२ कोरेन्ठि 10 - लोहोरुङ्1 आन्नामि लुम्पि काङा मिःछुपा हाङ् नुऎ लॆङ्ङा, टर मॆॽयङ् चुःॽङार आन्नानुङ् माङ्किसिरे यामुॽङा लोमॆ आन्नामि लुम्पि लिडा। काङा पावल आन्नानुङ् एट्टान मिःछुपा लॆङ्ङा। खिरिस्ट रक्न मिःछुपा हाङ् खोम् नाम्नावाँबि कॆ आन्ना लोकानि। 2 कॆ आन्ना नुःर लोकानि, काङा आन्नाबि टाःॽङार आन्नानुङ् मॆङ्किसिरे यामुमा आसिॽङार। काङ्कॆ चाइ निवाँयुङ् आलॆखुबाचिर योम्पक् यिकुङ्का काखुबा याॽमिचि नुङ् काङा माङ्किसिरे यामुङा। 3 मान्ठाभनॆ काङ्का सालुङ्पिॽन चुकिङ्का, हाङ्स बाखाबाटेमपि याॽमिचिर खिसिङ्कानि। 4 कानिम् आप्चिरा चाइ बाखाटेम्पिऎ रक्मा हॆॽनॆ, टर निवाँहाङ्मि चॆकुवॆ खानावाँ यो, आक्कसॆ लावामि किल्ला हाङ् हुन्नहा खानावाँ चेनुकु। 5 हाङ् निवाँहाङ्मि निवाँ ऎक्सि टाहा चोब्न खानावाँ हाङ् काङानङाये मिन्मानुङ् टाहा खानावाँ काङ्कॆ लुक्पिकुङ्का। हाङ् काङ्कॆ चोब्न खानावाँ हुक्पि लासे खिरिस्टऎ लोमिम्पा खानावाँ खेम्मिकुङ्का। 6 लोमिम्पा खानावाँ आन्नॆ खेम्सिकाम्नि हाङ् लोमिम्पा आखेम्खुबाचि चोब्न काङ्कॆ डान्डा पिकुम्का। 7 आन्नॆ मिक्ऎ खाङ्टकुयॆ खानावाँ टेः खाङाम्नॆ। हाङ् आन्नामि लुम्पि एक्कसॆ आन्ना खिरिस्टये कामानुङ् लोकानि हाङ् आन्नॆ म खानावाँ निवाँयुङ् लॆकाम्नि हाङ्ग आन्नॆ ग खानावाँ वाबाम्नि, काङ्का सङ्क आन्ना रक्न खिरिस्टमि याॽमिचिन। 8 आन्ना नासॆलॆःॽमाम् लागि हॆॽनॆ, टर नुचाकानिहा याॽमिचि मुमाम् लागि पारभुऎ काङ्का ढुप्पाट्ट पिडिङ्का। मसॆ काङ्कामि ढुप्पाट्टमि बारेबि एट्टान नाबुक् ठेॽइटुङ्का हाङ्स काङ्का ङेसिइङ्कानि। 9 काङॆ आन्ना किसिमा खाङ्मिॽमा लागि साब्चिरा साप्हाङ्मिम्पा हॆॽनॆ। 10 मान्ठाभनॆ एक्क हिप्पा याॽमिचि गर काग्मि, “पावलऎ आन्नॆ यिक्मान लॆ कामानुङ् डिरिक् साब्चिराबि खानावाँ साःब्कु, टर खोन आन्नामि लुम्पि लिमार टुङ्घङ्पार खानावाँ इनि हाङ् खोम् खानावाँऎ माङ्स योम्पक् यिगुनि।” 11 आक्र काखुबा याॽमिचिऎ काङ्का याॽमिचिम् लुम्पि माइङ्कार माङ् खानावाँ साप्हाङ्डुङ्का आक्खाचिम् लुम्पि चुमार सङ्क आक्रहाङ्न खानावाँ इकुङ्का कामानुङ् लेसुचिर। 12 काङ्कॆ हानाम्स टाङ्पॆ टाङ्पान टुङ्घङ्पाङाये कामानुङ् ङॆब्हिसिङ्कानि हाङ् युसुयुङुङ्कानि। खोचिऎ माङ्स खानावाँ वाबुचिनि। खोचिऎन माङ् चाइ काम्नुऎ रेम कामानुङ् खानावाँ इःक्मि हाङ् म खानावाँबिॽन उम्चि लुम्पि आसा चाइ नुऎ याॽमि कामानुङ् काखाङ्मि। 13 टर काङ्का निवाँहाङ्ऎ पिॽमिम्पा ढुप्पाट्टबाङ् मॆअङ्हा योम्पक्बि ढ्या लॆङिङ्कानि। निवाँहाङ्ऎ आन्नाढारि टाडामॆ योम्पक् पिडिङ्का, आक्कमि लागि हाङ् निवाँहाङ्ऎ पिॽमिम्पा होइढा योम्पक्बि टेःॽन नाबुक् ठेरुकिङ्का। 14 हाङ् काङ्का आन्नाबि आनआटामिम्पार हुन्न नाबुक् ठेरिङ्कानि। मान्ठाभनॆ खिरिस्टमि नुऎ खानावाँ खेम्मिॽमाम् लागि काङ्कान चोब्बाङ् याॽल आन्नाबि टाखुबा याॽमिचि रेम। 15 हाङ् काङ्का होइढा याॽमिचिऎ मुमिम्पा योम्पक्पि नाबुक् ठेरुम्कानि। काङ्कामि निवाँबि चुऎ खानावाँ चाइ माङ्भनॆ, आन्नामि निवाँयुङ् पुसे खॆॽल हाङ् काङ्कामि योम्पक् स पुसे खॆॽल लोमॆ रेम। 16 गरहाङ् काङ्का चाइ आन्ना चुकानिहा ठालबाङ् होइढा ठालबि नुऎ खानावाँ खेम्मिसि खॆॽहिकिङ्का हाङ् होइढा याॽमिचिऎ योम्पक् मुमिम्पा ठालबि काङ्कॆ नाबुक् ठेॽमा पाब्नि। 17 निवाँनेन साब्चिराऎ इकु, “नाबुक् ठेक्खुबॆ पारभुबिॽन नाबुक् ठेरुर।” 18 मान्ठाभनॆ टाङ्पॆ टाङ्पान नुचाङाये काखुबा याॽमि नुऎ लिनि। टर पारभुऎ नुऎ लोमिम्पा याॽमि नुऎ लि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.