१ कोरेन्ठि 4 - लोहोरुङ्खिरिस्टमि सॆःक्ढुङ्पाचि 1 आन्नॆ चाइ काङ्का सॆःक्ढुङ्पाचि खिरिस्टमि योम्पक् मुखुबाचि हाङ् निवाँहाङ्मि चुम्मिम्पा खानावाँ इखुबा याॽमिचि कामानुङ् मिन्मा लॆ। 2 हाङ् योम्पक् मुखुबा याॽमि उम् टुङ्घङ्पाऎ पिॽमिम्पा योम्पक् काम्नुःर यिक्खुबा लिमा लॆ। 3 काङा आन्नॆ हाङ् होइडा न्याय लॆखुबा याॽमिचिऎ आब्डिक् टिःॽङामि हाङ्स माङ्स मिङ्ङानि हाङ् काङॆ उङ्टाङ्पॆ न्याय लॆङानि। 4 काङा काइसॆ योम्पक् यिःक्डिङॆ कॆ लेङानि, टर ग लोमिम्पा चाइ काङा आब्डिक् मॆङ्डिङ्मान लॆःॽङा काॽङॆ सङ्क हॆॽनॆ। काङा ठाःग्खुबा चाइ पारभुन। 5 चाइबानऎ न्याय चाइ पारभु टाहाङ्न लि। पारभुऎन खाङ्मुनिहा चोब्न खानावाँ खाङ्मिकि हाङ् याॽमिमि निवाँबिहा खानावाँ वाप्मिकि। आक्रल चोब्न याॽमिचिऎ टक्चामॆ निङ्लावा निवाँहाङ्बाङ् टक्चाकुचि। मसॆ आन्नॆ आसास आक्क लः टामाबाङ् याॽलन आब्डिक आटिसाम्चिनॆ। 6 बुबुनानुसाचि, आन्नामि लागिन काङॆ अपोलोस नुङ् काङामि खानावाँ इसे आन्ना वाब्मिडानि। मसॆ निवाँनेन् साब्चिराबि रक्न माङ्टहाङ् हिङ्चामा लॆऎ लोमॆ वाबाम्नॆ। हाङ् काङ्का आन्नॆ एक्क नुःर लोसॆ होइक काइर मुमा काम्नुऎ हॆॽनॆ। 7 आसॆ चाइ आन्ना होइढाचिबाङ् ढ्या मुसानिहा? माल् आन्नाबि चुहा खानावाँ निवाँहाङ्ऎ पिॽमिन्पा हॆॽनॆ? निवाँहाङ्ऎ पिॽमिम्पा हाङ्ग मान्ठा आन्ना आसॆस मापिॽमिम्पार ढ्या लॆङुकानिहा? 8 आन्ना पाबुहा चोब्न खानावाँ टक्चाडाम्निहॆ? माल् आन्ना चासुम्टाङ्पा लिडानिहॆ? माल् काङ्का माइङ्का हाङ्स आन्ना निवाँहाङ्मि हाङ्डाम्पि ढुप्पाट्ट फॆक्खुबा पिक्खारानिहा? आन्ना चाइबान ढुप्पाट्ट फॆक्खुबा लिकानिग काम्नुऎन, मान्ठाभनॆ काङ्कॆ सङ्क आन्नानुङ् ढुप्पाट्ट फॆक्खुबा याॽमिचि लिखुबा लॆटिङ्का। 9 मान्ठाभनॆ काङा चाइ गर मिनुॽङा, निवाँहाङ्ऎ बाखाटेम्पि काङ्का सॆःक्ढुङ्पाचि चोब्बाङ् खुक्माबि युङ्डिङ्का। निवाँहाङ्ऎन काङ्का बाखाटेम्, निवाँखाटॆखुबाचि हाङ् याॽमिचिम् लुम्पि ङेसिमा लुर मुसिङ्का। 10 हाङ् काङ्का खिरिस्टमि निवाँ मॆड्डिङ्मा लिडिङ्का हाङ् आन्ना चाइ खिरिस्टबि लिसे निवाँटाङ्पा याॽमि लिडानि। काङ्का चॆक्मावा मॆड्डिङ्मा लिडिङ्का हाङ् आन्ना चॆक्मावा नुङ्मा लिडानि। काङ्का सिच्चामा खॆयाङ्डिङ्का टर आन्ना चाइ याॽमिचिऎ ङेबुकानि। 11 हस काङ्का चामा मान्चाटक्रे साक्मॆन्चा लुटिकिङ्का। हाङ् नाग्खॆॽमिम्पा चे चाङुकिङ्का हाङ् रःग्मा टुम्चाकिङ्का हाङ् खिम्स माइङ्का। 12 काङ्का टाङ्पाम हुगॆॽन योम्पक् मुचाकिङ्का। याॽमिचिऎ चाब्हिमा पिमिर आसिका पिकुङ्का हाङ् डुखा पिमिर आङ्कुङ्का। 13 काङ्का याॽमिचिऎ इचामार खोचिनुङ् काम्नुःरन यामुकिङ्का। काङ्का बाखाटेम्बिहा याॽमिचिम् लागि बाखाटेम्पिऎ माइलन नुङ् याॽवासिवाँन लिडिङ्का। 14 आन्ना ङेसिमाबि सिॽमिॽमाम् लागि हॆॽनॆ, टर आन्ना काङाम्न पिसाचिर मिन्मानुङ् लोमाम् लागि ग खानावाँ काङॆ साप्हाङ्मॆ पाइकानि। 15 मान्ठाभनॆ खिरिस्टबि आन्नामि चिन्खुबाचि ऎॽवाहा चुःक्मि हाङ्स, आपा ग टक्म माआमि। हाङ् आन्ना नुऎ खानावाँ खेम्मिसे खिरिस्ट येसुबि काङा आन्नामि आपा लिडिङ। 16 मसॆ आन्नॆ काङाबाङ् चिनानॆ कामानुङ् नुःर लोकानि। 17 मसॆ आन्नाबि खिरिस्टबि नेन्चामालुऎ काङामि निवाँऎ मिडुवॆ काम पासा रक्मान याॽमि टिमोठि पाङ्हाङ्मॆ सिकुङ। ह खोसॆ आन्ना काङॆ चोब्न ठाल हाङ् खिरिस्टमि मान्डालिबि काङॆ चिन्मिम्पा रक्न मान्टहाङ् हिङ्चाइङॆ हाङ् पाइटिङॆ लोमॆ इकानि। 18 आन्ना हङ्सिबि ऎॽवा चाइ काङा ह आन्नाबि टाङानि मिन्से ढ्या लॆङ्कानि। 19 टर पारभुऎ पाङ्हाङ्सिङ् हाङ्ग काङा सॆॽलॽन आन्नाबि टाःॽङा। हाङ् आक्खा ढ्या लॆङ्खुबाचिम् चॆक्मावा माङ्रटा कामानुङ् खाङ्कुङ। 20 मान्ठाभनॆ निवाँहाङ्मि हाङ्डाम् खानावाँबि हॆॽनॆ, टर चॆक्मावाबि लि। 21 आन्ना माङ् मिनुकानिहा? काङा टम्राङ् खिन्मानुङ् टामाङॆ रु नुऎ लावाबि नाम्नाम् पिसिसे टामाङॆ? |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.