१ कोरेन्ठि 2 - लोहोरुङ्कुरुसाबि सङ्टिखॆॽमिम्पा खिरिस्ट 1 बुबुनानुसाचि, काङा आन्नाबि निवाँहाङ्मि चुम्मिम्पा खानावाँ इसि टाइङ्र डिढ्ढा डिड्ढा खानावाँ हाङ् निवाँटाङ्पाङाये मिन्से मॆखाङ्मिटानि। 2 मान्ठाभनॆ काङा आन्नानुङ् चुइङ्र काङॆ येसु खिरिस्ट हाङ् खो कुरुसाबि कॆङ्मिम्पा खानावाँबाङ् होइडा खानावाँ ऎइमान काम्निटुङ। 3 काङा आन्नाबि टामार यिक्माहा योम्पक् यिक्हिङानि मिन्से एट्टान किसिमाऎ यङ्से डाबिङ। 4 काङा आन्नानुङ् यामुमार यामुरिक्खुबार हाङ् निवाँटाङ्पाऎर डिड्ढा डिड्ढा खानावाँ मान्इङा, टर सॆङ्सॆङॆ लावाऎ माङ् लोसिङ् मरक्न पाइटिङ। 5 मसॆ आन्नामि निवाँयुङ् याॽमिमि निवाँबि हॆॽनॆ टर निवाँहाङ्मि चॆक्मावाबि लिमा लॆ। 6 मरहाङ्स काङ्कॆ काम्नुःर निवाँयुङ् लॆखुबाचिनुङ् ग निवाँटाङ्पा खानावाँ इकुङ्का। आक्क निवाँटाङ्पा खानावाँ चाइ ग बाखाटेम्पिऎ खानावाँ हॆॽनॆ हाङ् गरक्लहा हाङ्चिम् खानावाँ सङ्क हॆॽनॆ। हाङ्चि ग लुक्खॆःॽमि। 7 टर काङ्कॆ चाइ निवाँहाङ्मि चुम्मिम्पा निवाँमि खानावाँ इकुङ्का। ग खानावाँ चाइ याॽमिचिबाङ् चुम्मिम्पा लॆटा। कानिम् निङ्लावामि लागिन निवाँहाङ्ऎ ग खानावाँ याॽलन सॆःगु। 8 गरक्लहा हाङ्चिबि आसॆस ग खानावाँ मान्वाबुचि। म खानावाँ वाबुचिग, खोचिऎ निङ् ठेॽमालॆऎ पारभु कुरुसाबि आकॆङ्खुबा लॆटुचि। 9 हाङ् निवाँनेन् साब्चिराबि गरहाङ् साब्डा, “याॽमिऎ हानाम्स माखाङ्मिम्पा, माखेम्मिम्पा हाङ् हानाम्स निवाँबि मामिॽलामिम्पा खानावाँन निवाँहाङ्ऎ खो नाम्नाम् पिस्सिखुबाचि पिकुचिमि।” 10 टर निवाँहाङ्ऎ खोमि टाङ्पामि लावाबाङ्न कानि आक्खा खोम् खानावाँ वाप्मिडि। सॆङ्सॆङॆ लावाऎ चोब्न खानावाँ यगुकु हाङ् निवाँहाङ्मि हङ्सिहा हङ्सिहा खानावाँ स यगुकु। 11 हाङ् याॽमि हङ्सि चुऎ लावाबिऎ खानावाँ खोसॆबाङ् होइक आसॆस वाप्हिसुचिनि? आक्रहाङ्न निवाँहाङ्मि लावाऎ टेःॽन निवाँहाङ्मि चोब्न खानावाँ वाप्हिकु। 12 हाङ् कानिऎ बाखाटेम्बिऎ लावा हॆॽनॆ, टर निवाँहाङ्ऎ पिॽमिम्पा निवाँहाङ्ऎ मुबिॽमिम्पा आक्खा खानावाँ वाप्हिसिर कामानुङ् निवाँहाङ्ऎ कानि सॆङ्सॆङॆ लावा पिडि। 13 मसॆ काङ्का याॽमिऎ टक्चामिम्पा निवाँबाङ् यामुसिङ्कानि, टर सॆङ्सॆङॆ लावाऎ चिन्मिम्पा खानावाँ यामुकिङ्का। हाङ् लावा चुखुबाचिन लावामि खानावाँ चिनुकुङ्चिगा। 14 हाङ् निवाँहाङ्मि लावा माऎ याॽमिऎ लावामि बारडाना लासुनि मान्ठाभनॆ ग खानावाँ खोम् लागि हुन्नऎ लि। आक्खा खानावाँ चाइ लावाबाङ् वाप्खुबाचिऎ टेःॽन वाबुकुचि। 15 हाङ् निवाँहाङ्मि लावा चुखुबा याॽमिऎ चाइ आक्खा चोब्न खानावाँ वाप्मा हेकु, टर खो चाइ आसॆस वाप्हिसुचिनि। 16 मान्ठाभनॆ निवाँनेन साब्चिराऎ गरहाङ् लोकु, “पारभुमि निवाँ आसॆ लेकुवॆ हाङ् आसॆ खो चिन्मा हेकुवॆ?” टर कानिऎ चाइ ग ले मान्ठाभनॆ कानिऎ चाइ खिरिस्टमि निवाँ टक्चाडि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.