सॆःक्ढुङ्पा 25 - लोहोरुङ्पावल फेस्टसमि ङारिङ्पि 1 फेस्टास याहुडियाबि हाङ्डाम् लॆसि टामिम्पा सुम्चि डिना डॆङ्पि काइसारियाबाङ् यारुसालेमटु खारा। 2 हाङ् आक्कुबि ढ्या याटाङ्पाचि नुङ् याहुडिचिम् टुङ्घङ्पाचिऎ खोम् कॆक्पि पावल आब्डिक् टिसुचि। 3 खोचिऎ फेस्टस काङ्कामि खानावाँ खेम्पिॽमा हाङ् पावल यारुसालेमपि पाङ्हाङ्पिॽमा कामानुङ् लोसुचि। मान्ठाभनॆ खोचिऎ पावल लाम्फुब्न सेॽमा मिन्मिम्पा लॆटुचि। 4 टर फेस्टसऎ आक्खाचि लोसुचि, “पावल काइसारियाबिऎ सॆक्चिम्पि सॆक्ढिङ्खॆडा। हाङ् काङा सङ्क सॆॽलन आक्कुबि खॆॽमॆ पाइङा। 5 मसॆ आन्नामि एक्क हिप्पा टुङ्घङ्पाचि कानुङ् खॆॽमा। हाङ् आक्क याॽमिऎ चाइबान खानावाँ नासॆलॆडु हाङ्ग खो आक्कुब्न आब्डिक् टिसुचिर।” 6 हाङ् फेस्टास यारुसालेम्पि बापङ् एपङ डिनार पेनाहाङ् काइसारियाबि ऎन्ढिन्टा। हाङ् वेन्डाक् लाम्पॆन न्यायॆ लॆठाम् ठालबि पेन्मानुङ् पावल गुबि लाटॆटाम्नॆ कामानुङ् लोसुचि। 7 पावल आक्कुबि टाआ, हाङ् यारुसालेमबाङ् उङ्डामिह् याहुडिचि खोम् गॆअङमॆअङ् येप्पकामि। हाङ् डिरिक् डिड्डा डिड्डा आब्डिक् टिपकुचि, टर खो टिमिम्पा आब्डिक् चाइबान कामानुङ् माखाङ्पमिॽहिसुचि। 8 हाङ् पावलऎ कॆ माङ्स काइसॆ योम्पक् मायिक्टिॽङा कामानुङ् गरहाङ् कासा, “काङॆ याहुडि यायेॽमा, निवाँहाङ्मि खिम् हाङ् रोमि हाङ्मि बारेबि माङ्स काइर योम्पक् मायिक्टिॽङा।” 9 फेस्टसऎ याहुडिचि चेन्चामिॽमॆ निवाँऎ पावल गरहाङ् सिमु, “आना मिट्टु यारुसालेम्पिटु पाङ्हाङ्खाना हाङ् आनाम् न्यायॆ आक्कुब्न लॆकुङ्, फॆन्नॆ?” 10 पावलऎ खानावाँ ऎम्पिटु, “काङा रोमि हाङ् काइसरमि न्यायॆ लॆठाम ठालमि लुम्पि येप्डिङ। मसॆ गुबिॽन काम् न्यायॆ लिमा लॆ। कॆ याहुडिचि माङ्स काइर मालॆटिॽङाचि लोमॆ ग आनॆ सङ्क नुःर लेकुना। 11 “कॆ सिखॆॽमॆ डान्डा टक्चामॆ योम्पक् नासॆलॆडुङ् हाङ्ग काङा सिससिखॆङा। टर याहुडिचिऎ टिमिम्पा आब्डिक् चाइबनऎ हॆॽनॆ हाङ्ग आसॆस काङा उम्चि हुक्पि पिॽहिङामिनि। कॆ काम् खानावाँ रोमि हाङ् काइसारबि टॆकुङ।” 12 हाङ् फेस्टासऎ खोम् खानावाँ इबाक्खुबाचिनुङ् खानावाँ इसाहाङ् पावल लोसु, “आनॆ काइसार हाङ्बि खानावाँ टॆकुङ् लोमिम्पासॆ आना काइसार हाङ्बिॽन पाङ्हाङ्ना।” फेस्टासऎ अगिरिपा हाङ् नुङ् खानावाँ इमिम्पा 13 एक्क हिप्चि डिना डॆङ्पि अगिरिपा हाङ् नुङ् खोम् नुसा बारनिकि फेस्टस चुब्सि काइसारियाबि टाआचि। 14 खोचि आक्कुबि डिरिक् डिना पेनाचि। हाङ् फेस्टसऎ अगिरिपा हाङ् नुङ् पावलमि बारेबि गर कामानुङ् यामुचाआचि, “फेलिक्सऎ सॆक्ढामिङ्पा एक्क याॽमि गुबि चु। 15 काङा यारुसालेम्पि खॆॽमार ढ्या याटाङ्पाचि नुङ् याहुडि टुङ्घङ्पाचिऎ आक्क डान्डा पिॽमा लॆ कामानुङ् काङा लोसिङ्मि। 16 “कॆ आक्खाचि गरहाङ् लोसुङ्चि, ‘आब्डिक् टिखुबाचिम् लुम्पि आब्डिक् टक्चाखुबॆ टाङ्पामि खानावाँ मायुङ्रढारि रोमि चालानाबि डान्डा पिॽमा फॆन्नि। 17 हाङ् खोचि काबि टाआमि, हाङ् काङा गरमर मान्लॆरे वेन्डाक् लाम्पॆन न्यायॆ लॆठाम् ठालबि आक्क लाटॆटाम्नॆ लोसुङ्चि। 18 हाङ् खो आब्डिक् टिखुबाचि येप्पकाहाङ् आब्डिक् टिपकुचि। टर खोचिऎ मरक्मा ढ्या आब्डिक् माटिहिसुचि। 19 टर उम्चि लुम्पि लिमिम्पा याटक्माटक् चाइ उम्चि यायेॽमा नुङ् म सिखॆडॆ येसु लोमॆ याॽमिमि बारेबिरे रछ। म येसु चाइ पावलऎ हस हिङ्चाढङ् लोकु। 20 ग खानावाँ मान्टहाङ् खाङ्मॆ कॆ माङ्स मालेङा। मसॆ कॆ पावल यारुसालेम्पिटुन खॆॽमा हाङ् आनाम् न्यायॆ लॆःॽमा मान्ट लिऎ? कामानुङ् सिमुङ। 21 टर पावलऎ खोम् न्यायॆ रोमि हाङ्ऎ लॆटुर कामानुङ् कासा। मसॆ कॆ सङ्क खो रोमि हाङ् काइसारबि पाङ्हाङ्मॆ निवाँ मुडुङ। टर खो आक्कुबि मान्पाङ्हाङ्रढारि टिलिङ्गाचि हुङ्मिडुङ्चि’।” 22 मसॆ अगिरिपाऎ फेस्टस लोसु, “ग याॽमिमि खानावाँ कॆस खेम्मा मिट्टुङ।” फेस्टसऎ लोसु, “आनॆ वेन्डा खोम् खानावाँ खेम्इकुना।” पावल अगिरिपामि ङारिङ्पि 23 हाङ् वेन्डाक् लाम्पॆ अगिरिपा नुङ् बरनिकि होइढा कप्टानचि हाङ् हाटाबिहा निङ् चुचाखुबा टुङ्घङ्पाचि नुङ् याॽमिचि खोम्ठाम् ठालबि टाआचि। हाङ् फेस्टसऎ पावल लाटॆटाम्नॆ लोसुचि हाङ् खो आक्कुबि लाटॆटुचि। 24 हाङ् फेस्टसऎ लोसु, “अगिरिपा हाङ् नुङ् गुबि काङ्कानुङ् चुकानिहा चोब्न आन्ना बुबुनुसाचि, यारुसालेम नुङ् गुबिहा चोब्न याहुडिचिऎ कानुङ् सेॽमान लॆ लोमिम्पा याॽमि गन यो। 25 टर ग याॽमिऎ सिखॆॽमॆ डान्डा टक्चामॆ योम्पक् यिक्मिम्पा कॆ माखाङ्ङा। हाङ् खोसॆ सङ्क रोमि हाङ्ऎ ग खानावाँ खाङुर कामानुङ् लोमिम्पासॆ काङॆ खो रोम पाङ्हाङ्मॆ निवाँ मुडुङ। 26 टर गमि बारेबि रोमि हाङ् माङ् साप्हाङ्मॆ कामानुङ् माङ्स मालेङा। मसॆ कॆग याॽमि गुबि अगिरिपा हाङ् नुङ् आन्नामि लुम्पि लाटॆडुङ। आन्नामि लुम्पि खानावाँ लिमार रे रोमि हाङ् साप्हाङ्मॆ खानावाँ यक्टकुङ् हला। 27 मान्ठाभनॆ सॆक्ढिङ्खॆम्पा याॽमि मरक्न आब्डिक् मॆड्डिङ् पाङ्हाङ्मा मामिॽङा।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.