२ कोरेन्ठि 4 - लोहोरुङ्बाखामि कक्नाम्बि युङ्मिम्पा लावामि चासुम् 1 निवाँहाङ्ऎन खोम् नाम्नाँवाऎ कानि ग खानावाँ खेम्मिॽमॆ योम्पक पिॽमिम्पासॆ काङ्कॆ ग योम्पक् यिक्माम् लागि निवाँ सेरुम्कानि। 2 कानिऎ चोब्न ङेसिमालुहा हाङ् कुम्से लॆकिहा काइसाहा योम्पक् याइडा। काङ्कॆ बङ्चामॆ खानावाँ इसुम्कानि हाङ् निवाँहाङ्मि खानावाँ होइकन मुसुम्कानि। टर निवाँहाङ्मि ङारिङ्पि चोब्न याॽमिचि चाइबानऎ खानावाँ नुःर इकुङ्का हाङ् चोब्न याॽमिचिऎ खाङ्टक्ल उम्चि ङारिङ्पि काङ्काम् हिङ्खामा ऎॽवा काम्नुऎ लॆऎ कामानुङ् खाङ्मिडुङ्का। 3 हाङ् काङ्कॆ खेम्मिॽमिम्पा नुऎ खानावाँ याॽमिचिम् लुम्पि वानवाप्निए लिःडा हाङ्ग, लुक्खॆखुबाचिम् लुम्पि वाप्निऎ लिडा। 4 ग बाखाटेम्पिऎ डेउटा साइटानऎ येसुबि निवाँयुङ् आलॆखुबाचिऎ खिरिस्टमि बारेबि खेम्मिॽमिम्पा नुऎ खानावाँबाङ् टाऎ निङ्लावा ऎवाबुचिर कामानुङ् उम्चि मिक् डॆक्पिडुचिमि। हाङ् खिरिस्ट चाइ निवाँहाङ्मि रुपा रेम। 5 मान्ठाभनॆ काङ्कॆ टाङ्पामिन खानावाँ खेम्मिटुम्चिगानि, टर येसु खिरिस्ट न पारभु यो कामानुङ् खेम्मिकुङ्का हाङ् काङ्का चाइ येसुमि निङ्पि आन्नामि योम्पक मुखुबा याॽमि लिःॽडिङ्का। 6 मान्ठाभनॆ “माॽयाक्टबि ओप्लिङ् ओर” लोखुबा निवाँहाङ्ऎन कानिमि निवाँबि ओऎ नुऎ खानावाँ टिबिडि। निवाँहाङ्मि ढ्या निङ्लावाबाङ् काङ्कॆ ग नुऎ खानावाँ लेकुङ्का। हाङ् आक्क निङ्लावा खिरिस्टबि खाङ्मुसा। 7 टर याङ्ऎ सङ्क इन्हिनॆ गरक्मा चासुम् कानि रहा माङ्ना माङ्हा बाखामि कक्नाम् रक्मा याॽमिचिबि मान्ठा युङ्मिम्पा भनॆ, कानिम् हुक्पि हॆॽनॆ, टर चोब्न चॆक्मावा निवाँहाङ्मि हुक्पि चुः, कामानुङ् खाङ्मिॽमाम् लागि रेम। 8 कानि चोब्ठालबाङ् डुखाऎ टिबुकि, हाङ्स खाॽमिक्न चाइ मान्लिटिटि। चोब्न खानावाँ मॆवाप्टि हाङ्स निवाँन चाइ मान्सिखॆटि। 9 याॽमिचिऎ कानि डुखा पिःॽमि हाङ्स निवाँहाङ्ऎ चाइ मायाइटिट्टि। हाङ् एट्टान रःक्मा खाइहाङ्चाडि हाङ्स मान्सिखॆटिट्टि। 10 येसुमि हिङ्खामा कानिम् सालुङ्बाङ् खाङ्मिॽमाम् लागि येसुऎ डुखा आङ्से सिखॆॽमिम्पा रक्न हानाम्स काङ्कॆ खोम् निङ्पि डुखा आङ्मा हेकुङ्का। 11 मान्ठाभनॆ काङ्कामि ग सिखॆऎ हिङ्खामाबि येसुमि हिङ्खामा खाङ्मुमामि लागिॽन काङ्का खोम् निङ्पि हानाम्स आसिखॆॽमॆ गारि डुखा आङ्कुङ्का। 12 मसॆ काङ्कॆ काङ्कामि हिङ्खामाबि हानाम्स डुखा आङ्मॆ पाइकुङ्का हाङ् सिखॆॽमा ठाबाक्डिङ्का, टर आक्क डुखाऎ आन्नाबि चाइ हानाम्स लुक्खॆॽनॆ हिङ्खामाऎ योम्पक् यिक्मे पाइकु। 13 “काङॆ निवाँयुङ् लॆःॽडुङ्, मसॆ काङा यामुसिङ्” कामानुङ् निवाँनेन् साब्चिराबि साप्खुबा याॽमिबि चुइन्टक्न काङ्काबि सङ्क निवाँयुङ् लॆःॽमॆ लावा चु। मसॆ काङ्कॆ निवाँयुङ् लॆकुङ्का हाङ् यामुकिङ्का। 14 निवाँहाङ्ऎ येसु सिखॆम्पाबाङ् हिङ्पॽमिट्टु लोमॆ काङ्कॆ लेकुङ्का। खोसॆ कानि स येसु नुङ्न हिङ्पॽमिकि हाङ् आन्ना नुङ् काङ्का खोबि लाखॆकि। 15 इघा चोब्न आन्नामि लागिॽन लिडा, मान्ठाभनॆ मान्टहाङ् याॽमिचिऎ निवाँहाङ्मि नाम्नाँवा टक्चाकुचि, मरहाङ्न याॽमिचिऎ खो डिरिक् ओहाक् पिस्से निङ्लावा लॆटुचिर। निवाँयुङ्बि हिङ्चामॆ 16 मसॆ हानाम्स कानिमि निवाँ सिखॆॽनि। कानि सालुङ्पि लुक्खॆसॆ खॆकि, टर लावाबि चाइ चोब्न डिना उम्चङ् लिसे खॆकि। 17 कानिऎ गरॽल आङुऎ डुखा चाइ ढ्या हॆॽनॆ हाङ्ग एच्छक्मि लागि टे रेम। गसॆ कानि कानिऎ डॆङ्पि टक्चाऎ हानाम्स लुक्खॆनिऎ सुखामि लागि लाम्फु मुबक्मे पाइकु। 18 काङ्कॆ खाङ्मुऎ खानावाँबि हॆॽनॆ, टर खाङ्मुनिऎ खानावाँबि निवाँ टिकुङ्का। मान्ठाभनॆ खाङ्मुऎ खानावाँ ग ऎच्छॽ मि लागि लिः, टर खाङ्मुनिऎ खानावाँ चाइ हानाम्स लिढ्याङ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.