१ ठेसलोनिकि 2 - लोहोरुङ्ठेसालोनिकिबि पावलमि योम्पक् 1 मान्ठाभनॆ बुबुनानुसाचि, काङ्कामि आन्नानुङ् चुप्मॆ योम्पक् हुन्नऎ मालॆ कामानुङ् आन्नॆ लेकाम्नि। 2 हाङ् काङ्कॆ याॽलन फिलिप्पिबि डुखा आङुङ्का हाङ् ङेसिमा लुर मुसिङ्का लोमॆ खानावाँ सङ्क लेकाम्नि। आक्कुबि याॽमिचिऎ काङ्का काइर लॆटिङ्कार सङ्क काङ्कॆ आन्ना निवाँहाङ्मि नुऎ खानावाँ खेम्मिॽमॆ पाङ्नुमा टक्चाउङ्का। 3 मान्ठाभनॆ काङ्कॆ इमिम्पा खानावाँ हुन्नऎ हाङ् काइसॆ मालॆ हाङ् बङ्सिॽमॆ रक्मा सङ्क मालॆ। 4 टर मान्टहाङ् काङ्का निवाँहाङ्ऎ खाङिङ्का हाङ् निवाँयुङ् लॆॽमानुङ् नुऎ खानावाँ खेम्मिॽमॆ योम्पक्पि टिसिङ्का। मरहाङ्न काङ्का याॽमिचि चेन्चामिस्सि हॆॽनॆ, टर कानिम् निवाँ ठाक्खुबा निवाँहाङ् चेन्चामिस्सि यामुकिङ्का। 5 मान्ठाभनॆ आन्नॆ नुःर लेकाम्नि, काङ्कॆ आन्ना ठेॽमॆ खानावाँ माइसुङ्का, ना आन्नाबाङ् माङ्माङ् टक्चामॆ निवाँन मुसुङ्का। निवाँहाङ्न गमि चुमॆक्सङ् चु। 6 काङ्का खिरिस्टमि सॆःक्ढुङ्पा लिमिम्पासॆ आन्ना सक्पि ढुप्पाट्ट फॆॽहिसुङ्का। हाङ्स काङ्कॆ ना याॽमिचिबाङ्, ना आन्नाबाङ् ना होइढाचिबाङ् निङ् ठेॽमॆ निवाँ मुसुङ्का। 7 टर काङ्का ग आन्नाम् लुम्पि टाङ्पाम् चाचा नुःर खाङ्खुबा एक्क आमाररे नाम्नावाँ नुङ्मा लिसिङ्का। 8 काङ्कॆ आन्ना डिरिक् नाम्नाम् पिसिम्पासॆ आन्नानुङ् नुऎ खानावाँ टे हॆॽनॆ, टर काङ्कामि हिङ्खामा सङ्क पिॽमा परक्मिम्पा लॆटिङ्का, मान्ठाभनॆ आन्ना काङ्कामि नाम्नाम् पिसिम्पा याॽमि लिमिम्पा लॆटानि। 9 मान्ठाभनॆ बुबुनानुसाचि, काङ्कॆ आन्नामि लुम्पि निवाँहाङ्मि नुऎ खानावाँ खेम्मिॽमार आसाबिसङ्क डुखा आसिॽल कामानुङ् लेन्टा सेन्टा माकारे मान्टहाङ् डुखा लॆसॆ योम्पक् यिगुम्कॆ लोमॆ खानावाँ लेसाम्नॆ। 10 काङ्का आन्ना निवाँयुङ् लॆखुबाचिम् लुम्पि चुमार सॆङ्सॆङॆ, निवाँनेन् हाङ् आब्डिक् मॆड्डिङ्मा लॆटिङ्का लोमॆ खानावाँमि चुमॆक्सङ् आन्ना हाङ् निवाँहाङ् सङ्क चु। 11 आन्नॆ लेकाम्निन एक्क आपाऎ टाङ्पामि पासाचि लोसिन्ट एक्क एक्क लॆसॆ आन्ना चोब्न काङ्कॆ खानावाँ चिनाचिम्। 12 काङ्कॆ आन्ना नुःर लोखाचिम् हाङ् पाङ्नुमा पिस्से इखाचिम् कि आम्नि हिङ्खामा निवाँहाङ्मि ङारिङ्पि नुऎ लिहिर। खोसॆ आन्ना खोम् हाङ्डाम् नुङ् निङ्लावाबि सेःरुकानि। 13 मसॆॽन निवाँहाङ् ओहाक् पिट्ढाङ्चिम् मान्ठाभनॆ काङ्कॆ सङ्क आन्ना निवाँहाङ्मि खानावाँ खेम्मिटानिर आन्नॆ याॽमिमि खानावाँर हॆॽनॆ, टर निवाँहाङ्मि खानावाँ कामानुङ् खेमाम्नि हाङ् लेसाम्नि। हाङ् ग चाइबान निवाँहाङ्मि खानावाँन सङ्क लॆटा। ग खानावाँऎ हस आन्ना निवाँयुङ् लॆखुबाचिबि योम्पक् यिक्मॆ पाइकु। 14 मान्ठाभनॆ बुबुनानुसाचि, खिरिस्ट येसुमि याहुडियाबि चुहा निवाँहाङ्मि मान्डालि रहान आन्ना लिडानि। मान्टहाङ् आन्ना टाङ्पाम्न याॽमिचिबाङ् डुखा आङानि, मरहाङ्न खोचिऎ सङक् याहुडिचिबाङ् डुखा आङामि। 15 खोचिऎ पारभु येसु हाङ् निवाँहाङ्मि खानावाँ लोखुबाचि सेरुचि हाङ् काङ्का सङ्क यिक्पहाक्सिङ्का। खोचिऎ निवाँहाङ्ऎ सिच्चामॆ योम्पक् यिगुकुचि हाङ् चोब्न याॽमिचि काइर लॆकुचि। 16 खोचिऎ काङ्का होइढा हॆॽनि बारेक् याॽमिचि हिङ्चामॆ खानावाँ आक्खाचिम् लुम्पि यामुमा मापिट्टिङ्का। गरहाङ् खोचिऎ उम्चि हिङ्वा येट्टिॽसे लाखॆःडुचि। टर डॆङ्पि निवाँहाङ्मि सिरि खोचिबि सिट्टा। 17 बुबुनानुसाचि, आन्नानुङ् काङ्का सालुङ्पि मिःक्म लःमि लागि खाइहाङ्डिङ्का हाङ्स काङ्कामि निवाँ चाइ आन्नानुङ्न चु। काङ्का आन्नानुङ् एट्टान चुप्मा मिन्डिङ्का हाङ् आन्नाबि टामाम् लागि हेर पाइटिङ्का। 18 मान्ठाभनॆ काङ्का आन्नाबि टामा मिनिङ्का। हाङ् काङा पावल चाइ डिरिक् खेपा टामा यगिङ् टर साइटानऎ काङ्का ऎगिङ्का। 19 कानिम् पारभु येसु टामार खोम् ङारिङ्पि काङ्कामि आस, चेन्चामॆ हाङ् काङानङाऎ मिन्मॆ मुकुट आन्नान यो। 20 चाइबान आन्ना काङ्कामि कायङ्पा मिम्मॆ याॽमिचि हाङ् चेन्चामॆ खानावाँ रेम। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.