कालास्सि 4 - लोहोरुङ्1 टुङ्घङ्पाचि, आन्नॆ आन्नामि योम्पक् मुखुबाचि सिःक्मावाग्मा मान्लॆॽले काम्नुःर लॆटाम्चिनॆ। आन्नॆ ग मिॽलाआम्नि, आन्नामि सङ्क पारुबि एक्क टुङ्घङ्पा चु। होइढा खानावाँ 2 हाङ् आन्ना नुःर पेन्से पारठाना लॆढाङ्सानॆ हाङ् निवाँहाङ् हानाम्स ओहाक् पिट्टाम्नॆ। 3 आन्नॆ काङ्कामि लागि स पारठाना लॆटानॆ। म आन्नामि पारठानाऎ निवाँहाङ्ऎ खिरिस्टमि हङ्सिॽयुहा नुऎ खानावाँ खेम्मिॽमॆ लाम्फु हेम्बकुर। गमि लागिॽन काङा चाइ सॆक्चिम्पि सॆक्ढिङ्खॆडिङ। 4 हाङ् काङा मान्टहाङ् यामुमा लॆःॽङॆ मरहाङ्न यामुहिङार कामानुङ् काम् लागि पारठाना लॆपिॽङानॆ। 5 हाङ् निवाँयुङ् आलॆखुबाचिनुङ् पाइमार नुःर निवाँ टिसे पाइटानॆ हाङ् आन्नॆ टक्चामिम्पा आक्क लःबि चाइ काम्नुःर पाइटानॆ। 6 हाङ् युम्ऎ चामा ठका चानुऎ मुसिन्टक्न आन्नामि खानावाँ निवाँनेन् नुङ् चानुऎ लिर, मसॆ आन्नॆ चोब्न खानावाँ ऎन्हिकाम्नि। पावलमि डॆङ्पिऎ खानावाँ 7 हाङ् आन्ना काङाम् बारेबि कॆ नाम्नाम् पिस्सिडुङॆ नुसा टुखिकास खो चाइ निवाँयुङ्मा लिमानुङ् काङाम् योम्पक् मुबाक्खुबा याॽमि रेम, खोसॆ आन्ना चोब्न खानावाँ इःकानि। 8 हाङ् आन्नॆ काङ्कामि बारेबि लेसाम्नॆ हाङ् आन्नामि निवाँबि चॆकुवॆ लिहिसानॆ कामानुङ्न काङॆ टुखिकास आन्नाबि पाङ्हाङ्मॆ पाइकुङ। 9 खो चाइ कानिम् नाम्नाम् पिसिॽमिम्पा हाङ् निवाँयुङ्मा नुसा ओनेसिमोस नुङ् टामेपाइ। खो चाइ आन्नाम्न याॽमि यो। खोचिऎन गुबिहा चोब्न खानावाँ आन्ना खेम्मिकानि। 10 हाङ् कानुङ्न सॆक्चिम्पि सॆक्ढिङ्खॆडॆ आरिस्टारखासऎ आन्ना स्यामिडानि हाङ् बारनाबासमि हाङ्लिसा मारकुसऎ स आन्ना स्यामिडानि यो। मारकुसमि बारेबि याॽलन कॆ आन्ना लोडानि। खो आन्नाबि टाआ हाङ्ग नुःर लॆटाम्नॆ। 11 हाङ् युस्टास निङ् लॆखुबा येसुऎ सङ्क आन्ना स्यामिडानि। याहुडि याॽमिचिबाङ् निवाँहाङ्मि हाङ्डाम्मि लागि योम्पक् मुबाक्खुबाचि खोचि टेःॽन रेम। खोचिऎ काङा निवाँबि एट्टान चेन्चामिडिङ्मि। 12 हाङ् आन्ना हङ्सिबिन येसु खिरिस्टमि योम्पक् मुखुबा इपाफारासऎ स स्यामिडानि। खोसॆ नुःर खोम् पारठानाबि आन्ना निवाँहाङ्बि चॆकुवॆ मुसे निवाँ गरमर मालॆॽरे निवाँयुङ् लॆखुबा याॽमिचि लिसानॆ कामानुङ् मिॽलाकानि। 13 मान्ठाभनॆ खोसॆ आन्नामि लागि हाङ् लाउडिकिया नुङ् हिरापोलिसबि चुःक्मिहा याॽमिचिम् लागि हेःर योम्पक् यिक्डु लोमॆ कॆ खाङ्डुङ। 14 हाङ् काङ्कामि नाम्नाम् पिसिॽमा लुऎ लाङ्काम् सिढा फॆक्खुबा लुका नुङ् डेमासऎ सङ्क स्यामिडानि। 15 हाङ् लाउडिकियाबि चुःक्मिहा बुबुनानुसाचि हाङ् नुम्फास हाङ् खोम् खिम्पि खोम्खुबा निवाँयुङ् लॆखुबाचि काङ्कॆ स्यामिॽमिम्पा खानावाँ खेम्मिटाम्चिनॆ। 16 हाङ् आन्नॆ ग साब्चिरा खाङ्सिकाम्निहाङ् लाउडिकियाबि चुःक्मिहा निवाँयुङ् लॆखुबाचिम् लुम्पि सङ्क खाङ्मिटाम्चिनॆ। हाङ् लाउडिकियाबि चुःक्मिहा निवाँयुङ् लॆखुबाचिम् लागि कॆ साप्हाङ्पा साब्चिरा आन्नॆ स खाङाम्नॆ। 17 हाङ् पारभुऎ आना पिॽमिम्पा योम्पक् मान्ट हाङ्स यॆॽमा लॆ कामानुङ् आरखिपास लोसाम्नॆ। 18 हाङ् ग डॆङ्पिऎ खानावाँ चाइ कॆ आन्ना काङॆ स्यामुॽमामि लागि काङाम् हुगॆॽन साब्डुङ् यो। काङा सॆक्चिम्पि सॆक्ढिङ्खॆडिङ् लोमॆ आमिखॆटाम्नॆ। आन्नानुङ् निवाँहाङ्मि नाम्नावाँ लिर। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.