गालाटि 3 - लोहोरुङ्यायेॽमा अठावा निवाँयुङ् 1 ओ ङाङ्पखॆॽमिम्पा गालाटिबिहा याॽमिचि! आसॆ आम्नि निवाँ यिङ्लाहाङ् पिट्टानिहा? येसु खिरिस्ट मान्टहाङ् हाङ् मान्ठा कुरुसाबि कॆङॆ लोमॆ चोब्न खानावाँ आम्नि मिगॆॽन खाङ्मिम्पा रक्न नुःर इःबिॽमिम्पा लॆटानि। 2 कॆ आन्ना एक्क खानावाँ सिमुकानि, आन्नॆ सॆङ्सॆङॆ लावा मोसामि यायेॽमा टिङ्मिम्पासॆ टक्चामिम्पा हॆ? खानावाँ आक्र ग हॆॽनॆ। सॆङ्सॆङॆ लावा ग आन्नॆ खिरिस्टमि बारेबि खेम्मिम्पा नुऎ खानावाँबि निवाँयुङ् लॆःॽमिम्पासॆ टक्चामिम्पा यो। 3 आन्ना गरढारि ङाङ्पखॆडानिहा खिरिस्टमि लावाबि हिङ्चामा परकानि हाङ् ह चाइ टाङ्पाम्न सालुङ्पिऎ चॆक्मावाबाङ् लुक्खॆॽमा मिनुकानिहा? 4 पारभुबि निवाँयुङ् लॆःॽमिम्पासॆ आन्नॆ हुन्न डुखा आङाम्नि। माल् आक्खा डुखा माङ्ना माङ्ऎ लॆःटॆ? चाइबान कॆ लेकुङ् आक्खा डुखा हुन्नऎ मान्लॆ। 5 मसॆ कॆ आन्ना लोकानि, निवाँहाङ्ऎ आन्ना सॆङ्सॆङॆ लावा पिट्टानि हाङ् आन्नामि लुम्पि आक्खॆॽमाहा योम्पक् यिगु। ग योम्पक् चाइ आन्नॆ मोसामि यायेॽमा टिङ्मिम्पासॆ लॆःॽमिम्पा हॆॽनॆ, टर आन्नॆ खेम्मिम्पा खानावाँबि निवाँयुङ् लॆःॽमिम्पासॆ रेटा। 6 आबाराहाम खाङाम्नॆ, “खोसॆ निवाँहाङ्बि निवाँयुङ् लॆटु हाङ् निवाँहाङ्ऎ खो निवाँनेन् याॽमि मुःसु।” 7 मसॆ आन्नॆ माङ् खानावाँ चाइ वाप्मा लॆः भनॆ आबाराहाममि चाइबानऎ पासाचि चाइ निवाँयुङ् लॆखुबाचिन। 8 निवाँहाङ्ऎ आबाराहाम याॽलन गरहाङ् लोसु, “बाखाटेम्पिहा चोब्न याॽमिचिऎ आनाबाङ् आसिका टक्चाकुचि” आक्रहाङ् निवाँनेन् साब्चिराऎ याॽलिन नुऎ खानावाँबाङ् हॆॽनिबारेक्चि निवाँयुङ्बाङ् निवाँनेन् लिःक्मि कामानुङ् लोसु। 9 मसॆ मान्टहाङ् चाइ निवाँयुङ् लॆटुहाङ् आबाराहामऎ आसिका टक्चाउ, मरहाङ्न खिरिस्टबि निवाँयुङ् लॆखुबाचिऎ सङ्क आसिका टक्चाकुचि। 10 निवाँनेन् साब्चिराऎ लोकु, “आसॆ चाइ चोब्न मोसामि यायेॽमा टिङुचिनि, आक्क याॽमिबि निवाँहाङ्मि चाप्हिमा सिः। मसॆ आसॆ चाइ मोसामि यायेॽमाऎ लोमिम्पा चोब्न खानावाँ टिङुनि आक्क सक्पि निवाँहाङ्मि चाप्हिमा सिःॽडा।” 11 हाङ् निवाँनेन् साब्चिराऎ गर सङ्क लोकु, “निवाँनेन् याॽमि चाइ निवाँयुङ्ऎन हिङ्चा।” गरहाङ् यायेॽमा टिङ्से आसास याॽमि निवाँहाङ्मि ङारिङ्पि निवाँनेन् लिनि कामानुङ् कानिऎ वाःप्हि। 12 हाङ् यायेॽमा लोमॆ चाइ निवाँयुङ् नुङ् टङ्नि, निवाँनेन् साब्चिराबि गरहाङ् साब्डा, “आसॆ चाइ मोसामि यायेॽमाबि चुहा चोब्न खानावाँ टिङुकु, खो आक्क यायेॽमाबाङ्न हिङ्चाः।” 13 यायेॽमाऎ कानि सक्पि टिःमिम्पा चाप्हिमाबाङ् खिरिस्टऎ फाःक्डि। खो कुरुसाबि कॆङा हाङ् काङ्कॆ टक्चामाहा डुखा खोसॆ आङु, मान्ठाभनॆ निवाँनेन् साब्चिराबि गरहाङ् साब्डा, “सिङ्पि कॆङ्ढाङ्मानुङ् सिःखॆॽमिम्पा चोब्न याॽमिचि चाप्हिमा नुङ्मा लिःक्मि।” 14 आबाराहामऎ टक्चामिम्पा आसिका हॆॽनिबारेक्चिऎ सङ्क टक्चाउचिर हाङ् निवाँयुङ्बाङ्न निवाँहाङ्ऎ पिकानि कामानुङ् ठुॽमिम्पा सॆङ्सॆङॆ लावामि चुप्लाङ टक्चाइर कामानुङ् खिरिस्टऎ आक्र लॆटु। यायेॽमा हाङ् चुप्लाङ् 15 बुबुनानुसाचि, याॽमिचि मान्टहाङ् पाइमिहा लोमॆ खानावाँ इमाम् लागि एक्क खानावाँ लोकानि। हिप्पा याॽमिचिऎ उम्चि लुम्पि एक्क चुप्लाङ् ठुबुक्चु हाङ् डॆङ्पि खोचिऎ आक्क हॆॽनॆ काहिचिनि हाङ् आक्कुबि माङ्स येप्टिॽमा हाङ् चेल्लाहाङ्मा हेसुचिनि। 16 गरहाङ्न निवाँहाङ्ऎ आबाराहाम हाङ् खोम् पासा नुङ् चुप्लाङ् हिःगु। निवाँनेन् साब्चिराऎ हानाम्स खोम् पासाचि कामानुङ् मान्लोसु। टर आनामि पासा कामानुङ् लोसु। आक्क एक्क पासा लोमिम्पा चाइ खिरिस्ट यो। 17 काङॆ लोमा यकुङॆ खानावाँ चाइ माङ्भनॆ, टाङ्पॆ आबाराहामनुङ् हिक्मिम्पा चुप्लाङ्बि निवाँहाङ्ऎ लायुङ् टिसिडु। मसॆ खोसॆ ठुॽमिम्पा चुप्लाङ्बाङ् रिकग् सुपङ् निङ् डॆङपि टामिम्पा यायॆॽमाऎ निवाँहाङ्मि लायुङ् नाःक्मा हाङ् खोम् चुप्लाङ् नासॆलॆॽमा हेसुनि। 18 मान्ठाभनॆ निवाँहाङ्ऎ पिक्खाना कामानुङ् लोमिम्पा खानावाँ चाइ यायॆॽमा टिङ्मार टक्चा हाङ्ग, निवाँहाङ्ऎ हिक्मिम्पा चुप्लाङ् ग चुप्लाङ्न हॆॽनॆ। टर गग निवाँहाङ्ऎ चुप्लाङ् ठुबु हाङ् आबाराहाम पिःडु। 19 मरहाङ्ग यायॆॽमा चाइ मान्ठा पिट्टिहा टा? ग यायेॽमा चाइ याॽमिचिमि हिङ्वा खाङ्मिॽमा कामानुङ् पिट्टि। टर यायेॽमा चाइ निवाँहाङ्ऎ हिक्मिम्पा चुप्लाङ् रक्न पासा मॆटारढारिमि लागि टेःॽन पिॽमिम्पा लॆटा। निवाँहाङ्ऎ खोम् यायेॽमा निवाँखाटॆखुबाचिबाङ् मोसा पिट्टु। हाङ् मोसा चाइ निवाँहाङ् नुङ् याॽमिम् लुम्पिऎ याॽमि लॆटा। 20 याॽमिम् लुम्पि चुप्लाङ् हिःक्माम् लागि हिप्पा याॽमिचिमि लुम्पि होइकन एक्क लुम्पि येप्पिखुबा याॽमि पाबुक्। टर निवाँहाङ्ऎ चाइ आबाराहाम नुङ् खोम् टाङ्पॆॽन चुप्लाङ् हिःगु। 21 मरहाङ्ग माल् यायॆॽमाऎ चाइ निवाँहाङ्मि चुप्लाङ् चेनुकुवॆ टा? खानावाँ आक्र हॆनहॆॽनॆ, याॽमिचिऎ यायेॽमाबाङ्न हिङ्खामा टक्चाउचिर कामानुङ् यायेॽमा पिॽमिम्पा हाङ्ग, ग यायेॽमाऎन निवाँहाङ्मि ङारिङ्पि याॽमिचि निवाँनेन् लिखुबा लॆटामि। 22 टर यायेॽमाऎ चोब्न याॽमिचि हिङ्वाबि टिप्भुङ्कुचि, मसॆ येसु खिरिस्टबि निवाँयुङ् लॆःॽमा हाङ्टेःॽन कानिऎ निवाँहाङ्मि चुप्लाङ् टक्चाकि। 23 खिरिस्टबि निवाँयुङ् लॆःॽमाबाङ् याॽलि कानि यायेॽमाऎ सॆक्भुङ्मिम्पा लॆटि हाङ् गसॆ निवाँयुङ् लोमॆ मान्वाप्लढारि कानि टिप्भुङ्मिम्पा लॆटि। 24 होइक पाराऎ लोमार खिरिस्ट मान्टारढारि निवाँयुङ्बाङ्न कानि निवाँनेन याॽमि लिहिसिर कामानुङ् खोसॆ यायेॽमा कानि लाम्फु खाङ्मिखुबा मुःसु। 25 टर ह चाइ कानिऎ खिरिस्टबि निवाँयुङ् लॆःॽहि। कानि आक्क लाम्फु खाङ्मिखुबा यायेॽमा पाब्पिनि। कानि निवाँयुङ्बाङ् निवाँहाङ्मि पासा लिसि 26 निवाँयुङ्बाङ्न खिरिस्ट येसुबाङ् आन्ना चोब्न निवाँहाङ्मि पासाचि लिःडानि। 27 मान्ठाभनॆ आन्ना हङ्सि आसॆ चाइ खिरिस्टमि निङ्पि बाप्टिस्मा लाडु, खोसॆ खोम् हिङ्खामाबि खिरिस्टमिन हिङ्खामा खिन्टिखॆःडु। 28 मसॆ येसु खिरिस्टबि याहुडिचि नुङ् हॆॽनिबारॆक्चिमि लुम्पि, टुङ्घङ्पा नुङ् योम्पक मुखुबाचिमि लुम्पि, वाठाङ्पा नुङ् मेॽनुङ्माचिमि लुम्पि माङ्स खानावाँ माआ, आन्ना चोब्न खिरिस्टबि एक्कन। 29 आन्ना खिरिस्टमि याॽमिचि हाङ् आबाराहाममि सङ्क पासाचि रेम, हाङ् निवाँहाङ्ऎ आबाराहाम पिःॽना कामानुङ् हिक्मिम्पा चुप्लाङ् टक्चाकाम्नि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.