हिबुरु 5 - लोहोरुङ्1 चोब्न चोब्नबाङ् ढ्या याटाङ्पा निवाँहाङ्ऎ इस्राएलि याॽमिचिबाङ्न सॆःगुकु हाङ् याॽमिचिमि लागि निवाँहाङ्मि योम्पक् यिक्मॆ योम्पक्मि ढुप्पाट्ट पिकु। हाङ् आक्क चोब्नबाङ् ढ्या याटाङ्पाऎ याॽमिचिऎ हिङ्वा यङ्निमा टक्चाङार कामानुङ् निवाँहाङ् पिस्सि लाटॆॽमिम्पा ठका पिॽमॆ नुङ् सङ्टिॽमॆ योम्पक् यिगुकु। 2 खो टाङ्पान सङ्क काइसॆ योम्पक् यिक्खुबा एक्क याॽमि लिमिम्पासॆ खानावाँ ऎवाप्खुबाचि हाङ् टेराङ्गे लाम् लाम्ढुखुबाचि मिछुॽमा लिमानुङ् खानावाँ वाप्मिहिकुचि। 3 मसॆ होइडा याॽमिचिमि हिङ्वामि लागि सङ्टिसि खॆॽमार खोसॆ खो टाङ्पामि हिङ्वामि लागि सङ्क सङ्टिॽमान लॆ। 4 हाङ् आसास खोचिऎ निवाँबि मिन्मिम्पासॆ चोब्बाङ् ढ्या याटाङ्पा लिमानुङ् ङेःप्सिखॆॽमिनि, टर हारुन रक्न चोब्बाङ् ढ्या याटाङ्पा चाइ निवाँहाङ्ऎ सॆःगुकुहाङ् लि। 5 गरहाङ्न खिरिस्टऎ सङ्क टाङ्पॆ टाङ्पान चोब्बाङ् ढ्या याटाङ्पा मुमानुङ् निङ्लावा मान्लासु टर निवाँहाङ्ऎ खो लोसु, “आना कामि पासाना, हाङ् आइ काङा आनामि आपा लिडिङ्।” 6 हाङ् निवाँनेन् साब्चिरामि होइक ठालबि निवाँहाङ्ऎ गर इडु, “आना चाइ माल्किसेडेक लोमॆ याॽमि रॽन हानाम्स लिढ्याङ्खुबा याटाङपाना।” 7 हाङ् येसु बाखाटेम्बि चुआर खो सिखॆम्पाबाङ् हिङ्पॽमिॽहिखुबा निवाँहाङ् नुङ् ढ्या सम्लाबि हाब्से मिॽवानुङ् पारठाना लॆटा। हाङ् खो मिःछुपा लॆङ्से निवाँ टिसे पारठाना लॆॽमिम्पासॆॽन निवाँहाङ्ऎ खोम् पारठाना खेम्पिटु। 8 खिरिस्ट चाइ खो निवाँहाङ्मि पासा न लॆटा हाङ्स खोसॆ टाङ्पॆॽन आङ्मिम्पा डुखाबाङ् निवाँहाङ्ऎ लोमिम्पा खानावाँ खेम्मा चिनु। 9 हाङ् खिरिस्टऎ चोब्न खालाहा डुखा आङ्मानुङ् चोब्न खानावाँऎ चेप्खॆटु हाङ् खोसॆ लोमिम्पा खेम्खुबा चोब्नमि लागि हानाम्स लुक्खॆॽनॆ हिङ्खामा पिक्खुबान लिसा। 10 हाङ् निवाँहाङ्ऎन खो मल्किसेडेक लोमॆ याॽमि रक्न चोब्बाङ् ढ्या याटाङ्पा मुसु। निवाँयुङ् याइमा फॆन्नि 11 गमि बारेबि इमालॆऎ खानावाँ डिरिक् चु, टर आन्ना ऎॽवा लोमार सङ्क एखेम्खुबा लिमिम्पासॆ आन्ना वाप्मिॽमा हेनि। 12 हढारि ग आन्ना होइढा याॽमिचि निवाँहाङ्मि खानावाँ चिन्खुबा याॽमिचि लिसिॽमा लॆटॆ, टर होइखेपा सङ्क आन्ना होइढा याॽमिचिऎन निवाँहाङ्मि बारेबि मिॽमिहा खानावाँ सङ्क चिन्मा लॆकानि। हाङ् आन्ना छाक्कॆ चामॆ ठःका चाहिखुबा हॆॽनॆ, टर डुरु टे डुङ्खुबा चाचाचिर लॆकानि। 13 मान्ठाभनॆ आसॆ मिॽमिॽहा खानावाँ टे वाबुकु आक्क डुरु टे डुङ्खुबा एक्क चाचा रक्मान। खोसॆ निवाँनेन् खानावाँ चिन्मिम्पा लिनि। 14 टर छाक्कॆ चामॆ ठका चाइ पुखॆॽमिम्पा याॽमिमि लागि रेम। खोसॆ चिन्सिन्पासॆ काम्नुऎ नुङ् काइसॆ फाक्मॆ निवाँ टक्चामिम्पा लि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.