हिबुरु 13 - लोहोरुङ्निवाँहाङ् चेन्चामिॽमॆ खानावाँ 1 एक्कसॆ होइक बुबुनानुसा रक्न नाम्नाम् पिस्सिपॆ चुआनॆ। 2 हाङ् टाबाङ्चि खाङ्मा आमिखॆटाम्नॆ मान्ठाभनॆ ऎॽवाचिऎ मान्लेॽरेम निवाँखाटॆखुबाचि खाङ्डुचि। 3 हाङ् सॆक्चिम्पि सॆक्ढिङ्खॆडामिहाचि टाङ्पा सङ्क सॆक्ढिङ्खॆॽमिम्पा रक्न मिन्से खाङाम्नॆ। हाङ् डुखाबि सिडामिहा याॽमिचि टाङपा सङ्क डुखाबि सिॽमिम्पा रक्न खाङाम्नॆ। 4 हाङ् भ्यामि खानावाँ चोब्नसे ङेःप्मा लॆ। हाङ् खिम्टाङ्पा नुङ् खिम्टाङ्मामि लुम्पि एक्कसॆ होइक बङ्सिपे चुमा फॆन्नि मान्ठाभनॆ ङेसिमा लुऎ हाङ् होइकमि खिम्टाङ्पा नुङ् खिम्टाङ्मा नासॆलॆखुबा हाङ् ब्याबिचारिचि निवाँहाङ्ऎ डान्डा पिकुचि। 5 हाङ् आन्नामि हिङ्खामाबि याङ्मि लोभा आलॆटानॆ। आन्नानुङ् माङ् चु आक्कनुङ्न चेन्चाआनॆ मान्ठाभनॆ निवाँहाङ्ऎ गर लोःॽडि, “काङॆ आन्ना हानाम्स लॆहाङ्सानिनि, काङॆ आन्ना हानाम्स याइटानिनि।” 6 मसॆ कानि माकिसिरे गर कामा हेकि, “पारभुऎन काङा खाङुॽङा। काङा हानाम्स किसिङानि। याॽमिचिऎ काङा माल लॆहिङामिहा?” 7 आन्ना निवाँहाङ्मि खानावाँ चिन्खुबा टुङ्घङ्पाचि मिॽलाआम्नॆ। खोचिम् हिङ्खामा मान्टऎ लॆटॆ हाङ् मान्टहाङ् खोचिऎ ग बाखाटेम् याइडाउचॆ लोमॆ निवाँबि युङाम्नॆ। आन्नॆ सङ्क खोचिऎ रक्न निवाँयुङ् लॆटाम्नॆ। 8 येसु खिरिस्ट आसेन, आयु हाङ् हानाम्स मरक्टे लिढाङ्। 9 आन्ना नानाओलिहा उम्चङ् चिन्माहा खानावाँऎ आफोप्सिखारानॆ। चामॆ डुङ्मॆ खानावाँऎ हॆॽनॆ, टर निवाँहाङ्मि नाम्नावाँऎ कानिमि लावा चॆकुवॆ मुमिम्पा रेम। चामॆ डुङ्मॆ खानावाँऎ लावाबि हानाम्स आसास माङ्स काम्नुऎ योम्पक् मान्यिक्टिटु। 10 हाङ् कानिम एक्क युङ्ठङ् चु, आक्कुबि सङ्टिॽमिम्पा खानावाँबाङ् सॆङ्सॆङॆ ठालबि योम्पक् मुखुबा याटाङ्पाचिऎ माङ्स चामा फॆन्नि। 11 याहुडि चोब्बाङ् ढ्या याटाङ्पाऎ हिङ्वामि लागि सङ्टिॽमॆ पोसुमि हारि एट्टान सॆङ्सॆङॆ ठालबि लाटॆकु। टर पोसुमि सालुङ् छाउनिबाङ् बाहिर हिट्ढाङ्कु। 12 आक्रहाङ्न टाङ्पाम्न हारिऎ याॽमिचि हिङ्वाबाङ् फाक्माम् लागि येसु सङ्क हाटाबाङ् बाहिरान सिखारा। 13 मसॆ कानि सङ्क छाउनिबाङ् बाहिरा खोबि खारिये हाङ् खोसॆ आङ्मिम्पा ङेसिमा लुऎ खानावाँ कानिऎ सङ्क आङुम्ये। 14 मान्ठाभनॆ ग बाखाटेम् कानि हानाम्स पेन्मॆ कानिम् खिम् हॆॽनॆ। कानि ग डॆङ्पि टाऎ खिम्मि लाम् खाङ्मे पाइकि। 15 मसॆ कानिऎ हानाम्स येसुमि निङ्बाङ् निवाँहाङ् ठेॽमॆ योम्पक्ऎन सङ्टिॽमॆ योम्पक् यिगिये। ग चाइ खोम् निङ् लाखुबाचिम् याबाङ् सङ्टिॽमिम्पा भेटि रेम। 16 हाङ् एक्कसॆ होइकमि नुऎ लॆःॽमा हाङ् टाङ्पानुङ् चुऎ ठका हाचामा आमिखॆटाम्नॆ मान्ठाभनॆ ग निवाँहाङ्ऎ नेन्चाकुवॆ सङ्टिॽमॆ खानावाँ यो। 17 हाङ् आन्नामि टुङ्घङ्पाऎ लोमिम्पा खेमानॆ हाङ् खोचिम् ढुप्पाट्टबि पेनानॆ। खोचिऎ निवाँहाङ्बि उम्चि योम्पक् मान्टऎ कामानुङ् खाङ्मिॽमा लॆ हाङ् खोचिऎ हानाम्स आन्ना खाङुकानि। हाङ् खोचिमि खानावाँ खेमाम्नि हाङ्ग, खोचिऎ चेन्चामानुङ् योम्पक् यिगुक्मि। हाङ् माखेमाम्नि हाङ्ग, डुखा मिनुक्मि। खोचि डुखा मिन्मिटाम्नि हाङ्ग आन्नामि माङ्स काम्नुऎ लिबिटानिनि। 18 हाङ् काङ्कामि लागि पारठाना लॆटानॆ। काङ्कामि निवाँ नुऎ लॆ लोमॆ काङ्कॆ लेकुङ्का मान्ठाभनॆ काङ्का हाम्पॆ योम्पक काम्नुहा लॆ आक्खा योम्पक् टे यिक्मा मिनुकिङ्का। 19 हाङ् काङॆ आन्ना नुःर लोकानि, काङा आन्नाबि सॆॽलॽन टाहिङार कामानुङ् निवाँहाङ्बि पारठाना लॆपिॽङानॆ। डॆङ्पिऎ पारठाना 20-21 कानिमि पारभु येसु कानि खाङ्खुबा एक्क ढ्या कुचा रेम। खोम् हारिबाङ् निवाँहाङ् नुङ् याॽमिचिमि लुम्पि एक्क हानाम्स लुक्खॆॽनॆ चुप्लाङ् लिमा परःक्डा। निवाँहाङ्ऎ येसु खिरिस्ट सिखॆॽमिम्पाबाङ् हिङ्पक्मिॽमानुङ् उम्चङ् चुप्लाङ् यॆरु। गरहाङ् सान्टि पिक्खुबा निवाँहाङ्ऎ आन्ना चोब्न नुहा खानावाँ पिकानिहाङ् आन्ना खोमि निवाँ रक्न पाइहिकानि। आन्नामि हिङ्खामाबाङ् खो चेन्चामिॽहिसाम्नॆ कामानुङ् खोसॆ आन्ना येसु खिरिस्टबाङ् पाइबाकानि। येसु खिरिस्टमि हानाम्स निङ् सङ्पि लिर। आमेन। 22 बुबुनानुसाचि, काङॆ गर लॆटानॆ मर लॆटानॆ कामानुङ् साप्मिम्पा खानावाँबि निवाँ टिसानॆ कामानुङ् नुःर लोकानि। ग साब्चिराबि मिक्म टे खानावाँ साब्डुङ्। 23 हाङ् कानिम नुसा टिमोठि सेक्चिमबाङ् आम्पका लोमॆ आन्ना खेम्मिॽमा मिकानि। खो सेॽलन गुबि टाआ हाङ्ग आन्ना चुब्सि काङा टाःॽङार खो सङ्क लाटॆकुङ। 24 हाङ् आन्नामि चोब्न मान्डालिबिऎ टुङ्घङ्पाचि काङ्कॆ स्यामिहाङ्डामि कामानुङ् लोसाम्चिनॆ। हाङ् इटालियामि बुबुनानुसाचिऎ स आन्ना स्यामुहाङ्डानि। 25 आन्ना चोब्ननुङ् निवाँहाङ्मि नाम्नाँवा लिढाङ्र। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.