२ टिमोठि 3 - लोहोरुङ्डॆङ्पिहा डिना 1 टर आनॆ ग लेॽयाकॆ, डॆङ्पिहा डिनाबि किॽमालुहा लः टा। 2 मान्ठाभनॆ आक्रल याॽमिचि टाङ्पा टे खाङ्खुबा, याङ्मि लोभा लॆखुबा, काङानयॆ मिन्खुबा, होइढाचि आङॆप्खुबा, ठक्चिक् नुङ् वाचिक् काखुबा, टाङ्पामि आपा आमाऎ लोमिम्पा ऎखेम्खुबा, नुःर लॆःॽमार सङ्क काइर मिक्खुबा हाङ् सॆङ्सॆङॆ मॆड्डिङ्हाचि, 3 हाङ् नाम्नाम् आपिसिखुबा, यङ्निमा आपिक्खुबा, इचाखुबा, टाङ्पान काम्नुःर आपाइखुबा, होइढाचि डुखा पिक्मार चेन्चाखुबा हाङ् काम्नुऎ खानावाँ सिच्चाखुबा लिक्मि। 4 हाङ् बङ्सिखुबा, हाम्पि ग हाम्पि पाइखुबा, काङानङायॆ मिन्खुबा हाङ् निवाँहाङ्बाङ्स उम्चि चेन्चामाबि निवाँ टिकुचि। 5 हाङ् खोचि निवाँनेन्र पाइखाङ्मि, टर खोचि निवाँनेन् मुखुबा चॆक्मावा चाइ लासुचिनि। आक्रहा याॽमिचिबाङ् मिउन पेनॆ। 6 मान्ठाभनॆ आक्खाचिबाङ् ऎॽवाचिऎ चाइ खिम्खिम्पि खॆःॽमिहाङ् निवाँ मॆड्डिङ्हा हाङ् डिरिक् खालाहा काइसॆ खानावाँबाङ् डुखाबि सिट्टिखॆडामिहा मेॽनुङ्माचि उम्चि हुक्पि युङुकुचिमि। 7 आक्खा मेॽनुङ्माचिऎ आसामि खानावाँ हाङ्स खेम्मा ग खेम्ढाङ्कुचि, टर चाइबानऎ खानावाँ चाइ हानाम्स लेहिसुचिनि। 8 मान्टहाङ् यान्नॆस नुङ् याम्बॆरेसऎ मोसा काइर लोसाचु, मरहाङ्न इघा याॽमिचिऎ सङ्क चाइबानऎ खानावाँ काइसॆ लोकुचि। आक्खाचिम् ग निवाँन नासॆलिडा हाङ् निवाँयुङ्न माइडुचि। 9 टर खोचिऎ हानाम्स आक्रहाङ्न लॆहिसुचिनि, मान्ठाभनॆ यान्नॆस नुङ् याम्बॆरेसमि रक्न इॽया आक्खाचिम् सङ्क चोब्नमि लुम्पि उम्चि काइसॆ खानावाँ खाङ्मु। टिमोठिमि बारेबि पावलमि खानावाँ 10 टर आनॆ चाइ काम खानावाँ, हिङ्खामा, लॆःॽमा मिडुङॆ योम्पक्, निवाँयुङ्, आङ्मॆ योम्पक्, नाम्नावाँ हाङ् मान्टहाङ् हुङ्कुङॆ कामानुङ् लेकुना। 11 एन्टिओखियाबि, आइकोनियामबि हाङ् लुस्टाराबि याॽमिचिऎ काङा ऎॽवा डुखा पिट्टिङ्मॆ हाङ् आङुङॆ लोमॆ खानावाँ आनॆ काम्नुःर लेकुना। टर पारभुऎ काङा आक्खा चोब्न डुखाबाङ् फाक्बकिङ। 12 चाइबान लोमॆन हाङ्ग आसा चाइ खिरिस्ट येसुबि भाक्टि लॆःॽमानुङ् हिङ्चामा मिनुक्, खोसॆ याॽमिचिबाङ् डुखा आङ्मान लॆ। 13 टर काइसाचि हाङ् ढाटु बङ्चामि हाङ् बङ्चामा स सिःॽमि। खोचि काइसॆबाङ् झाना काइसॆ लिसॆ खॆःॽमि। 14 टर आना चाइ टाङ्पॆ चिन्मिम्पा खानावाँ हाङ् लॆःॽमिम्पा निवाँयुङ्पि लागालिढाङ्सॆ। आक्क खानावाँ आनॆ आसा आसाबाङ् चिनुनॆ म खानावाँ नुःर लेकुना। 15 आनॆ मिःछुपाबाङ्न सॆङ्सॆङॆ निवाँनेन् साब्चिरामि खानावाँ लेडुना। आक्कसॆ आनाम् खिरिस्ट येसुबि चुऎ निवाँयुङ्बाङ् हिङ्चामॆमि बारेबि निवाँटाङ्पा मु। 16 सॆङ्सॆङॆ निवाँनेन् साब्चिराबि साप्मिम्पा चोब्न खानावाँ निवाँहाङ्ऎ लोमिम्पा रक्न साप्मिम्पा रेम, हाङ् ग याॽमिचि चिन्माम् लागि, काइसॆबाङ् ऎम्पकानॆ लोमाम् लागि, हुन्नहा खानावाँ याइटानॆ लोमाम् लागि हाङ् सॆङ्सॆङॆ लाम्फुबि लाम्ढुमिॽमाम् लागि काम्नुऎ लॆ। 17 मान्ठाभनॆ निवाँहाङ्मि याॽमि चोब्न काम्नुऎ योम्पक् मुहिखुबा लिर कामानुङ्न निवाँनेन् साब्चिरा पिॽमिम्पा यो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.