याकुब 4 - लोहोरुङ्बाखाटेम्मि लाङ्काम् 1 हाङ् आन्नामि लुम्पि खिमाटुमा हाङ् याटक्माटक् हाम्पा टाऎ? आक्खा चोब्न खानावाँ आन्ना काइर लॆसॆ हाङ्स हानाम्स चेन्चामा यकुवॆ आम्नि सालुङ् हङ्सिॽयुबाङ् टाडॆ हॆॽनॆ? आक्क चाइ आन्ना हङ्सिॽयु खि। 2 आन्नॆ टक्चामा मिङ्कानि, टर आक्क टक्चाआम्निनि मसॆ सेप्पे चुकानि। आन्नॆ लामा मिनुकाम्नि टर आन्नॆ मिॽलाम्पा ठका टक्चाआम्निनि, मसॆ आन्ना ङॆनुकानि हाङ् खिकानि। हाङ् आन्ना याटक्माटक् काकानि हाङ् खिकानि। आन्नॆ टक्चाआम्निनि मान्ठाभनॆ आन्नॆ निवाँहाङ् नुङ् ङागाम्निनि। 3 आन्नॆ ङागुकाम्नि टर टक्चाआम्निनि मान्ठाभनॆ आन्नॆ टक्चामा मिकाम्नॆ ठका काइसॆ योम्पक्मि लागि काइसॆ निवाँऎ ङागुकाम्नि। 4 ओ ब्याबिचारि याॽमिचि, माल् बाखाटेम् नुङ् लाङ्काम् लॆङ्मॆ लोमॆ चाइ निवाँहाङ्ऎ सिच्चाकु लोमॆ लेसाम्निनॆ? आसॆ चाइ बाखाटेम् नुङ् लाङ्काम् लि खो निवाँहाङ् सिच्चाखुबा लि। 5 माल् निवाँनेन् सप्चिराबि गरहाङ् साप्मिम्पा खानावाँ आन्नॆ हुन्नऎ मिनुकानिहा, “निवाँहाङ्ऎ कानि हङ्सिॽयु युङ्पिॽमिम्पा लावामि लागि खो एट्टान सिरि मिङ्कु?” 6 टर खोसॆ कानिऎ आक्खा काइसॆ खानावाँ याइहिसिर कामानुङ् हस नाम्नावाँ पिकि। मसॆ निवाँनेन् साब्चिराऎ लोकु, “निवाँहाङ्ऎ चाइ काङानङाये मिन्खुबाचि सिच्चाकुचि टर काङा माङ्स हॆॽङानॆ मिन्खुबाचि चाइ नाम्नावाँ पिकुचि।” 7 मसॆ निवाँहाङ्ऎ माङ् लोकानि म खेमाम्नॆ हाङ् साइटान चाइ काइर लोसाम्नि हाङ्ग आक्क आन्नाबाङ् खाइहाङ्। 8 आन्ना निवाँहाङ्मि नेन्टाङ् डाबानॆ हाङ् निवाँहाङ् सङ्क आन्नामि नेन्टाङ् टा। हिङ्वाचि आन्नॆ हिङ्वा योम्पक् यिक्मा याइटानॆ हाङ् निवाँ फॆक्खुबाचि आम्नि निवाँ सॆङ्सॆङॆ मुसाम्नॆ। 9 आन्ना हाबानॆ, याकासानॆ हाङ् निवाँ टुगानॆ। आन्नामि यिचामा चाइ हाब्माबि सिॽल हाङ् आन्नामि नेन्चामा चाइ डुखाबि सिॽल। 10 पारभुमि ङारिङ्पि टाङ्पा मिछुॽमा मुसाम्नॆ हाङ् खोसॆ आन्ना मिट्टु ठेप्पकानि। होइढा याॽमिचि न्यायॆ आलॆटाम्चिनॆ 11 बुबुनानुसाचो, एक्कसॆ होइक काइर लोबॆ आचुआनॆ। आसॆ चाइ टाङ्पामि बुबुनानुसाचि काइर लोकु आठावा आब्डिक् टिकु, खोसॆ यायेॽमान आब्डिक् टिकु। आनॆ यायेॽमा आब्डिक् टिकुना हाङग आना आक्कसॆ लोमिम्पा खेम्खुबा हॆॽनॆ टर आक्कमि न्यायॆ लॆखुबारे लिक्ना। 12 निवाँहाङ् टेःॽन यायेॽमा पिक्खुबा हाङ् न्यायॆ लॆखुबा यो। खोसॆ टेःॽन याॽमिचि हिङ्पमिॽमा स हेकु सेॽमा स हेकु। टर टाङ्पाम् गॆअङ्मॆअङ्हा याॽमिचि आब्डिक् टिखुबा आन्ना आसानिर? कायङ्पा मिन्खुबाचि वोमिम्पा 13 “आयु आठावा वेन्डा एक्क हाटाबि खॆःॽङा हाङ् आक्कुबि एक्क निङ्र पेनुॽङा हाङ् बेप्पारा लॆःॽङा हाङ् याङ् डुबुॽङा” काखुबा आन्नॆ काम् खानावाँ खेमाम्नॆ। 14 वेन्डा माङ् लिऎ लोमॆ आन्नॆ लेसाम्निनि। आनामि हिङ्खामा माल? गग एच्छक्मि लागि खङ्ङुखुबा माखॆखुबा मॆक्खुमा रक्मान। 15 आक्रहाङ् हॆॽनॆ, टर आन्नॆ गरहाङ् कामा लॆटॆ “निवाँहाङ्मि निवाँर लिसा हाङ्ग काङ्का हिङ्चाकिङ्का हाङ् म आठावा आक्क योम्पक् मुकिङ्का।” 16 टर आन्ना टाङ्पॆ मिॽलामिम्पा खानावाँबि काङानये मिङ्कानि। गरक्मा कायङ्पा मिन्मॆ चोब्न खानावाँ काम्नुऎ हॆॽनॆ। 17 मसॆ आसॆ चाइ नुऎ योम्पक् यिक्मा लॆ कामानुङ् लेकु हाङ्स म लॆटुनि आक्कसॆ हिङ्वा लॆकु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.