२ कोरेन्ठि 9 - लोहोरुङ्1 याहुडियाबि चुखुबा खिरिस्टबि निवाँनेन् निवाँहाङ्मि याॽमिचि खाङ्माम् लागि पाङ्हाङ्मॆ पाइमिम्पा खानावाँमि बारेबि काङॆ साब्मा पाप्पानिनि। 2 मान्ठाभनॆ आन्नॆ होइढा याॽमिचि ऎॽवा मुबाक्मा मिकाम्चिनॆ लोमॆ काङॆ लेकुङ। हाङ् आन्नामि बारेबि काङॆ माकेडोनियाबिहा याॽमिचि नुङ्स नाबुक् ठेॽमानुङ् निम्निङ्बाङ्न आन्ना आखाइयाबि चुखुबाचिऎ होइढाचि मुबाक्माम् लागि परक्मिम्पा लॆटानि कामानुङ् खेम्मिटुङ्चि। हाङ् आन्नामि पाङ्नुमाऎन माकेडोनियाबिहा ऎॽवा याॽमिचिऎ सङ्क पिॽमॆ निवाँ टक्चाडुचि। 3 ह चाइ काङॆ खिरिस्टबि काम् इघा नुसाचि आन्नाबि पाङ्हाङ्मे पाइकुङ्चि। आन्नामि बारेबि काङॆ नाबुक् ठेस्से इमिम्पा खानावाँ हुन्नहा हॆॽनॆ, काङॆ लोमिम्पा रक्न लॆटानॆ। 4 काङ्कॆ आन्नाबि ढ्या आस लॆडुङ्का, टर माकेडोनियाबाङ् एक्क हिप्पा कानुङ्न सोरि टाआमि हाङ्ग हाङ् आन्नॆ पिॽमॆ याङ् चाइ माखोम्प हाङ्ग, काङ्का नुङ् आन्ना सङ्क एट्टान ङेसिमाबि सिट्टि खॆकि। 5 मसॆ काङा टामाबाङ् याॽलन इघा नुसाचि आन्नाबि पाङ्हाङ्मा नुऎ मिनिङ। हाङ् आन्नॆ पिॽमा कामानुङ् परक्मिम्पा ठका खोम्बाकानि हाङ् आक्क चाइ पिॽमान लॆ कामानुङ् लोमिम्पासॆ पिॽमिम्पा हॆॽनॆ, टर टाङ्पामि निवाँबाङ्न पिॽमिम्पा ठका लिक्। 6 टर आन्नॆ ग खानावाँ आमिखॆटाम्नॆ, मिःॽम टुब्खुबॆ मिःॽमन खोमुकु, हाङ् डिरिक टुब्खुबॆ डिरिक्न खोमुकु। 7 हाङ् आसॆआसॆ आन्नामि निवाँबि ऎॽवा ऎॽवा पिॽमा मिनुकानि मरक्न पिट्टाम्चिनॆ। याॽमिचिऎ लोमिम्पासॆ निवाँ टुक्से आपिट्टाम्चिनॆ, आठावा मान्ठाभनॆ चेन्चासे पिक्खुबा याॽमिन निवाँहाङ्ऎ नाम्नाम् पिसिकु। 8 हाङ् निवाँहाङ्ऎ चोब्न आसिका आन्ना खेःॽल पिॽहिकानि हाङ् आन्ना पाबुऎबाङ्स डिरिक् पिकानि। आन्ना हानाम्स चोब्न खानावाँ चुखुबा लिकानि हाङ् नुऎ योम्पक् यिक्हिकानि। 9 निवाँनेन साब्चिराबि गरहाङ् साब्डा, “खोसॆ टुबुकु हाङ् ढ्या निवाँऎ आचुखुबाचि पिडुचि, खोमि यिक्मिम्पा काम्नुऎ योम्पक् हानाम्स लिढ्याङ।” 10 निवाँहाङ्ऎ चोब्न टुप्खुबाचि चारिक् हाङ् चाखुबाचि चामा ठःका पिकुचिमि। हाङ् खोसॆ आन्ना पाप्कानिहा चोब्न चारिक् पिकानि हाङ् आक्क चारिक् कॆप्पॽमिकु हाङ् खोसॆ नुऎ निवाँऎ पिॽमिम्पासॆ आक्कसॆ नुऎ चारुङ् सिकु। 11 हाङ् आन्नॆ हानाम्स ढ्या निवाँऎ पिॽहिखुबा मुमामि लागि निवाँहाङ्ऎ आन्ना चोब्न खानावाँबि आसिका पिकानि। हाङ् आन्नॆ आक्खाचिमि लागि पिॽमिम्पा ठका काङ्कॆ होइढा मान्डालिबि पिॽमार खोचिऎ निवाँहाङ् ओहाक् पिकुचि। 12 हाङ् आन्नॆ पिॽमिम्पा खानावाँऎ निवाँयुङ् लॆखुबा याॽमिचिमि लागि पाबुऎ ठका टङ्टाः। आक्र टेःॽन हॆॽनॆ, टर आक्कबाङ् निवाँहाङ् ओहाक् पिॽमॆ ढ्या योम्पक् सङ्क लि। 13 हाङ् खिरिस्टमि नुऎ खानावाँ सक्पि आन्नॆ टिमिम्पा निवाँ हाङ् ढ्या निवाँ नुङ् खोचिमि लागि हाङ् चोब्न निवाँयुङ् लॆखुबाचिम् लागि यिक्मिम्पा योम्पक् याॽमिचिऎ खाङ्कुचि हाङ् निवाँहाङ्मि निङ् ठेरुकुचि। 14 हाङ् निवाँहाङ्मि ढ्या नाम्नाँवा आन्ना सक्पि लिमिम्पासॆ खोचिऎ आन्ना एट्टान नाम्नाम् पिसिसे पारठाना लॆपिकानि। 15 माङ् नुङ् सङ्क ङेप्हिनॆ खोसॆ पिॽमिम्पा बारडानामि लागि निवाँहाङ्न ओहाक् लिर। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.