१ कोरेन्ठि 16 - लोहोरुङ्निवाँहाङ्मि याॽमिचिम् लागि याङ् खोम्मॆ 1 यारुसामबिऎ निवाँनेन् याॽमिचि पाइबाक्माम् लागि आन्नॆ खोम्मा लॆऎ याङ्मि बारेबि कॆ आन्ना माङ् लोकानि भनॆ, कॆ गालाटियाबिहा मान्डालि माङ् लोसुङ्चि, म रक्न लॆटानॆ। 2 हाप्टामि याॽलऎ डिना आन्नॆ डुप्मिम्पा चासुम्बाङ् मिःॽमि मिःॽमि फाक्बकाम्नॆ हाङ् खोम्याकाम्नॆ। आक्र लॆटानि हाङ्ग काङा आन्नाबि टाःॽङार याङ् खोम्ढाङ्मा पाब्नि। 3 हाङ् काङा आन्नाबि टाःॽङाहाङ् आन्नॆ सॆःग्मिम्पा याॽमिचिन साब्चिरा साप्पिहाङ्कुङ्चि हाङ् आक्क याङ् यरुसालेमबि लाखॆटाम्नॆ लोकुङ्चि। 4 हाङ् काङान खॆॽमा सिट्टिङ् हाङ्स खोचि सङ्क चिखॆकुङ्चि। पावललॆ लङ्पॽमॆ निवाँ मुमिम्पा 5 काङा माकॆडोनिया खॆःॽङा हाङ् आन्नाबि टाःॽङा। ह चाइ काङा माकॆडोनिया लिसे खॆॽमॆ पाइॽङा। 6 काङा आन्नाबि हिच्चि सुम्चि डिना पेनुॽङा हला, आठावा चुङ्लावा भोरि सङ्क पेन्हिङा। आक्क डॆङ्पि काङा हाबि लङ्खॆङा हाङ्स आन्नॆ काङा लाम्फुबि पाबुहा खानावाँ टङ्पिहिःॽङानि। 7 मान्ठाभनॆ काङा आक्कुबि टामार आन्ना एच्छक्मि लागि चुॽमॆ हॆॽनॆ, टर पारभुऎ टङ्पिटिङ् हाङ्ग डिरिक् डिना आन्नानुङ् पेन्मा मिन्डिङ। 8 टर पेन्टिकोसमि चाडाढारि काङा एफिसि हाटाबिॽन लिःॽङा। 9 मान्ठाभनॆ काङॆ गुबि पारभुमि लागि ढ्या योम्पक् मुटक्डिङ। मरहाङ्स काङा सिच्चोखुबाचि गुबि डिरिक् चुःक्मि। 10 आन्नाबि टिमोठि टामार खो आन्नॆ नुःर लॆटाम्नॆ, मान्ठाभनॆ खो सङ्क काङा रक्न पारभुमि योम्पक् मुखुबा याॽमि रेम। 11 आन्नॆ आसॆस खो काइर आलॆटाम्नॆ। खो काङाबि टामार खो पाबुहा ठका पिॽहाङ्साम्नि। मान्ठाभनॆ गुबि काङॆ खो हाङ् खोनुङ् टाखुबा बुबुनुसाचिम् लाम् खाङ्मे पाइकुङ। 12 हाङ् काङॆ नुसा ओपोल्लोस होइढा बुबुनानुसाचि चिःक्मानुङ् आन्ना चुब्सि खारॆ कामानुङ् नुःर लोसुङ। टर ह चाइ आन्नाबि टामा मामिन्, डॆङ्पि लः टङ्मा अक्सि खो आन्नाबि डाबुक। पावलमि डॆङ्पिऎ खानावाँ 13 नुःर पेनानॆ हाङ् निवाँयुङ्पि नुःर येबानॆ। आकिसिखुबा हाङ् चॆकुवॆ लिःसानॆ। 14 हाङ् चोब्न योम्पक नाम्नाम् पिस्सिॽमानुङ् मुसानॆ। 15 आन्नॆ इस्टिफानास नुङ् खोम् खिम्पिहा याॽमिचि लेकाम्निन। खोचि आखाइयाबिहा याॽमिचिबि चोब्नबाङ् याॽल निवाँयुङ् लॆखुबाचि यो। खोचिऎ निवाँनेन् याॽमिचि पाइबाक्माम् लागि उम्चि हिङ्खामान पिडुचि। 16 बुबुनानुसाचि, गरहा याॽमिचि हाङ् गरहाङ्न पाइबाक्खुबा लाङ्काम्चिऎ लोमिम्पा खेमाम्नॆ। 17 इस्टिफानस, फोटुनाटस हाङ् आखाइकास कोरेन्ठिबाङ् काङाबि टाआमिर एट्टान चेन्चाइङ्, मान्ठाभनॆ आन्ना काङानुङ् माचुआनिर खोचिऎ काङॆ पाङ्नुमिट्टिङ्मि। 18 खोचिऎ आन्ना रॽन काङा सङ्क चेन्चामिडिङ्मि। आन्नॆ गरॽहा याॽमिचि नुःर लॆःॽमा लॆःॽमि। 19 एसियाबिहा मान्डालिऎ आन्ना स्यामुहाङ्डानि। हाङ् आकिलास नुङ् पिरिस्किला हाङ् खोचिम् खिम्पि खोमुॽमिहा मान्डालिऎ स पारभुमि निङ्पि आन्ना स्यामुहाङ्डानि। 20 हाङ् चोब्न बुबुनानुसाचिऎ स आन्ना स्यामुहाङ्डानि। हाङ् आन्ना स एक्कसॆ होइक नाम्नाम् पिस्सिॽमानुङ् स्यामिपॆ चुआनॆ। 21 ग स्यामुमिम्पा खानावाँ चाइ काङा पावलऎन साप्मे पाइकुङ। 22 आसॆ चाइ पारभु नाम्नाम् पिस्सिटुनि, खो चाब्हिमा नुङ्मा याॽमि लिक। ओ पारभु टाऎ म। 23 पारभु येसुमि नाम्नाँवा आन्नाबि लिर। 24 हाङ् खिरिस्ट येसुमि निङ्पि कॆ आन्ना चोब्न नाम्नाम् पिसिकानि। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.