१ कोरेन्ठि 14 - लोहोरुङ्निवाँहाङ्बाङ् यामुमॆ बारडाना 1 मसॆ होइढा बारडाना भान्डा सङ्क नाम्नाम् पिसिॽमॆ निवाँ टक्चामा मिनानॆ। हाङ् लावामि बारडाना टक्चामॆ ढ्या निवाँ टिसानॆ, आक्कबाङ्स निवाँहाङ्मि खानावाँ इमॆ बारडाना टक्चामा यगानॆ। 2 मान्ठाभनॆ होइढा खाप् यामुखुबा याॽमि याॽमिचि नुङ् यामुनि, टर निवाँहाङ् नुङ् यामुक्। खोसॆ यामुमिम्पा खानावाँ आसॆस वाबुचिनि। खोसॆ सॆङ्सॆङॆ लावामि चॆक्मावाबाङ् निवाँहाङ्मि चुम्मिम्पा खानावाँ इकु। 3 टर निवाँहाङ्मि खानावाँ लोखुबा याॽमि चाइ याॽमिनुङ्न यामुसे याॽमिचि निवाँबि चॆकुवॆ मुकुचि, पाङ्नुमा हाङ् लावाबि चॆक्मावा पिकुचि। 4 हाङ् होइढा खाप यामुखुबाऎ टाङ्पा टे चॆकुवॆ मुकु, टर निवाँहाङ्मि खानावाँ लोखुबाऎ चाइ चोब्न मान्डालिन चॆकुवॆ मुकु। 5 आन्ना चोब्पसॆ होइक खाप् यामुसानॆ कामानुङ् काङा मिनुॽङा, टर आक्कबाङ् सङ्क डिरिक् चाइ आन्ना निवाँहाङ्मि खानावाँ लोखुबा लिसानॆ कामानुङ् मिनुॽङा। होइकन खाप्पि यामुमाबाङ निवाँहाङ्मि खानावाँ लोखुबा लिमा चाइ ढ्या रेम, मान्ठाभनॆ होइक खाप्पि यामुमिम्पा खानावाँऎ माङ् लोकुवॆ लोमॆ इबिखुबा चुहाङ् टेःॽन गसॆ मान्डालि आसिका पिकु। 6 मसॆ बुबुनानुसाचि, काङा आन्नामि लुम्पि होइक खाप्बि यामुसे टाइङ् टर आक्कसॆ लोमा यकुवॆ खानावाँ लोसानिनि, निवाँहाङ्ऎ लोसॆचॆ कामानुङ् खाङ्मिॽमिम्पा खानावाँ इटानिनि। हाङ् आन्नॆ खोम् बारेबि वाव्मान लॆऎ खानावाँ इटानिनि हाङ्ग आक्कसॆ योम्पक् यिगुकुवॆटा? 7 सक्मा मॆड्डिङ्मा बाँसुरि हाङ् बिना डुब्मार आक्कमि साम्ला होइक होइकन मालि हाङ्ग मान्टक्र साम्ला लेटक्मॆ? 8 पॆँपॆँलिमामि साम्ला नुःर माखेम्टा हाङ्ग आसा चाइ खिमाटुमामि लागि परक्ऎ? 9 गरहाङ्न आन्नॆ यामुमिम्पा खाप् मान्वाबा हाङ्ग आनॆ माङ् लोमिम्पा मान्टक्ल लेःमॆ? गसॆ माङ्स योम्पक् यिगुनि। 10 बाखाटेम्पि चुहा चोब्न खाप्ऎ लोमा यकुवॆ खानावाँ माङ्र टाः लोमॆ लिः। 11 टर एक्कसॆ यामुमिम्पा खाप् काङॆ मान्वाब्ङा हाङ्ग यामुखुबामि लागि काङा होइकन हाङ्टेम्बिऎ याॽमिर लिःॽङा हाङ् आक्क यामुखुबा स काङामि लागि होइकन हाङ्टेम्बिऎ याॽमिर लिः। 12 मसॆ कॆ आन्ना लोकानि आन्नॆ स सॆङ्सॆङॆ लावामि बारडाना टक्चामॆ ढ्या निवाँ मुःॽडाम्नि। आक्क बारडाना चाइ मान्डालिबि एट्टान योम्पक् पिॽल कामानुङ् याङाम्नॆ। 13 मसॆ होइक खाप्पि यामुखुबाऎ काङा माङ् यामुङॆ कामानुङ् वाब्मॆ निवाँ सङ्क टक्चाङार कामानुङ् पारठाना लॆःॽल। 14 मान्ठाभनॆ काङा होइक खाप्पि पारठाना लॆःॽङा हाङ्ग काङाम् लावाऎ पारठाना लॆकु, टर काङाम् निवाँ चाइ आक्कुबि लिनि। 15 मसॆ कानिऎ माङ् लॆःॽमा लॆऎ लोमॆ इकानि। काङॆ लावाबि पारठाना लॆःॽङा हाङ् निवाँबि स पारठाना लॆःॽङा हाङ् लावाबि साम् इकुङ् हाङ् निवाँबि सङ्क इकुङ् हाङ् आक्कसॆ लोमा यकुवॆ खानावाँ स वाबुकुङ। 16 मान्ठाभनॆ आन्नॆ लावाबाङ् ओहाक् पिकाम्चिनि टर म खानावाँ होइडा याॽमिचिऎ वाबुचिनि हाङ् आक्रल ऎवाप्खुबा होइडाचिऎ मान्टॽल “आमॆन” लोमॆ? 17 आनॆ ओहाक् पिॽमिम्पा खानावाँ एट्टान काम्नुऎ लॆ हाङ्स, आक्कसॆ होइढा याॽमिचिम् लुम्पि माङ्स नुऎ योम्पक् यिगुनि। 18 काङॆ निवाँहाङ् ओहाक पिकुङ्, काङा आन्नाबाङ्स डिरिक् होइक खाप्पि यामुॽङा। 19 टर मान्डालिबि आसॆस ऎवाप्खुबा होइक खाप्बाङ् डिरिक् खानावाँ यामुमाभाङ्स ग याॽमिचिऎ वाप्खुबा खाप्पि मिःक्म टे खानावाँ यामुमा काम्निकुङ। 20 बुबुनानुसाचि, निवाँ टक्चामॆ खानावाँबि पिसाचिर आलिसानॆ। काइसॆ खानावाँबि चाइ पिसाचिर लिसानॆ, टर आक्खा खानावाँ वाप्मॆ योम्पक्बि चाइ टुम्मि याॽमिर लिसानॆ। 21 निवाँनेन साब्चिराबि गरहाङ् साब्डा, “पारभु गरहाङ् का, काङा काम् याॽमिचि नुङ् हॆॽनिबारॆक्चिम् खाप्बाङ् हाङ् होइकन हाङ्टेम्बिऎ याॽमिचिम् खाप्बाङ् यामुःॽङा, हाङ्स खोचिऎ काम् खानावाँ खेमुचिनि” 22 मसॆ होइक खाप्पि यामुमिम्पा चाइ निवाँयुङ् लॆखुबाचिमि लागि हॆॽनॆ, टर निवाँयुङ् आलॆखुबा याॽमिचिम् लागि चिन्ना यो। टर निवाँहाङ्मि खानावाँ इमॆ खानावाँ चाइ निवाँयुङ् आलॆखुबाचिम् लागि हॆॽनॆ, टर निवाँयुङ् लॆखुबाचिम् लागि यो। 23 मसॆ मान्डालिबि खोम्मार चोब्पासॆ ऎवाप्मॆ खाप्पि यामुसामि हाङ्ग, हाङ् आक्रल निवाँयुङ् आलॆखुबा आठावा म खाप् ऎवाप्खुबा याॽमिचि आक्कुबि टाआमि हाङ्ग, माल् आन्ना खोचिऎ ङाङ्पखॆॽमिम्पा याॽमि लोसानिनिहॆ? 24 टर चोब्पसॆ निवाँहाङ्मि खानावाँ इमार आक्कुबि निवाँयुङ् आलॆखुबा आठावा होइढा याॽमिचि चुःक्मि हाङ्ग, खोचिऎ म यामुमिम्पा खानावाँ खाङुकुचि हाङ् खोचिमि हिङ्वा वाप्टकुचि हाङ् टाङ्पा टाङ्पान ठागुकुचि। 25 हाङ् खोचिमि निवाँ हङ्सिऎ खानावाँ आम्प हाङ् खोचिऎ “आन्नामि लुम्पि निवाँहाङ् चुः” कामानुङ् खो चुङुकुचि। निवाँहाङ् नुःर चुङ्मॆ खानावाँ 26 बुबुनानुसाचि, कॆ लोमा यकुङॆ खानावाँ चाइ माङ्भनॆ, आन्ना एक्क ठालबि खोम्मार एक्कसे साम् इकु, होइकसॆ चिनुकु, होइकसॆ निवाँहाङ्ऎ खो खाङ्मिॽमिम्पा खानावाँ इकु, होइकसॆ चाइ होइकन खाप्पि यामुक् हाङ् होइकसॆ चाइ आक्कसॆ लोमिम्पा खानावाँऎ लोमा यकुवॆ खानावाँ माङ्रटा कामानुङ् इकु। इघा चोब्न योम्पक्ऎ आन्नामि लुम्पि एक्कसॆ होइक लावा चॆकुवॆ मुमामि लागि लॆटानॆ। 27 हाङ् हिप्पा सुम्पाऎ टेःॽन एक्कसॆ होइक हुङ्से होइक खाप्पि यामुसानॆ हाङ् एक्कसॆ आक्खा यामुमिम्पा खानावाँऎ माङ् लोकुवॆ कामानुङ् चोप्पासॆ वाप्टॽमॆ गारि इसुर। 28 टर आक्क खानावाँऎ लोमा यकुवॆ खानावाँ चाइ माङ्रटा लोमॆ इहिखुबा याॽमि माआ हाङ्ग, मान्डालिबि होइक खाप् यामुखुबा याॽमि यङ् उःक्ल हाङ् उम्टाङ्पा निवाँहाङ् नुङ् यामुचार। 29 हाङ् निवाँहाङ्मि खानावाँ लोखुबाचि सङ्क हिप्पा सुम्पा टेः यामुमिर हाङ् होइडाचिऎ चाइ आक्क लोमिम्पा खानावाँ चाइबन रु हुन्न कामानुङ् ठाःगुचिर। 30 हाङ् एक्क याॽमिऎ निवाँहाङ्मि खानावाँ लोमॆ पाइकुर होइक याॽमिऎ निवाँहाङ्ऎ सेन्चि पिॽमानुङ् यामुमिट्टु हाङ्ग याॽलऎ याॽमि चाइ यङ् उःग्ल। 31 आन्ना चोप्पसॆ एक्कसॆ होइक हुङ्से निवाँहाङ्मि खानावाँ लोहिकाम्नि हाङ् खेम्खुबाचिऎ सङ्क म खानावाँबाङ् चिन्टकुचि हाङ् पाङ्नुबक्मि। 32 निवाँहाङ्मि खानावाँ लोखुबामि बारडाना आक्क बारडाना टक्चाखुबा याॽमिम् हुक्पिन लि। 33 मान्ठाभनॆ निवाँहाङ्ऎ चाइ हाम्पि ग हाम्पि लॆटिॽमिम्पा नेन्चाउनि, टर चोब्न टङ्मानुङ् यिक्मिम्पा योम्पक् नेन्चाकु। हाङ् होइढा ठालबिहा मान्डालिबि निवाँयुङ् लॆखुबाचि रक्न आन्नॆ सङ्क गरहाङ् लॆःॽमा लॆ। 34 मान्डालिबि मेॽनुङ्माचि यङ् उःग्मिर। खोचिऎ आक्कुबि यामुचामा फॆन्नि। यायेॽमाऎ लोसिन्टक्न खोचि उम्चि खिम्टाङ्पामि ढुप्पाट्टबि पेन्मिर। 35 खोचिऎ खानावाँ सिम्मा मिनुॽमि हाङ्ग, उम्चि खिम्टाङ्पानुङ् खिम्पि सिमुचिर। मान्ठाभनॆ मान्डालिबि खोम्मार मॆॽनुङ्मा यामुचामॆ लोमॆ चाइ ङेसिमा लुऎ खानावाँ यो। 36 माल्, निवाँहाङ्मि खानावाँ आन्ना कोरेन्ठिबिहा याॽमिचिबाङ् आम्पक्डॆ हॆ? माल् आन्नाबि टे ग खानावाँ टाडॆहॆ? 37 आसॆ टाङ्पा निवाँहाङ्मि खानावाँ लोखुबाङा अठावा काङानुङ् लावामि बारडाना चु मिनुकु, खोसॆ काङॆ साप्मिम्पा ग खानावाँ पारभुऎन लोमिम्पा कामानुङ् लेसुर। 38 टर खोसॆ ग खानावाँ माङ्स मिट्टुनि हाङ्ग आन्नॆ सङ्क खोम् खानावाँ खेम्मा फॆन्नि। 39 मसॆ बुबुनानुसाचि, निवाँहाङ्मि खानावाँ लोमाबि एट्टान निवाँ टिसानॆ, टर होइक खाप्पि यामुखुबाचि सङ्क आसॆगाम्चिनॆ। 40 टर चोब्न खानावाँ काम्नुःर टङ्ल। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.