१ कोरेन्ठि 11 - लोहोरुङ्1 काङा खिरिस्टर पाइङा हाङ् आन्ना चाइ काङार पाइखुबा लिसानॆ। मान्डालिबि निङ्टवाँ डॆक्मॆ खानावाँ 2 काङॆ आन्नामि निङ् ठेरुकुङ् मान्ठाभनॆ आन्नॆ काङा चोब्न खानावाँबि मिॽलाङानि हाङ् काङॆ चिन्मिम्पा रक्न आन्ना पाइकानि। 3 टर आन्नॆ ग खानावाँ वाबाम्नॆ कामानुङ् मिङ्ङा, चोब्न वाठाङ्पाचिमि निङ्टँवाँ चाइ खिरिस्ट रेम। हाङ् मेॽनुङ्मामि निङ्टँवाँ चाइ उम् खिम्टाङ्पा रेम हाङ् खिरिस्टमि निङ्टँवाँ चाइ निवाँहाङ् यो। 4 मसॆ हाम्पॆ वाठाङ्पाऎ चाइ पारठाना लॆमार आठावा निवाँहाङ्मि खानावाँ लोमार निङ्टँवाँ डॆगुकु, खोसॆ उम् निङ्टँवाँ खिरिस्टमि नाबुक् वेनुकु। 5 हाङ् हाम्पॆ मेॽनुङ्माऎ चाइ पारठाना लॆमार आठावा निवाँहाङ्मि खानावाँ लोमार निङ्टँवाँ डॆगुनि, खोसॆ उम् निङ्टँवाँ खिम्टाङ्पामि नाबुक् वेनुकु, मान्ठभनॆ गग आक्क मेॽनुङ्माऎ टाङाक् खोमिम्पा रक्मान। 6 मसॆ मेॽनुङ्मॆ उम् निङ्टँवाँ डॆगुनि हाङ्ग, बोरु खोसॆ टाङाक् खोसुर। टर आक्क मेॽनुङ्मामि लागि टाङाक् खोमॆ चाइ ङेसिमा लुऎ लि हाङ्ग खोसॆ उम् निङ्टँवाँ डॆगुर। 7 टर वाठाङ्पाऎ चाइ पारठाना लॆःॽमार आठावा निवाँहाङ् चुङ्मार उम् निङ्टँवाँ डॆक्मा पाब्नि, मान्ठाभनॆ खो निवाँहाङ् रऎ रेम हाङ् खो निवाँहाङ्मि निङ्लावा यो। टर मेॽनुङ्मा वाठाङ्पामि निङ्लावा रेम। 8 मान्ठाभनॆ वाठाङ्पा मॆॽनुङ्माबाङ् मुबॽमिम्पा हॆॽनॆ, टर मॆॽनुङ्मा चाइ वाठाङ्पाबाङ् मुबॽमिम्पा यो। 9 हाङ् वाठाङ्पा मॆॽनुङ्मामि लागि मुमिम्पा हॆॽनॆ, टर मॆॽनुङ्मा चाइ वाठाङ्पामि लागि मुमिम्पा यो। 10 मसॆ निवाँखाटॆखुबाचिमि ङारिङ्पि मेॽनुङ्मॆ टाङ्पामि खिम्टाङ्पामि ढुप्पाट्टबि चुङा कामानुङ् खाङ्ङुमा लागि स निङ्टँवाँ डॆग्मा लॆ। 11 मरहाङ्स पारभुमि ङारिङ्पि मेॽनुङ्मा वाठाङ्पाबाङ् मॆअङ् लिनि हाङ् वाठाङ्पा सङ्क मेॽनुङ्माबाङ् मेअङ् लिनि। 12 मान्ठाभनॆ वाठाङ्पाबाङ् मॆॽनुङ्मा मुमिम्पा रेम, हाङ् मॆॽनुङ्माबाङ्न वाठाङ्पा जान्म लि हाङ् चोब्न ठका निवाँहाङ् बाङ्न टा। 13 आन्नॆॽन मिॽलाआम्नॆ, माल् मेॽनुङ्मॆ निङ्टँवाँ मान्डॆग्ले निवाँहाङ् पारठाना लॆमा खॆन्चाकुहॆ? 14 माल् वाठाङ्पाऎ टक्भॆऎ टाङाक् हिङ्मॆ खानावाँ चाइ ङेसिमा लुऎ लोमॆ खानावाँ निवाँबि मरक्न उम्टाङ्पा टानिहॆ? 15 टर मेॽनुङ्मामि टक्भॆऎ टाङाक् लॆपिकु हाङ्ग, आक्क खो काम्नुऎ खॆन्चाठक् लि। मान्ठाभनॆ आक्क खो डॆक्माम् लागि पिॽमिम्पा रेम। 16 टर आसॆ चाइ ग खानावाँबि काङानुङ् खिमा मिनुक, काङ्का सॆःक्ढुङ्पाचिऎ आक्खा योम्पक् मुमा पिट्टानिनि हाङ् होइढा चोब्न मान्डालिबि स मेॽनुङ्माचिऎ निङ्टवाँ डॆगुकुचि। पारभु भोजा ( मट्टि २६:२६-२९ ; मारकुस १४:२२-२५ ; लुका २२:१४-२० ) 17 ह काङॆ आन्ना लोमा ठाबाक्डानिहा खानावाँबि नाङानिनि। मान्ठाभनॆ आन्ना खोम्टिखॆॽमार नुऎ योम्पक् हॆॽनॆ, टर काइसॆ योम्पक् यिगुकानि। 18 एक्क खानावाँ, आन्ना मान्डालिबि खोम्मार आन्नामि लुम्पि याटॽमाटक् लि हॆम कामानुङ् खेमुकुङ्, हाङ् आक्क खानावाँ चाइबान मिकुङ। 19 माल् आन्नामि लुम्पिहा याटक्माटकबाङ् होइढा याॽमिचिऎ आन्ना हङ्सि आसा चाइबानऎ निवाँहाङ्मि याॽमिचि कामानुङ् लेकुचि मिनुकानिहॆ? 20 आन्ना एक्क ठालबि खोमुकानिर पारभु भोजा चाकानि चाइबान लोमार आक्क पारभु भोजा हॆॽनॆ। 21 मान्ठाभनॆ आन्नॆ मान्हाचारे टाटाङ्पाऎ लाटॆॽमिम्पा चामा ठका चाकानि, आचुखुबाचि चाइ साग्मेन्चा लिकानि हाङ् चुखुबा चाइ सेइङ्खॆकानि। 22 माल् चामा हाङ् डुङ्मामि लागि आम्नि खिम् माऎ? माल आन्नॆ निवाँहाङ्मि मान्डालि माङ्स हॆॽनॆ मिकाम्निहॆ हाङ् आचुखुबाचि ङेसिमा लुलु मुमा मिकाम्चिनॆ? खोइ गमि बारेबि कॆ आन्ना माङ् लोमानिहा? माल् नुऎ योम्पक् मुसाम्नि लोमानिहा? कॆ आन्नॆ नुऎ योम्पक् यिगाम्नि लोसानिनि। उहुँ, काङा आक्र काहिङानि। 23 मान्ठाभनॆ पारभुऎ काङा माङ् लोडिङ्, मन कॆ आन्ना सङ्क पिट्टानि, हानाम्ऎ युटा चाइ पारभु येसु लाबुचि, म युटा खोसॆ चारेपा याङु। 24 हाङ् निवाँहाङ् ओहाक् पिट्टु हाङ् चारेपा योबु हाङ् कासा, “ग चाइ आन्नाम लागि पिॽमिम्पा काङाम् सालुङ् यो। ग आन्नॆ काङा मिॽलाॽमाम् लागि लॆटानॆ।” 25 आक्रहाङ्न चारेपा चाउहाङ खरॆ याङ्से गर लोसुचि, “ग खरॆ काङाम् हारिमि उम्चङ् चुप्लाङ् यो। हानाम् आन्नॆ ग डुङुकाम्नि, काङा मिॽलामाम् लागि ग लॆटानॆ।” 26 मसॆ हानाम् चाइ आन्नॆ ग चारेपा चाकानि हाङ् ग खरॆबाङ् डुङुकाम्नि, खो होइखेपा सङ्क माऎन्टारढारि आन्नॆ पारभु चाइ कामि लागि सिखॆॽमिम्पा लोमॆ याॽमिचिम् लुम्पि फुबकाम्नि। 27 मसॆ आसा चाइ खिरिस्ट माङेप्ले पारभुमि चारेपा चाक् हाङ् खोम् खरॆबाङ् डुङुक, आक्क याॽमिऎ पारभुमि सालुङ् नुङ् हारिमि लागि हिङ्वा योम्पक् यिगुकु। 28 मसॆ याॽलन टाङ्पॆ टाङ्पान ठागुचिर हाङ्टेःॽन आक्खाचिऎ चारेपा चाउचिर हाङ् खरॆबाङ् डुङुचिर। 29 मान्ठाभनॆ हाम्पॆ याॽमिऎ चाइ खिरिस्टबि निवाँयुङ् लॆखुबाचि मान्ङेप्ले चारेपा चाक् हाङ् खरॆबाङ् डुङुक, खोसॆ टाङ्पॆ टाङ्पासक्पिॽन डान्डा टॆकु। 30 मसॆॽन आन्नामि लुम्पि ऎॽवाचि टुक्खुबा लॆकानि हाङ् ऎॽवा चाइ सिसुसिखारामि। 31 टर याॽलन कानिऎ टाङ्पॆ टाङ्पान ठागा हाङ्ग निवाँहाङ्ऎ आब्डिक टिसिनि। 32 टर बाखाटेम्पिहा याॽमिचिनुङ्न लुक्खॆॽमा आसिट्टिर कामानुङ् पारभुऎ कानि न्यायॆ लॆःॽमानुङ् डान्डा पिॽमेपाइकि। 33 मसॆ काम् बुबुनानुसाचि, अन्नॆ पारभु भोजा चामार एक्कसॆ होइक हुङ्पॆ चुआनॆ। 34 हाङ् आसा चाइ एट्टान सागॆ सिकु, खोसॆ खिम्पिॽन चाउर हाङ् पारभु भोजा चामार होइढाचि मान्हुङ्मिम्पासॆ आब्डिक् नुङ्मा लिमा आसिॽल। होइढा खानावाँ चाइ काङा आन्नाबि टाःॽङा हाङ् लोखानि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.