१ ठेसलोनिकि 4 - लोहोरुङ्निवाँहाङ्ऎ नेन्चामॆ हिङ्खामा 1 ह बुबुनानुसाचि, पारभु येसुबि काङ्कॆ आन्ना निवाँहाङ् नेन्चामिॽमॆ हिङ्खामा मान्टहाङ् हिङ्चामा लॆऎ लोमॆ खानावाँ इसिडानि। हाङ् आन्नॆ काङ्कॆ लोमिम्पा आनुसारॆ हिङ्खामा हिङ्चामॆ स सिकानि। हाङ् हस आक्खा खानावाँबि नुःर पाइटानॆ कामानुङ् लोकानि। 2 मान्ठाभनॆ काङ्कॆ पारभु येसुमि ढुप्पाट्टबाङ् आन्ना माङ्माङ् लोडानि म खानावाँ आन्नॆ लेकाम्निन। 3 मान्ठाभनॆ निवाँहाङ्ऎ आन्ना सॆङ्सॆङॆ लिमिम्पा खाङ्मा मिकानि, मसॆ आन्ना ब्याबिचारा लॆःॽमॆ योम्पक्बाङ् मिउ पेनानॆ। 4 आन्ना चोप्पासॆ ग खानावाँ लेमा लॆ, आन्नॆ टाङ्पाम् सालुङ् टाङ्पॆॽन खाङ्मा चिन्मा लॆ हाङ् सॆङ्सॆङॆ हाङ् नुऎ हिङ्खामा हिङ्चामा लॆ। 5 निवाँहाङ् आलॆखुबा होइढा हॆॽनि बारेक् याॽमिचिर ब्याबिचारा लॆःॽमॆ निवाँऎ आचेप्खॆटानॆ। 6 आसॆस आक्रहा योम्पक् मुसे निवाँयुङ् लॆखुबामि खिम्टाङ्मानुङ् इम्चासे काइर लॆःॽमा आठावा खोबाङ् खुमा फॆन्नि। मान्ठाभनॆ आक्खा चोब्न खानावाँमि डान्डा पारभुऎ लाकु लोमॆ खानावाँ काङ्कॆ आन्ना याॽलिन स नुःर इसिडानि। 7 मान्ठाभनॆ निवाँहाङ्ऎ कानि सॆङ्सॆङॆ मॆड्डिङ्मा लिसि हॆॽनॆ, टर सॆङ्सॆङॆ हिङ्खामा पिस्सि सॆःॽमिम्पा यो। 8 मसॆ आसॆ चाइ इघा खानावाँ खेमुनि, खोसॆ याॽमिमि हॆॽनॆ, टर खोम् सॆङ्सॆङॆ लावा पिक्खुबा निवाँहाङ्मि खानावाँ खेमुनि। 9 ह निवाँयुङ् लॆखुबा बुबुनानुसाचिम् लुम्पि मान्टहाङ् नाम्नाम् पिसिपॆ चुमा लॆऎ लोमॆ खानावाँमि बारेबि काङ्कॆ आन्ना माङ्स साब्मा पाप्पानिनि। मान्ठाभनॆ निवाँहाङ्ऎन आन्ना टाङ्पा टाङ्पाबि नाम्नाम् पिसिॽमा लॆ लोमॆ खानावाँ चिन्सिडानि। 10 हाङ् आन्नॆ चाइबान माकेडोनियाबिहा चोब्न बुबुनानुसाचि नाम्नाम् पिसिडाम्चिनि। हस काङ्कॆ आन्ना बुबुनानुसाचि नुःर लोखाचिम् आन्ना आक्कबाङ्स डिरिक् नाम्नाम् पिसिॽमॆ खानावाँबि पुसानॆ। 11 हाङ् काङ्कॆ याॽलिन लोसिन्टॽन आन्नॆ सान्टिबि पेन्मॆ खानावाँबि निवाँ टिसानॆ, होइढा याॽमिचि गरमर लोमॆ खानावाँबि हॆॽनॆ, टर टाङ्पाम् योम्पक् मुचाआनॆ हाङ् टाङ्पाम् लागि टाङ्पाम् हुगॆॽन योम्पक् मुसानॆ। 12 आक्रहाङ् निवाँयुङ् आलॆखुबाचिम् लुम्पि सङ्क आन्ना नुचाकानिहा याॽमि लिकानि हाङ् पाबुहा ठका होइढा याॽमिचि नुङ् हुक् टाप्मा पाप्पानिनि। पारभु टामॆ खानावाँ 13 बुबुनानुसाचि, आन्नॆ सिखॆम्पाचिम् बारेबि माङ् लिऎ लोमॆ खानावाँ लेसाम्नॆ कामानुङ् काङ्का मिनुङ्किङ्का, मसॆ निवाँयुङ् आलॆखुबा याॽमिचिर आन्ना निवाँ टुक्माबि सिॽमा आसिॽल। 14 मान्ठाभनॆ येसु सिखारा हाङ् फेरि हिङ्पका लोमॆ खानावाँबि कानिऎ निवाँयुङ् लॆ। गरहाङ्न खोबि निवाँयुङ् लॆःॽमानुङ् सिखॆम्पाचि निवाँहाङ्ऎ येसुबाङ् लाटॆकुचि। 15 पारभुमि खानावाँबाङ् काङ्कॆ आन्ना लोकानि, पारभु टामार हिङ्चाखुबा कानिबाङ् याॽल सिखॆम्पाचिऎ खो चुबुकुचि। 16 मान्ठाभनॆ पारभु खोन पारुबाङ् ढ्या खानावाँनुङ् हाङ् ढ्या निवाँखाटॆखुबामि साम्लानुङ् हाङ् निवाँहाङ्मि पॆपॆलिमामि सम्लाबि उङुक्। हाङ् निवाँयुङ् लॆःॽमानुङ् सिखॆम्पाचि याॽल हिङ्पःक्मि। 17 हाङ् कानि हिङ्चामा नुङ् बाखाटेम्पि चुयाकिहाचि स खोचिनुङ् सोरि खिन्दुमाबि पारभु चुप्माम् लागि नाम्फलिॽवाबि लाखॆ। गरहाङ् कानि हानाम्स पारभु नुङ् लिढाङ्कि। 18 मसॆ आक्खा खानावाँबाङ् एक्कसॆ होइक याॽमि निवाँबि चॆक्मावा पिप्पे चुआनॆ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.