१ ठेसलोनिकि 3 - लोहोरुङ्टिमोठि ठेसालोनिकाबि पाङ्हाङ्मिम्पा 1 मसॆ काङ्कॆ मॆआङ्हिसुङ्का हाङ् एठेन्स हाटाबि टाङ्पा टे वेड्डामा खाइचामा सङ्क नुऎन लि मिनिङ्का। 2 हाङ् आन्ना आम्नि निवाँयुङ्पि चॆकुवॆ मुसि हाङ् पाङ्नुमा पिस्सि कानिम् नुसा टिमोठि आन्नाबि पाङ्हाङ्सुङ्का। खो खिरिस्टमि नुऎ खानावाँ खेम्मिॽमॆ योम्पक्मि लागि निवाँहाङ्मि योम्पक् मुबक्खुबा लाङ्काम् यो। 3 मान्ठाभनॆ आक्खा डुखाऎ आसाम्स निवाँ गरमर आलिर। आन्नॆ लेकाम्नि गमि लागिॽन कानि सॆःक्मिम्पा यो। 4 मान्ठाभनॆ काङ्का आन्नानुङ्न चुमार याॽलि सङ्क कानिऎ डुखा आङ्मान लॆ कामानुङ् लोमिम्पा लॆटानि हाङ् मरक्न लिसा। म ग आन्नॆ लेकाम्निन। 5 मसॆ कॆ माआङ्हिङा हाङ् ठाःक्खुबॆ आन्ना ठागानि हाङ् आम्नि निवाँयुङ् माइपिटानि हला मिनिङ। हाङ् काङ्कामि योम्पक् हुन्नऎ लिऎ रु कामानुङ् किसिमानुङ् आम्नि निवाँयुङ् वाप्सि टिमोठि पाङ्हाङसुङ। 6 टर हहन टिमोठि आन्नाबाङ् गुबि टाडा। खोसॆ आन्नामि निवाँयुङ् हाङ् नाम्नाम् पिसिॽमॆ खानावाँमि बारेबि काम्नुऎ खानावाँ लाटॆडु। आन्नॆ काङ्का नाम्नाम् पिसिॽमानुङ् हानाम्स मिॽलाकाम्नि हेम हाङ् काङ्कॆ चुब्मा मिनिन्टक्न आन्नॆ सङ्क चुप्मा मिङ्कानि हेमु लोमॆ खानावाँ खोबाङ् खेमुङ्का। 7 मसॆ बुबुनानुसाचि, आन्नामि निवाँयुङ्मि खानावाँऎ काङ्कामि डुखा नुङ् कास्टाबि सङ्क पाङ्नुमा टक्चाडुङ्का। 8 मान्ठाभनॆ आन्ना पारभुबि चॆकुवॆ लिसानि लोमॆ खानावाँ खेम्मार काङ्कामि सङ्क सक्मा कॆ। 9 मान्ठाभनॆ आन्नॆ कानिम् लागि निवाँहाङ्मि ङारिङ्पि लाटॆॽमिम्पा चेन्चामॆ खानावाँमि लागि कानिम् निवाँहाङ् ऎॽवा ओहाक् पिॽमा हाङ्स खेटुनि। 10 आन्ना चुप्मा हाङ् आन्नामि निवाँयुङ्पि हस डिरिक् खानावाँ येट्टिमाम् लागि काङ्का लेन्टा हाङ् सेन्टा निवाँ हङ्सिॽयुबाङ्न पारठाना लॆकिङ्का। 11 कानिम् निवाँहाङ् आपा हाङ् पारभु येसुऎन आन्नाबि टामॆ लाम् हेम्बकुर। 12 हाङ् काङ्कॆ आन्ना नाम्नाम् पिसिन्टक्न पारभुऎ आन्ना स टाङ्पा टाङ्पाबि हाङ् चोब्न याॽमिचि नाम्नाम् पिसिॽमॆ खानावाँबि पुबक्से खॆॽहिखुबा मुसानिर। 13 खोसॆ आन्नामि निवाँ चॆकुवॆ मुसुर मसॆ पारभु येसु खोम् चोब्न सॆङ्सॆङॆहाचिनुङ् टामार आन्ना कानिम् निवाँहाङ् आपामि ङारिङ्पि आब्डिक् मॆड्डिङ्मा हाङ् सॆङ्सॆङॆ लिकानि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.