लुका 2 - लोहोरुङ्येसुमि जन्म ( मट्टि १:१८-२५ ) 1 मरक्लऎ डिनाबि रोम हाङ्डाम्बिऎ ढ्या हाङ् आगास्टसऎ याॽमि ङॆॽमाम् लागि निङ् साॽमा लॆ कामानुङ् खोसॆ हाङ्डाम् लॆःमिम्पा चोब्न हाङ्डाम्पि लोमिम्पा लॆटा। 2 इग याॽलऎ निङ् ङॆःॽमॆ नुङ् साॽमॆ योम्पक् लिमार कुरेनियास लोमॆ याॽमि सिरिया अन्चलबिऎ टुङ्घङ्पा लॆटा। 3 चोब्न याॽमिचि निङ् साप्सि टाङ्पा टाङ्पामि हाटाबि खारामि। 4 योसेफ सङ्क खो पेन्डॆ ठाल गालिल अन्चलमि नासराटबाङ् निङ् साॽमाम् लागि खोम् टुबालाबाचिम् ठाल याहुडियामि बेटलेहेम लोमॆ हाटाबि खारा, मान्ठाभनॆ खो डाउडमि सामॆक्बिऎ याॽमि लॆटा। 5 निङ् साॽमाम् लागि खोसॆ टाङ्पॆ ङाःक्सिम्पा मारियम सङ्क सोरि चिखॆटु। आक्रल मारियम बःक्खुरुॽमा लॆटा। 6 बेटलेहेमपि चुआचिरक्न मारियममि चाचा टक्मॆ बेला साप्पु। 7 हाङ् खोसॆ टुम्मि पासा टगु हाङ् चेऎ मोमु हाङ् पिक्खङ्पि युङु मान्ठाभनॆ खोचिम् लागि पोप्ठाम्ठॆयोङ्पि ठवाँ मॆन्चु। कुखुबाचि नुङ् निवाँखाटॆखुबाचि 8 बेटलेहेम गाँवाँ कॆक्पिऎ चउराबि सामुङ् कुखुबाचि, उम्चि सामुङ् हुङ्सॆ युटा पेम्मिम्पा लॆटामि। 9 एक्क निवाँखाटॆखुबा कुखुबाचिमि कॆक्पि खाङ्मुसा। हाङ् निवाँहाङ्मि ओऎ गिउमिउ ओसा हाङ् खोचिऎ म खाङ्टकुचि हाङ् किसिमाऎ यङ्पकुचि। 10 हाङ् निवाँखाटॆखुबाऎ आख्खाचि लोसुचि, “आकिसिआनॆ, मान्ठाभनॆ काङॆ आन्नामि लागि एट्टान हाङ्हाङ्मि खानावाँ लाटॆडुङ। ग खानावाँ चोब्न याॽमिचिम् लागि लि। 11 “आयु डाउड जन्म लिमिम्पा हाटाबि आन्नामि लागि निवाँहाङ्ऎ पाङ्हाङ्पा एक्क फाक्खुबा खिरिस्टमि जन्म लिडा, खोन पारभु यो। 12 “आन्नॆ लेमाम् लागि चाइ ग लिक्, आन्नॆ एक्क चाचा चेऎ मोम्मिम्पा हाङ् सिङखङ्पि इम्मिॽमिम्पा खाङ्टकाम्नि।” 13 आक्रलॽन होइढा डिरिक् निवाँखाटॆखुबाचि सङ्क आक्कुबि खाङ्मुसामि हाङ् निवाँहाङ्मि निङ् ठेस्से गरक्मा साम् इबकामि, 14 “चोब्बाङ् सङ्पि पारुबि पेन्खुबा निवाँहाङ् सङ्पि लिर। हाङ् बाखाटेम्पि आसा याॽमिचि नुङ् खो चेन्चाक् आख्खाचिऎ सान्टि टक्चाउचिर।” 15 निवाँखाटॆखुबाचि पारुबि ऎम्पखारामि हाङ् कुखुबाचि टाङ्पा टाङ्पाबि गर कासामि, “लु कानि पारभुऎ लोमिम्पा रक्मा लिमिम्पा खानावाँ बेटलेहेमपि खाङ्सि खॆॽमा।” 16 हाङ् कुखुबाचि पिन्से बेटलेहेम खारामि। आक्कुबि खोचिऎ मारियम, योसेफ नुङ् सिङ्खङ्पि इम्मिॽमिम्पा चाचा खाङ्टकुचि। 17 आक्क डॆङ्पि निवाँखाटॆखुबाऎ चाचा टक्डा कामानुङ् इडुयॆ खानावाँ खोचिऎ खेम्मिटुचिमि। 18 ग खानावाँ खेम्खुबा चोब्न याॽमिचि आख्खॆटुचि। 19 टर मारियमऎ चाइ खेम्मिम्पा चोब्न खानावाँ उम् निवाँब्न युङु। 20 मान्टक्मा कुखुबाचि लोमिम्पा लॆटामि आक्रक्मान खेम्टमिम्पा नुङ् खाङ्टक्मिम्पासॆ खोचि निवाँहाङ्मि निङ् लासे ठेस्से ऎम्पकामि। येसुमि निङ् युङ्मिम्पा 21 इस्राएलिचिम् यायेॽमा रक्न बाङ्चि डिनाबि चाचामि खाट्ना लिमार खोम् निङ् “येसु” युङुचि। आक्क निङ् खो बःक्पि टामाबाङ् याॽलन निवाँखाटॆखुबाऎ पिॽमिम्पा लॆटा। येसु सङ्टिम्पा 22 मोसाऎ साॽमिम्पा यायेॽमा रक्न खोचिम् सॆङ्सॆङॆ लिमॆ लः लिसा हाङ् खोचिऎ खो निङवाहाङ्मि ङारिङ्पि पिस्सि यारुसालेम लाटॆटुचि। 23 मान्ठाभनॆ निवाँहाङ्मि यायेॽमाबि “चोब्न याॽल टॽमिम्पा वाठाङ्पा पासा निवाँहाङ्मि लागि सङ्टिॽमा लॆ” कामानुङ् साब्डा। 24 हाङ् निवाँहाङ्मि यायेॽमाऎ लोसिन्टॽन, खोचि हिच्चि हिच्चि उखिरिॽवा रु रप्खॆॽवा खिम्मानुङ् सङ्टिॽमाम् लागि निवाँहाङ्मि खिम्पि टाआचि। 25 आक्रल सिमियोन लोमॆ याॽमि यारुसालेमपि पेन्युक्सा। खो निवाँनेन् याॽमि लॆटा हाङ् खो निवाँहाङ्बि निवाँयुङ् लॆयुक्सा। खोसॆ इस्राएलिचिम् फाक्खुबा याॽमिमि लाम्फु खाङ्ढाङ्पा लॆटु हाङ् खोनुङ् सॆङ्सॆङॆ लावा चुआ। 26 सॆङ्सॆङॆ लावाऎ सिमियोन गरहाङ् लोमिम्पा लॆटा, “निवाँहाङ्ऎ पाङ्कुयॆ खिरिस्ट मॆखाङ्टॽलढारि आना सिखॆॽनानि।” 27 सॆङ्सॆङॆ लावाऎ सिमियोन निवाँहाङ्मि खिम्पि खारॆ लोसु, हाङ् खो खारा। आक्रलॽन मारियाम नुङ् योसेफ सङ्क यायेॽमाबि साॽमिम्पा योम्पक् मुमाम् लागि चाचा खिम्मानुङ् निवाँहाङ्मि खिम्पि टाआचि। 28 सिमियोनऎ चाचा उम् हुक्पि ठेॽमानुङ् निवाँहाङ्मि निङ् ठेस्से खो गर कासा, 29 “ओ निवाँहाङ्, आनॆ कानुङ् इमिम्पा खानावाँ सङ्क यॆरुना। ह काङा आनाम् योम्पक् मुखुबा काम्नुःर लाम्फु पिॽङॆ। 30 मान्ठाभनॆ काम् मिगॆॽन आनॆ पाङ्हाङ्पा फाक्खुबा खाङ्टकुङ। 31 आनॆ खो चोब्न याॽमिचिऎ खाङ्टकुचिर कामानुङ् पाङ्हाङ्डुनॆ रेम। 32 खोन होइढा हॆॽनि बारेक् याॽमिचि आनाम् लाम्फु खाङ्मिखुबा ओप्लिङ् यो हाङ् आनाम् इस्राएलि याॽमिचि निङ्लावा लॆःॽमिखुबा रेम।” 33 चाचामि बारेबि सिमियोनऎ लोमिम्पा खानावाँ खेमाचु हाङ् योसेफ नुङ् मारियाम आक्टिखाराचि। 34 सिमियोनऎ खोचि आसिका पिट्टुचि हाङ् उम्मा मारियाम लोसु, “खेमॆ, इस्राएलबि डिरिक् याॽमिचि हिङ्पमिॽमाम् लागि नुङ् नासॆलॆॽमाम् लागि निवाँहाङ्ऎ आनम्न चाचा सॆःक्डु। खोन निवाँहाङ्मि लाम्फु खाङ्मिखुबा यो हाङ् डिरिक् याॽमिचिऎ खो सिच्चाकुचि। 35 गरहाङ् डिरिक् याॽमिचिम् निवाँबिहा खानावाँ खाङ्मुक् हाङ् आनाम् निवाँ चाइ छोम्कुयॆ ठुॽलाङ्ऎ ठगिन्टॽन टुगुक।” 36 निवाँहाङ्मि खिम्पि एक्क निवाँहाङ्मि खानावाँ लोखुबा हन्ना लोमॆ मासिङ्मा चुआ। खो आसेर सामॆॽबिऎ फानुएल लोमॆ याॽमिमि मेॽनुङ्मा पासा लॆटा। खो भ्या लॆःॽमिम्पा बाङ्चि निङ् डॆङ्पिॽन लाङ्मिॽमा पिक्खॆम्पा लॆटा। 37 हाङ् खो लाङ्मिॽमान लिमानुङ् बापङ्रिऎ (८४) निङ्ऎ मासिङ्मा पिक्खॆम्पा लॆटा। हाङ् खोसॆ निवाँहाङ् चुङ्ठाम् खिम् मॆयाइले म साक्नेॽमानुङ् लेल्लेन् सेन्सेन् निवाँहाङ् चुङ्युक्सु। 38 आक्रलॽन खो सङ्क मारियाम नुङ् योसेफमि कॆक्पि टाआ हाङ् निवाँहाङ् ओहाक् पिट्टु हाङ् इस्राएलिचि हिङ्चामिक्खुबामि लाम्फु खाङ्खुबा चोब्न येसुमि बारेबि इटुचि। 39 निवाँहाङ्मि यायेॽमाऎ लोसिन्टॽन चोब्न मुमाहा योम्पक् मुसिटाचु हाङ् मारियाम नुङ् योसेफ चाचा येसु चिःक्मानुङ् गालिल ठुम्काबिऎ उम्चि हाटा नासरटबिॽन ऎन्टाआचि। 40 आक्कुबि चाचा पुसे चॆक्मावाऎ लिसे खारा हाङ् निवाँ टासे खारा, हाङ् निवाँहाङ्मि आसिका खो सक्पि चुआ। येसुऎ निवाँहाङ्मि खिम्पि खानावाँ इमिम्पा 41 येसुमि उम्पा उम्मा सालिम्मे फाक्मिम्पा चाडा मानालॆसि यारुसालेम खॆॽयुॽसाचि। 42 येसु एपङ्हि निङऎ लिमार याहुडि चालाना रक्न खोचि चाडा मानालॆसि यारुसालेम खाराचि। 43 चाडा लुक्खारा हाङ् खोचि टाङ्पाम् खिम्पि ऎम्पकामि। येसु चाइ यारुसालेमबिॽन पेयाका। हाङ्सङ् ग खानावाँ उम्पा नुङ् उम्माऎ मालेचु। 44 येसु होइढा लाम्फु लाम्ढुखुबाचिनुङ् चु मिनाचि हाङ् लेल्लेन् लाम्ढुङ्साचि। युटा म टाङ्पाम् याॽमिचि नुङ् लाङ्काम्चिम् लुम्पि यक्पकाचु। 45 टर खोचिऎ आक्कुबि येसु मान्यक्टकाचु। मसॆ खोचि खो यक्माम् लागि यारुसालेम ऎम्पकाचि। 46 हाङ् खोचिऎ सुम्चि डिनाबि येसु निवाँहाङ्मि खिम्पि यक्टकाचु। आक्रल खो निवाँनेन् खानावाँ चिङ्खुबा याॽमिचिम् खानावाँ खेम्से हाङ् खानावाँ सिम्से पेम्मिम्पा लॆटा। 47 खोसॆ यामुमिम्पा नुङ् ऎम्पिॽमिम्पा चेन्टुबाङ् निवाँहा खानावाँ खेम्खुबा नुङ् खाङ्खुबा चोब्न आक्खॆ मियुक्सुचि। 48 आक्कुबि उम्चि पासा खाङ्टकाचु हाङ् खोचि स आक्टिखाराचि। हाङ् मारियामऎ सिमु, “चाचो, आनॆ काङ्का इग माङ् लॆःॽमिम्पा? खाङॆ, आम्पा नुङ् काङॆ आना किसिसे यक्मेसिसाचिम्।” 49 खोसॆ खोचि लोसुचि, “आन्नॆ काङा मान्ठा यक्मिम्पा? माल काङा उङ्पामि खिम्पि लिमा लॆ कामानुङ् आन्नॆ लेसाम्निनॆ?” 50 हाङ्सङ् खोसॆ लोमिम्पा खानावाँ खोम् आमा नुङ् आपाऎ मॆवाप्हिचु। 51 आक्क डॆङ्पि येसु खोम् आपाआमानुङ् नासरटबि ऎन्टाआ हाङ् खोचिऎ लोमिम्पा खानावाँ खासिसे पेना। उम्माऎ चाइ इघा चोब्न खानावाँ मामिखॆॽले म उम् निवाँब्न युङु। 52 हाङ् येसु सालुङ् नुङ् निवाँबि निवाँहाङ् नुङ् याॽमिमि नाम्नावाँबि पुबक्से खारा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.