मट्टि 11 - लोहोरुङ्येसु हाङ् बाप्टिस्मा पिक्खुबा युहान्ना ( लुका ७:१८-३५ ) 1 हाङ् येसुऎ टाङ्पाम् एपङ्हि टिङ्खुबाचि लोमाहा खानावाँ लोसिटु हाङ् खो चाइ आक्कबाङ् गालिलमि गॆअङ्मॆअङ्हा हाटाबि चिन्सि हाङ् खेम्मिसि खारा। 2 हाङ् बाप्टिस्मा पिक्खुबा युहान्ना सॆक्चिम्पि सॆक्ढिङ्खॆम्पा बेला खोसॆ खिरिस्टऎ मुमिम्पा योम्पक्मि बारेबि खानावाँ खेमु। हाङ् खोसॆ खोम् टिङ्खुबाचि ग खानावाँ सिम्सि पाङ्हाङ्सुचि। 3 आक्खाचि टाआमिहाङ् येसु गर कामानुङ् सिमुचि, “काङ्कॆ हुङ्मिम्पा खिरिस्ट आनान रु काङ्कॆ होइकमिन लाम् खाङ्मा लॆऎ?” 4 येसुऎ आक्खाचि लोसुचि, “खारानॆ हाङ् आन्नॆ खेम्मिम्पा हाङ् खाङ्मिम्पा खानावाँ युहान्ना खेम्मिटाम्नॆ- 5 मिक्सुरुम्पाचि मिक् खाङ्खुबा लिडामि, लाङ् टामिनिहाचि लाम्ढुबडामि, साखक्मि टुक्खाचि नुबक्डामि, नाबाक् आखेम्खुबाचि खेम्खुबा लिडामि, सिखॆम्पाचि हिङ्पडामि हाङ् माङ्स माआमिहा याॽमिचिऎ नुऎ खानावाँ खेम्टक्डुचि। 6 हानाम्स काबि निवाँयुङ् लॆखुबा आसिका टक्चामिम्पा याॽमि यो।” 7 हाङ् बाप्टिस्मा पिक्खुबा युहान्नामि टिङ्खुबाचि खाइटामि हाङ् येसुऎ याॽमिचि युहान्नामि बारेबि लोसुचि, “आन्ना आसास पेन्मिनिहा ठालबि मान्ठा खारानिहा? माल् हिॽयापाऎ मिट्ढाङ्मिम्पा निङ्गालॆ बाफु खाङ्सि? 8 हॆॽनॆहाङ्ग आन्ना माङ् खाङ्सि खॆॽमिम्पा लॆटानिहा टा? माल काम्नुहा चे चाङ्मिम्पा याॽमि खाङसि? काम्नुहा चे चाङ्मिम्पाचि ग हाङ्खिम्पि पेनुक्मि। 9 लु इराङानॆ आन्ना माङ् खाङ्सि आम्पकानिहा टा? निवाँहाङ्मि खानावाँ लोखुबा खाङ्सि? खो मन, कॆ लोकानि, आन्नॆ निवाँहाङ्मि खानावाँ लोखुबाबाङ्स टुङ्घङ्पा एक्क याॽमि खाङ्टडाम्नि। 10 बाप्टिस्मा पिक्खुबा युहान्ना आक्क याॽमि रेम, खोम् बारेबि निवाँहाङ्ऎ निवाँनेन् साब्चिराबि गर लोसु, ‘खाङॆ, काम् पाङ्कुचा आनाबाङ् याॽलन पाङहाङ्कुङ्, हाङ् खोसॆ आनामि लाम्फु आना खॆॽमाबाङ् याॽलन हेम्बकु।’ 11 “चाइबान कॆ आन्ना लोकानि, याॽमि हङ्सिबि बाप्टिस्मा पिक्खुबा युहान्नाबाङ् टुङ्घङ्पा आसास माआमि। हाङ्स पारुमि हाङ्डाम्पि आसा चाइ चोब्बाङ् मिछुॽमा लॆ, खो बाप्टिस्मा पिक्खुबा युहान्नाबाङ् स ढ्या लि। 12 बाप्टिस्मा पिक्खुबा युहान्नामि लःबाङ् हढारि पारुमि हाङ्डाम् याॽमिचिऎ डुखा पिॽमॆ पाइकुचि। हाङ् याॽमिचि आक्कुबि हेमाहे भॆन्मॆ पाइमि। 13 मान्ठाभनॆ युहान्ना टामाबाङ् याॽल चोब्न निवाँहाङ्मि खानावाँ लोखुबाचि हाङ् मोसामि यायेॽमाऎ निवाँहाङ्मि हाङ्डाम्मि बारेबि खानावाँ इःसु। 14 काङॆ लोमिम्पा खानावाँबि खासिकानि हाङ्ग एलिया चाइ मन। 15 आसाम् नाबाक् चु खोसॆ खेमुर! 16 “आच्चेलाहा याॽमिचि कॆ माङ् नुङ् सिःग्माचिहा? आक्खाचि ग हाटाबि पेन्से वाप्चाखुबा पिसाचिर लॆःॽमि हाङ् होइढा लाङ्काम्चि सेःरुकुचिमिहाङ् गरहाङ् लोकुचि, 17 ‘काङ्कॆ आन्नामि लागि बिब्बिलिङ्मा डुबिङ्का हाङ्स आन्ना मालाॽलुसानि। काङ्कॆ डुखामि साम् इसिङ्का हाङ्स आन्ना मॆहाबानि।’ 18 “कॆग लोकुङ् मान्ठाभनॆ युहान्नाऎ चामॆ हाङ् डुङ्मॆ खानावाँबि निवाँ माटिरे टाआ। खोचिऎ खो खारिॽमाङ्ऎ लाप्मिम्पा याॽमि लोसुचि। 19 हाङ् याॽमिमि पासा चाइ चासे डुङ्से टाआ। हाङ् खोचिऎ खो चाइ ‘खाङानॆ, रोप्खुबा सेइङ्खॆटिक्खुबा, यावॆङ्ग लाखुबा हाङ् हिङ्वाचिम् लाङ्काम्’ कामानुङ् लोकुचि। निवाँहाङ् ऎॽवाकॆ निवाँटाङ्पा लॆऎ लोमॆ खानावाँ खोम् योम्पक्ऎन चुमॆक्सङ् पिःइडा।” निवाँयुङ् आलॆखुबाचि ढिक्कारा ( लुका १०:१३-१५ ) 20 “हाङ् हाम्पॆ हाम्पॆ हाटाबि येसुऎ डिरिक् चॆक्मावाऎ योम्पक् यिक्मिम्पा लॆटु, आक्खा ठालबिहा याॽमिचि टाङ्पामि हिङ्वाबाङ् माऎन्पक्मि। मसॆ खोसॆ खोचि गर कामानुङ् वोबकुचि, 21 “ढिक्कारा, खोराजिन हाङ् बेठ्सेडाबिहा याॽमिचि! मान्ठाभनॆ आन्नामि लुम्पि यिक्मिम्पा आक्खॆमाहा योम्पक् टुरोस नुङ् सिडोन्बिहा याॽमिचिम् लुम्पि यिक्मिम्पा हाङ्ग आरॆॽन खोचिऎ चखॆॽमामि चे चाङ्से हाङ् ठाब्बि सिःॽमानुङ् उम्चि हिङ्वा याइखुबा लॆटुचि। 22 मसॆ कॆ आन्ना लोकानि, निवाँहाङ्ऎ न्यायॆ लॆःॽमार आन्नामि डुखा टुरोस नुङ् सिडोन्बिहा याॽमिचिम्बाङ् सङ्क ढ्या लि। 23 “ओ काफारनहुमबिहा याॽमिचि, माल् आन्ना पारुबि टुङ्घङ्पा लिकिङ्का मिङ्कानिहा? आन्ना ग नाराक्पि कक्ढाङ्कानि मान्ठाभनॆ आन्नाबि लॆमिम्पा आक्खॆमाहा योम्पक् साडोम हाटाबि लॆमिम्पा लॆटा ग आक्क हढारि स लिखुबा लॆटा। 24 मान्ठाभनॆ कॆ आन्ना लोकानि, निवाँहाङ्ऎ न्यायॆ लॆःॽमार आन्नामि डुखा साडोम हाटाबिहा याॽमिचिम्बाङ् सङ्क ढ्या लि।” काङाबि नाचासि डाबानॆ ( लुका १०:२१-२२ ) 25 येसुऎ आक्रल लोसु, “ओ आपा, पारु हाङ् बाखाटेम्पिऎ पारभु, कॆ आना ओहाक् पिःॽना। मान्ठाभनॆ आनॆ इघा खानावाँ निवाँटाङ्पाङाये मिन्खुबाचि नुङ् चेन्टुबावाँ याॽमिचिबाङ् चुमुना हाङ् पिसाचि रक्मा याॽमिचि चाइ वाप्मिटुचिना। 26 मान्ठाभनॆ आपो, आनॆ गरक्न लॆःॽमा काम्निटुना। 27 “हाङ् काम् निवाँहाङ् आपाऎ काङा चोब्न चॆक्मावा नुङ् ढुप्पाट्ट पिडिङ। आपाबाङ् होइक आसॆस पासा लेसुचिनि हाङ् पासाबाङ् होइक आसॆस आपा लेसुचिनि। टर पासाऎ सॆःगुचि हाङ्ग याॽमिचिऎ आपा लेकुचि। 28 “याक्टाखॆम्पा हाङ् लिस्सॆ भारिऎ टिप्भुङ्पा चोब्न याॽमिचि, काबि टाआनॆ, कॆ आन्ना नाचामिकानि। 29 कामि जुवा खिनाम्नॆ हाङ् काबाङकॆ चिनानॆ, हाङ् टाङ्पामि लावाबि नाचाटकानि। मान्ठाभनॆ का नुऎ हाङ् नाम्नावाँ नुङ्मा लॆःॽङा। 30 मान्ठाभनॆ काम् जुवा खाराब टामॆ हाङ् काम् भारि सोप्पॆ लॆ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.