एफिसि 4 - लोहोरुङ्खिरिस्टबि एक्कन लिमॆ 1 मसॆ पारभुमि लागि सॆक्ढिङ्खॆडिङॆ काङॆ आन्ना निवाँहाङ्ऎ माङ्मि लागि सेःरानि मरहाङ्न पाइटानॆ कामानुङ् लोकानि। 2 हानाम्स मिःछुपा लॆङ्मॆ, नाम्नावाँ नुङ्मा हाङ् आङ्हिखुबा लिसानॆ। हाङ् एक्कसॆ होइक नाम्नाम् पिसिपे चुआनॆ। 3 हाङ् निवाँहाङ्मि लावाऎ आन्ना टङ्चामिडानि। मसॆ आन्नामि लुम्पि टङ्चामानुङ् पेनानॆ। 4 निवाँहाङ्ऎ आन्ना सेःॽमार पिॽमिम्पा एक्कन आस रक्न सालुङ सङ्क एक्कन। हाङ् सॆङ्सॆङॆ लावा सङ्क एक्कन। 5 हाङ् कानिमि एक्कन पारभु चु, एक्कन निवाँयुङ्पि लाम्ढुडि हाङ् एक्कन बाप्टिस्मा लाडि। 6 हाङ् कानि चोब्नमि निवाँहाङ् आपा एक्कन। खोन चोब्नमि पारभु, हाङ् खोसॆॽन चोब्न योम्पक् कानिबाङ् यिगुकु हाङ् खो कानि चोब्नबि चुः। 7 टर कानि सक्पि नाम्नावाँमि बारडाना चाइ खिरिस्टऎन ठाःक्मानुङ् पिःॽडि। 8 निवाँनेन् साब्चिराऎ गरहाङ् साप्मिम्पा रक्न, “खो पारुबि ठाङ्मार, खोसॆ सॆक्चिम्पि चुखुबा डिरिक् याॽमिचि सोरि लाखॆटुचि हाङ् याॽमिचि बारडाना पिटटुचि।” 9 ग खो मिट्टु ठाङा लोमिम्पा चाइ माल? ग खानावाँऎ चाइ खो ग बाखाटेम् हाङ् मबाङ्स मिम्मु युसा लोकु। 10 हाङ् बाखाटेम्पि युखुबान पारु नुङ् बाखाटेम्पि खोम् चॆक्मावा खाङ्मिॽमाम् लागि पारुबाङ्स सङ्पि ठाङ्खारा। 11 हाङ् खोसॆॽन ऎॽवा याॽमिचि सॆक्ढुङ्पाचि, निवाँहाङ्मि खानावाँ लोखुबाचि, नुऎ खानावाँ खेम्मिखुबाचि, मान्डालि खाङ्खुबाचि हाङ् चिन्खुबाचि मुःडुचि। 12 हाङ् खोसॆ चोब्न निवाँहाङ्मि याॽमिचि खोम् योम्पक् मुहिखुबा मुमाम् लागि हाङ् खिरिस्टमि सालुङ् मान्डालि चॆकुवॆ मिॽमाम् लागि गर लॆटु। 13 हाङ् इगाह बारडानामि योम्पक्ऎ कानि निवाँयुङ्पि एक्कन लिःमा हाङ् निवाँहाङ्मि पासामि निवाँबि पुःमिहिकि हाङ् कानि चाइबान खिरिस्ट रक्न मापाइहिरढारि खोसॆ कानि पुःमिढाङ्कि। 14 हाङ् कानि हयॆबाङ् मरक् पिसाचिर लिसिनि। कानिमि निवाँयुङ् चॆकुवॆ लिः। हाङ् होइढा काइसाहा याॽमिचिऎ कानि चिन्मिम्पा हुन्नहा खानावाँऎ कानि फोप्सिॽमा हेसिनि। हाङ् कानिमि याॽलऎ निवाँयुङ्बाङ् गरमर लॆटिनि। 15 बोरु कानिबि एक्कसॆ होइक नाम्नाम् पिसिपे चाइबान यामुसे खिरिस्ट रक्न लॆःसे खो रक्मान लिसिये मान्ठाभनॆ खो कानिम् निङ्टवाँ यो। 16 हाङ् खोमि ढुप्पाट्ट खुक्माबि कानिमि चोब्न सालुङ् टङुक। हाङ् चोब्न भागऎ टाटाङ्पामि योम्पक् यिगुकु हाङ्ग, आक्कसॆ होइढा भाग पुःमिहिकु। हाङ् चोब्न सालुङ् पु हाङ् कानिऎ एक्कसॆ होइक नाम्नाम् पिसिपे चुकि। खिरिस्टबि उम्चङ् हिङ्खामा 17 मसॆ काङॆ पारभुबि आन्ना नुःर लोकानि, आन्ना पाइमार निवाँहाङ् आलेखुबा याॽमिचिर आपाइटानॆ। आक्खाचिम् खानावाँ हुन्नऎ लॆः। 18 आक्खाचिम् निवाँ माॽयाक्टऎ डॆक्खॆडु। हाङ् निवाँहाङ्ऎ पिःऎ हिङ्खामाबाङ् म्यु चुःॽमि। मान्ठाभनॆ आक्खाचिम् निवाँ माङ्स आलेक्खुबा हाङ् लोमिम्पा आखेम्खुबा पिक्खॆडा। 19 हाङ् खोचि ङेसिमा ना यासिमा पिक्खॆडामि हाङ् चोब्न काइसॆ लाम्फु टिङ्से ङेसिमा लुहा योम्पक् यिक्माबि उम्चि हिङ्खामा टिःढाङ्डुचि। 20 टर आन्नॆ चाइ खिरिस्टमि बारेबि चिन्मिम्पा खानावाँबाङ् आक्रहा खानावाँ माचिन्टिटानि। 21 चाइबान आन्नॆ येसुऎ चिन्मिम्पा खानावाँ खेमाम्नि हाङ् म रक्न चिन्डानि कामानुङ् निवाँयुङ् लॆकुङ। 22 हाङ् याॽलि आन्ना मान्टहाङ् पाइयुक्सानि म हिङ्खामा याइटानॆ। मान्ठाभनॆ आन्नामि काइसॆ निवाँऎ आन्ना हुन्नऎ लाम्फुबि लाम्ढुमॆ हाङ् नासॆलॆॽमॆ पाइटानि। 23 हाङ् आन्नामि निवाँ हाङ् लावा चोब्न उम्चङ लिःर। 24 हाङ् उम्चङ् याॽमि चाइ निवाँहाङ् रक्मान मुमिम्पा लिः। हाङ् ग हिङ्खामा चाइ निवाँनेन हाङ् सॆङ्सॆङॆबि पाइ। आन्ना आक्रहाङ्न पाइटानॆ। 25 मसॆ ढाँटु बङ्चामा याइटानॆ। हाङ् एक्कसॆ होइकनुङ् माङ् चाइ चाइबानऎ लॆः, म खानावाँ टे इसानॆ मान्ठाभनॆ कानि चोब्न खिरिस्टमि सालुङ्मि एक्क एक्क भाग रेम। 26 आन्ना सोम खेरुकानिर हिङ्वा योम्पक् चाइ आयिगानॆ। आन्ना एच्छक्म सोम् खेरुकानि हाङ्स एच्छक्हाङ् आन्नामि सिरि सिःखॆॽल। 27 आक्र लॆःसे साइटान आन्ना हङ्सि भॆन्मा आटक्कुर। 28 खुचाखुबॆ खुचामा याइटुर हाङ् योम्पक् मुचासे डुबुर। हाङ् डुखाबि सिक्खुबाचि पिॽहिखुबा लिःर। 29 आन्नामि याबाङ काइसॆ खानावाँ ऎआम्पॽल। पाबुऎ, नुऎ हाङ् याॽमिचि योम्पक पिःऎ खानावाँ टे यामुसानॆ। हाङ् खेम्खुबाचिऎ आसिका टक्चाउचिर। 30 हाङ् निवाँहाङ्मि सॆङ्सॆङॆ लावा डुखा आमिॽमिटाम्नॆ मान्ठाभनॆ आन्ना फाग्डानिहा याॽमिचि लोमॆ खानावाँमि लायुङ्न सॆङ्सॆङॆ लावा रेम। 31 हाङ् चोब्न खालाहा काइसॆ खानावाँ, खिमाटुमा, सिरि लॆःमॆ खानावाँ याइटानॆ। हाङ् वोःमॆ, खानावाँ इचाटिॽमॆ हाङ् काइर मिप्पेचुमॆ खानावाँ याइटानॆ। 32 हाङ् एक्कसॆ होइक नाम्नाम् पिसिपे नाम्नावाँ लॆःपे चुआनॆ। निवाँहाङ्ऎ खिरिस्टबि आन्नामि हिङ्वा यङ्मिॽमिम्पा रक्न आन्नॆ सङ्क एक्कसॆ होइक यङ्निपे चुआनॆ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.