सॆःक्ढुङ्पा 28 - लोहोरुङ्पावल माल्टाबि 1 हाङ् काङ्का माङ्स मालिरे कॆक्पि आम्पकिङ्का। हाङ् आक्क ठालमि निङ् माल्टा कामानुङ् लेटकुङ्का। 2 आक्कुबि पेन्खुबा याॽमिचि एट्टान टङ्चाखुबा लॆटामि। आक्रल आक्कुबि वारि टामा ठाबाम्पा हाङ् चुङ् लुमिम्पा लॆटा, हाङ् खोचिऎ मि टुम्पक्पिट्टिङ्का हाङ् हुङ्चासि काङ्का सेःरिङ्का। 3 पावलऎ मिॽमिॽहा सिङ् खोमु हाङ् मिःबि टिसु। आक्रल मिऎ एम्मिम्पासॆ एक्क पुसॆःॽमा आम्पकाहाङ् पावलमि हुक्पि नॆटिखारा। 4 आक्कुबिहा याॽमिचिऎ पावलमि हुक्पि पुसॆःॽमा नॆटिखॆॽमिम्पा खाङुचिहाङ् टाटाङ्पाबि गर कासामि, “गग याॽमि सेक्खुबान रेम। मान्ठाभनॆ खो पॆरॆरॆमाबाङ् हिङ्चाआ हाङ्स न्यायॆबाङ् माकुम्हि।” 5 टर पावलऎ आक्क पुसॆःॽमाऎ मान्डक्पान मिःबि कहाङ्सु मसॆ खो माङ्स मालि। 6 याॽमिचिऎ ह पावल ऎच्छहाङ् होम्ब हाङ् टॆप्राङ्ट सिखॆ मिनामि। टर ऎॽवा हुङ्मार सङ्क खो माङ्स मालिम्पा खाङुचिहाङ् उम्चि निवाँ होइकन मुमानुङ् टाटाङ्पाबि गर कासामि, “गग डेउटान।” 7 आक्कमि कॆक्पिन आक्क ठालबिऎ टुङ्घङ्पा पाब्लियसमि रोपा चुआ। खोसॆ काङ्का खोम् खिम्पि चिःक्खॆटिङ्का हाङ् सुम्चि डिनाढारि टाबाङ्चिर नुःर चामा हिङिङ्का। 8 पाब्लियसमि आपा डॆटॆॽमा हाङ् आँउऎ टुक्पॽमिम्पा लॆटा। पावल खो खाङ्सि खाराहाङ् पारठाना लॆपिटु हाङ् टाङ्पाम् हुक् खो सक्पि युङ्मानुङ् नुबक्मिट्टु। 9 गर लिमिम्पा लेटकुचिहाङ् आक्क ठालबिहा चोब्न टुक्खुबाचि पावलबि टाआमि हाङ् नुबकामि। 10 आक्कुबिहा याॽमिचिऎ काङ्कामि निङ् ठेरुचि हाङ् काङ्का लङ्पॽमा ठाबाक्मार पाबुहा चोब्न हुक्सक् पिहाङ्सिङ्का। माल्टाबाङ् रोम खॆॽमिम्पा 11 हाङ् सुम्चि माइना डॆङ्पि काङ्का आक्क ठालबाङ् अलॆक्जेन्डरिया लोमॆ ठालबिऎ योवाखङ्पि ठाङिङ्का। आक्क योवाखङ् चुङ् भोरि आक्कुब्न पेन्मिम्पा लॆटा। हाङ् आक्कमि याॽलऎ भागबि काप्से डेउटामि मुर्टि डुब्मिॽपा लॆटा। 12 हाङ् काङ्का सुराकुसाइ लोमॆ हाटाबि टाइङ्का हाङ् आक्कुबि सुम्चि डिना पेनिङ्का। 13 आक्कबाङ् लङ्पकिङ्काहाङ् काङ्का इटालि हाङ्टेम्बिऎ रेगिया हाटाबि टाइङ्का। हाङ् वेन्डाक् लाम्पॆ युलाम् पोट्टाबाङ् हिॽयापा टाआ, होइक डिना काङ्का पाटिओलि लोमॆ हाटाबि टाइङ्का। 14 आक्कुबि काङ्कॆ एक्क हिप्पा निवाँयुङ् लॆखुबा बुबुनुसाचि चुबुङ्का। खोचिऎ काङ्का एक्क हाप्टा र काङ्कानुङ् पेम्पिॽमा कामानुङ् लोसिङ्का। मसॆ काङ्का खोचिनुङ् वाङ्चि डिना पेनिङ्का हाङ् रोम पोट्टा लङ्पकिङ्का। 15 रोमबिहा निवाँयुङ् लॆखुबा बुबुनुसाचिऎ काङ्का टामे पाइमिम्पा खानावाँ खेमुचि। हाङ् हिप्पा सुम्पा आप्पियासमि हाटाबि हाङ् होइढाचि चाइ सुम्चिपाटि लोमॆ ठालबि काङ्का चुब्सि टाआमि। हाङ् पावलऎ खोचि खाङुचिहाङ् चेन्चामानुङ् निवाँहाङ् ओहाक् लोसु। पावल रोम हाटाबि 16 काङ्का रोमपि टाइङ्काहाङ् आक्कुबि एक्क टिलिङ्गामि ढुप्पाट्ट हङ्सि पावलऎ खोसॆ नेन्चाम्पा ठालबि पेन्मा पिट्टुचि। 17 सुम्चि डिना डॆङ्पि पावलऎ आक्कुबिहा याहुडि टुङ्घङ्पाचि सेःरुचि। हाङ् आक्खाचि सङ्क खोम्टि खारामि हाङ् पावलऎ लोसुचि, “बुबुनुसाचि, काङॆ कानिम् याॽमिचि हाङ् कानिम् टुबालाबाचिम् चालानामि माङ्स काइर मालॆटिॽङा। हाङ्स याहुडि बुबुनुसाचिऎ काङा यरुसालेम्पि लाबिङ्मि हाङ् रोमि याॽमिचिम् हुक्पि पिडिङ्मि। 18 रोमिचिऎ काङा खाङिङ्मि हाङ् लेहाङ्मॆ निवाँ मुसुचि, मान्ठाभनॆ खोचिऎ कॆ सिखॆॽमॆ डान्डा टक्चामॆ माङ्स काइसॆ यिक्मिम्पा माखाङुचि। 19 कट्टार याहुडिचिऎ लेहाङ्मा ग फॆनफॆन्नि कामिम्पासॆ, कॆ काम खानावाँ रोमि हाङ् काइसार लोमान सिट्टा। हाङ्स काम् बुबुनुसाचि आब्डिक् टिमॆ खानावाँ कानुङ् माङ्स माआ। 20 मसॆ आन्ना चुप्मा हाङ् ग खानावाँ इमाम् लागि कॆ आन्ना सेःरानि। कानि इस्राएलिचिऎ डाबुॽ कामानुङ् हुङ्मिम्पा फाक्खुबा हाङ्मि लागि काङा गुबि हिक्टिखॆडिङ।” 21 खोचिऎ खानावाँ ऎम्पिटुचि, “काङ्कॆ याहुडियाबाङ् आनाम् बारेबि माङ्स साब्चिरा माभॆट्टक्टिट्टुङ्का। हाङ् आक्कबाङ् आना काइर लोसि गुबि आसास मॆटाटिॽमि हाङ् माङ्स मालोटिॽमि। 22 टर काङ्कॆ ग खानावाँमि बारेबि आनाम् खानावाँ चाइ माल कामानुङ् खेम्मा मिडुङ्का मान्ठाभनॆ काङ्कॆ माङ् लेकुङ्का भनॆ ग खानावाँ डिरिक् ठालबिहा याॽमिचिऎ सिच्चाकुचि।” 23 हाङ् खोचिऎ पावल नुङ् फेरि चुप्मॆ डिना टङुचि हाङ् याॽलऎबाङ् डिरिक जाना खोमामिहाङ् पावल पेन्डॆ ठालबि टाआमि। हाङ् पावलऎ मोसामि यायेॽमा हाङ् निवाँहाङ्मि खानावाँ लोखुबाचिम् साब्चिराबाङ् निवाँहाङ् हाङ्डाम्मि चुमॆक्सङ् पिट्टुचि। हाङ् येसुबि निवाँयुङ् लॆटुचिर कामानुङ् डिरिक् खानावाँ इपिटुचि। 24 हाङ् खोसॆ लोमिम्पा खानावाँ ऎॽवाचिऎ चाइ निवाँयुङ् लॆटुचि टर होइढाचिऎ चाइ मालॆटुचि। 25 मसॆ उम्चि लुम्पिन खानावाँ माटङ् हाङ् आक्कबाङ् खाइमा परकामि। आक्रल पावलऎ लोसुचि, “सॆङ्सॆङॆ लावाऎ यासाइया लोमॆ निवाँहाङ्मि खानावाँ लोखुबाबाङ् आन्नामि टुबालाबाचि लोमिम्पा ग खानावाँ चाइबानऎ लॆटा। 26 इघा याॽमिचिबि खारॆहाङ् गर लोसॆचॆ, आन्नॆ खेम्मा ग खेम्काम्नि टर वाबाम्निनि। हाङ् खाङ्मा ग खाङ्काम्नि टर खाङ्टकाम्निनि।” 27 मान्ठाभनॆ इघा याॽमिचिम् निवाँ काइसॆ लिडा। उम्चि नाबाक् सॆक्टिखॆडा। हाङ् उम्चि मिक् डेक्टिखॆडा। हॆॽनि हाङ्ग खोचिऎ खाङ्टकुचि, खेम्टकुचि, वाब्टकुचि हाङ् काबि ऎम्पखुबा लॆटामि। कॆ खोचि नुबक्मिट्टुङ्चि। 28-29 मसॆ पावलऎ आक्खाचि गर लोसुचि, “आन्नॆ ग खानावाँ लेसाम्नॆ, निवाँहाङ्मि फाक्बक्खुबामि खानावाँ होइढा हॆॽनिबारेक्चिबि पाङ्हाङ्डा हाङ् आक्खाचिऎ खेमुकुचि।” 30 हिच्चि निङ्ढारि पावल खोसॆॽन याङ् फङ्से लामिम्पा खिम्पि पेना। हाङ् खोसॆ खो चुब्सि टाखुबा चोब्न याॽमिचि नुःर लॆःॽयुङ्सुचि। 31 खोसॆ मॆन्किसिरे आँटानुङ् निवाँहाङ्मि हाङ्डाम्मि बारेबि खेम्मिसे, पारभु येसु खिरिस्टमि बारेबि चिन्युक्सुचि। हाङ् आसॆस ग योम्पक्पि खो माऎक्हिसुचि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.