऎ लॆङ्मिम्पा काम्नुऎ येःॽमार खाङ्मुकानि। टर हङ्सिउ चाइ किम्खॆमिम्पा याॽमिमि सॆकॽवा नुङ् चोब्न काइसॆ डॆक्मिम्पा लि। 28 गरहाङ्न आन्ना याॽमिचिऎ बाहिराबाङ् खाङ्मार आन्ना निवाँनेन् लॆकानि, टर हङ्सिॽयु चाइ हुन्नहा खानावाँ हाङ् हिङ्वाऎ चेप्खॆडानि। आब्डिक्मि खानावाँ ( लुका ११:४७-५१ ) 29 “ढिक्कारा आन्ना, मोसामि यायेॽमा चिन्खुबाचि हाङ् फारिसिचि! आन्ना हुन्नहाचि, मान्ठाभनॆ आन्नॆ निवाँहाङ्मि खानावाँ लोखुबाचिम् येःॽमा हेबुकाम्नि हाङ् निवाँनेन याॽमिचिमि येःॽमा चागुकाम्नि। 30 हाङ् आन्ना काकानि, ‘काङ्काम् पाप्पा टुबाचिम् पालबि काङ्का चुइङ्काग निवाँहाङ्मि खानावाँ लोखुबाचि सेॽमॆ योम्पक्पि खोचिनुङ् मान्यिगिङ्का हला।’ 31 मसॆ आक्र कामानुङ् आन्नॆ आन्ना निवाँहाङ्मि खानावाँ लोखुबाचि सेक्खुबा याॽमिचिम् पासाचिन कामानुङ् चुमॆक्सङ् पिकाम्नि। 32 आन्नामि पाप्पा टुबाचिऎ मान्टक्मा लॆकॆम्पा हिङ्वामि योम्पक् लॆकॆटामि म आन्नॆ यॆराम्नॆ! 33 “ओ सिःक्चा नुङ्मा पुसॆःॽमामि पासाचि, नाराक्पि सिॽमाबाङ् मान्टहाङ् आन्ना हिङ्चाकानिहा? 34 मसॆ कॆ आन्नाबि निवाँहाङ्मि खानावाँ लोखुबाचि, निवाँटाङ्पा याॽमिचि हाङ् चिन्खुबाचि पाङ्हाङ्कुङ्चि। आक्खाचिबि आन्नॆ ऎॽवाचि सेरुकाम्चिनि हाङ् कुरुसाबि कॆङ्सिकाम्चिनि, ऎॽवाचि चाइ याहुडिचि खोम्ठाम् खिम्पि कर्रा टिकाम्चिनि हाङ् ऎॽवाचि चाइ हाटा हाटाबाङ् यिक्पहाङ्कुचिमि। 35 मसॆ आब्डिक् मॆड्डिङ्मा याॽमि हाबिल्मि हारिबाङ् निवाँहाङ्मि खिम् नुङ् युङ्ठङ्मि लुम्पि आन्नॆ सेॽमिम्पा बेरेक्किहामि पासा जाकारिया हाङ् बाखाटेम्पि अङ्मिॽमिम्पा चोब्न निवाँनॆन याॽमिचिमि हारिमि आब्डिक् आम्नि निङ्टवाँबि सि। 36 चाइबान कॆ आन्ना लोकानि, इघा चोब्न खानावाँ आच्चेलाहा याॽमिचि सक्पिॽन सि। येसुऎ यरुसालेम्मि लागि डुखा मिन्मिम्पा ( लुका १३:३४-३५ ) 37 “ओ यारुसालेमबिहा याॽमिचि, ओ यारुसालेमबिहा याॽमिचि! आन्नॆ निवाँहाङ्ऎ आन्नाबि पाङ्हाङ्पा निवाँहाङ्मि खानावाँ लोखुबाचि ऎॽवाहा खेप्पा लुङ्कॽवाऎ डॆराम्चिनि हाङ् सेराम्चिनि हाङ् हस आक्रक्न लॆःॽमा मिङ्कानि। आन्ना कोब्माडोब्माम् लागि कॆ काम् हुक् वारुॽमाऎ उम् पासाचि कुःप्माम् लागि लाप्रॆङ् फेसिन्टॽन फेसुङ् टर आन्ना माखासिआनि। 38 खाङाम्नॆ, ह आम्नि खिम् याइडा हाङ् माङ्स माऎ लिडा। 39 मान्ठाभनॆ कॆ आन्ना लोकानि, ‘पारभुमि निङ्पि टाखुबा आसिका नुङ्मा लॆ’ मालोरढारि आन्नॆ काङा फेरि हानाम्स खाङ्टॽङानिनि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.