१ कोरेन्ठि 6 - लोहोरुङ्खिमॆटुमॆ खानावाँ 1 आन्नामि लुम्पि खिसानि हाङ्ग, माल न्याय ङाःक्सि खिरिस्टमि याॽमिचिबि खारानिनिहाङ् निवाँहाङ्न आलेक्खुबाचिबि खॆकानिहा? 2 खिरिस्टमि सॆङ्सॆङॆ याॽमिचिऎन बाखाटेम्पि न्याय लॆकुचि कामानुङ् माल आन्नॆ लेसाम्निनिहॆ? बाखाटेम्मि टा न्याय लॆखुवा आन्नॆ माल मिॽमिहा खिमाटुमा टङ्मा लेसाम्निनिहॆ? 3 कानिऎ निवाँखाटॆखुबाचिमि सङ्क न्याय लॆकि कामानुङ् आन्नॆ लेसाम्निनिहॆ? हाङ् ग हिङ्खामामि न्याय लॆःॽमॆ खानावाँ ग माङ्स हॆॽनॆ। 4 गरहा खिमाटुमा टङ्सि माल आन्ना मान्डालिऎ माङ्स ङेबुचिनिहा याॽमिचिबि हॆ खॆकानिहा? 5 आन्नाम् लुम्पि एक्क स खिमाटुमा टङ्हिखुबा निवाँनेन् याॽमि माऎ? गग ङेसिमा लुऎ खानावाँ रेटा। 6 एक्क खिरिस्टियनऎ होइक खिरिस्टियननुङ् खिक् हाङ् निवाँहाङ् निवाँयुङ् आलॆखुबाचिबि खिमाटुमामि खानावाँ टङ्पिॽमा कासे लाखॆॽमॆ? 7 आन्नामि लुम्पि खिमॆटुमॆ योम्पक्न आन्ना हेचाइमा खाइहाङ्चाआनि लोमॆ रेम। बोरु याॽमिचिम् आन्याये हाङ् लुप्चाडानिहा खानावाँ आङाम्नॆ। 8 टर आन्ना ग टाङ्पाम् याॽमि हङ्सिन बङ्सिपॆ, लुप्चाबॆ चुकानि। 9 काइसॆ योम्पक् यिक्खुबा याॽमिचि पारुमि हाङ्डाम्पि भॆन्टॽमिनि लोमॆ आन्नॆ लेकाम्नि। टाङ्पान ऎबङ्सिखारानॆ। ब्याबिचारिचि, मुर्टि चुङ्खुबाचि, ङेसिमा मॆड्डिङ् पाइखुबाचि, वाठाङ्पा वाठाङ्पा हाङ् मॆॽनुङ्मा मॆॽनुङ्मा काइर लॆखुबाचि, 10 खुचाखुबाचि, लोभा लॆखुबाचि, सेइङ्खॆक्खुबाचि, याॽमि इचाखुबाचि हाङ् लुप्चाखुबाचि निवाँहाङ्मि हाङ्डाम्पि भॆन्टक्मिनि। 11 आन्ना हङ्सिबि ऎॽवाचि चाइ आक्रहान लॆटानि। टर आन्ना हिङ्वाबाङ् निवाँहाङ्ऎ सःगानिहाङ् सॆङ्सॆङॆ मुसानि। पारभु येसु खिरिस्टमि निङ्पि कानिम् निवाँहाङ्मि लावाबाङ् आन्ना आब्डिक् मॆड्डिङ्मा लिडानि। ब्याबिचारा आलॆटानॆ 12 आन्ना हङ्सिबाङ् ऎॽवाचि चाइ गर सङ्क काकानि, “काङा मान्ट लॆङा हाङ्स नु।” टर चाइबान लोमार, चोब्न खानावाँ आन्नामि लागि नुऎ लिनि। हाङ् काङा सङ्क कासिङ् हला, “काङा मान्ट पाइङा हाङ्स नु। टर काङॆ ग योम्पक् यिक्ङानि मान्ठाभनॆ काङा आक्कसॆ सॆक्मा आखॆच्चाङार।” 13 आन्ना गरहाङ् काकानि हला, “चामा बःक्मि लागि रेम हाङ् बःक् चामामि लागि।” टर चाइबान लोमार, निवाँहाङ्ऎ हिच्चिन नासॆ लॆकु। याॽमिमि सालुङ् ब्यबिचारामि लागि हॆॽनॆ, पारभुमि लागि रेम। हाङ् सालुङ्मि लागि पाबुऎ खानावाँ येसुऎ टङुकु। 14 निवाँहाङ्ऎ खोम चॆक्मावऎ पारभु सिखॆम्पाबाङ् हिङ्पॽमिट्टु। हाङ् कानि स खोम चॆक्मावऎन हिङ्पॽमिकि। 15 आन्नामि सालुङ् चाइ खिरिस्टमि एक्क सालुङ् कामानुङ् लेसाम्निनॆ? हाङ् माल् खिरिस्टमि सालुङ् काङॆ ब्यबिचारि याॽमिचिमि सालेङ् मुमाङॆ? ग हानाम्स लिनि। 16 ब्याबिचारि याॽमिचिबि खॆक्खुबाचि खोचिनुङ् एक्कन सालुङ् लिःॽमि लोमॆ खानावाँ आन्नॆ लेसाम्निनिहॆ? निवाँनेन साब्चिराऎ गरहाङ् लोकु, “हिप्पा याॽमि टङुग्चिहाङ् एक्कन सालुङ् लिःक्चि।” 17 खिरिस्ट नुङ् टङ्खुबा चाइ खोनुङ् लावाबि एक्कन लि। 18 आन्ना ब्याबिचाराबाङ् मॆॽयङ्न पेनानॆ। हाङ् होइडा हिङ्वा याॽमिम् सालुङ्बा बाहिरा लि, टर ब्याबिचारा लॆखुबॆ चाइ टाङ्पाम सालुङ् हङ्सिॽन हिङ्वा लॆकु। 19 माल आन्नामि सालुङ् सॆङ्सॆङॆ लावामि खिम् कामानुङ आन्नॆ लेसाम्निनॆ? निवाँहाङ्ऎ पिॽमिम्पा सॆङ्सॆङॆ लावान आन्ना हङ्सि पेनुक। मसॆ आन्ना खोम्न यो। 20 निवाँहाङ्ऎ खोम् पासा सङ्टिसे आन्ना इन्डानि। मसॆ आन्नामि सालुङ्ऎ निवाँहाङ्मि निङ्लावा लिमा लॆ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.