१ कोरेन्ठि 5 - लोहोरुङ्मान्डालिबि ब्याबिचारामि खानावाँ 1 आन्नामि लुम्पि एट्टान ब्यबिचारा लिमॆपाइ कामानुङ् खेम्डुङ। गरक्मा योम्पक् ग निवाँयुङ् आलॆखुबाचिम् लुम्पि सङ्क लिनि। ऎॽवा याॽमिऎ ग टाङ्पाम होइक दामामा युङ्चाडानि हेमु। 2 हाङ् मान्टहाङ्र आन्ना काङानङाये मिङ्कानिहा? आन्ना ग निवाँइइ पेनानॆ। हाङ् आक्रहा योम्पक् यिक्खुबाचि आन्नाम लुम्पाङ् लाबहाङ्साम्चिनॆ। 3 काङा आन्नाबि सालुङ्पि माइङ् हाङ्स लावाबि आन्नानुङ् चुःॽङा। हाङ् काङा आक्कुबि चुइन्टॽन आक्रक्मा योम्पक् यिक्खुबा काङॆ न्याये लॆसिडुङ्चि। 4 आन्ना पारभु येसुमि निङ्पि खोमुकानिर काङा सङ्क लावाबि आन्नानुङ् लिःॽङा। हाङ् कानिम् पारभु येसुमि चॆक्मावा कानिम् लुम्पि लि। 5 हाङ् आक्रहा याॽमि आन्नाबाङ् लाबहाक्साम्चिनॆ हाङ् हिङ्वा नुङ्मा योम्पक् चाइ लुक्खॆॽर कामानुङ् साइटानमि हुक्पि याइटाम्नॆ हाङ् पारभुमि न्याय लॆःॽमॆ डिनाबि लावा नुङ्मा याॽमिचि चाइ हिङ्चामिर। 6 आन्ना ग खानावाँबि ढ्या लॆङ्कानिहा काम्नुऎ हॆॽनॆ। माल् चःग्मिम्पा खाॽमिक्बि मिःॽम खाबॆक् डेन्मार चोब्न खाॽमिक् हम्बक्मिकु लोमॆ लेसाम्निनॆ? 7 मसॆ खाबॆक् रक्मा काइसाहा याॽमि आन्नामि लुम्पाङ् लाबहाक्साम्चिनॆ। हाङ् आन्ना खिरिस्टऎ खाबॆक् माठुमिम्पा खाॽमिक्र सॆङ्सॆङॆ लॆकानि। मान्ठाभनॆ कानिम् फाग्मॆ लोमॆ चाडामि सामुङ् चाइ कानिमि लागि सङ्टिडा। मान्ठाभनॆ कानि फाक्खुबा खिरिस्ट न कानिम् लागि सङ्टिखॆॽपिडि। 8 मसॆ काइसाहा नुङ् हिङ्वा नुङ्मा याॽलिहा खाबॆक्बाङ् मुमिम्पा चारेपा चासे फाक्मॆ चाडा आमानालॆटिये, टर खाबॆक् मान्ठुमिम्पा सॆङ्सॆङॆ नुङ् चाइबानऎ चारेपाऎ चाडा मानालॆटिये। 9 हाङ् काङॆ आन्ना साॽमिम्पा साब्चिराबि ब्याबिचारा लॆखुबाचिनुङ् ऎटङ्चाआनॆ लोमिम्पा लॆटानि। 10 ग लोमिम्पा चाइ माङ् भने, ग बाखाटेम्पिहा ब्याबिचार लॆखुबाचि, खुसुबाङ्चि, लोभा लॆखुबाचि हाङ् मुर्टि चुङ्खुबाचिमि बारेबि लोमिम्पा हॆॽनॆ। आक्खाचिनुङ् आटङ्चामार ग आन्नॆ बाखाटेम्न याइमा लॆ। 11 टर काङॆ लोमिम्पा चाइ माङ्भनॆ, काङा सङ्क निवाँयुङ् लॆखुबाङा कामानुङ् ब्याबिचारा लॆखुबाचि, लोभा लॆखुबाचि, मुर्टि चुङ्खुबाचि, सेइङ्खॆक्खुबाचि, इचाटिखुबाचि हाङ् खुचाखुबाचिमि खानावाँ इमिम्पा यो। आक्रहा याॽमिचि माङ्माङ् लॆःॽमिर मर आलॆटानॆ। 12-13 निवाँयुङ् आलॆखुबाचि न्यायॆ लॆःॽमॆ योम्पक् काम् हॆॽनॆ। खोचि चाइ निवाँहाङ्ऎन न्याये लॆकुचि। निवाँयुङ् लॆखुबाचि आन्नॆ न्याये लॆःॽमा लॆ। निवाँनेन साब्चिराऎ गरहाङ् इकु, “हिङ्वा याॽमिचि आन्नाबाङ् लाबहाङ्साम्चिनॆ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.