सॆःक्ढुङ्पा 3 - लोहोरुङ्पाट्रुरसऎ लाङ् फॆन्नॆ याॽमि नुबक्मिॽमिम्पा 1 ह पाट्रुस नुङ् युहान्ना लेन्टाऎ सुम्चि बाजे फेर पारठाना लॆसि निवाँहाङ्मि खिम्पि खॆॽमे सिसाचि। 2 हाङ् उम्मामि बःक्बाङ्न लाङ् ऎफॆङ्खुबा एक्क याॽमि चुआ, याॽमिचिऎ खो एक्क काम्नुऎ लोमॆ लम्भॆरॆङ्माबि निवाँहाङ्मि खिम्पि भॆन्खुबा याॽमिचिबाङ् ङाग्चार कामानुङ् डिनाहि खिन्टॆॽयुक्सुचि। 3 खोसॆ पाट्रुस नुङ् युहान्ना निवाँहाङ्मि खिम् हङ्सि भेन्मा परक्मिम्पा खाङ्मानुङ् भिखा टक्चाकुङॆरु कामानुङ् ङागा। 4 टर पाट्रुसऎ युहान्ना नुङ् नुःर खाङुहाङ् लोसु, “काचिगा खाङ्चिमॆ।” 5 हाङ् आक्खाचिबाङ् माङ्माङ् टकुङॆरु कामानुङ् खोसॆ आक्खाचि पोट्टा नुःर निवाँ टिसु। 6 हाङ् पाट्रुसऎ लोसु, “फिःॽया नुङ् सिःग कॆ मायुङ्टिॽङा, टर कानुङ् माङ् चु आना आक्क पिक्खाना, नासाराटमि येसु खिरिस्टमि निङ्पि येप्पकॆ हाङ् लाम्ढुसॆ।” 7 हाङ् खोसॆ आक्कमि चुप्ठिङ् हुक्पि लाप्से येप्पक्मिट्टु। हाङ् मरक्लॽन उम् लाङ् नुङ् फेन्दुरुक्माबि चॆक्मावा टाआ। 8 हाङ् खो येप्पका हाङ् चेपका हाङ् गॆअङ्मॆअङ् वाइसे आक्खाचिनुङ् लाम्ढुसे, चेसे, निवाँहाङ्मि निङ् ठेस्से निवाँहाङ्मि खिम् हङ्सि भॆना। 9 हाङ् चोब्न याॽमिचिऎ खो लाम्ढुमिम्पा हाङ् खोसॆ निवाँहाङ्मि निङ् ठेॽमिम्पा खाङुटकुचि। 10 हाङ् आक्खाचिऎ खो निवाँहाङ्मि खिम्मि बाहिराऎ काम्नुऎ लोमॆ लोम्भॆरॆङ्माबि ङाग्चासि पेन्खुबा कामानुङ् लेसुचि। हाङ् खोबि लिमिम्पा खानावाँऎ आक्खाचि फोफो आक्खॆटुचि हाङ् माङ् ह माङ् मिनामि। पाट्रुसऎ निवाँहाङ्मि खिम्पि नुऎ खानावाँ खेम्मिकुचि 11 ह आक्क याॽमिऎ सोलोमानमि ओम्फु लोमॆ ठालबि पाट्रुस नुङ् युहान्ना लाप्से लाम्ढुमिम्पा याॽमिचिऎ खाङ्टकुचिहाङ् आक्खॆॽमानुङ् खोचि चुक्मिहा ठालबि पिन्टाआमि। 12 पाट्रुसऎ ग खाङुहाङ् आक्खा याॽमिचि गर कामानुङ् लोसुचि, “इस्राएलि याॽमिचि, आन्ना मान्ठा ग खानावाँबि आठावा ग याॽमि कानिम् चॆक्मावा हाङ् निवाँनेन्ऎ लाम्ढुमिॽमिम्पार आक्खॆॽमानुङ् काङ्का खाङुक्चिमे? 13 आबाराहाममि निवाँहाङ्, इसहाकमि निवाँहाङ्, याकुबमि निवाहाङ् हाङ् कानिम् टुबालाबाचिम् निवाँहाङ्ऎ खोम् योम्पक् मुखुबा येसु निङ्लावा नुङ्मा मुडु, खो आन्नॆ सेॽमाम् लागि लाॽमिटाम्नि हाङ् टुङ्घङ्पा पिलाटसऎ खो लेहाङ्मा मिनु हाङ्स आन्नॆ खो पिलाटसमि ङारिङ्पि सिच्चोआम्नि। 14 टर आन्नॆ सॆङ्सॆङॆ हाङ् निवाँनेन् याॽमिमि ठालबि याॽमि सेक्खुबा चाइ लेहाङ्पिच्चिमॆ कामानुङ् ङागाम्नि, 15 गरहाङ् आन्नॆ हिङ्खामा पिक्खुबा सेराम्नि, टर निवाँहाङ्ऎ खो सिखेम्पाबाङ् हिङ्पॽमिडु काङ्का आक्क खानावाँ खाङ्खुबाचिन। 16 हाङ् येसुमि निङ्पि लॆःॽमिम्पा निवाँयुङ्ऎ हाङ् खोम् निङ्बाङ्न आन्नॆ खाङ्मिम्पा हाङ् लेॽमिम्पा ग याॽमि चॆकुवॆ लिडा, हाङ् येसुबा पिॽमिम्पा निवाँयुङ्ऎ ग याॽमि आन्नामि लुम्पिॽन नुःबक्डा। 17 “बुबुनुसाचि, ह कॆ लेकुङ् आन्नॆ हाङ् आन्नामि टुङ्घङ्पाचिऎ माङ्स मावाॽमिम्पासॆ येसु सेॽमिटुचि। 18 टर याॽलन चोब्न निवाँहाङ्मि खानावाँ लोखुबाचिम् याबाङ् खिरिस्टऎ डुखा आङ्मान लॆ कामानुङ् इमिम्पा खानावाँ येसुऎ गरहाङ् यॆरु। 19 मसॆ आन्नामि हिङ्वा सःक्माम् लागि टाङ्पाम् हिङ्वा मिॽलापानॆ हाङ् काइसॆ योम्पक्बाङ् निवाँहाङ्बि ऎम्पकानॆ हाङ् खोम् ङारिङ्पिऎ हाङ्हाङ्, चॆक्मावा आन्नाबि टार। 20 हाङ् खोसॆ आन्नामि लागि याॽलनन सॆःक्मिम्पा येसु पाङ्हाङ्कु। खो खिरिस्ट यो। 21 हाङ् निवाँहाङ्ऎ याॽलबाङ्न खोम् सॆङ्सॆङॆ निवाँहाङ्मि खानावाँ लोखुबाचिऎ लोसिन्टॽन निवाँहाङ्ऎ चोब्न खानावाँ फेरि उम्चङ् मामुरढारि खिरिस्ट पारुबि लिमा लॆ कामानुङ् लोडु। 22 मोसाऎ खिरिस्टमि बारेबि गर लोसु, ‘पारभु निवाँहाङ्ऎ का रक्मान निवाँहाङ्मि खानावाँ लोखुबा एक्क आन्नामि बुबुनुसाचिबाङ् सॆगुकु। खोसॆ लोमिम्पा चोब्न खानावाँ आन्नॆ खेम्मा लॆ। 23 आसॆ म निवाँहाङ्मि खानावाँ लोखुबामि खानावाँ खेमुनि आक्क काइर गारि निवाँहाङ्मि याॽमिचिबाङ् फाॽलिङ् खाइहाङ्चा।’ 24 “हाङ् निवाँहाङ्मि खानावाँ लोखुबा सामुएल हाङ् खोबाङ् डॆङ्पिहा चोब्न निवाँहाङ्मि खानावाँ लोखुबाचिऎ इघा डिनामि बारेबिॽन खानावाँ इसुचि। 25 हाङ् आन्ना आक्खा निवाँहाङ्मि खानावाँ लोखुबाचिम् हाङ् आक्क चुप्लाङ्मि पिसानासाचिन। म निवाँहाङ्ऎ आन्नाम् टुबालाबाचिनुङ् चुप्लाङ् हिगु। खोसॆ आबाराहाम लोसु, ‘बाखाटेम्बिहा चोब्न याॽमिऎ आनाबाङ् आसिका टक्चाकुचि।’ 26 गरहाङ् निवाँहाङ्ऎ खोम् टाङ्पाम्न पासा सॆगु हाङ् आन्ना आसिका पिॽमा कामानुङ् चोब्बाङ् याॽल आन्नाबिॽन पाङ्हाङ्सु। हाङ् खोसॆ आन्नामि काइसॆ योम्पक्बाङ् ऎम्पक्मिट्टानि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.