गालाटि 4 - लोहोरुङ्1 काङॆ लोमा यकुङॆ खानावाँ चाइ माङ्भनॆ, एक्क पिसानुङ् उम्पाबाङ् चोब्न ठःका टक्चामॆ ढुप्पाट्ट लिःबिकु हाङ्स खो मापुबक्लढारि चासुम्मि टुङ्घङ्पान हाङ्स खो योम्पक् मुखुबा एक्क याॽमि रःकॆ टेः लि। 2 मान्ठाभनॆ खो चाइ खोम् आपाऎ लोमिम्पा लःढारि होइढा खाङ्खुबा याॽमिचिम् ढुप्पाट्टबि पेम्मा लॆः। 3 गरहाङ्न कानि सङ्क एक्क पिसा रक्न मापुबक्लढारि ग बाखाटेम् नुङ् नाम्फलिॽवाबिऎ लावामि चॆक्मावामि ढुप्पाट्ट हङ्सि चुइ। 4 टर निवाँहाङ्ऎ लोमिम्पा लः टाआ हाङ् खोसॆ खोम् पासा ग बाखाटेम्पि पाङ्हाङ्सु। हाङ् खोम् पासा चाइ एक्क मेॽनुङ्माबाङ् जान्म लिसा हाङ् यायेॽमामि ढुप्पाट्टबि पेना। 5 यायॆॽमामि ढुप्पाट्टबि चुखुबा याॽमिचि टाङ्पा सिःखॆॽमानुङ् आक्क यायेॽमाबाङ् फाक्बक्सि हाङ् आक्कबाङ् कानि निवाँहाङ्मि पासाचि लिहिसिर कामानुङ् निवाँहाङ्ऎ खो पाङ्हाङ्सु। 6 हाङ् आन्ना निवाँहाङ्मि पासाचि लिमिम्पासॆ, निवाँहाङ्ऎ खोम् पासामि लावा कानिम् निवाँबि युङ्पिःडि। हाङ् आक्क लावाऎन कानि “ओ अब्बा, आपा!” कामिकि। 7 मसॆ ह आन्ना यायेॽमामि ढुप्पाट्टबि पेन्से योम्पक् मुखुबा याॽमिचि हॆॽनि, टर निवाँहाङ्मि पासाचि यो। हाङ् आन्ना खोमि पासाचि लिमिम्पासॆ, खोसॆ आन्ना पिकानि कामानुङ् लोमिम्पा खानावाँ पिकानिन। गालाटिचिमि बारेबि पावलमि खानावाँ 8 निवाँहाङ् लेःमाबाङ् याॽलि आन्नॆ बाखाटेम् नुङ् नाम्फलिॽवाबिहा होइकन डेउटाचि चुङ्युक्साम्नि हाङ् आक्खाचिम् योम्पक् मुखुबा याॽमिचि लॆटानि। 9 टर ह ग आन्नॆ निवाँहाङ् लेकाम्नि, बोरु निवाँहाङ्ऎ आन्ना खोम् पासाचि मुडानि। हाङ् मान्टक्ल ह आन्नॆ याॽलिहा हिङ्खामाबि ऎम्पक्मानुङ् आक्खा हुन्नहा लावाबिहा खानावाँमि योम्पक् मुखुबा याॽमिचि लिःमा मिनुकानिहा? 10 हाङ् आन्नॆ ग याहुडि चालानाबिहा डिना, माइना, रिटु हाङ् निङ्रे टिङ्मे पाइकाम्नि। 11 का गर मिम्मे पाइङा, काङॆ आन्नामि लागि हेमाहे यिक्मिम्पा योम्पक् हुन्नऎ लिऎ रु? 12 बुबुनानुसाचि, कॆ आन्ना नुःर लोकानि, आन्ना काङा रक्न आक्खा खानावाँबाङ् फागानॆहाङ् हिङचाआनॆ मान्ठाभनॆ काङा सङ्क यायेॽमाबाङ् फाग्से आन्ना हॆॽनिबारेक्चि रक्मान लिःडिङ। हाङ् काङॆ आन्ना याॽलि नुऎ खानावाँ खेम्मिटानिर माङ्स काइर मान्लॆटिॽङानि। 13 काङा टुक्पम्पासॆॽन याॽलि काङॆ आन्ना नुऎ खानावाँ खेम्मिटानि लोमॆ खानावाँ आन्नॆ लेकाम्निन। 14 आक्रल काङामि टुक्मावाऎ आन्ना खोप्चिनाँवाँबि सिॽमिॽमिम्पा लॆटानि हाङ्स आन्नॆ काङा काइर मालॆटिङ्नि। टर निवाँहाङ्मि निवाँखाटॆखुबा हाङ् खिरिस्ट येसुन टामिम्पार नुःर लॆटिङ्नि। 15 काङॆ ग खानावाँमि चुमॆक्सङ् पिकुङ्, आक्रल हेःमॆ योम्पक् लॆटा ग आन्नॆ आन्नामि मिक् लाबक्माहाङ् काङा पिॽमा सङ्क परक्खुबा लॆटानि। गरक्ल चाइ आन्नामि आक्क हाङ्हाङ् हाबि खाइटॆ? 16 माल् आक्क नुऎ खानावाँ खेम्मिॽमिम्पासॆ ह चाइ काङा आन्नॆ सिच्चामिम्पा याॽमि लिसिङॆ? 17 हुन्नहा खानावाँ चिन्खुबा आक्खा होइढा याॽमिचि आन्नामि निवाँ खोचिबि सॆॽमाम् लागि हेःर पाइमि, टर खोचि काम्नुऎ निवाँऎ चाइ पाइमिम्पा हॆॽनॆ। खोचिऎ आन्ना काङाबाङ् फाक्माहाङ् खोचि पोट्टा टेः निवाँ टिःमिर कामानुङ् आक्र लॆःॽमि। 18 आन्नामि लागि याॽमिचिऎ नुऎ लॆःॽमा मिनुक्मि, आक्क योम्पक् काम्नुऎन रेम, टर आक्क योम्पक् चाइ काङा आन्नानुङ् चुःॽङार टेः हॆॽनॆ, टर हानाम्स लिःढाङ्मा लॆ। 19 काङाम् पिसाचि, आन्ना खिरिस्टबि मापुबक्लढारि एक्क मेॽनुङ्माऎ चाचा टक्मॆ बेला आङ्कुवॆ डुखाबि काङा होइखेपा सङ्क सिःडिङ। 20 गरॽल काङा आक्कुबि आन्नानुङ्न चुइङ्ग गरहाङ् काइर खानावाँ इमा आपाब्खुबा लॆटिङ। मान्ठाभनॆ आन्नामि बारेबि माङ् लोमॆ काङामि निवाँबिन मॆन्टाटि। हागार नुङ् सारामि खानावाँ 21 यायॆॽमामि ढुप्पाट्टबि पेन्मा मिङ्खुबाचिऎ काङामि खानावाँ खेमाम्नॆ, माल् यायॆॽमाऎ लोमा यकुवॆ खानावाँ आन्नॆ वाप्डाम्निहॆ? 22 निवाँनेन् साब्चिराबि गरहाङ् साब्डा, अबाराहममि हिप्पा पासाचि चुआचि। एक्क खोम् योम्पक् मुखुबा हागारबाङ्ऎ लॆटा हाङ् होइक चाइ खोम् खिम्टाङ्मा साराबाङ्ऎ लॆटा। सारा चाइ योम्पक् मुखुबा हॆॽनॆ। 23 योम्पक् मुखुबा खिम्टाङ्माबाङ् जान्म लिमिम्पा चाचा चाइ आबाराहाममि निवाँ रक्न जान्म लिमिम्पा लॆटा, टर योम्पक् मुमामि लागि हॆॽनॆ टर खोम् खिम्टाङ्माबाङ् जान्म लिमिम्पा चाइ निवाँहाङ्मि चुप्लाङ् रक्न जान्म लिमिम्पा लॆटा। 24 ग खानावाँऎ लोमा यकुवॆ खानावाँ चाइ होइक सङ्क चुः। हिप्पान मेॽनुङ्माचिऎ निवाँहाङ्ऎ खोम् याॽमिचि नुङ् हिक्मिम्पा चुप्लाङ् रक्मा यो। योम्पक् मुखुबा हागार सिनाइ लोमॆ पङ्पङ्माबिऎ चुप्लाङ् रेम। खोबाङ् जान्म लिमिम्पाचि चोब्न योम्पक् मुखुबाचिन लिःक्मि। 25 हाङ् हागार चाइ आराब हाङ्टेम्बि चुऎ सिनाइ लोमॆ पॆसङ् रक्मा टेः हॆॽनॆ हाङ् आक्क बाखाटेम्बिऎ हऎ यारुसालेम हाटा नुङ् सङ्क ङेप्हि मान्ठाभनॆ यारुसलेम चाइ उम् पासाचिनुङ् योम्पक् मुखुबा लिःॽडा। 26 टर होइक मेॽनुङ्मा सारा चाइ पारुबिऎ यारुसालेम नुङ् ङेप्हि। खो चाइ योम्पक् मुमामि लागि हिःक्टिखॆॽमिम्पा मेॽनुङ्मा हॆॽनॆ हाङ् कानि आक्क यारुसालेम हाटाबिऎ याॽमिचि रेम। 27 मान्ठाभनॆ निवाँनेन् साब्चिराबि गरहाङ् साब्डा, “ओ चाचा ऎटक्खुबा मॆॽनुङमा आना हाङ्हाङ् मिनॆ, हानाम्स चाचा टक्मॆ डुखाबि आसिॽमिम्पा मेॽनुङ्मा आना चेन्चासे याकासे, मान्ठाभनॆ खिम्टाङ्पा चुखुबा मेॽनुङ्मामि भन्डा ग आचुखुबामि पासाचि ऎॽवा ह ऎॽवा चुःक्मि।” 28 काम् बुबुनानुसाचि, कानि सङ्क इसाहाक रक्न निवाँहाङ्ऎ चुप्लाङ् हिक्मिम्पा खोम् पासाचि यो। 29 टर लावामि चॆक्मावाबाङ् जान्म लिःमिम्पा इसाहाक इस्माएलऎ डुखा पिट्टिन्टक्न ह यायेॽमा टिङ्मिॽमा यक्खुबाचिऎ आन्ना डुखा पिॽमॆ पाइकानि। 30 टर निवाँनेन् साब्चिराऎ गमि बारेबि माङ् लोकुवॆ? “योम्पक् मुखुबा मेॽनुङ्मा हाङ् उम् पासा वेल्लाहाङ्साम्नॆ मान्ठाभनॆ योम्पक् मुखुबामि पासाऎ योम्पक् मुमामि लागि माहिक्टि खॆॽमिम्पा मेॽनुङ्मामि पासा नुङ् एक्कन ढुप्पाट्ट टक्चाउनि।” 31 मसॆ बुबुनानुसाचि, कानि योम्पक् मुखुबामि हॆॽनॆ टर योम्पक् मुमाम् लागि माहिक्टि खॆॽमिम्पा मेॽनुङ्मामि पासाचि यो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.